ជាង ២ឆ្នាំហើយដែលពិភពលោកចេះតែទុកឱកាសឱ្យរបបសឹកភូមា បន្តគាបសង្កត់ និងវាយបង្ក្រាបអ្នកប្រជាធិបតេយ្យ។ ក្រុមអ្នកប្រជាធិបតេយ្យដែលត្រូវរបបសឹកចាប់ខ្លួនជាង ១៦០០០នាក់ និងស្លាប់ជាង ៣០០០នាក់។
អ្នកនយោបាយសំខាន់ៗ រួមទាំងអ្នកស្រី អ៊ុងសាន ស៊ូជី ជើងឯកប្រជាធិបតេយ្យអាស៊ីនៅបន្តឃុំខ្លួនដោយប្រឈមនឹងទោសជាង ៣០ឆ្នាំដែលរបបសឹកភូមាទម្លាក់កំហុសលើអ្នកស្រី។
មិនមែនតែអ្នកស្រី ស៊ូជី ម្នាក់ទេដែលប្រឈមមុខនឹងទោសដ៏ធ្ងន់ធ្ងរដូចនេះ ក្នុងនោះមានប្រធានាធិបតី និងអ្នកនយោបាយនៃក្រុមអ្នកប្រជាធិបតេយ្យជាង ៣០០នាក់កំពុងជាប់ឃុំ ក៏ប្រឈមមុខធ្ងន់ធ្ងរដែរ។
ក្រុមប្រឹក្សាសន្តិសុខអង្គការសហប្រជាជាតិ ក៏បានអំពាវនាវឱ្យមានការដោះលែងអ្នកស្រី ស៊ូជី និងអ្នកនយោបាយទាំងអស់ ដើម្បីបើកផ្លូវទៅរកការស្ដារប្រជាធិបតេយ្យឡើងវិញ។ ប្រទេសនៅក្នុងតំបន់ភាគច្រើនចង់ឃើញការបញ្ចប់របបសឹកជាបន្ទាន់ ក្នុងនោះមានទាំងក្រុមប្រទេសនៃសមាគមអាស៊ានផងដែរ។
ប្រទេសដែលមានឥទ្ធិពលនៅក្នុងតំបន់នេះ ដូចជាឥណ្ឌូនេស៊ី ម៉ាឡេស៊ី សិង្ហបុរី និងហ្វីលីពីន តែងតែបញ្ចេញប្រតិកម្មឱ្យរបបសឹកភូមា ត្រូវអនុវត្តគោលការណ៍ ៥ចំណុចរបស់អាស៊ានដែលជាគន្លឹះដោះស្រាយវិបត្តិនៅភូមា។
នៅថ្ងៃនេះ នាយករដ្ឋមន្ត្រី លី សៀនឡុង និងប្រធានាធិបតីឥណ្ឌូនេស៊ី ចូកូ វីដូដូ ដែលបានជួបមេដឹកនាំទាំងពីរ រួមនឹងនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហិម និងប្រធានាធិបតីហ្វីលីពីន ហ្វីឌីណង់ ម៉ាកូសជ័រ បានសន្យារួមគ្នាគាបសង្កត់របបសឹក ដោយសហការជាមួយអង្គការសហប្រជាជាតិឱ្យដោះលែងអ្នកទោសមនសិការ និងអ្នកទោសនយោបាយទាំងអស់ ហើយធ្វើដំណើរទៅរកការដឹកនាំបែបប្រជាធិបតេយ្យឡើងវិញ។
មិនថាឡើយប្រទេសក្នុងសមាគមអាស៊ានទេដែលនៅតែបន្តគាបសង្កត់របបសឹកភូមា ក្រុមប្រទេសប្រជាធិបតេយ្យធំនៅអឺរ៉ុប មានក្រុមសហភាពអឺរ៉ុប ២៧ប្រទេស ប្រទេសជប៉ុន អូស្ត្រាលី កាណាដា សហរដ្ឋអាមេរិក អង់គ្លេស កូរ៉េខាងត្បូង នៅតែបន្តដាក់គំនាបទៅលើរបបសឹក។
តែជាការកត់សម្គាល់ ប្រទេសធំពីរក្នុងតំបន់ដែលមានព្រំដែនជាប់នឹងប្រទេសភូមា មានដូចជាប្រទេសចិន និងឥណ្ឌា មិនមានភាពរឹងមាំ និងប្រាកដប្រជាក្នុងការដាក់គំនាបទៅលើពួកយោធាភូមានោះទេ ជាពិសេស គឺប្រទេសចិន។
សារព័ត៌មានមួយនៃប្រទេសភូមា ឈ្មោះថា Mizzima បានធ្វើការកត់សម្គាល់របស់ខ្លួនថា ក្នុងតំបន់អាស៊ី ប្រទេសដែលមានឥទ្ធិពលខ្លាំងលើពួកយោធាមានតែប្រទេសចិន។ តែប្រទេសដ៏ធំនេះមិនដែលពោលពាក្យថា របបសឹកភូមាជារបបខុសច្បាប់ម្ដងណាទេ ហើយចិននេះក៏មិនបានចូលរួមជាមួយនឹងប្រទេសនៃក្រុមប្រឹក្សាសន្តិសុខអង្គការសហប្រជាជាតិ ថ្កោលទោស ឬដាក់ទណ្ឌកម្មលើពួកយោធាភូមាដែរ។
ប្រទេសនេះចូលចិត្តប្រើពាក្យថា គេមិនត្រូវលូកដៃចូលរឿងកិច្ចការផ្ទៃក្នុងប្រទេសភូមាទេ ហើយថាត្រូវទុកឱ្យភាគីពាក់ព័ន្ធនៅភូមាគេដោះស្រាយដោយខ្លួនគេផ្ទាល់។
Mizzima បានធ្វើការកត់សម្គាល់ទៀតថា ប្រទេសធំនេះដែលសុំកុំឱ្យមានការលូកដៃចូលបញ្ហាភូមា តែប្រទេសនេះតែងតែបញ្ជូនអ្នកការទូតរបស់ខ្លួនដោយស្ងាត់ៗទៅជួបមេដឹកនាំយោធាភូមា។ ជំនួបនេះតែងតែបែកធ្លាយថា ចិននៅតែសន្យាជួយពង្រឹងការដឹកនាំរបស់ពួកយោធាតាមរយៈការផ្ដល់ជំនួយផ្សេងៗ និងតាមរយៈការពង្រីកមុខជំនួញពាណិជ្ជកម្ម ដែលប្រទេសប្រជាធិបតេយ្យមួយចំនួនបានបិទទំនាក់ទំនងពាណិជ្ជកម្មជាមួយនឹងរបបសឹកទៅហើយនោះ។
ជំនួបស្ងាត់ៗរបស់តំណាងរដ្ឋាភិបាលចិន និងមេដឹកនាំយោធាភូមា ដែលមានជាញឹកញាប់ ចិនមិនដែលលើកឡើង ឬជំរុញឱ្យរបបសឹកបោះបង់ចោលការដឹកនាំរបស់ខ្លួន ហើយផ្ទេរអំណាចទៅរដ្ឋាភិបាលស្របច្បាប់ម្ដងណាទេ។
រយៈពេល ៣ខែមកនេះ ក្រុងប៉េកាំង បានបញ្ជូនបេសកជនរបស់ខ្លួន គឺលោក Deng Xijun ឱ្យជួបមេដឹកនាំយោធាភូមា មានចំនួន ២ដងមកហើយ។ ជំនួបរបស់លោក Deng Xijun ជាមួយមេដឹកនាំរបបសឹក បានធ្វើឱ្យរបបសឹកមួយក្នុងសមាគមអាស៊ីអាគ្នេយ៍កាន់តែរឹងមាំថែមទៀត។
តាម Mizzima ក្រុងប៉េកាំងមិនត្រឹមតែមិនចូលរួមនឹងសហគមន៍អន្តរជាតិដាក់ទណ្ឌកម្មសេដ្ឋកិច្ចទៅលើពួកយោធានោះទេ គឺចិនកាន់តែពង្រឹងមុខជំនួញរបស់ខ្លួនថែមទៀត។
យោងតាមវិទ្យាស្ថានយុទ្ធសាស្ត្រ និងនយោបាយអំពីប្រទេសភូមា គម្រោងវិនិយោគទុនរបស់ចិន ទោះជាចិនបារម្ភអំពីហានិភ័យ ក៏ប្រទេសនេះនៅបន្តមុខជំនួញជាមួយយោធាភូមា។ តាមវិទ្យាស្ថាននេះ ចិននៅបន្តរក្សាទុកគម្រោងជំនួញយ៉ាងតិច ៣០០គម្រោង។
តែគម្រោងដែលស្រុតចុះ គឺគម្រោងវិស័យកាត់ដេរ។ គម្រោងនេះធ្លាក់ចុះស្ទើរតែទាំងស្រុង ព្រោះផលិតផលកាត់ដេរត្រូវពឹងលើទីផ្សារនៅអឺរ៉ុប និងអាមេរិក។ ចិនជាប្រទេសមានជំនួញលើវិស័យកាត់ដេរធំជាងគេនៅភូមា។
តាមវិទ្យាស្ថាននេះ ក្រោយពីសហភាពអឺរ៉ុប និងអាមេរិកបិទទីផ្សារពាណិជ្ជកម្មជាមួយរបបសឹកភូមា ដែលធ្វើឱ្យប៉ះពាល់ជំនួញវិស័យកាត់ដេររបស់ចិន គេសង្កេតឃើញចិនបានពង្រីកគម្រោងជំនួញតូចៗជាច្រើនជាមួយពួកយោធា ជាពិសេសនៅតំបន់ជាប់ព្រំដែនចិន។
ចំណែកសារព័ត៌មានភូមា Mizzima បន្តកត់សម្គាល់ទៀតថា ជំនួញដែលចិន និងពួកយោធាភូមាពង្រីកថែមទៀត គឺជំនួញឈើហ៊ុប និងការរុករករ៉ែ។ Mizzima ថារយៈពេលប៉ុន្មានខែចុងក្រោយនេះ ចិនសឹងតែលែងលើកឡើងទៅហើយអំពីការផ្លាស់ប្ដូររបបសឹកភូមា ទៅរករបបប្រជាធិបតេយ្យវិញ៕