33 C
Phnom Penh

លោក ហ៊ុន ម៉ានិត ត្រូវ​បាន​តែងតាំង​ជា​មេបញ្ជាការ​រង​បញ្ជាការដ្ឋាន​កងទ័ព​ជើងគោក

ដោយ ឌឹ ខេមបូឌា ដេលី

បទវិភាគ

លោក ហ៊ុន ម៉ានិត ដែល​ជា​កូនប្រុស​ទី​ពីរ​របស់​លោក ហ៊ុន សែន ត្រូវ​បាន​តែងតាំង​ជា​មេបញ្ជាការ​រង​នៃ​បញ្ជាការដ្ឋាន​កងទ័ព​ជើងគោក​បន្ថែម​លើ​តួនាទី​ដែល​កំពុង​មាន​បច្ចុប្បន្ន បន្ទាប់ពី​លោក ហ៊ុន ម៉ាណែត បងប្រុស​របស់​លោក ហ៊ុន ម៉ានិត ទើប​ត្រូវ​បាន​ដំឡើង​ជា​នាយ​ឧត្តមសេនីយ៍​ផ្កាយ​មាស​៤ ស្មើ​នឹង​លោក ទៀ បាញ់ ផង​ដែរ​នោះ។

បើ​តាម​អនុក្រឹត្យ​ស្ដីពី​ការ​តែងតាំង​មុខតំណែង​នាយទាហាន​ដែល​ចុះហត្ថលេខា​កាលពី​ថ្ងៃទី​១៧ ខែ​មីនា ឆ្នាំ​២០២៣ ដោយ​លោក ហ៊ុន សែន ឪពុក​របស់​លោក ហ៊ុន ម៉ានិត និង​ជា​នាយករដ្ឋមន្ត្រី​បច្ចុប្បន្ន។ អនុក្រឹត្យ​បញ្ជាក់​ថា ការ​តែងតាំង​លោក ហ៊ុន ម៉ានិត ជា​មេបញ្ជាការ​រង​បញ្ជាការដ្ឋាន​កងទ័ព​ជើងគោក​បន្ថែម​លើ​មុខងារ​បច្ចុប្បន្ន​នេះ គឺ​តប​តាម​សំណើ​របស់​រដ្ឋមន្ត្រី​ការពារ​ជាតិ លោក ទៀ បាញ់។

មិនមែន​តែ​លោក ហ៊ុន ម៉ានិត នោះ​ទេ​ដែល​ត្រូវ​បាន​តែងតាំង​នោះ កាលពី​ថ្ងៃទី​១៧ ខែ​មីនា ឆ្នាំ​២០២៣ កូនប្រុស​ច្បង​របស់​លោក ហ៊ុន សែន គឺ​លោក ហ៊ុន ម៉ាណែត ក៏​ត្រូវ​បាន​ឪពុក​ទូល​ថ្វាយ​ព្រះមហាក្សត្រ​ឲ្យ​ដំឡើង​តំណែង​ជា​នាយ​ឧត្តមសេនីយ៍​ផ្កាយ​មាស​៤ ស្មើ​នឹង​រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ ផង​ដែរ ខណៈ​លោក ហ៊ុន សែន ដាក់​លោក ហ៊ុន ម៉ាណែត ធ្វើជា​បេក្ខជន​នាយករដ្ឋមន្ត្រី​បន្ត​វេន​ពី​លោក។

ការ​ដំឡើង​តំណែង​របស់​លោក ហ៊ុន ម៉ាណែត និង​តែងតាំង​លោក ហ៊ុន ម៉ានិត ក្នុង​ជួរ​កងទ័ព​នៃ​ក្រសួង​ការពារ​ជាតិ​នា​ពេលនេះ ធ្វើឡើង​បន្ទាប់ពី​សារព័ត៌មាន​របស់​ជប៉ុន ASIA TIMES កាលពី​ថ្ងៃទី​៧ ខែ​មីនា បាន​ចុះផ្សាយ​ថា គ្រួសារ​ត្រកូល ទៀ និង​គ្រួសារ​ត្រកូល ហ៊ុន កំពុង​មាន​ប៉ះទង្គិច​គ្នា​ក្នុង​ផែនការ​សន្តតិវង្ស​របស់​លោក ហ៊ុន សែន ស្រប​ពេល​ដែល​ចិន​ហាក់​មិន​មាន​ជំនឿ​លើ​លោក ហ៊ុន ម៉ាណែត ជា​មេដឹកនាំ​ថ្មី​របស់​ប្រទេស​កម្ពុជា​ទៅ​ថ្ងៃ​មុខ​នោះ។

ជាមួយ​គ្នា​នេះ គ្រួសារ​សាច់ញាតិ​របស់​លោក ទៀ បាញ់ រដ្ឋមន្ត្រី​ក្រសួង​ការពារ​ជាតិ ក៏​កំពុងតែ​គំរាម​ផែនការ​របស់​លោក ហ៊ុន សែន ដែល​ចង់​ដំឡើង​សាច់ញាតិ​របស់​លោក​នៅ​ក្នុង​ក្រសួង​ការពារ​ជាតិ ដែល​ធ្វើ​ឲ្យ​ស្ថាប័ន​នេះ​ធ្លាក់​ក្នុង​ឥទ្ធិពល​របស់​ចិន។

លោក​នាយករដ្ឋមន្ត្រី ហ៊ុន សែន ដែល​ដឹកនាំ​ប្រទេស​កម្ពុជា​ជិត ៤០​ឆ្នាំ​មក​នេះ បាន​រៀបចំ​កូនៗ​របស់​ខ្លួន​កាន់​ក្នុង​ជួរ​កងទ័ព​នៅ​ក្នុង​វិស័យ​សំខាន់ៗ ស្រប​ពេល​ដែល​លោក​កំពុង​ផ្ទេរ​អំណាច​ឲ្យ​លោក ហ៊ុន ម៉ាណែត។

ជាក់ស្ដែង កូនប្រុស​ទី​២ របស់​លោក គឺ​លោក ហ៊ុន ម៉ានិត ត្រូវ​បាន​តែងតាំង​ជា​មេបញ្ជាការ​រង​នៃ​បញ្ជាការដ្ឋាន​កងទ័ព​ជើងគោក​បន្ថែម​ពី​លើ​តួនាទី​ជា​អគ្គនាយក​នៃ​អគ្គនាយកដ្ឋាន​ស្រាវជ្រាវ-ចារកិច្ច​នៃ​ក្រសួង​ការពារ​ជាតិ​បច្ចុប្បន្ន។

ចំណែក​ប្អូនប្រុស​របស់​លោក ហ៊ុន ម៉ានិត គឺ​លោក ហ៊ុន ម៉ានី ជា​តំណាងរាស្ត្រ​មណ្ឌល​ខេត្ត​កំពង់ស្ពឺ និង​ជា​ប្រធាន​អង្គការ​យុវជន​មួយ​ឈ្មោះ​ថា សហភាព​សហព័ន្ធ​យុវជន​កម្ពុជា ខណៈ​បងស្រី​របស់​លោក ហ៊ុន ម៉ានិត គឺ​អ្នកស្រី ហ៊ុន ម៉ាណា និង​ប្អូនស្រី​របស់​លោក គឺ​អ្នកស្រី ហ៊ុន ម៉ាលី គឺជា​ពាណិជ្ជករ និង​ពាក់ព័ន្ធ​ក្នុង​វិស័យ​ជាច្រើន​នៃ​សេដ្ឋកិច្ច។

បើ​តាម​របាយការណ៍​ឆ្នាំ​២០១៦ របស់​អង្គការ​ឃ្លាំមើល​អន្តរជាតិ (Global Witness) ដែល​មាន​ចំណងជើង​ថា «អាណាចក្រ​សាជីវកម្ម​នៃ​គ្រួសារ​ត្រកូល ហ៊ុន (Hostile Takeover)» ដែល​បង្ហាញ​ថា ក្រុមហ៊ុន​មួយ​ចំនួន​គ្រប់គ្រង​ដោយ​គ្រួសារ​លោក​នាយករដ្ឋមន្ត្រី ហ៊ុន សែន ដែល​មាន​តម្លៃ​ជាង ២០០​លាន​ដុល្លារ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស