35 C
Phnom Penh

ក្រុម​អ្នក​ឃ្លាំមើល​ព្យាករ​ថា​លោក កឹម សុខា អាច​នឹង​ទទួល​បាន​ពានរង្វាន់​ណូបែល​សន្តិភាព

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​ព្យាករ​ថា មេដឹកនាំ​បក្ស​ប្រឆាំង លោក កឹម សុខា អាច​នឹង​ទទួល​បាន​ពានរង្វាន់​ណូបែល​សន្តិភាព ដោយសារ​ការ​តស៊ូ​នយោបាយ​ដើម្បី​សេរីភាព យុត្តិធម៌ និង​លទ្ធិប្រជាធិបតេយ្យ រហូត​រង​នូវ​ការ​កាត់ទោស​ពី​រដ្ឋាភិបាល​លោក ហ៊ុន សែន ត្រូវ​ជាប់​គុក​ក្នុង​ផ្ទះ ២៧​ឆ្នាំ។

អនុប្រធាន​វេទិកា​ពលរដ្ឋ លោក ម៉ែន ណាត បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily ថា ការ​តស៊ូ​នយោបាយ​ក្នុង​ជីវិត​លោក កឹម សុខា ដែល​ត្រូវ​តុលាការ​ក្រុង​ភ្នំពេញ​កាត់ទោស​ឱ្យ​ជាប់​គុក​ក្នុង​ផ្ទះ​រហូត​ដល់​ជិត ៣​ទសវត្សរ៍​ព្រោះតែ​ការ​តស៊ូ​ដើម្បី​លទ្ធិប្រជាធិបតេយ្យ​កន្លង​មក​នេះ គាត់​អាច​នឹង​ត្រូវ​បាន​ដាក់​ជា​បេក្ខភាព​ដែល​នឹង​ត្រូវ​ទទួល​បាន​ពានរង្វាន់​ណូបែល​សន្តិភាព​នៅ​ពេល​ខាងមុខ។

លោក ម៉ែន ណាត រិះគន់​ថា ការ​កាត់ទោស​លោក កឹម សុខា បែប​នេះ គឺជា​រឿង​អយុត្តិធម៌​បំផុត​សម្រាប់​រូបលោក និង​ប្រជាពលរដ្ឋ​ដែល​គាំទ្រ​គណបក្ស​សង្គ្រោះ​ជាតិ។ ជាង​នេះ​ទៀត ការ​សម្រេច​ឃុំ​ខ្លួន​លោក កឹម សុខា ក្នុង​ផ្ទះ​របស់​គាត់ គឺ​កាន់តែ​បង្ហាញ​ពី​ភាព​អយុត្តិធម៌​ថែម​ទៀត ព្រោះ​តុលាការ​ក្រោម​បញ្ជា​របស់​លោក ហ៊ុន សែន បាន​ប្រែ​ក្លាយ​ផ្ទះ​លោក កឹម សុខា ទៅ​ពន្ធនាគារ​ទៅ​ហើយ។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា នៅ​ពេល​ដែល​ផ្ទះ​លោក កឹម សុខា ត្រូវ​បាន​កំណត់​ជា​ពន្ធនាគារ មាន​ន័យ​ថា ក្នុង​ផ្ទះ​នេះ​នឹង​មិន​អនុញ្ញាត​ឱ្យ​មាន​អ្នក​បម្រើ ដូចជា​អ្នក​រៀបចំ​ម្ហូប​អាហារ និង​អ្នក​បើកបរ​រថយន្ត​ឲ្យ​លោក កឹម សុខា ទៀត​នោះ​ទេ។ លោក​ថា លើស​ពី​នេះ សេវា​ទូរសព្ទ​ក៏​ត្រូវ​កាត់​ផ្តាច់ សេវា​អ៊ីនធឺណិត​ក៏​ត្រូវ​ហាមឃាត់ ជាពិសេស​បើ​លោក កឹម សុខា ចង់​លក់​ផ្ទះ​នេះ ក៏​មិន​អាច​ធ្វើ​ទៅ​បាន​ដែរ។

លោក ម៉ែន ណាត គូស​បញ្ជាក់​ថា ម្ចាស់ផ្ទះ​ក៏​ត្រូវ​កាត់ទោស​បិទ​សេរីភាព ២៧​ឆ្នាំ រីឯ​ផ្ទះ​ក៏​ត្រូវ​កាត់ទោស​បិទ​សេរីភាព ២៧​ឆ្នាំ​ដូច​គ្នា។

