ពីទីក្រុងប៉េកាំង ឯណោះវិញ ក្រសួងការបរទេសចិន បាននិយាយថា ចិនត្រូវព្យាយាមរក្សាទំនាក់ទំនងជាមួយគ្រប់ភាគីនៃវិបត្តិនៅអ៊ុយក្រែន ដោយនៅតែប្រកាន់ជំហររបស់ខ្លួនចង់ឱ្យមានសន្តិភាពរវាងរុស្ស៊ី និងអ៊ុយក្រែន ឡើងវិញ។
អ្នកនាំពាក្យក្រសួងការបរទេសចិន អ្នកស្រី Mao Ning កាលពីថ្ងៃចន្ទ បានប្រាប់សន្និសីទសារព័ត៌មាននៅទីក្រុងប៉េកាំង ថា «ខ្លឹមសារសំខាន់គឺការអំពាវនាវដើម្បីស្វែងរកសន្តិភាព លើកកម្ពស់ការសន្ទនា និងលើកកម្ពស់ដំណោះស្រាយនយោបាយចំពោះវិបត្តិនៅអ៊ុយក្រែន»។
ស្ត្រីអ្នកនាំពាក្យចិនរូបនេះបាននិយាយថា ចិនជំរុញឱ្យមានកិច្ចសន្ទនា និងដំណោះស្រាយដោយសន្តិវិធីសម្រាប់វិបត្តិអ៊ុយក្រែន បើទោះបីសហរដ្ឋអាមេរិកបន្តចោទថា ទីក្រុងប៉េកាំងកំពុងពិចារណាការផ្គត់ផ្គង់អាវុធដល់រុស្ស៊ីក៏ដោយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃចន្ទ ទី២៧ ខែកុម្ភៈ នេះ។
ចិនដែលបានប្រកាសសម្ព័ន្ធភាព «គ្មានព្រំដែន» ជាមួយរុស្ស៊ី នៅមុនរុស្ស៊ីលុកលុយប្រទេសអ៊ុយក្រែន បានបដិសេធមិនថ្កោលទោសរុស្ស៊ីឈ្លានពានអ៊ុយក្រែននោះទេ។
កាលពីសប្តាហ៍មុន ចិនបានចេញផ្សាយផែនការ «សន្តិភាព ១២ចំណុច» ដែលអំពាវនាវឱ្យមានបទឈប់បាញ់ ហើយមានការយោគយល់គ្នានៃប្រទេសទាំងពីរ គឺរុស្ស៊ី និងអ៊ុយក្រែន។
ប៉ុន្តែប្រធានាធិបតីអ៊ុយក្រែន លោក វូឡូឌីមៀរ ហ្សេឡេនស្គី បាននិយាយនៅក្នុងបណ្ដាញសង្គម Telegram កាលពីថ្ងៃចន្ទថា អ៊ុយក្រែនពិតជាចង់ឱ្យមានជ័យជម្នះកើតឡើងនៅឆ្នាំនេះ តែចំពោះផែនការសន្តិភាពរបស់ចិន អាចជាការលើកទឹកចិត្ត ទំនុកចិត្ត មិត្តភ័ក្ដិ និងការទូត។
ជាមួយគ្នានេះ នៅពេលទទួលដំណឹងថា ប្រធានាធិបតីចិន ស៊ី ជីនពីង នឹងធ្វើដំណើរទៅក្រុងមូស្គូ នៅខែមេសា ដើម្បីជួបសមភាគីរុស្ស៊ី វ៉្លាឌីមៀ ពូទីន លោក វូឡូឌីមៀរ ហ្សេឡេនស្គី បានថ្លែងថា លោកចង់ជួបលោក ស៊ី ដើម្បីបង្ហាញអារម្មណ៍របស់លោកចំពោះចិន អំពីការបង្កើតផែនការសន្តិភាព ១២ចំណុចសម្រាប់ប្រជាជនអ៊ុយក្រែន។
តែមកដល់ពេលនេះ ភាគីចិននៅពុំទាន់ឱ្យដឹងថា លោក ស៊ី នឹងយល់ព្រមជួបលោក ហ្សេឡេនស្គី ឬយ៉ាងណាទេ។ យ៉ាងណា អ្នកសង្កេតការណ៍គិតថា លោក ហ្សេឡេនស្គី អាចនឹងស្នើចិនដាក់បញ្ចូលបន្ថែមចំណុចមួយទៀត គឺការដកទ័ពរុស្ស៊ីទាំងស្រុងចេញពីអ៊ុយក្រែន៕