មេដឹកនាំខ្មែរដែលក្រោមការគ្រប់គ្រងរបស់វៀតណាម លោក ហ៊ុន សែន អះអាងថា មរតកដំបូងបំផុតរបស់បក្សប្រជាជនកម្ពុជាសម្រាប់ជាតិខ្មែរ គឺការជួយសង្គ្រោះជីវិតពលរដ្ឋឲ្យរស់រានមានជីវិតក្រោយថ្ងៃរំដោះ ៧មករា ឆ្នាំ១៩៧៩ ចេញពីរបបប្រល័យពូជសាសន៍ ប៉ុល ពត។
មេដឹកនាំបក្សកាន់អំណាចដែលជ្រោមជ្រែងដោយវៀតណាម លោក ហ៊ុន សែន លើកឡើងក្នុងពិធីសម្ពោធអគារសិក្សានៃវិទ្យាស្ថានបច្ចេកវិទ្យាកម្ពុជា នៅថ្ងៃទី១ ខែមីនា ឆ្នាំ២០២៣ នេះ ដោយលើកឡើងជាសំណួរថា តើមាននរណាម្នាក់ដែលហ៊ាននិយាយថា បើទោះបីគ្មានថ្ងៃរំដោះ ៧មករា ឆ្នាំ១៩៧៩ ក៏ខ្លួនអាចមានជីវិត និងរួចផុតពីរបបប្រល័យពូជសាសន៍ ប៉ុល ពត ដែរទេ?
លោក ហ៊ុន សែន បន្ថែមថា ដំបូងបំផុតកុំភ្លេចអំពីការសង្គ្រោះជីវិតមនុស្សឲ្យរស់រានមានជីវិតតាមរយៈថ្ងៃរំដោះ ៧មករា បើគ្មានថ្ងៃរំដោះ ៧មករា កុំនិយាយអ្វីទៀត គឺនិយាយតែពីរឿងស្លាប់តែប៉ុណ្ណោះ។
អតីតមេកម្មាភិបាលខ្មែរក្រហម លោក ហ៊ុន សែន លើកឡើងថា ចំណែកមរតកទីពីររបស់បក្សប្រជាជនកម្ពុជា គឺការចូលរួមរបស់រដ្ឋាភិបាលអតីតសាធារណរដ្ឋប្រជាមានិតកម្ពុជា និងរដ្ឋកម្ពុជា ដែលដឹកនាំដោយបក្សប្រជាជនកម្ពុជានៅក្នុងដំណើរការស្វែងរកសន្តិភាពសម្រាប់កម្ពុជា តាមរយៈនៃការចរចាឱ្យមានកិច្ចព្រមព្រៀងទីក្រុងប៉ារីស និងការអនុវត្តនូវកិច្ចព្រមព្រៀងនេះ។
មេដឹកនាំខ្មែរដែលវៀតណាមលើកបន្តុបកាលពីឆ្នាំ១៩៨៥ លោក ហ៊ុន សែន បញ្ជាក់ថា សមិទ្ធផលបន្តមកទៀត គឺការអនុវត្តនយោបាយឈ្នះឈ្នះរបស់លោកដែលជាមរតកដ៏សំខាន់ធ្វើឱ្យសន្តិភាពកើតមានឡើងនៅកម្ពុជារហូតមានសុខសន្តិភាព និងការអភិវឌ្ឍដូចពេលបច្ចុប្បន្ននេះ។
កាលពីចុងខែមករា ឆ្នាំ២០២៣ អតីតមេដឹកនាំបក្សប្រឆាំង លោក សម រង្ស៊ី រិះគន់ថា រយៈពេល ៣៨ឆ្នាំដែលមេដឹកនាំបក្សកាន់អំណាច លោក ហ៊ុន សែន ធ្វើជានាយករដ្ឋមន្ត្រីបានបន្សល់ទុកនូវបញ្ហាដ៏ធ្ងន់ធ្ងរសម្រាប់កម្ពុជា ដូចជាការដឹកនាំប្រទេសតាមរបបហ្វាស់ស៊ីស បង្កើតឱ្យមានការសម្លាប់ក្រៅប្រព័ន្ធដោយគ្មានទោស ការជួញដូរគ្រឿងញៀន ការជួញដូរមនុស្ស និងការលាងលុយកខ្វក់ ជាដើម ដែលជាប់ពាក់ព័ន្ធនឹងរដ្ឋាភិបាលដែលកំពុងដឹកនាំដោយលោក ហ៊ុន សែន យ៉ាងខ្លាំង។
លោក សម រង្ស៊ី បញ្ជាក់ថា អ្វីដែលលោកបានរៀបរាប់នេះ គឺជាមរតកដែលបក្សប្រជាជនកម្ពុជាកំពុងដឹកនាំដោយលោក ហ៊ុន សែន បន្សល់ទុកសម្រាប់កម្ពុជា គឺជាគ្រាប់បែកដ៏ធំមួយនឹងផ្ទុះកម្ទេចប្រទេសកម្ពុជានៅថ្ងៃអនាគត។
ចំណែកអតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី១ មីនា នេះថា លោកមិនជំទាស់នឹងការលើកឡើងរបស់លោក ហ៊ុន សែន ទេ ប៉ុន្តែថ្ងៃ ៧មករា ឆ្នាំ១៩៧៩ នៅតែមានការជជែកគ្នាមិនដាច់ស្រេចនៅឡើយថា ជាថ្ងៃរំដោះពលរដ្ឋខ្មែរពីរបប ប៉ុល ពត ឬជាថ្ងៃដែលបើកផ្លូវឱ្យវៀតណាមឈ្លានពានកម្ពុជា ដែលជាមរតកសម្រាប់ពលរដ្ឋនៅពេលនេះ និងទៅថ្ងៃអនាគត។
លោកបញ្ជាក់ថា ជុំវិញថ្ងៃរំដោះ ៧មករា នេះ ក៏មានការលើកឡើងច្រើនដែរថា ហេតុអ្វីនៅពេលនោះកម្ពុជាមិនប្តឹងទៅអង្គការសហប្រជាជាតិឱ្យមករំដោះខ្មែរ បែរជាទៅពឹងវៀតណាមទៅវិញ។
លោកបន្ថែមថា បញ្ហានេះទាល់តែមានការបកស្រាយឱ្យបានច្បាស់លាស់ ទើបអាចបែងចែកឱ្យដាច់ស្រឡះថា ថ្ងៃ៧មករា ឆ្នាំ១៩៧៩ គឺជាថ្ងៃអ្វីឱ្យពិតប្រាកដ។
ដោយឡែកអ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី២៤ ខែកុម្ភៈ ថា មរតកដែលលោក ហ៊ុន សែន បានបន្សល់ទុកឱ្យកម្ពុជាក្នុងអំណាចរបស់គាត់ជិត ៤០ឆ្នាំមកនេះមានចំណុច ២ធំៗ គឺទី១ គំរូឧក្រិដ្ឋកម្មសង្គ្រាមដើម្បីអំណាច និងទី២ គឺគំរូឧក្រិដ្ឋកម្មជាតិខ្មែរដើម្បីបម្រើបរទេសឈ្លានពាន៕