34 C
Phnom Penh

លោក ស៊ី ចាប់ផ្ដើម​ទស្សនកិច្ច​នៅ​រុស្ស៊ី​សប្ដាហ៍​ក្រោយ​ជាមួយ​នឹង​ក្ដី​សង្ឃឹម​ថា​ជួយ​ឱ្យ​អ៊ុយក្រែន​មាន​សន្តិភាព

ដោយ ឌឹ ខេមបូឌា ដេលី

បទវិភាគ

ប្រធានាធិបតី​ចិន ស៊ី ជីនពីង នឹង​ធ្វើ​ទស្សនកិច្ច​ទៅ​កាន់​ទីក្រុង​មូស្គូ រយៈពេល​បី​ថ្ងៃ​នៅ​សប្ដាហ៍​ក្រោយ​ដោយ​ចាប់ផ្ដើម​ពី​ថ្ងៃ​ចន្ទ​រហូត​ដល់​ថ្ងៃ​ពុធ។

ក្រសួង​ការបរទេស​ចិន បាន​ប្រកាស​ថា ទស្សនកិច្ច​របស់​លោក ស៊ី ធ្វើឡើង​តាម​ការ​អញ្ជើញ​របស់​ប្រធានាធិបតី​រុស្ស៊ី វ៉្លាឌីមៀ ពូទីន ដែល​ទាំង​លោក ពូទីន និង​លោក ស៊ី បាន​ជួប​គ្នា​ម្តង​រួច​ទៅ​ហើយ​កាលពី​ឆ្នាំ​២០២២ នៅ​លើ​ទឹកដី​នៃ​ប្រទេស​កាហ្សាក់ស្ថាន។

ទស្សនកិច្ច​របស់​លោក ស៊ី ទៅ​កាន់​ទីក្រុង​មូស្គូ នៅ​សប្តាហ៍​ក្រោយ​នេះ លោក​ត្រូវ​ជួប​សមភាគី​រុស្ស៊ី វ៉្លាឌីមៀ ពូទីន ទី​មួយ​សំដៅ​ពង្រឹង​កិច្ច​សហប្រតិបត្តិការ​ទ្វេភាគី ហើយ​ទី​២ លោក ស៊ី ត្រូវ​គេ​រំពឹង​ថា​អាច​នឹង​លាតត្រដាង ឬ​ក៏​ពន្យល់​លោក ពូទីន អំពី​គោលបំណង​របស់​ចិន ដែល​ចង់​ដើរ​តួនាទី​ជា​អ្នក​សម្របសម្រួល និង​ជា​អ្នក​បង្កើត​ឲ្យ​មាន​រូបមន្ត​ដើម្បី​ធ្វើ​ឲ្យ​មាន​ការ​បញ្ចប់​សង្គ្រាម​លើ​ទឹកដី​អ៊ុយក្រែន។

ចិន​បាន​បញ្ចេញ​ផែនការ​សន្តិភាព ១២​ចំណុច​ពាក់ព័ន្ធ​នឹង​សង្គ្រាម​រុស្ស៊ី និង​អ៊ុយក្រែន។ ផែនការ ១២​ចំណុច​នេះ ចិន​បាន​ប្រកាស​ជា​សាធារណៈ ហើយ​ធ្វើ​ឲ្យ​មាន​ការ​ភ្ញាក់ផ្អើល​នៅ​ឯ​កិច្ចប្រជុំ​នៃ​មហាសន្និបាត​អង្គការ​សហប្រជាជាតិ ដែល​ពេល​នោះ​អ្នក​ការទូត ១៩៣​ប្រទេស​ចូលរួម​ក្នុង​សាល​ប្រជុំ​ដើម្បី​រំលឹក​អំពី​ខួប ១​ឆ្នាំ​ដែល​រុស្ស៊ី​លើក​ទ័ព​លុកលុយ​ប្រទេស​អ៊ុយក្រែន នៅ​ថ្ងៃទី​២៤ ខែ​កុម្ភៈ ឆ្នាំ​២០២២។ នៅ​ថ្ងៃ​នោះ​ហើយ​ដែល​តំណាង​ចិន នៅ​អង្គការ​សហប្រជាជាតិ​បញ្ចេញ​ផែនការ​សន្តិភាព ១២​ចំណុច ដើម្បី​ធ្វើ​ឲ្យ​អ៊ុយក្រែន និង​រុស្ស៊ី​បញ្ចប់​ការ​ប្រយុទ្ធ​គ្នា។

