នៅថ្ងៃអង្គារនេះ ប្រទេសថៃ និងសហរដ្ឋអាមេរិក បានចាប់ផ្តើមដឹកនាំការធ្វើសមយុទ្ធយោធាប្រចាំឆ្នាំធំមួយដែលមានកងទ័ពអាមេរិក ៦ពាន់នាក់ចូលរួម ជាមួយនឹងកងទ័ពមួយចំនួនមកពី ៣០ប្រទេស។ នេះបើតាមការចេញផ្សាយដោយទីភ្នាក់ងារព័ត៌មាន AFP នៅថ្ងៃអង្គារ ទី២៨ ខែកុម្ភៈ ឆ្នាំ២០២៣។
សមយុទ្ធ «ពស់វែកមាស» ដែលបង្កើតឡើងដំបូងតាំងពីឆ្នាំ១៩៨២ គឺជាសមយុទ្ធយោធាពហុភាគីដ៏ចំណាស់បំផុតមួយរបស់ពិភពលោក និងធំជាងគេបង្អស់ប្រចាំនៅតំបន់អាស៊ីអាគ្នេយ៍។ ល្បែងលំហាត់យោធានេះ ជាគន្លឹះមួយសម្រាប់ឱ្យទីក្រុងវ៉ាស៊ីនតោន ពង្រឹងសម្ព័ន្ធភាពរបស់ខ្លួននៅតំបន់អាស៊ី ក្នុងកាលៈទេសៈដែលអាមេរិកកំពុងប្រឈមការប្រកួតប្រជែងកាន់តែខ្លាំងឡើងពីសំណាក់ប្រទេសចិន។
បន្ទាប់ពីត្រូវបានកាត់បន្ថយចំនួនទ័ពអំឡុងការរាតត្បាតនៃជំងឺកូវីដ-១៩ តែសម្រាប់ឆ្នាំនេះ កងទ័ពអាមេរិកជាង ៦០០០នាក់ចូលរួមក្នុងសមយុទ្ធដែលជាចំនួនច្រើនមិនធ្លាប់មានក្នុងរយៈពេលមួយទសវត្សរ៍ចុងក្រោយនេះ។ នេះបើតាមលោក John Aquilino មេបញ្ជាការជាន់ខ្ពស់យោធាអាមេរិកប្រចាំតំបន់ឥណ្ឌូ-ប៉ាស៊ីហ្វិក។
លោក John Aquilino និយាយថា សមយុទ្ធនេះប្រព្រឹត្តទៅពីថ្ងៃទី២៨ កុម្ភៈ នេះដល់ថ្ងៃទី១០ ខែមីនា។
ព្រឹត្តិការណ៍នេះវាបង្ហាញពីរបៀបដែលការឆ្លើយតបរួមគ្នា និងជួយការពារឱ្យតំបន់ឥណ្ឌូ-ប៉ាស៊ីហ្វិក ឱ្យមានលក្ខណៈសេរី និងបើកចំហ ដើម្បីឱ្យប្រជាជាតិទាំងអស់អាចរក្សាសន្តិភាព ស្ថិរភាព និងវិបុលភាពនៅក្នុងតំបន់។
សមយុទ្ធយោធា «ពស់វែកមាស ២០២៣» មានការចូលរួមពីកងកម្លាំងសរុប ៧៣៩៤នាក់មកពី ៣០ប្រទេស ដែលក្នុងនោះប្រទេសដែលចូលរួមពេញលេញ រួមមានជប៉ុន សិង្ហបុរី កូរ៉េខាងត្បូង ម៉ាឡេស៊ី និងឥណ្ឌូនេស៊ី។ ចំណែកចិន ឥណ្ឌា និងអូស្ត្រាលី ក៏ចូលរួមដែរក្នុងលំហាត់ប្រតិបត្តិការមនុស្សធម៌។
ជាមួយគ្នានេះ ប្រទេសចំនួន ១០ រួមមានទាំងកម្ពុជា ចូលរួមក្នុងនាមជាក្រុមអ្នកសង្កេតការណ៍ ខណៈ ១០ប្រទេសផ្សេងទៀតចូលរួមក្នុងនាមជាក្រុមរៀបចំផែនការប្រតិបត្តិការពហុភាគី៕