ប្រធាន​គណបក្ស​សង្គ្រោះ​ជាតិ លោក កឹម សុខា កាលពី​ថ្ងៃទី​៣ ខែ​មីនា ឆ្នាំ​២០២៣ ត្រូវ​សាលាដំបូង​រាជធានី​ភ្នំពេញ​ប្រកាស​សាលក្រម​សម្រេច​ផ្ដន្ទាទោស​ឲ្យ​ជាប់​គុក​ក្នុង​ផ្ទះ​រយៈពេល ២៧​ឆ្នាំ មិន​អនុញ្ញាត​ឱ្យ​ជួប​អ្នកដទៃ​ក្រៅតែ​ពី​សាច់ញាតិ និង​ត្រូវ​ដកហូត​សិទ្ធិ​មិន​ឲ្យ​ធ្វើ​នយោបាយ​អស់​មួយ​ជីវិត។

ការ​ផ្ដន្ទាទោស​នេះ ធ្វើឡើង​បន្ទាប់ពី​អាជ្ញាធរ​នៃ​រដ្ឋាភិបាល​លោក ហ៊ុន សែន បាន​ចាប់​លោក កឹម សុខា ដាក់​ក្នុង​ពន្ធនាគារ​ត្រពាំងផ្លុង​កាលពី​ជាង ៥​ឆ្នាំ​មុន គឺ​នៅ​ថ្ងៃទី​៣ ខែ​កញ្ញា ឆ្នាំ​២០១៧ កន្លងទៅ ក្រោម​បទ​ចោទ​ពី​បទ​ក្បត់​ជាតិ​ដើម្បី​ផ្តួល​រំលំ​រដ្ឋាភិបាល​កម្ពុជា។

នេះ​មិនមែន​ជា​លើក​ទី​មួយ​ទេ​ដែល​លោក កឹម សុខា រង​ការ​ធ្វើ​ទុក្ខបុកម្នេញ​ផ្នែក​នយោបាយ​ពី​គណបក្ស​កាន់​អំណាច​របស់​លោក ហ៊ុន សែន តាំងពី​ជិត ២០​ឆ្នាំ​មុន​មក ព្រោះតែ​ការ​តស៊ូ​ដើម្បី​បុព្វហេតុ​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស​នៅ​កម្ពុជា ក្នុង​នោះ​លោក​ត្រូវ​ជាប់​ពន្ធនាគារ​លើកដំបូង​នៅ​ថ្ងៃ​៣១ ខែ​ធ្នូ ឆ្នាំ​២០០៥ ពី​ការ​ចោទ​ប្ដឹង​ពី​លោក ហ៊ុន សែន ពី​បទ​បរិហារកេរ្តិ៍​ក្នុង​នាម​លោក​ជា​ប្រធាន​មជ្ឈមណ្ឌល​សិទ្ធិមនុស្ស​កម្ពុជា នៅ​ពេល​នោះ ប៉ុន្តែ​លោក​ត្រូវ​បាន​ដោះលែង​ឲ្យ​មាន​សេរីភាព​វិញ​នៅ​ថ្ងៃទី​១៧ ខែ​មករា ឆ្នាំ​២០០៦ ក្រោយពី​រដ្ឋាភិបាល​លោក ហ៊ុន សែន រង​សម្ពាធ​ខ្លាំង​ពី​សហគមន៍​អន្តរជាតិ។

ការ​ចោទ​ប្តឹង​ពី​លោក ហ៊ុន សែន នេះ ធ្វើឡើង​បន្ទាប់ពី​លោក កឹម សុខា បាន​ដឹកនាំ​មជ្ឈមណ្ឌល​សិទ្ធិមនុស្ស​កម្ពុជា​តាំងពី​អំឡុង​ឆ្នាំ​២០០២ មក ដែល​លោក​បាន​ចុះ​អប់រំ និង​ពន្យល់​ប្រជាពលរដ្ឋ​ឲ្យ​យល់ដឹង​អំពី​សិទ្ធិ​ពលរដ្ឋ សិទ្ធិមនុស្ស និង​លទ្ធិប្រជាធិបតេយ្យ និង​ការ​អប់រំ​ទាំង​ផ្លូវលោក និង​ផ្លូវធម៌​ផង​ដែរ។

នៅ​ដើម​ឆ្នាំ​២០០៧ លោក កឹម សុខា បាន​ដឹកនាំ​ក្បួន​សិទ្ធិ​យាត្រា ដែល​ត្រូវ​ធ្វើ​ដំណើរ​ដោយ​ថ្មើរជើង​រយៈពេល ១៦​ថ្ងៃ​ពី​វត្តភ្នំ​ទៅ​កាន់​ប្រាសាទ​អង្គរវត្ត ខេត្ត​សៀមរាប ដើម្បី​ទាមទារ​សិទ្ធិ​សេរីភាព​បញ្ចេញមតិ និង​ភាព​អត់ឱន​ផ្នែក​នយោបាយ​នៅ​កម្ពុជា ក្នុង​នោះ​នៅ​ថ្ងៃទី​២២ ខែ​កក្កដា ឆ្នាំ​២០០៧ លោក កឹម សុខា បាន​បង្កើត​គណបក្ស​នយោបាយ​មួយ​ដែល​មាន​ឈ្មោះ​ថា គណបក្ស​សិទ្ធិមនុស្ស ដែល​លោក​ជា​អ្នក​ដឹកនាំ​ដោយ​ផ្ទាល់។

ក្រោយ​គណបក្ស​សិទ្ធិមនុស្ស​របស់​លោក និង​គណបក្ស សម រង្ស៊ី បាន​ច្របាច់​បញ្ចូល​គ្នា​ទៅ​ជា​គណបក្ស​សង្គ្រោះ​ជាតិ​កាលពី​ឆ្នាំ​២០១២ និង​ទទួល​បាន​ការ​គាំទ្រ​ពី​ប្រជាពលរដ្ឋ​ជិត ៣​លាន​នាក់​ដែល​ទទួល​សំឡេង​ក្នុង​រដ្ឋសភា​ជាតិ ៥៥​អាសនៈ។ លោក កឹម សុខា ក៏​ត្រូវ​អាជ្ញាធរ​ក្រុង​ភ្នំពេញ​ឆ្មក់​ចូល​ចាប់​ខ្លួន​ទាំង​មាន​អភ័យ​ឯកសិទ្ធិ​សភា​ទាំង​កណ្តាល​អាធ្រាត្រ កាលពី​ថ្ងៃទី​៣ ខែ​កញ្ញា ឆ្នាំ​២០១៧ ពី​បទ​ឃុបឃិត​ជាមួយ​រដ្ឋ​បរទេស​ដើម្បី​ផ្តួល​រំលំ​រដ្ឋាភិបាល​កម្ពុជា។

ជុំវិញ​បញ្ហា​នេះ សារព័ត៌មាន Southeast Asia Globe កាលពី​ខែ​កក្កដា ឆ្នាំ​២០១៤ បាន​ចុះផ្សាយ​ពី​ការ​លើកឡើង​របស់​អ្នក​ផ្តល់​ប្រឹក្សា​ផ្នែក​នយោបាយ​ឯករាជ្យ​នៅ​កម្ពុជា បណ្ឌិត ម៉ាខឺស ស្កាប៊ូ ថា​លោក កឹម សុខា បាន​ដាក់​ខ្លួន​គាត់​ក្នុង​ភ្នក់ភ្លើង​ជាច្រើនលើក​ច្រើនគ្រា ដោយសារតែ​គាត់​ហ៊ាន​និយាយ​ប្រឆាំង​នឹង​ក្រុម​អ្នក​កាន់​អំណាច​បច្ចុប្បន្ន​នេះ។

ប្រធាន​គណបក្ស​សង្គ្រោះ​ជាតិ លោក កឹម សុខា ធ្លាប់​បាន​អះអាង​កាលពី​ពេល​កន្លងទៅ​ថា លោក​នឹង​មិន​ក្បត់​ប្រទេស​ជាតិ មិន​ក្បត់​ឆន្ទៈ​ពលរដ្ឋ និង​មិន​បោះបង់​ចោល​មាតុភូមិ​កម្ពុជា​ជា​ទី​ស្រឡាញ់​របស់​លោក​ជាដាច់ខាត ហើយ​អ្វីៗ​ដែល​លោក​ធ្លាប់​បាន​សន្យា​ចំពោះ​អ្នកគាំទ្រ​គណបក្ស​សង្គ្រោះ​ជាតិ និង​ពលរដ្ឋ​ខ្មែរ លោក​នៅតែ​ហ៊ាន និង​បន្ត​សន្យា​ជូន​ជន​រួម​ជាតិ​ជានិច្ច។

ប្រធាន​គណបក្ស​សង្គ្រោះ​ជាតិ លោក កឹម សុខា កើត​នៅ​ថ្ងៃទី​២៧ ខែ​មិថុនា ឆ្នាំ​១៩៥៣ ស្ថិត​នៅ​ឃុំ​ឧត្ដមសូរិយា ស្រុក​ត្រាំកក់ ខេត្ត​តាកែវ ដែល​បាន​តស៊ូ​ដើម្បី​សេរីភាព និង​យុត្តិធម៌​សង្គម​នៅ​ប្រទេស​កម្ពុជា​ពី​មេដឹកនាំ​មជ្ឈមណ្ឌល​សិទ្ធិមនុស្ស រហូត​ក្លាយ​ជា​អ្នក​នយោបាយ​មួយ​រូប​ដែល​បាន​ឆ្លងកាត់​ឧបសគ្គ​មិន​ចេះ​ចប់ និង​កំពុង​រង​ការ​គាបសង្កត់​សិទ្ធិ​នយោបាយ​ពី​សំណាក់​បក្ស​កាន់​អំណាច​របស់​លោក ហ៊ុន សែន សព្វថ្ងៃ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស