31 C
Phnom Penh

លោក ហ៊ុន សែន អនុញ្ញាត​ឱ្យ​អ្នកទោស​ថៃ​និង​ឡាវ​វិល​ត្រឡប់​ទៅ​ប្រទេស​កំណើត​ដោយ​មិន​ចាំបាច់​ធ្វើ​បដិការ

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា លោក ហ៊ុន សែន អះអាង​ថា កម្ពុជា​នឹង​អនុញ្ញាត​ឱ្យ​អ្នកទោស​ថៃ និង​ឡាវ ដែល​កំពុង​ជាប់​ទោស​នៅ​កម្ពុជា វិល​ត្រឡប់​ទៅ​កាន់​ប្រទេស​កំណើត​របស់​ពួកគេ​វិញ​ឱ្យ​បាន​មុន​ពិធី​បុណ្យ​ចូល​ឆ្នាំ ដោយ​មិន​ចាំបាច់​ធ្វើ​បដិការ ឬ​ការ​បញ្ជូន​តាម​នីតិវិធី​ច្បាប់​នោះ​ឡើយ។

ថ្លែង​ក្នុង​សន្និសីទ​កាសែត​រួម​គ្នា​ជាមួយ​លោក សនសៃ ស៊ីផាន់ដន នាយករដ្ឋមន្ត្រី​ឡាវ ក្រោយពី​បញ្ចប់​ជំនួប​កាលពី​ថ្ងៃទី​១៣ ខែ​កុម្ភៈ ឆ្នាំ​២០២៣ ក្នុង​ដំណើរ​ទស្សនកិច្ច​របស់​លោក ហ៊ុន សែន នៅ​ឡាវ ប្រព្រឹត្ត​ទៅ​ពី​ថ្ងៃទី​១៣ ដល់​ថ្ងៃទី​១៤ ខែ​កុម្ភៈ។

បុរស​ខ្លាំង​រូប​នេះ​អះអាង​ថា លោក​ក៏​នឹង​ផ្តល់​អ្នកទោស​ជនជាតិ​ថៃ ដែល​ជាប់​ពន្ធនាគារ​នៅ​កម្ពុជា​ទៅ​ឱ្យ​ប្រទេស​ថៃ វិញ​ដែរ នៅ​មុន​បុណ្យ​ចូល​ឆ្នាំ​ថ្មី ខណៈ​ដែល​កម្ពុជា ឡាវ និង​ថៃ មាន​មហា​សង្ក្រាន្ត​ក្នុង​ពេល​តែ​មួយ​រួម​គ្នា។

លោក​នាយករដ្ឋមន្ត្រី​បាន​លើកឡើង​ថា ការ​បញ្ជូន​អ្នកទោស​ឡាវ និង​អ្នកទោស​ថៃ ដែល​ជាប់​ឃុំ​នៅ​កម្ពុជា ទៅ​ប្រទេស​កំណើត​របស់​ពួកគេ នឹង​ត្រូវ​ធ្វើឡើង​ឲ្យ​បាន​មុន​ពិធី​ចូល​ឆ្នាំ​ថ្មី​នៃ​ប្រទេស​ទាំង​៣ នេះ ដែល​នឹង​ប្រព្រឹត្ត​ទៅ​ក្នុង​អំឡុង​ខែ​មេសា ឆ្នាំ​២០២៣ ដូច​គ្នា។

លោក​នាយករដ្ឋមន្ត្រី​ក៏​បាន​ណែនាំ​ឲ្យ​លោក ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួង​មហាផ្ទៃ ឲ្យ​ធ្វើការ​ជាមួយ​លោក កើត រិទ្ធ រដ្ឋមន្ត្រី​ក្រសួង​យុត្តិធម៌ ដើម្បី​ធ្វើ​កិច្ចការ​នេះ​ឲ្យ​បាន​ឆាប់។

លោក ហ៊ុន សែន បាន​លើកឡើង​ទៀត​ថា លោក​ធ្លាប់​ពិភាក្សា​ជាមួយ​លោក ឆឺតគៀត អាត់ថាក័រ (Cherdkiat Atthakor) ឯកអគ្គរាជទូត​ថៃ​ប្រចាំ​កម្ពុជា កាលពី​អំឡុង​ខែ​មករា ឆ្នាំ​២០២៣ អំពី​ការ​ផ្ទេរ​អ្នកទោស​នេះ។ លោក​បាន​ឯកភាព​ជាមួយ​ភាគី​ថៃ ហើយ​បាន​ប្រាប់​ឲ្យ​ក្រសួង​យុត្តិធម៌ ពិនិត្យ​លើ​ការ​បញ្ជូន​អ្នកទោស​ថៃ ទៅ​ប្រទេស​របស់​ពួកគេ​វិញ ដោយ​មិន​ចាំបាច់​ធ្វើ​បត្យាប័ន​នោះ​ទេ ពោល​គឺ​ផ្លាស់ប្ដូរ​អ្នកទោស​ទៅវិញ​ទៅមក​ដោយ​យោង​ទៅ​លើ​ការ​ស្ម័គ្រចិត្ត​របស់​ពួកគេ។

យោង​តាម​របាយការណ៍​ដែល​បង្ហាញ​ដោយ​លោក នុត សវនា អ្នក​នាំពាក្យ​អគ្គនាយកដ្ឋាន​ពន្ធនាគារ បាន​ឲ្យ​ដឹង​ថា បច្ចុប្បន្ន​អ្នកទោស​ជនជាតិ​ឡាវ ដែល​កំពុង​អនុវត្ត​ទោស​នៅ​ប្រទេស​កម្ពុជា មាន​ចំនួន ៧៥​នាក់ ក្នុង​នោះ​មាន​បទល្មើស​គ្រឿងញៀន រំលោភ​សេពសន្ថវៈ និង​បទល្មើស​ផ្សេងៗ​ទៀត។

ដោយឡែក​សម្រាប់​អ្នកទោស​ដែល​ជា​ជនជាតិ​ថៃ វិញ មាន​ចំនួន ១០៩​នាក់ ក្នុង​នោះ​មាន​បទល្មើស​គ្រឿងញៀន មនុស្ស​ឃាត និង​ឃាតកម្ម រំលោភ​សេពសន្ថវៈ និង​បទល្មើស​ផ្សេងៗ​ទៀត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស