ប្រមុខរដ្ឋាភិបាលកម្ពុជា លោក ហ៊ុន សែន អះអាងថា ក្រុមហ៊ុនធំៗប្រចាំប្រទេសចិន បានបង្ហាញពីការចាប់អារម្មណ៍ក្នុងការបន្តវិនិយោគលើការសាងសង់ហេដ្ឋារចនាសម្ព័ន្ធគមនាគមន៍នៅប្រទេសកម្ពុជា។
មេដឹកនាំខ្មែរដែលជាមិត្តដែកថែបរបស់ចិន លោក ហ៊ុន សែន បានអះអាងកាលពីថ្ងៃទី៩ កុម្ភៈ ថា បន្ទាប់ពីជួបជាមួយក្រុមវិនិយោគប្រចាំប្រទេសចិន ក្នុងដំណើរទស្សនកិច្ចទៅសាធារណរដ្ឋប្រជាមានិតចិន នៅពេលនេះ ក្រុមហ៊ុនវិនិយោគធំៗចំនួន ៣ របស់ប្រទេសចិន រួមមានក្រុមហ៊ុនសាងសង់គមនាគមន៍ចិន ក្រុមហ៊ុនសាជីវកម្មស្ពានថ្នល់ចិន និងក្រុមហ៊ុន China Metro Group Limited កំពុងពិនិត្យលទ្ធភាពសាងសង់ហេដ្ឋារចនាសម្ព័ន្ធនានាដទៃទៀតនៅប្រទេសកម្ពុជាទៅថ្ងៃមុខ។
មេដឹកនាំខ្មែរដែលមាននិន្នាការទៅរកមិត្តចិន លោក ហ៊ុន សែន លើកឡើងថា ក្រុមហ៊ុនទាំងនោះអះអាងថា ការសាងសង់ និងដាក់ឲ្យប្រតិបត្តិការលើផ្លូវល្បឿនលឿនភ្នំពេញ-ក្រុងបាវិត ដែលត្រូវបានរៀបចំឡើងក្រោមកិច្ចសន្យាភាពជាដៃគូរវាងរដ្ឋ និងឯកជន ដើម្បីឈានទៅអនុវត្តគម្រោងសាងសង់ផ្លូវល្បឿនលឿននេះនៅពាក់កណ្តាលឆ្នាំ២០២៣ និងគ្រោងបញ្ចប់នៅឆ្នាំ២០២៧ ស្របគ្នានឹងការសាងសង់ផ្លូវល្បឿនលឿនហូជីមិញ-ម៉ុកបៃ ដែលគ្រោងនឹងបញ្ចប់ការសាងសង់នៅឆ្នាំ២០២៧ ខាងមុខនេះដែរ។
ជាងនេះទៀត ក្រុមហ៊ុនវិនិយោគចិនទាំងនោះក៏មានគម្រោងវិនិយោគលើការដឹកជញ្ជូនផ្លូវទឹកសាប ការវិនិយោគលើការចម្រាញ់ទឹកកខ្វក់នៅខេត្តព្រះសីហនុ និងការសិក្សាពីផ្លូវរថភ្លើងល្បឿនលឿនភ្នំពេញ-ប៉ោយប៉ែត និងគម្រោងនៃការវិនិយោគផ្លូវរថភ្លើង-ល្បឿនលឿនធុនស្រាលពីខេត្តសៀមរាប ទៅកាន់អាកាសយានអន្តរជាតិថ្មីនៅស្រុកជីក្រែង ក្នុងខេត្តសៀមរាប ថែមទៀត។
ប្រមុខរដ្ឋាភិបាលកម្ពុជា លោក ហ៊ុន សែន បញ្ជាក់ថា លោកក៏បានស្នើឲ្យក្រុមហ៊ុន China Metro Group Limited សិក្សាពីគម្រោងវិនិយោគផ្លូវល្បឿនលឿនធុនស្រាលពីរាជធានីភ្នំពេញទៅកាន់អាកាសយានដ្ឋានអន្តរជាតិភ្នំពេញថ្មី និងផ្លូវរថភ្លើងល្បឿនលឿនធុនស្រាលក្នុងរាជធានីភ្នំពេញផងដែរ។
លោក ហ៊ុន សែន គូសបញ្ជាក់ថា ក្រុមហ៊ុនវិនិយោគទាំងបីរបស់ប្រទេសចិន សន្យាថានឹងសិក្សាលើលទ្ធភាពវិនិយោគថ្មីៗក្នុងប្រទេសកម្ពុជាសម្រាប់ពេលខាងមុខនេះ ជាពិសេសក្រោយលទ្ធផលនៃដំណើរទស្សនកិច្ចផ្លូវការរបស់លោកទៅកាន់សាធារណរដ្ឋប្រជាមានិតចិន នៅពេលនេះ។
កាលពីថ្ងៃទី២០ ខែឧសភា ឆ្នាំ២០២១ លោកនាយករដ្ឋមន្ត្រី ហ៊ុន សែន បានឆ្លើយតបនឹងសំណួរអ្នករៀបចំកម្មវិធីក្នុងសន្និសីទអន្តរជាតិលើកទី២៦ ស្ដីពីអនាគតរបស់អាស៊ី ថា បើមិនឲ្យរដ្ឋាភិបាលកម្ពុជាទៅពឹងមហាអំណាចចិន តើឲ្យកម្ពុជាទៅពឹងបរទេសមួយណា ខណៈចិនបានផ្តល់ជំនួយជាច្រើនដល់កម្ពុជាក្នុងពេលបច្ចុប្បន្ននេះ។
ប្រមុខរដ្ឋាភិបាលកម្ពុជា លោក ហ៊ុន សែន បានបញ្ជាក់ជំហររបស់ខ្លួននៅពេលនោះទៅកាន់ប្រទេសក្នុងតំបន់អាស៊ី និងមហាអំណាចពិភពលោកដទៃទៀត ដូចអាមេរិក ជាដើម ថា បើកម្ពុជាមិនបានពឹងមហាអំណាចកុម្មុយនីស្តចិនទេ នោះកម្ពុជាក៏មិនមានការរីកចម្រើនដូចសព្វថ្ងៃនេះដែរ។ លោកអះអាងថា ដោយសារតែបានមិត្តចិន ទើបកម្ពុជាមានស្ពានឆ្លងទន្លេ មានផ្លូវខ្វាត់ខ្វែងដូចសព្វថ្ងៃនេះ។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី១០ កុម្ភៈ នេះថា ដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅចិនលើកនេះ គឺដើម្បីវាស់ស្ទង់ពីទំនាក់ទំនងរបស់មិត្តដែកថែបចិន យ៉ាងហោចណាស់ ៣លក្ខខណ្ឌជុំវិញការផ្ទេរអំណាចរបស់គាត់ទៅលោក ហ៊ុន ម៉ាណែត នៅពេលខាងមុខ ដែលជាសញ្ញាអាក្រក់សម្រាប់ប្រជាធិបតេយ្យ។
លោក គឹម សុខ លើកឡើងថា លក្ខខណ្ឌទាំងនោះមានដូចជា ទី១ គាត់ត្រូវប្រាកដថា អ្នកវិនិយោគចិននៅតែបន្តទម្លាក់ថវិកាក្នុងកម្រិតណាបន្តទៀតនៅកម្ពុជា ដើម្បីវិនិយោគ ក៏ដើម្បីឲ្យប្រាកដដែរថា រដ្ឋាភិបាលចិននៅផ្តល់កម្ចីឲ្យរដ្ឋាភិបាលរបស់គាត់ច្រើនប៉ុនណាបន្តទៀត និងមានរយៈពេលយូរប៉ុនណាទៅថ្ងៃមុខ។
លោកបន្តថា លក្ខខណ្ឌទី២ គឺដើម្បីឲ្យដឹងថា រដ្ឋាភិបាលចិននៅបន្តជួយការពារមុខមាត់រដ្ឋាភិបាលរបស់គាត់ និងរដ្ឋាភិបាលជំនាន់ក្រោយ ដែលអាចនឹងដឹកនាំដោយកូនប្រុសរបស់គាត់នៅលើឆាកអន្តរជាតិដែរឬក៏អត់។
លោក គឹម សុខ បន្ថែមថា លក្ខខណ្ឌទី៣ គឺដើម្បីឲ្យប្រាកដថា ភាគីចិននៅតែបន្តប្រកាន់ជំហរជួយជ្រោមជ្រែងក្នុងកិច្ចសហប្រតិបត្តិការយោធាជាមួយរដ្ឋាភិបាលរបស់គាត់ និងរដ្ឋាភិបាលជំនាន់របស់គណបក្សប្រជាជនកម្ពុជាគ្រប់កាលៈទេសៈដូចពេលនេះដែរឬក៏អត់។
អ្នកវិភាគឯករាជ្យរូបនេះគូសបញ្ជាក់ថា ប្រសិនបើលោកនាយករដ្ឋមន្ត្រី ហ៊ុន សែន ទទួលបានសញ្ញាវិជ្ជមានជាក់លាក់ណាមួយដោយមានការធានាពីភាគីចិន ទាំងការវិនិយោគនៅកម្ពុជា ទាំងការសន្យាបន្តផ្តល់កម្ចីក្នុងទំហំទឹកប្រាក់សមល្មមក្នុងលក្ខខណ្ឌសមស្របណាមួយ នោះគាត់នឹងបន្តបិទខ្ទប់លំហប្រជាធិបតេយ្យដោយគ្មានញញើតនោះទេ ដើម្បីអនុវត្តផែនការផ្ទេរអំណាចគ្រួសារនិយមពីគាត់ទៅលោក ហ៊ុន ម៉ាណែត៕