រដ្ឋមន្ត្រី​ការបរទេស​ចិន Qin Gang បាន​ភ្ជាប់​ទូរស័ព្ទ​ទៅ​សមភាគី​អ៊ុយក្រែន លោក ឌីមេទ្រី កូលីបា កាលពី​ថ្ងៃ​ព្រហស្បតិ៍ ថា ទស្សនកិច្ច​របស់​លោក ស៊ី ជីនពីង ជា​ការ​បង្ហាញ​ថា​ចិន​ចង់​ឃើញ​អ៊ុយក្រែន និង​រុស្ស៊ី​បញ្ចប់​សង្គ្រាម​ជាមួយ​គ្នា​ដោយ​ដំណោះស្រាយ​នយោបាយ​រួម​គ្នា គឺ​ការ​ចរចា។

រដ្ឋមន្ត្រី​ការបរទេស​ចិន បាន​បញ្ជាក់​ទៀត​ថា ចិន​តែងតែ​ជំរុញ​ឲ្យ​មាន​ការ​ចរចា​រវាង​ភាគី​ប្រយុទ្ធ​គ្នា​ទាំង​ពីរ​នេះ ហើយ​ចិន​តែងតែ​អំពាវនាវ​ដល់​សហគមន៍​អន្តរជាតិ​រួម​គ្នា​បង្កើត​ឲ្យ​បាន​នូវ​គោលការណ៍​ដើម្បី​ធ្វើ​ឲ្យ​មាន​សន្តិភាព​នៅ​អ៊ុយក្រែន។

ចិន​ជា​ប្រទេស​មួយ​ដែល​មាន​ឥទ្ធិពល​នៅ​អង្គការ​សហប្រជាជាតិ ហើយ​ចិន​ជា​សមាជិក​ក្រុមប្រឹក្សា​អង្គការ​សហប្រជាជាតិ តែ​ចិន​មិន​ដែល​បោះឆ្នោត​រួម​ជាមួយ​នឹង​ប្រទេស​ជាច្រើន​ទៀត​នៃ​សមាជិក​អង្គការ​សហប្រជាជាតិ ដើម្បី​ថ្កោលទោស​រុស្ស៊ី​លើក​ទ័ព​លុកលុយ​ប្រទេស​អ៊ុយក្រែន​នោះ​ទេ។ ចិន​ក៏​មិន​ដែល​បោះឆ្នោត​គាំទ្រ​រុស្ស៊ី ចំពោះ​រុស្ស៊ី​ឈ្លានពាន​ប្រទេស​ជិតខាង​មួយ​នេះ​ដែរ តែ​ចិន​សម្រេច​ចិត្ត​នៅ​ក្នុង​ការ​បោះឆ្នោត​ត្រឹមតែ​អនុប្បវាទ​ប៉ុណ្ណោះ។

ការ​បោះឆ្នោត​អនុប្បវាទ​នេះ​មាន​ន័យ​ថា ចិន​ចង់​បង្ហាញ​អំពី​ជំហរ​របស់​ខ្លួន​ឈរ​លើ​គោលការណ៍​អព្យាក្រឹត្យ​រវាង​រុស្ស៊ី និង​អ៊ុយក្រែន តែ​ចិន​នៅ​ពេល​ដែល​សហគមន៍​អន្តរជាតិ​ដាក់​ទណ្ឌកម្ម​លើ​ប្រទេស​រុស្ស៊ី​ដោយសារតែ​លើក​ទ័ព​ឈ្លានពាន​អ៊ុយក្រែន​នេះ គឺ​មហាអំណាច​នេះ​បែរជា​មិន​ចូលរួម​ដាក់​ទណ្ឌកម្ម​នោះ​ទេ ហើយ​មិន​តែប៉ុណ្ណោះ បាន​ទាមទារ​ឲ្យ​ពួក​បស្ចិម​ប្រទេស​ដែល​ដឹកនាំ​ដោយ​សហរដ្ឋ​អាមេរិក បញ្ឈប់​ការ​ដាក់​ទណ្ឌកម្ម​លើ​រុស្ស៊ី ដោយ​ទីក្រុង​ប៉េកាំង អះអាង​ថា វា​ជា​ទណ្ឌកម្ម​ឯកតោភាគី​ប៉ុណ្ណោះ ព្រោះ​គ្មាន​សេចក្ដី​សម្រេច​ណា​មួយ​ចេញពី​ក្រុមប្រឹក្សា​សន្តិសុខ​អង្គការ​សហប្រជាជាតិ។

ចិន​លើកឡើង​ថា ទណ្ឌកម្ម​ណា​មួយ​ត្រឹមត្រូវ​តាម​ច្បាប់​អង្គការ​សហប្រជាជាតិ វា​លុះត្រាតែ​ក្រុមប្រឹក្សា​សន្តិសុខ​ជា​អ្នក​ធ្វើ​សេចក្ដី​សម្រេច។

យ៉ាងណា​នៅ​ក្នុង​ក្រុមប្រឹក្សា​សន្តិសុខ​អង្គការ​សហប្រជាជាតិ គឺ​ប្រទេស​ចិន​តែងតែ​ធ្វើ​សេចក្ដី​សម្រេច​ការ​បោះឆ្នោត​ជំទាស់​ផង ហើយ​ពេល​ខ្លះ​បោះឆ្នោត​អនុប្បវាទ​ផង។

នៅ​ពេល​ដែល​ចិន​អះអាង​ថា ក្រុង​ប៉េកាំង​ចង់​សម្រេច​ឲ្យ​បាន​នូវ​ផែនការ​សន្តិភាព ១២​ចំណុច​របស់​ខ្លួន​ដែល​ក្នុង​នោះ​មាន​ការ​ស្នើ​ឲ្យ​មាន​បទ​ឈប់​បាញ់​គ្នា និង​ការ​បញ្ចប់​ទណ្ឌកម្ម​ទាំងស្រុង​ទៅ​លើ​រុស្ស៊ី ប៉ុន្តែ​ក្នុង​ផែនការ ១២​ចំណុច​នេះ គេ​ពុំ​ឃើញ​មាន​ការ​បញ្ជាក់​អំពី​ការ​ដក​ទ័ព​រុស្ស៊ី​ចេញពី​ទឹកដី​អ៊ុយក្រែន​នោះ​ទេ ហើយ​ក៏​មិន​បាន​បញ្ជាក់​អំពី​អធិបតេយ្យភាព​របស់​អ៊ុយក្រែន​នោះ​ដែរ។

ទាក់ទិន​ទៅ​នឹង​ផែនការ ១២​ចំណុច​របស់​ចិន រដ្ឋមន្ត្រី​ការបរទេស​អ៊ុយក្រែន​បាន​បញ្ចេញ​ព័ត៌មាន​របស់​លោក​ដោយ​បាន​បញ្ជាក់​នៅ​លើ​ទ្វីតធឺ​របស់​លោក​ថា លោក​ពិត​ជា​បាន​ជួប​សន្ទនា​គ្នា​ជាមួយ​សមភាគី​ចិន លោក ឈីង ហ្កាង ពិត​មែន​កាលពី​ថ្ងៃ​ព្រហស្បតិ៍ ហើយ​ក៏​បាន​លើកឡើង​អំពី​ផែនការ​សន្តិភាព​របស់​ចិន ១២​ចំណុច​នេះ​ផង​ដែរ។

លោក ឌីមីទ្រី កូលីបា បាន​បញ្ជាក់​ថា លោក​បាន​លើកឡើង​ចំណុច​និយាយ​អំពី​អធិបតេយ្យភាព​របស់​ប្រទេស​អ៊ុយក្រែន និង​ការ​ដក​ទ័ព​រុស្ស៊ី​ចេញពី​ទឹកដី​អ៊ុយក្រែន រួម​នឹង​ការ​ដែល​លោក​សង្កត់​ធ្ងន់​អំពី​រូបមន្ត​សន្តិភាព ១០​ចំណុច​របស់​លោក ហ្សេឡេនស្គី ប្រធានាធិបតី​អ៊ុយក្រែន ដែល​បាន​បង្ហាញ​ជា​សាធារណៈ​រួច​ទៅ​ហើយ​នៅ​ឯ​ជំនួប​កំពូល​នៃ​មេដឹកនាំ​ប្រទេស​សេដ្ឋកិច្ច​ជឿនលឿន G-២០ ដែល​បាន​ធ្វើឡើង​នៅ​ក្នុង​ទឹកដី​ប្រទេស​ឥណ្ឌូនេស៊ី កាលពី​ខែ​វិច្ឆិកា ឆ្នាំ​២០២២។

ចំពោះ​ការ​លើកឡើង​របស់​លោក​រដ្ឋមន្ត្រី​ការបរទេស​អ៊ុយក្រែន គេ​ពុំ​ឃើញ​មាន​ការ​បកស្រាយ​វិញ​របស់​លោក​រដ្ឋមន្ត្រី​ការបរទេស​ចិន​នោះ​ទេ។ ដូចនេះ​ហើយ​ដែល​អ្នក​សង្កេតការណ៍​មើល​ឃើញ​ថា ផែនការ​សន្តិភាព​របស់​ចិន ១២​ចំណុច​នេះ បើ​គ្មាន​ការ​ទទួល​យក​លក្ខខណ្ឌ​របស់​អ៊ុយក្រែន នឹង​នាំ​ទៅ​រក​ភាព​បរាជ័យ ហើយ​ទស្សនកិច្ច​របស់​លោក ស៊ី ជីនពីង នៅ​ក្រុង​មូស្គូ ទោះបីជា​លោក ស៊ី ត្រូវ​ជួប​ពិភាក្សា​រឿង​នេះ​ជាមួយ​លោក ពូទីន ក៏ដោយ បើ​មិន​ទទួល​យក​លក្ខខណ្ឌ​របស់​អ៊ុយក្រែន ដែល​ស្នើ​ឲ្យ​ដក​ទ័ព​រុស្ស៊ី​ទាំងអស់​ចេញពី​ទឹកដី​អ៊ុយក្រែន និង​គោរព​អធិបតេយ្យភាព​អ៊ុយក្រែន ទេ មាន​ន័យ​ថា ទស្សនកិច្ច​របស់​លោក ស៊ី នៅ​ក្រុង​មូស្គូ គឺជា​ការ​ពង្រឹង​កាន់តែ​ធ្វើ​ឲ្យ​រឹងមាំ​ថែម​ទៀត​រវាង​ទំនាក់ទំនង​ក្រុង​មូស្គូ និង​ក្រុង​ប៉េកាំង តែប៉ុណ្ណោះ។

ក្នុង​ន័យ​នេះ គេ​សង្កេត​ឃើញ​សេចក្ដី​ថ្លែងការណ៍​មួយ​បញ្ចេញ​ដោយ​វិមាន​ក្រឹមឡាំង ដូចជា​មិន​បាន​លើក​ឡើង​ពី​ផែនការ​សន្តិភាព​របស់​ចិន ១២​ចំណុច​នេះ​ទេ គឺ​ក្រុង​មូស្គូ លម្អិត​តែ​អំពី​សហប្រតិបត្តិការ​ស៊ីជម្រៅ​គ្រប់​ជ្រុងជ្រោយ​រវាង​រុស្ស៊ី និង​ចិន​តែប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស