27 C
Phnom Penh

លោក កឹម សុខា បាត់បង់​សិទ្ធិ​ទទួល​បាន​ជំនួយ​ពី​មេធាវី

ដោយ ឌឹ ខេមបូឌា ដេលី

បទវិភាគ

សហ​មេធាវី​របស់​លោក កឹម សុខា ចាត់ទុក​ការ​រារាំង​ពី​សំណាក់​កងកម្លាំង​ស្លៀកពាក់​ស៊ីវិល​ដែល​យាម​នៅ​មុខ​ផ្ទះ​របស់​លោក កឹម សុខា មិន​ឱ្យ​ពួកគេ​ចូល​ជួប​កូនក្ដី​របស់​ខ្លួន​ដើម្បី​ពិគ្រោះ​យោបល់​ច្បាប់​រៀបចំ​ពាក្យ​បណ្តឹង​ឧទ្ធរណ៍ ថា​ជា​រំលោភ​សិទ្ធិ​ទទួល​បាន​ជំនួយ​មេធាវី។

ក្នុង​សេចក្ដី​ថ្លែងការណ៍​ការ​រំលោភ​សិទ្ធិ​ទទួល​បាន​ជំនួយ​មេធាវី​របស់​លោក កឹម សុខា ដែល​ចេញ​ដោយ​សហ​មេធាវី​ការពារ​ក្ដី​ឲ្យ​លោក កឹម សុខា បាន​ឲ្យ​ដឹង​ថា នា​រសៀល​ថ្ងៃទី​១៤ ខែ​មីនា ឆ្នាំ​២០២៣ នេះ សហ​មេធាវី​ការពារ​ក្តី​បាន​ទៅ​ផ្ទះ​លោក កឹម សុខា ដើម្បី​ជួប​កូនក្ដី​នៅ​គេហដ្ឋាន​របស់​លោក​ផ្ទាល់។

ការ​ទៅ​ជួប​នេះ ដោយ​សហ​មេធាវី​អះអាង​ថា​ដើម្បី​ពិគ្រោះ​យោបល់​ច្បាប់ និង​រៀបចំ​ពាក្យ​បណ្តឹង​ឧទ្ធរណ៍​លើ​សាលក្រម​ព្រហ្មទណ្ឌ កាល​ថ្ងៃទី​៣ ខែ​មីនា ឆ្នាំ​២០២៣ របស់​សាលាដំបូង​រាជធានី​ភ្នំពេញ បន្ទាប់ពី​កូនក្ដី​ត្រូវ​តុលាការ​ដាក់​ឲ្យ​ស្ថិត​នៅ​ក្រោម​ការ​ត្រួតពិនិត្យ​តាម​ផ្លូវ​តុលាការ (ឃុំ​ខ្លួន​ក្នុង​ផ្ទះ)។

នៅ​ពេល​ពួកគេ​ទៅ​ដល់​ខាងមុខ​ផ្ទះ​របស់​លោក កឹម សុខា បែរ​ជា​ត្រូវ​បាន​កងកម្លាំង​ស្លៀកពាក់​ស៊ីវិល​ដែល​យាម​នៅ​មុខ​ផ្ទះ​គាត់ បាន​រារាំង និង​មិន​អនុញ្ញាត​ឱ្យ​សហ​មេធាវី​ជួប​ពិគ្រោះ​យោបល់​ច្បាប់​ជាមួយ​កូនក្ដី​របស់​ខ្លួន​ឡើយ ដោយ​ពួកគេ​តម្រូវ​ឲ្យ​សហ​មេធាវី​សុំ​ការ​អនុញ្ញាត​ពី​ព្រះរាជអាជ្ញា​ជា​មុន​សិន​ទៅវិញ។

សហ​មេធាវី​ចាត់ទុក​ការ​រារាំង​របស់​កងកម្លាំង​ស្លៀកពាក់​ស៊ីវិល​ដែល​មិន​អនុញ្ញាត​ឲ្យ​ជួប​កូនក្ដី​នេះ ថា​ជា​ការ​រំលោភ​សិទ្ធិ​ទទួល​បាន​ជំនួយ​មេធាវី​របស់​លោក កឹម សុខា ខណៈ​ការ​តម្រូវ​នេះ សហ​មេធាវី​ថា​មិន​អាច​អនុវត្ត​តាម​ការ​ណែនាំ​ដោយ​ផ្ទុយ​នឹង​ច្បាប់​ក្រម និង​វិធាន​ជា​ធរមាន​ដែល​គ្រប់គ្រង​វិជ្ជាជីវៈ​មេធាវី​នោះ​ឡើយ។

សហ​មេធាវី​លើកឡើង​ថា ចាប់ពី​ពេល​នេះ​តទៅ សហ​មេធាវី​មិន​អាច​អនុវត្ត​សិទ្ធិ​បំពេញ​កាតព្វកិច្ច និង​ទំនួល​ខុសត្រូវ​ចំពោះ​លោក កឹម សុខា និង​រឿងក្ដី​បច្ចុប្បន្ន​របស់​គាត់​តទៅទៀត​បាន​ឡើយ ហើយ​សិទ្ធិ​ទទួល​បាន​ជំនួយ​មេធាវី​ដែល​មាន​ចែង​ក្នុង​ច្បាប់​ដែល​លោក កឹម សុខា ត្រូវ​ទទួល​បាន​ក៏​ត្រូវ​បាន​រំលោភ​យ៉ាង​ធ្ងន់ធ្ងរ លើកលែង​តែ​មាន​ការ​កែប្រែ​ជា​វិជ្ជមាន និង​ទាន់​ពេលវេលា។

