មេដឹកនាំចិន លោក ស៊ី ជីនពីង សម្ដែងការគាំទ្រឥតងាករេចំពោះប្រធានាធិបតីវេណេហ្ស៊ុយអេឡា លោក នីកូឡាស ម៉ាឌូរ៉ូ ដែលកំពុងស្ថិតនៅក្រោមសម្ពាធកាន់តែខ្លាំងឡើងពីសំណាក់កងទ័ពសហរដ្ឋអាមេរិក ដែលចង់ឲ្យមេដឹកនាំផ្ដាច់ការនៅអាមេរិកខាងត្បូង ចុះចេញពីអំណាច។
កាលពីថ្ងៃទី២៣ វិច្ឆិកា ក្នុងខួបកំណើតលោក ម៉ាឌូរ៉ូ ឈានចូលអាយុ ៦៣ឆ្នាំ ប្រធានាធិបតីចិន ស៊ី ជីនពីង បានបញ្ជូនសារអបអរសាទរ តែសាររបស់មេដឹកនាំចិនរូបនេះបានបញ្ជាក់ពីការប្ដេជ្ញារបស់លោក នៅតែបន្តគាំទ្រចំពោះមេដឹកនាំនៃប្រទេសវេណេហ្ស៊ុយអេឡា ម្នាក់នេះ ដែលកំពុងពុះពារនឹងសម្ពាធពីសហរដ្ឋអាមេរិកបង្ខំឱ្យចុះចេញពីតំណែង ក្រោមបទចោទថាលោក ម៉ាឌូរ៉ូ ជាមេខ្លោងអង្គការភេរវកម្មគ្រឿងញៀន។
សហរដ្ឋអាមេរិក បានចាត់ថ្នាក់ជាផ្លូវការលើបណ្ដាញក្រុម Cartel de los Soles នៃប្រទេសវេណេហ្ស៊ុយអេឡា ថាជាអង្គការភេរវករបរទេសដែលប្រធានាធិបតីលោក ម៉ាឌូរ៉ូ និងមន្ត្រីជាន់ខ្ពស់ផ្សេងទៀតជាមេខ្លោង។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃអង្គារ ទី២៥ ខែវិច្ឆិកា ឆ្នាំ២០២៥។
រដ្ឋមន្ត្រីការបរទេសអាមេរិក លោក Marco Rubio បាននិយាយថា សហរដ្ឋអាមេរិកចាត់ថ្នាក់ក្រុម Cartel of the Suns ជាអង្គការភេរវករបរទេស FTO ហើយមន្ត្រីអាមេរិកាំងឯទៀតនិយាយថា Cartel of the Suns កំពុងសហការជាមួយក្រុមជនអន្ធពាល Tren de Aragua វេណេហ្ស៊ុយអេឡា ដែលត្រូវបានសេតវិមាន ចោទថាមានទំនាក់ទំនងជាមួយលោក ម៉ាឌូរ៉ូ ហើយក៏ត្រូវបានចាត់ថ្នាក់ជាអង្គការភេរវករបរទេស FTO។
ប៉ុន្តែលោក ម៉ាឌូរ៉ូ បានច្រានចោលការចោទប្រកាន់ទាំងអស់នេះ ដោយចោទបកវិញថា សហរដ្ឋអាមេរិកចាត់ថ្នាក់លើក្រុមដែលគ្មានរូបរាងអ្វីឡើយ។ លោក ម៉ាឌូរ៉ូ និងរដ្ឋាភិបាលរបស់លោក ចោទប្រកាន់សហរដ្ឋអាមេរិក ថាកំពុងស្វែងរកការផ្លាស់ប្ដូររបបដឹកនាំនៅវេណេហ្ស៊ុយអេឡា និងកំពុងបង្កអស្ថិរភាពក្នុងតំបន់អាមេរិកខាងត្បូង។
សហរដ្ឋអាមេរិក កំពុងបង្កើនវត្តមានទ័ពយ៉ាងខ្លាំងនៅតំបន់សមុទ្រការីបៀន ដោយដាក់ពង្រាយនាវាចម្បាំង និងក្រុមនាវាផ្ទុកយន្តហោះ USS Gerald Ford កើនឡើងជិត ២០គ្រឿង។ នាវា USS Gerald Ford កំពុងផ្ទុកយន្តហោះចម្បាំង ៧០គ្រឿង។ ជាមួយគ្នានេះ សហរដ្ឋអាមេរិកក៏បានដាក់ពង្រាយយន្តហោះចម្បាំង F-35 ចំនួន ១០គ្រឿងនៅលើកោះ Perto Rico ដែលជាដែនកោះស្វយ័តក្រោមសហរដ្ឋអាមេរិក ស្ថិតនៅទល់មុខនឹងឆ្នេរសមុទ្រវេណេហ្ស៊ុយអេឡា។ វត្តមានគ្រឿងសព្វាវុធអាមេរិកាំងកាន់តែមានចំនួនកើនឡើង ជាមួយនឹងកងទ័ពក៏កើនឡើងជិត ២០០០០នាក់ដែរ។
កងនាវាចម្បាំង និងយន្តហោះចម្បាំងអាមេរិកាំង ដែលកំពុងធ្វើសកម្មភាពយោធាក្បែរនឹងឆ្នេរសមុទ្រវេណេហ្ស៊ុយអេឡា បានវាយប្រហារលើកាណូតបើកចេញពីឆ្នេរសមុទ្រវេណេហ្ស៊ុយអេឡា ដោយកម្ទេចជាង ២០គ្រឿង សម្លាប់មនុស្ស ៨៣នាក់។ ករណីនេះ មានការតាមដានពិនិត្យពីមជ្ឈដ្ឋានអ្នកច្បាប់ និងសមាជិកសភាអាមេរិកាំងនៅក្រុងវ៉ាស៊ីនតុន ដែលមើលឃើញថាការវាយប្រហារនោះអាចខុសច្បាប់អន្តរជាតិ។
លោក ដូណាល់ ត្រាំ និងរដ្ឋការរបស់លោក ចាត់ទុកជាក្រុមភេរវករគ្រឿងញៀនដែលត្រូវតែកម្ទេច តែវាជារូបភាពត្រៀមវាយចូលប្រទេសវេណេហ្ស៊ុយអេឡា ក្រោយពីលោក ត្រាំ បញ្ជាក់ថា ប្រតិបត្តិការដំណាក់កាលទី២ គឺវាយលើគោលដៅបណ្ដាញភេរវកម្មគ្រឿងញៀននៅលើទឹកដីវេណេហ្ស៊ុយអេឡា ហើយរបបលោក ម៉ាឌូរ៉ូ ក៏នឹងត្រូវកម្ទេចផងដែរ។
លោកប្រធានាធិបតីចិន ស៊ី ជីនពីង បញ្ជាក់ក្នុងលិខិតរបស់លោកដែលផ្ញើជូនលោក ម៉ាឌូរ៉ូ បានបន្តថា ទីក្រុងប៉េកាំង មើលឃើញលោកប្អូនប្រុសមិនមែនកំពុងដឹកនាំរបបភេរវកម្មអ្វីនោះទេ តែការពិត សហរដ្ឋអាមេរិកកំពុងយកលេសបង្កអស្ថិរភាពនៅតំបន់ ហើយចង់ធ្វើឱ្យចលាចលនយោបាយនៅវេណេហ្ស៊ុយអេឡា ក្រោមផែនការឈ្លានពានផ្ដួលមេដឹកនាំស្របច្បាប់នៃប្រទេសអធិបតេយ្យមួយតែប៉ុណ្ណោះ។
សាររបស់លោក ស៊ី បង្ហាញពីការថ្កោលទោសសកម្មភាពកងទ័ពអាមេរិកាំង ដោយទាមទារឱ្យសហរដ្ឋអាមេរិកបិទចោលយុទ្ធនាការយោធាសំដៅផ្ដួលប្រព័ន្ធដឹកនាំរបស់លោក ម៉ាឌូរ៉ូ។ បន្ថែមលើសពីនេះ អ្នកនាំពាក្យក្រសួងការបរទេសចិន អ្នកស្រី Mao Ning បានហៅការដាក់ឈ្មោះលោក ម៉ាឌូរ៉ូ ក្នុងបញ្ជីអង្គការភេរវកម្មបរទេស គឺជាការលាបពណ៌ ហើយឈានដល់ការប្រើកម្លាំងទ័ពឈ្លានពានប្រទេសមួយនៅតំបន់អាមេរិកខាងត្បូង ក្នុងផលប្រយោជន៍ភូមិសាស្ត្រនយោបាយ និងសេដ្ឋកិច្ច។
កាលពីសប្ដាហ៍មុន លោក នីកូឡាស ម៉ាឌូរ៉ូ បានបញ្ជូនលិខិតទៅជូនប្រធានាធិបតីរុស្ស៊ី ប្រធានាធិបតីចិន និងប្រធានាធិបតីអ៊ីរ៉ង់ ឱ្យជួយការពាររបបរបស់លោក ដែលកំពុងធ្លាក់ក្នុងយុទ្ធសាស្ត្រសង្គ្រាមគ្រឿងញៀនពីលោក ដូណាល់ ត្រាំ។ ទាំងរុស្ស៊ី ចិន និងអ៊ីរ៉ង់ បានចេញសេចក្ដីថ្លែងការណ៍ដាច់ដោយឡែកពីគ្នា ដោយប្រកាសថ្កោលទោសសហរដ្ឋអាមេរិក និងទាមទារឱ្យផ្អាកសកម្មភាពយោធាជាបន្ទាន់។
ឥឡូវនេះ សភាពការណ៍កាន់តែផុយស្រួយ សហរដ្ឋអាមេរិកប្រកាសព្រមានជើងហោះហើរកុំបន្តហោះហើរលើលម្ហអាកាសវេណេហ្ស៊ុយអេឡា និងសមុទ្រការីបៀន ព្រោះកងយន្តហោះចម្បាំងសហរដ្ឋអាមេរិក កំពុងហោះហើរស៊ើបការណ៍។
គេសង្កេតឃើញសហភាពអឺរ៉ុប និងប្រទេសជាច្រើន បានសម្រេចបញ្ចៀសការហោះហើរលើលម្ហអាកាសវេណេហ្ស៊ុយអេឡា និងលម្ហអាកាសតំបន់សមុទ្រការីបៀន ទៅតាមការព្រមានពីសហរដ្ឋអាមេរិក៕
© 2025, ឌឹ ខេមបូឌា ដេលី. All rights reserved.