26 C
Phnom Penh

ផែនការ​សន្តិភាព​១២​ចំណុច​របស់​ចិន​សម្រាប់​រុស្ស៊ី-អ៊ុយក្រែន​ទំនង​មិន​អាច​ដំណើរការ​បាន​ទេ

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃទី​២៤ ខែ​កុម្ភៈ ជា​ថ្ងៃ​ខួប​មួយ​ឆ្នាំ​ដែល​រុស្ស៊ី​លើក​ទ័ព ២៥​ម៉ឺន​នាក់​លុកលុយ​ប្រទេស​អ៊ុយក្រែន ដែល​នៅ​ថ្ងៃ​នោះ​ចិន​បាន​បញ្ចេញ​ផែនការ​សន្តិភាព ១២​ចំណុច ដើម្បី​បញ្ចប់​ភ្លើង​សង្គ្រាម​នៅ​លើ​ទឹកដី​អ៊ុយក្រែន។

ផែនការ ១២​ចំណុច​នេះ​ត្រូវ​បាន​ផ្សព្វផ្សាយ​តាមរយៈ​ប្រព័ន្ធ​ផ្សព្វផ្សាយ​អន្តរជាតិ​នៅ​ពេល​ដែល​អង្គ​មហាសន្និបាត​អង្គការ​សហប្រជាជាតិ​កំពុងតែ​ប្រជុំ ហើយ​ឈាន​ដល់​ការ​អនុម័ត​លើ​សេចក្ដី​សម្រេច​មួយ​ជា​ថ្មី​ម្ដង​ទៀត ដោយ​ទាមទារ​ឱ្យ​រុស្ស៊ី​ដក​ទ័ព​ចេញពី​ប្រទេស​អ៊ុយក្រែន។

ផែនការ ១២​ចំណុច​របស់​ចិន ទោះជា​ត្រូវ​បាន​ទម្លាយ​តាមរយៈ​បណ្ដាញ​ផ្សាយ​ព័ត៌មាន​អន្តរជាតិ តែ​ពុំ​បាន​លម្អិត​ត្រង់​ចំណុច​ណា​មួយ​នោះ​ទេ។ ក្នុង ១២​ចំណុច​នេះ គេ​រក​ឃើញ​យ៉ាងហោចណាស់ ២​ចំណុច​ស្ថិត​ក្នុង​ភាព​អាថ៌កំបាំង ព្រោះតែ​ចិន​ពុំ​បាន​លម្អិត​អំពី​អធិបតេយ្យភាព​នៃ​ប្រទេស​អ៊ុយក្រែន រួម​នឹង​ការ​ឲ្យ​រុស្ស៊ី​ដក​ទ័ព​ទាំងស្រុង​ចេញពី​អ៊ុយក្រែន។

ចំណុច​ដែល​នាំ​ឲ្យ​ពួក​បស្ចិម​ប្រទេស ជាពិសេស​គឺ​សហរដ្ឋ​អាមេរិក​ចាត់ទុក​ផែនការ​សន្តិភាព​របស់​ចិន​នេះ​ថា​ជា​ការ​ផ្ដល់​ផល​ប្រយោជន៍​ទៅ​ឱ្យ​រុស្ស៊ី គឺ​នៅ​ត្រង់​ចំណុច​ដែល​លោក បៃដិន អះអាង​ថា ការ​មិន​បញ្ជាក់​អំពី​រុស្ស៊ី​ត្រូវ​ដក​ទ័ព​ចេញពី​អ៊ុយក្រែន និង​ការ​គោរព​អធិបតេយ្យភាព​របស់​អ៊ុយក្រែន គឺជា​រឿង​ដ៏​សំខាន់។ ប្រធានាធិបតី​អាមេរិក លោក ចូ បៃដិន បាន​ថ្លែង​ដោយ​ចំអក​ថា ផែនការ​សន្តិភាព​របស់​ចិន​នេះ​វា​ដូចជា​ល្បែង​ឆ្ពិន​ភ្នែក​តែប៉ុណ្ណោះ។

លោក បៃដិន ថា​សហរដ្ឋ​អាមេរិក និង​សម្ព័ន្ធមិត្ត​មិន​អាច​ចាត់ទុក​ផែនការ​សន្តិភាព​របស់​ចិន​ជា​រូបមន្ត​នៃ​ការ​ឆ្ពោះ​ទៅ​រក​ការ​បញ្ចប់​សង្គ្រាម​បាន​នោះ​ទេ។ ជាមួយ​គ្នា​នេះ រដ្ឋមន្ត្រី​ការបរទេស​អាមេរិក លោក Antony Bliken ក៏​បាន​វាយប្រហារ​ចិន​ថា កំពុងតែ​លេង​ល្បែង​ជាមួយ​នឹង​រុស្ស៊ី គឺ​ចង់​រៀប​ក្រឡា​ឱ្យ​រុស្ស៊ី​ដើរ ហើយ​ពង្រឹង​យុទ្ធសាស្ត្រ​សង្គ្រាម​របស់​រុស្ស៊ី​ឡើងវិញ​តែប៉ុណ្ណោះ។

លោក​ថា ផែនការ​នេះ​មិន​គួរ​ត្រូវ​ព្យាយាម​ឲ្យ​ចេញ​នោះ​ទេ ហើយ​ថា​ចិន​ខ្លួនឯង​ត្រូវតែ​ប្រកាន់​ឱ្យ​ភ្ជាប់​នូវ​ការ​មិន​ផ្ដល់​អាវុធ​ណា​មួយ​ទៅ​ឲ្យ​រុស្ស៊ី។

លោក​ព្រមាន​ថា បើ​ចិន​លួច​ផ្ដល់​អាវុធ ឬ​ក៏​បញ្ចេញ​អាវុធ​ទៅ​ឱ្យ​រុស្ស៊ី គឺ​ចិន​ត្រូវ​ប្រឈម​នឹង​ផលវិបាក​ធ្ងន់ធ្ងរ​ពី​សហរដ្ឋ​អាមេរិក និង​កម្លាំង​យុត្តិធម៌​នៅ​លើ​ពិភពលោក ដែល​ប្រឆាំង​រុស្ស៊ី​លើក​ទ័ព​ឈ្លានពាន​អ៊ុយក្រែន។

ចាប់តាំងពី​ចិន​ប្រកាស​ផែនការ​សន្តិភាព ១២​ចំណុច​នេះ មាន​ប្រទេស​តិចតួច​ណាស់​ដែល​គាំទ្រ​ចិន ក្នុង​នោះ​គឺ​ប្រទេស​រុស្ស៊ី​ផ្ទាល់​តែម្ដង រួម​ជាមួយ​ប្រទេស​បេឡារុស ដែល​ជា​អាយ៉ង​របស់​រុស្ស៊ី ហើយ​និង​ប្រទេស​មួយ​ចំនួន​ទៀត​ដែល​មាន​និន្នាការ​ប្រកាន់​ការ​ដឹកនាំ​តាម​បែប​ផ្ដាច់ការ និង​កុម្មុយនីស្ត​និយម។

នៅ​ពេល​ដែល​ចិន​បញ្ចេញ​ផែនការ ១២​ចំណុច​នេះ​ភ្លាម ប្រធានាធិបតី​អ៊ុយក្រែន លោក វ៉ូឡូឌីមៀ ហ្សេឡេនស្គី បាន​ស្នើសុំ​ជួប​ប្រធានាធិបតី ស៊ី ជីនពីង នៅ​ពេល​ដែល​លោក ស៊ី ត្រូវ​មក​ទស្សនកិច្ច​នៅ​ទីក្រុង​មូស្គូ នា​ខែ​មេសា។

មក​ដល់​ពេលនេះ ចិន​មិនទាន់​ឆ្លើយតប​សំណើ​របស់​លោក ហ្សេឡេនស្គី នៅឡើយ​នោះ​ទេ ថា​តើ​លោក ស៊ី ជីនពីង យល់ព្រម​ជួប ឬ​មិន​ជួប។

បើ​តាម​អ្នក​សង្កេតការណ៍​ឲ្យ​ដឹង​ថា លោក ហ្សេឡេនស្គី ចង់​ជួប​លោក ស៊ី ដែល​អាច​នាំ​ឲ្យ​មាន​ការ​ដាក់​បញ្ចូល​នូវ​ចំណុច​ជាក់លាក់​ជាច្រើន ក្នុង​នោះ​ការ​ដក​ទ័ព​រុស្ស៊ី​ទាំងស្រុង​ចេញពី​អ៊ុយក្រែន និង​ការ​ដែល​ត្រូវ​ឱ្យ​រុស្ស៊ី​ទទួលស្គាល់​អធិបតេយ្យភាព​ដែនដី​អ៊ុយក្រែន ដោយ​យោង​តាម​កិច្ចព្រមព្រៀង​ព្រំដែន​រួម​ជាមួយ​គ្នា​ឆ្នាំ​១៩៩១ ដោយ​បាន​កំណត់​ខ្សែបន្ទាត់​ព្រំដែន​រវាង​ប្រទេស​ទាំង​ពីរ ហើយ​ឧបទ្វីប​គ្រីមៀរ ដែល​រុស្ស៊ី​យក​បាន​ពី​អ៊ុយក្រែន នៅ​ឆ្នាំ​២០១៤ តាមរយៈ​ការ​បោះឆ្នោត​ប្រជាមតិ ក៏​វា​ស្ថិត​នៅ​ក្នុង​ដែនដី​នៃ​ប្រទេស​អ៊ុយក្រែន ផង​ដែរ។

ប៉ុន្តែ​កន្លងមក រុស្ស៊ី​តែងតែ​ដាក់​គំនាប​ទៅ​លើ​អ៊ុយក្រែន ឲ្យ​ទទួលស្គាល់​គ្រីមៀរ ជា​ផ្លូវការ​ថា​ជា​ដែនដី​របស់​រុស្ស៊ី តែ​ប្រធានាធិបតី​អ៊ុយក្រែន ក្រោយ​ឆ្នាំ​២០១៤ រួម​ទាំង​លោក ហ្សេឡេនស្គី ប្រកាស​ដាច់ខាត​មិន​ទទួលស្គាល់​គ្រីមៀរ ជា​ដែនដី​របស់​រុស្ស៊ី​នោះ​ទេ។ ដូច្នេះ​អ្នក​សង្កេតការណ៍​មើល​ឃើញ​ថា លោក ហ្សេឡេនស្គី ពិត​ណាស់​នឹង​ដាក់ ២​ចំណុច​នេះ​បន្ថែម​ទៀត​ចូល​ទៅ​ក្នុង​ផែនការ​សន្តិភាព ១២​ចំណុច​របស់​ចិន។

តែ​បែប​នេះ ពិត​ណាស់​វា​នឹង​នាំ​ឱ្យ​ចិន​មិន​អាច​ទទួល​យក​បាន​នោះ​ទេ ព្រោះ​ចិន​ចង់​ឱ្យ​ភាគី​អ៊ុយក្រែន និង​រុស្ស៊ី ជជែក​គ្នា​ចំណុច​ទាំង​ពីរ​នេះ​នៅ​ឯ​តុ​ចរចា ជាជាង​ចិន​បញ្ចូល​ចំណុច​នេះ​ដែល​នាំ​ឱ្យ​រុស្ស៊ី​មិន​អាច​ទទួល​យក​បាន​នោះ។

ដោយសារតែ​ខ្វះ​ភាព​ចន្លោះ​ត្រង់ ២​ចំណុច​នេះ​ហើយ ដែល​អ្នក​សង្កេតការណ៍​របស់​ពួក​បស្ចិម​ប្រទេស រួម​ទាំង​ប្រមុខ​ការទូត​អាមេរិក Antony Bliken ព្រមាន​ថា ផែនការ​សន្តិភាព​របស់​ចិន មិន​អាច​យក​ទៅ​បញ្ចូល​ក្នុង​រូបមន្ត​បញ្ចប់​សង្គ្រាម​លើ​ទឹកដី​អ៊ុយក្រែន បាន​នោះ​ទេ។

បើ​ដូចនេះ ផែនការ​សន្តិភាព ១២​ចំណុច​របស់​ចិន ទំនង​មិន​អាច​ដំណើរការ​បាន​ទេ ហើយ​ការ​ចរចា​ក៏​មិន​អាច​ប្រព្រឹត្ត​ទៅ​បាន​ដែរ ហើយ​សង្គ្រាម​នៅ​លើ​ទឹកដី​អ៊ុយក្រែន នៅតែ​បន្ត គឺ​បន្ត​រហូត​រក​ឃើញ​អ្នក​ឈ្នះ និង​អ្នក​ចាញ់​ពិតប្រាកដ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស