29.3 C
Phnom Penh

អ្នក​ឃ្លាំមើល​ទទូច​ឱ្យ​រដ្ឋាភិបាល​ជួយ​រក​ដំណោះស្រាយ​បញ្ចប់​វិវាទ​ការងារ​បុគ្គលិក​ណាហ្គា​វើលដ៍

ដោយ ឌឹ ខេមបូឌា ដេលី

បទវិភាគ

ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ លោក វន់ ពៅ ទទូច​ឱ្យ​រដ្ឋាភិបាល​កម្ពុជា និង​ស្ថាប័ន​ពាក់ព័ន្ធ ជួយ​អន្តរាគមន៍​រក​ដំណោះស្រាយ​លើ​វិវាទ​ការងារ​នៃ​បុគ្គលិក​ក្រុមហ៊ុន​ណាហ្គា​វើលដ៍ ឱ្យ​បាន​ចប់​មុន​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ ដើម្បី​កិត្តិយស​រដ្ឋាភិបាល និង​បក្ស​កាន់​អំណាច។

លោក វន់ ពៅ ប្រាប់​សារព័ត៌មាន The Cambodia Daily នៅ​ថ្ងៃទី​២៣ កុម្ភៈ នេះ​ថា ដើម្បី​បញ្ចប់​រឿង​នេះ​ដោយ​យុត្តិធម៌ តុលាការ​ត្រូវតែ​ទម្លាក់​ចោល​រាល់​បទ​ចោទ​លើ​ប្រធាន​សហជីព និង​តំណាង​សហជីព​ដែល​កំពុង​រង​នូវ​ការ​ចោទប្រកាន់​ទាំង​អយុត្តិធម៌​កន្លងមក ដើម្បី​ឱ្យ​ពួកគេ​មាន​សេរីភាព​ពេញលេញ​ឡើងវិញ ជាពិសេស​ត្រូវតែ​បញ្ចប់​ឱ្យ​បាន​មុន​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ ដើម្បី​កិត្តិយស​រដ្ឋាភិបាល និង​បក្ស​កាន់​អំណាច។

ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ​រូប​នេះ​បញ្ជាក់​ថា ក្រៅពី​ទម្លាក់​ចោល​នូវ​បទ​ចោទ​នានា ក្រុមហ៊ុន​ណាហ្គា​វើលដ៍ ក៏​ត្រូវ​ទទួលយក​បុគ្គលិក​ដែល​ខ្លួន​បាន​បញ្ឈប់​ឱ្យ​ចូល​ធ្វើការ​វិញ និង​ត្រូវ​បើក​ឱ្យ​សហជីព​ដែល​រង​នូវ​ការ​រំលាយ​កាលពី​ពេល​កន្លងទៅ ដំណើរការ​ឡើងវិញ​ផង​ដែរ ដើម្បី​ធានា​នូវ​ការ​គោរព​សិទ្ធិ​កម្មករ​គ្មាន​ការ​រំលោភ​បំពាន​បន្ត​ទៀត។

ការ​អះអាង​នេះ ធ្វើឡើង​បន្ទាប់ពី​បុគ្គលិក​ក្រុមហ៊ុន​ណាហ្គា​វើលដ៍​រាប់​សិប​នាក់​បន្ត​ធ្វើ​កូដកម្ម​នៅ​មុខ​ក្រុមហ៊ុន​ណាហ្គា​វើលដ៍ ទាមទារ​ឱ្យ​អាជ្ញាធរ​រក​យុត្តិធម៌​ឱ្យ​មេដឹកនាំ​សហជីព និង​តំណាង​សហជីព​របស់​ពួកគេ​ដែល​កំពុង​រង​នូវ​បណ្តឹង​ពី​តុលាការ​សព្វថ្ងៃ​នេះ។

កាលពី​ថ្ងៃទី​២២ ខែ​កុម្ភៈ ឆ្នាំ​២០២៣ ក្រុម​បុគ្គលិក​នៃ​ក្រុមហ៊ុន​ណាហ្គា​វើលដ៍​ប្រមាណ​ជា ៥០​នាក់ បាន​នាំគ្នា​ចេញ​ធ្វើ​កូដកម្ម​ទាមទារ​រក​យុត្តិធម៌​បន្ត​ទៀត​នៅ​មុខ​ក្រុមហ៊ុន​ណាហ្គា​វើលដ៍​ទី​១ បន្ទាប់ពី​ប្រធាន​សហជីព និង​តំណាង​សហជីព​របស់​ពួកគេ​ចំនួន ៩​នាក់ ត្រូវ​តុលាការ​កោះហៅ​ឱ្យ​ចូល​សវនាការ​ដើម្បី​សាកសួរ​កាលពី​ថ្ងៃទី​២១ ខែ​កុម្ភៈ ឆ្នាំ​២០២៣ ក្រោម​បទ​ចោទប្រកាន់ ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម​កាលពី​ឆ្នាំ​២០២១ កន្លងទៅ។

ក្រុម​បុគ្គលិក​ក្រុមហ៊ុន​ណាហ្គា​វើលដ៍ បាន​ឈរ​តវ៉ា​ដោយ​លើក​បដា វាយ​ស្គរ និង​ច្រៀង​បទចម្រៀង​រៀបរាប់​ពី​ការ​រំលោភ​សិទ្ធិ​ការងារ​ពី​សំណាក់​ក្រុមហ៊ុន​ណាហ្គា​វើលដ៍ ក្នុង​គោលបំណង​ឲ្យ​ថៅកែ​ចេញ​មក​ដោះស្រាយ​វិវាទ​ការងារ បន្ទាប់ពី​អតីត​បុគ្គលិក​ក្រុមហ៊ុន និង​ប្រធាន​សហជីព ត្រូវ​បាន​ឃុំ​ខ្លួន និង​រង​នូវ​ការ​ចោទប្រកាន់​ទាំង​អយុត្តិធម៌​អស់​រយៈពេល​ជាង ១​ឆ្នាំ​មក​នេះ។

ការ​ចេញ​ធ្វើ​កូដកម្ម​នេះ ធ្វើឡើង​បន្ទាប់ពី​សាលាដំបូង​រាជធានី​ភ្នំពេញ​បើក​សវនាការ​លើ​សំណុំរឿង​ប្រធាន​សហជីព និង​តំណាង​សហជីព​ចំនួន ៩​នាក់ កាលពី​ថ្ងៃទី​២១ ខែ​កុម្ភៈ ឆ្នាំ​២០២៣ រួម​មាន​កញ្ញា ឈឹម ស៊ីថរ កញ្ញា ឈឹម សុខន អ្នកស្រី រី សុវណ្ណឌី អ្នកស្រី សុន ស្រីពេជ្រ អ្នកស្រី ហៃ សុភាព អ្នកស្រី ឃ្លាំង សុបិន្ដ កញ្ញា ទូច សិរីមាស លោក សុខ ណារិទ្ធ និង​លោក សុខ គង្គា ផង​ដែរ។

កាលពី​ថ្ងៃទី​១៨ ខែ​ធ្នូ ឆ្នាំ​២០២១ កម្មករ​និយោជិត​របស់​ក្រុមហ៊ុន​ណាហ្គា​វើលដ៍​ចំនួន ៣៦៥​នាក់ ត្រូវ​បាន​បញ្ឈប់​ពី​ការងារ​ដោយ​បង្ខំ និង​មិន​បាន​ផ្តល់​សំណង​ទៅ​តាម​ច្បាប់​ការងារ ដែល​ជា​មូលហេតុ​នាំ​ឱ្យ​មាន​ការ​តវ៉ា​ទាមទារ​ពី​កម្មករ​និយោជិត​ដោយ​ការ​ធ្វើ​កូដកម្ម​នៅ​មុខ​ក្រុមហ៊ុន ប៉ុន្តែ​អាជ្ញាធរ​រដ្ឋ​មិន​បាន​ជួយ​រក​យុត្តិធម៌​ឱ្យ​កម្មករ​និយោជិត​ដែល​ជា​ជនរងគ្រោះ​នោះ​ទេ បែរ​ជា​នាំគ្នា​បង្ក្រាប​លើ​កម្មករ​ទាំងនោះ​ទៅវិញ រហូត​ឈាន​ដល់​ការ​ចាប់​ឃុំ​ខ្លួន​តំណាង​កម្មករ​ជាច្រើន​រូប​ថែម​ទៀត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស