ក្រុមអ្នកតស៊ូមតិនៅក្រៅស្រុក ថាការសម្រេចចិត្តរបស់អតីតយុវជនចលនាមាតាធម្មជាតិ ទៅចុះចូលជាមួយបក្សកាន់អំណាចជាសិទ្ធិក្នុងការជ្រើសរើសរបស់ពួកគេ ប៉ុន្តែនឹងធ្វើឲ្យខាតប្រយោជន៍ជាតិទៅថ្ងៃក្រោយ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១៣ មីនា នេះថា ការទាក់ទងដោយផ្ទាល់ពីសំណាក់មេដឹកនាំបក្សកាន់អំណាច លោក ហ៊ុន សែន ទៅអតីតក្រុមយុវជនការពារបរិស្ថានទាំងនោះ ដោយសារគាត់មើលឃើញពីប្រយោជន៍សម្រាប់នយោបាយ និងប្រយោជន៍សម្រាប់ក្រុមគ្រួសាររបស់គាត់ទៅថ្ងៃក្រោយ មិនមែនដោយសារតែប្រយោជន៍ប្រទេសជាតិនោះទេ។
អនុប្រធានវេទិកាពលរដ្ឋរូបនេះបញ្ជាក់ថា ការដឹកនាំរបស់មេដឹកនាំបក្សកាន់អំណាច លោក ហ៊ុន សែន ជិត ៤០ឆ្នាំមកនេះ គឺមានតែភាពវិនាសហិនហោចទៅៗតែប៉ុណ្ណោះ។ លោកបន្ថែមថា ការដឹកនាំរបស់លោក ហ៊ុន សែន បានបំផ្លាញទាំងធនធានធម្មជាតិនៅលើគោក និងក្រោមទឹក ដូចជាព្រៃឈើ រ៉ែ និងមច្ឆជាតិ ជាដើម ខណៈដែនអធិបតេយ្យរបស់កម្ពុជាក៏ត្រូវបាត់បង់បន្តិចម្តងៗថែមទៀត។
លោក ម៉ែន ណាត អះអាងថា ដើម្បីលុបបំបាត់ការរិះគន់ចំពោះការដឹកនាំមិនត្រឹមត្រូវរបស់ខ្លួន លោក ហ៊ុន សែន តែងប្រកាន់គោលការណ៍ផ្ទាល់មួយចំនួនចំពោះអ្នកដែលប្រឆាំងនឹងគាត់ ក្នុងនោះមានដូចជាការអូសទាញដោយការផ្តល់នូវផលប្រយោជន៍ផ្ទាល់ខ្លួន ប៉ុន្តែបើអូសទាញមិនបាន គឺគាត់នឹងបង្ខូចកេរ្តិ៍ឈ្មោះម្នាក់នោះ។ លោកបន្ថែមថា សម្រាប់អ្នកប្រឆាំងនៅក្នុងស្រុក គាត់នឹងគំរាមកំហែង សម្លុត ប៉ុន្តែបើពួកគេមិនខ្លាច គាត់នឹងបង្ក្រាប បើបង្ក្រាបហើយនៅតែមិនខ្លាចទៀត គាត់នឹងបញ្ជាឲ្យចាប់ខ្លួនតែម្តង។
កាលពីថ្ងៃទី១២ ខែមីនា ឆ្នាំ២០២៣ មេដឹកនាំបក្សកាន់អំណាច លោក ហ៊ុន សែន បានទម្លាយវីដេអូដែលគាត់បានទាក់ទងតាមរយៈប្រព័ន្ធតេឡេក្រាមដោយផ្ទាល់ជាមួយអតីតស្ថាបនិកអង្គការមាតាធម្មជាតិ លោក ស៊ីម សំណាង បន្ទាប់ពីអតីតសកម្មជនបរិស្ថានរូបនោះបានចុះចូលជាមួយគណបក្សប្រជាជនកម្ពុជា។
លោក ហ៊ុន សែន បានអះអាងតាមរយៈនៃការសន្ទនាតាមទូរសព្ទនៅពេលនោះថា ពួកគេគួរតែធ្វើការជាមួយរដ្ឋាភិបាល ជាជាងនាំគ្នាប្រឆាំងនឹងការដឹកនាំរបស់រដ្ឋាភិបាល។ លោក ហ៊ុន សែន អះអាងថា បើពួកគេមិនសហការជាមួយរដ្ឋាភិបាលទេ ពួកគេនឹងមិនអាចធ្វើអ្វីបានឡើយ ជាក់ស្តែងដូចសកម្មភាពរបស់ពួកគេដែលធ្លាប់ធ្វើកន្លងមក គឺមិនអាចធ្វើអ្វីបានទាំងអស់។
បុរសខ្លាំងរូបនេះបញ្ជាក់ថា បើពួកគេចាំតែបាតុកម្មប្រឆាំងនឹងរដ្ឋាភិបាល គឺមិនអាចធ្វើឲ្យកម្ពុជារីកចម្រើនបានទេ។ លោក ហ៊ុន សែន បន្ថែមថា តាមគម្រោងទៅថ្ងៃអនាគត រដ្ឋាភិបាលនឹងរៀបផែនការឲ្យកម្ពុជាក្លាយជាកម្ពុជាបៃតងជាមិនខាន។
ការអះអាងរបស់មេដឹកនាំបក្សកាន់អំណាច លោក ហ៊ុន សែន បែបនេះ ធ្វើឡើងបន្ទាប់ពីសកម្មជនបរិស្ថានមួយចំនួនបាននាំគ្នាទៅចុះចូលជាមួយបក្សកាន់អំណាចនៅពេលនេះ ដែលអ្នកទាំងនោះត្រូវបានរដ្ឋាភិបាលតែងតាំងឲ្យមានមុខងារ និងតួនាទីក្នុងក្រសួងនានាជាបន្តបន្ទាប់។
អតីតយុវជនបរិស្ថានមួយចំនួនបានឈប់ធ្វើការងារសង្គមជាមួយអង្គការចលនាមាតាធម្មជាតិ និងអង្គការសង្គមស៊ីវិលផ្សេងទៀត ដោយនាំគ្នាងាកទៅគាំទ្ររដ្ឋាភិបាលរបស់លោក ហ៊ុន សែន វិញ ប៉ុន្តែក្រោយពីការចុះចូលជាមួយគណបក្សប្រជាជនកម្ពុជា ពួកគេក៏បាននាំគ្នាអូសទាញយុវជនផ្សេងៗទៀតឲ្យទៅចុះចូលដូចខ្លួនដែរ។
ជាក់ស្តែង កាលពីពេលថ្មីៗនេះ អតីតសហស្ថាបនិកចលនាមាតាធម្មជាតិ លោក ម៉េង ហេង និងអតីតសកម្មជនបរិស្ថានកូនភ្លោះពីរនាក់ គឺលោក ជុំ ហួត និងលោក ជុំ ហួរ ព្រមទាំងអតីតសកម្មជន ១០០រាត្រី លោក មួង សូនី និងលោក មួង សុភ័ក្រ ជាដើម បាននាំគ្នាទៅចូលរួមជាមួយគណបក្សប្រជាជនកម្ពុជាក្រោមការដឹកនាំរបស់លោក ហ៊ុន សែន ជាបន្តបន្ទាប់ និងទទួលបានតួនាទីក្នុងជួររដ្ឋាភិបាលផងដែរ៕