បុរសខ្លាំងក្រាញអំណាចជិត ៤០ឆ្នាំនៅកម្ពុជា អំពាវនាវឲ្យអ្នកនយោបាយប្រឆាំងគោរពសិទ្ធិពលរដ្ឋក្នុងការធ្វើនយោបាយ ស្របពេលដែលមានក្រុមយុវជនមួយក្រុមបានចុះចូលជាមួយគណបក្សប្រជាជនកម្ពុជា ហើយធ្វើការវាយប្រហារបក្សប្រឆាំង និងសង្គមស៊ីវិល។
ក្នុងពិធីសម្ពោធដាក់ឲ្យប្រើប្រាស់អគារសិក្សា និងប្រគល់សញ្ញាបត្រជូននិស្សិតវិទ្យាស្ថានបច្ចេកវិទ្យាកម្ពុជា នាថ្ងៃទី០១ ខែមីនា នេះ លោក ហ៊ុន សែន ចេញមុខការពារយុវជនមួយក្រុមដែលធ្លាប់ធ្វើការនៅអង្គការក្រៅរដ្ឋាភិបាល និងគាំទ្រគណបក្សប្រឆាំង ដែលបាននាំគ្នាទៅចូលរួមជាមួយគណបក្សប្រជាជនកម្ពុជានាពេលថ្មីៗនេះ។
លោកបញ្ជាក់ថា យុវជនទាំងនោះបានរងការប្រមាថពីអ្នកនយោបាយ គណបក្សបក្សប្រឆាំង ឬបុគ្គលមួយចំនួន បន្ទាប់ពីពួកគេបានងាកមកគាំទ្ររដ្ឋាភិបាលវិញ ដោយសារកន្លងមកពួកគេគាំទ្របក្សប្រឆាំងមិនទទួលបានផលប្រយោជន៍អ្វីឡើយ ក្រៅពីបណ្ដុះបណ្ដាលពួកគេឲ្យប្រឆាំងរដ្ឋាភិបាល។
លោកចាត់ទុកគណបក្សនយោបាយ និងបុគ្គលមួយចំនួនដែលរិះគន់ និងចោទយុវជនដែលងាកមកធ្វើការ និងចូលរួមជាមួយរដ្ឋាភិបាល «លក់ឧត្ដមគតិ ឬស៊ីលុយបរទេស» នោះថា មិនមែនជាអ្នកប្រជាធិបតេយ្យទេ ប៉ុន្តែនាំគ្នាតាំងខ្លួនជាអ្នកប្រជាធិបតេយ្យ។
លោក ហ៊ុន សែន ស្នើទៅអ្នកនយោបាយបក្សប្រឆាំង និងបុគ្គលមួយចំនួនត្រូវគោរពសិទ្ធិពលរដ្ឋក្នុងការធ្វើនយោបាយ ក្នុងនោះលោកព្រមានអ្នកនយោបាយបក្សប្រឆាំងឲ្យប្រុងប្រយ័ត្នក្រុមយុវជនទាំងនោះដែលនាំគ្នាធ្វើបាតុកម្មដើម្បីប្រឆាំងនឹងពួកគេវិញ បើសិនជាមិនបញ្ឈប់សកម្មភាពរិះគន់ទៀត។
ការចេញមុខការពាររបស់លោក ហ៊ុន សែន នាថ្ងៃនេះ បន្ទាប់ពីយុវជនចំនួន ៨នាក់ ក្នុងនោះអតីតសហស្ថាបនិកចលនាមាតាធម្មជាតិ លោក ម៉េង ហេង អតីតសកម្មជនបរិស្ថានកូនភ្លោះពីរនាក់ គឺលោក ជុំ ហួត និងលោក ជុំ ហួរ ព្រមទាំងអតីតសកម្មជន ១០០រាត្រី លោក មួង សូនី និងលោក មួង សុភ័ក្រ ជាដើម បាននាំគ្នាចេញសេចក្តីថ្លែងការណ៍គាំទ្រចំណាត់ការរបស់រដ្ឋាភិបាលលោក ហ៊ុន សែន ដែលសម្រេចបិទអង្គភាពសារព័ត៌មាន VOD កាលពីពេលថ្មីៗនេះ។
ក្រុមនេះមិនត្រឹមតែចេញសេចក្ដីថ្លែងការណ៍គាំទ្រចំណាត់ការរបស់រដ្ឋាភិបាលបិទសារព័ត៌មានឯករាជ្យ VOD ប៉ុណ្ណោះទេ ប៉ុន្តែពួកគេក៏បាននាំគ្នាវាយប្រហារទៅគណបក្សប្រឆាំង និងអង្គការក្រៅរដ្ឋាភិបាលដែលពួកគេធ្លាប់ធ្វើការជាមួយកន្លងមកថែមទៀត។
យ៉ាងណាក៏ដោយ គេសង្កេតឃើញលោក ហ៊ុន សែន តែងប្រកាស និងទាមទារឲ្យគណបក្សប្រឆាំង និងសង្គមស៊ីវិល ព្រមទាំងសកម្មជននានា គោរពសិទ្ធិពលរដ្ឋក្នុងការធ្វើនយោបាយ ប៉ុន្តែសម្រាប់រូបលោកវិញ មិនបានគោរពសិទ្ធិពលរដ្ឋឡើយ ជាពិសេសលោកតែងធ្វើទុក្ខបុកម្នេញឥតស្រាកស្រាន្តចំពោះអ្នកដែលមានទស្សនៈផ្ទុយមិនគាំទ្រគណបក្សប្រជាជនកម្ពុជា។
ជាក់ស្ដែងថ្មីៗនេះ លោក ហ៊ុន សែន បានបញ្ជាឲ្យបិទសារព័ត៌មាន VOD និងធ្វើទុក្ខបុកម្នេញលោក សុន ឆ័យ លោក គង់ គាំ លោក ថាច់ សេដ្ឋា និងចាប់ខ្លួនមេដឹកនាំសហជីពណាហ្គាវើលដ៍ កញ្ញា ឈឹម ស៊ីថរ ជាដើម៕