សហ​មេធាវី​ការពារ​ក្ដី​ឲ្យ​លោក កឹម សុខា គឺ​អ្នកស្រី ម៉េង សុភារី បាន​សរសេរ​លើ​ហ្វេសប៊ុក​កាលពី​ថ្ងៃទី​១៤ មីនា ថា កូនក្ដី​របស់​ពួកគាត់​បាន​បាត់បង់​សិទ្ធិ​ទទួល​បាន​ជំនួយ​មេធាវី ដែល​ជា​ផ្នែក​មួយ​នៃ​ការ​បាត់បង់​សិទ្ធិ​ទទួល​បាន​ការ​ជំនុំជម្រះ​ដោយ​យុត្តិធម៌។

អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ លោក គឹម សុខ បាន​លើកឡើង​ក្នុង​កម្មវិធី IDEA TALK នៃ​សារព័ត៌មាន The Cambodia Daily កាលពី​ថ្ងៃទី​១៤ មីនា ថា ប្រសិនបើ​សមត្ថកិច្ច​រារាំង​សហ​មេធាវី​លោក កឹម សុខា មិន​ឲ្យ​ចូល​ជួប​កូនក្ដី​មែន​នោះ វា​ជា​រឿង​ខុស​ច្បាប់ ខណៈ​ការ​ប្ដឹង​ជំទាស់​ទៅ​សាលា​ឧទ្ធរណ៍ មេធាវី​មិន​អាច​សម្រេច​ជំនួស​កូនក្ដី​បាន​ឡើយ។

លោក គឹម សុខ អះអាង​ថា​ចំពោះ​រឿង​កាត់ក្ដី​ឲ្យ​លោក កឹម សុខា មាន​ទោស​ចំនួន ២៧​ឆ្នាំ​ដើម្បី​បើក​ផ្លូវ​ឲ្យ​លោក ហ៊ុន ម៉ាណែត ឡើង​កាន់​អំណាច​គឺជា​ការ​បំពាន​ច្បាប់ ព្រោះ​សូម្បី​សហ​មេធាវី​លោក កឹម សុខា ដែល​ទៅ​ជួប​កូនក្ដី​ដោយ​ធ្វើ​ទៅ​តាម​ច្បាប់​ក៏​ត្រូវ​សមត្ថកិច្ច​រារាំង​ដោយ​បំពាន​ច្បាប់​ដែរ។

លោក គឹម សុខ ថា​ការ​ផ្ទេរ​អំណាច​ពី​លោក ហ៊ុន សែន ទៅ​លោក ហ៊ុន ម៉ាណែត នេះ​មិន​ខុស​ពី ប៉ុល ពត ឡើយ ដោយសារ ប៉ុល ពត មុន​នឹង​ឡើង​កាន់​តំណែង​ជា​បង​ធំ​ទី​១ នោះ សាឡុត ស ឬ ប៉ុល ពត បាន​សម្លាប់ ទូ សមុត្រ ចោល ខណៈ​សមាជិក ២០​នាក់​ត្រូវ​សម្លាប់​នៅ​សល់​តែ ៤​នាក់​ប៉ុណ្ណោះ។

តុលាការ​ក្រុង​ភ្នំពេញ​កាលពី​ថ្ងៃទី​៣ ខែ​មីនា ឆ្នាំ​២០២៣ កន្លងទៅ បាន​ប្រកាស​ក្រម​កាត់ទោស​លោក កឹម សុខា ចំនួន ២៧​ឆ្នាំ​ពី​បទ «សន្ទិដ្ឋភាព​ជាមួយ​បរទេស ឬ​បទ​ឃុបឃិត​ត្រូវរ៉ូវ​គ្នា​ជាមួយ​បរទេស» ដែល​រដ្ឋាភិបាល​លោក ហ៊ុន សែន ថា​ពាក់ព័ន្ធ​ជាមួយ​អាមេរិក។

ត្បិត​ទោស ២៧​ឆ្នាំ តុលាការ​កម្ពុជា​មិន​ដាក់​គុក​លោក កឹម សុខា ក៏​ពិត​មែន ប៉ុន្តែ​តុលាការ​បាន​ឃុំ​ខ្លួន​លោក កឹម សុខា នៅ​ក្នុង​ផ្ទះ ដោយ​ហាម​ជួប​ខ្មែរ និង​ជួប​បរទេស ដែល​ទំនង​សំដៅ​លើ​ស្ថានទូត​ប្រទេស​លោក​សេរី​ដែល​កន្លងមក​តែង​ទៅ​ជួប​ពិភាក្សា​ជាមួយ​លោក​នៅ​គេហដ្ឋាន​របស់​លោក​ផ្ទាល់។

ក្រៅពី​កាត់ទោស ២៧​ឆ្នាំ និង​ហាមឃាត់​ខ្មែរ ព្រមទាំង​ជនបរទេស​មិន​ឱ្យ​ជួប​ហើយ ប្រធាន​ក្រុមប្រឹក្សា​ជំនុំជម្រះ​សាលាដំបូង​រាជធានី​ភ្នំពេញ ក៏​បាន​ដកហូត​សិទ្ធិ​បោះឆ្នោត សិទ្ធិ​ឈរ​ឈ្មោះ​ឲ្យ​គេ​បោះឆ្នោត និង​សិទ្ធិ​ធ្វើ​សកម្មភាព​នយោបាយ​ពេញ​មួយ​ជីវិត​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស