បុរសខ្លាំងក្រាញអំណាចផ្ដាច់មុខនៅកម្ពុជា លោក ហ៊ុន សែន សារភាពថាការដំឡើងឋានន្តរស័ក្តិឱ្យកូនប្រុសបង្កើតខ្លួនឯងដែលត្រៀមស្នងមរតកអំណាចពីខ្លួន គឺជាផែនការឆ្ពោះទៅរកការក្តោបក្តាប់អំណាច ដើម្បីគ្រប់គ្រងអំណាចជានាយករដ្ឋមន្ត្រីនាពេលខាងមុខ។
មេដឹកនាំខ្មែរកាងអំណាចតត្រកូល លោក ហ៊ុន សែន លើកឡើងក្នុងពិធីប្រគល់សញ្ញាបត្រដល់និស្សិតនៃវិទ្យាស្ថាន វ៉ាន់ដា នៅថ្ងៃទី២២ ខែមីនា ឆ្នាំ២០២៣ នេះថា ការដំឡើងឋានន្តរស័ក្តិកូនៗខ្លួនឯងដូចជា លោក ហ៊ុន ម៉ាណែត និងលោក ហ៊ុន ម៉ានិត គឺជាការបង្ហាញអំណាចរបស់លោកក្នុងនាមជានាយករដ្ឋមន្ត្រីនៅពេលនេះ ព្រោះថាបើលោកធ្វើជានាយករដ្ឋមន្ត្រី ហើយគ្មានអំណាចនោះ គឺមិនចាំបាច់ធ្វើជានាយករដ្ឋមន្ត្រីធ្វើអ្វីនោះទេ។
លោក ហ៊ុន សែន ព្រមានថា អំណាចជានាយករដ្ឋមន្ត្រី គឺធំជាងអ្វីៗទាំងអស់ កុំថាឡើយឋានៈត្រឹមពាក់ផ្កាយ សូម្បីពាក់ដល់លោកខែ ក៏នាយករដ្ឋមន្ត្រីអាចដកចេញពីតំណែងបានដែរ ដូច្នេះការរិះគន់នានា គឺមិនអាចទៅរួចនោះទេ ព្រោះលោកខ្លួនឯងដែលជានាយករដ្ឋមន្ត្រីសព្វថ្ងៃនេះកំពុងក្តោបក្តាប់អំណាចបែបនេះទៅហើយនោះ។
លោក ហ៊ុន សែន ទម្លាយថា មានតែកូនប្រុសរបស់លោក គឺលោក ហ៊ុន ម៉ាណែត តែមួយគត់ដែលកាន់កងកម្លាំងប្រដាប់អាវុធធំជាងគេក្នុងចំណោមមេបញ្ជាការរងកងទ័ពដែលពាក់ផ្កាយ៤ ទាំងអស់ ដូចជាលោក សៅ សុខា និងលោក ទៀ វិញ ជាដើម នៅពេលនេះ។
កាលពីថ្ងៃទី១៧ ខែមីនា ឆ្នាំ២០២៣ ព្រះករុណាព្រះបាទ សម្តេចព្រះ បរមនាថ នរោត្តម សីហមុនី បានត្រាស់បង្គាប់ដំឡើងឋានន្តរស័ក្តិថ្នាក់ «នាយឧត្តមសេនីយ៍» ដល់លោក ហ៊ុន ម៉ាណែត បន្ទាប់ពីលោក ហ៊ុន សែន ដែលជាឪពុកបានទូលថ្វាយព្រះអង្គឱ្យដំឡើងឋានន្តរស័ក្តិដល់លោក ហ៊ុន ម៉ាណែត ទៅជានាយឧត្តមសេនីយ៍ផ្កាយមាសបួន ស្របពេលដែលកូនប្រុសច្បងរូបនេះកំពុងត្រៀមខ្លួនស្នងមរតកអំណាចជានាយករដ្ឋមន្ត្រីបន្តពីខ្លួននាពេលខាងមុខនេះ ខណៈកូនប្រុសបង្កើតម្នាក់ទៀតរបស់លោក ហ៊ុន សែន គឺលោក ហ៊ុន ម៉ានិត ដែលជាអគ្គនាយកនៃអគ្គនាយកដ្ឋានស្រាវជ្រាវ-ចារកិច្ចនៃក្រសួងការពារជាតិ ក៏ត្រូវបានលោក ហ៊ុន សែន តែងតាំងជាមេបញ្ជាការរងនៃបញ្ជាការដ្ឋានកងទ័ពជើងគោក បន្ថែមលើមុខងារបច្ចុប្បន្ននៅថ្ងៃទី១៧ ខែមីនា ឆ្នាំ២០២៣ ដូចលោក ហ៊ុន ម៉ាណែត ដែរ។
ទាក់ទិននឹងបញ្ហានេះ អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ បានអះអាងកាលពីពេលថ្មីៗនេះថា សព្វថ្ងៃនេះលោក ហ៊ុន សែន កំពុងរៀបឱ្យកម្ពុជាក្លាយជាការគ្រប់គ្រងអំណាចតាមបែបសន្តតិវង្ស ដោយលោក ហ៊ុន សែន រំលោភសិទ្ធិអំណាចមន្ត្រីជាន់ខ្ពស់ផ្ទៃក្នុងបក្ស ចំណែកលោក ហ៊ុន ម៉ាណែត ជាអ្នកលុបបំបាត់អំណាចនៃគ្រួសារមេដឹកនាំទាំងនោះតាមរយៈនៃការលុបបំបាត់តួនាទីកូនៗរបស់ពួកគេនៅតាមស្ថាប័នសំខាន់ៗទាំងអស់នៅថ្ងៃក្រោយពេលដែលលោក ហ៊ុន ម៉ាណែត មានអំណាចពេញដៃដូចលោក ហ៊ុន សែន នៅពេលនេះ។
ជុំវិញការដំឡើងឋានៈកូនខ្លួនឯងយ៉ាងតក់ក្រហល់នៅពេលនេះ ធ្វើឡើងបន្ទាប់ពីសារព័ត៌មានអន្តរជាតិ Asia Times បានចុះផ្សាយកាលពីពេលថ្មីៗនេះថា រដ្ឋមន្ត្រីការពារជាតិលោក ទៀ បាញ់ កំពុងទប់ទល់ និងអាចបំផ្លាញផែនការរបស់លោក ហ៊ុន សែន ក្នុងការផ្ទេរអំណាចទៅឱ្យលោក ហ៊ុន ម៉ាណែត ប៉ុន្តែលោក ទៀ បាញ់ សុខចិត្តទទួលស្គាល់លោក ហ៊ុន ម៉ាណែត ជាបេក្ខជននាយករដ្ឋមន្ត្រីជាថ្នូរទៅនឹងការសន្យាថា នឹងផ្តល់ឱ្យកូនប្រុសរបស់លោកនូវការស្នងតំណែងជារដ្ឋមន្ត្រីការពារជាតិបន្តពីលោក ប៉ុន្តែការសន្យានេះបែរជាមិនត្រូវបានគោរពទៅវិញ។
ចំណែកអតីតមេដឹកនាំបក្សប្រឆាំង លោក សម រង្ស៊ី រិះគន់កាលពីចុងខែមករា ឆ្នាំ២០២៣ ថា លោក ហ៊ុន សែន បានចាប់យកប្រទេសកម្ពុជាទាំងមូលធ្វើជាកម្មសិទ្ធិផ្ដាច់មុខសម្រាប់គ្រួសាររបស់គាត់រួចទៅហើយ ដែលមានន័យថា អំណាចផ្ដាច់ការដោយការប្លន់អំណាចប្រជារាស្ត្រ និងបំផ្លិចបំផ្លាញជាតិនេះ នឹងបន្តជារៀងរហូតតាមរយៈផែនការរបស់លោក ហ៊ុន សែន ដែលចង់ឲ្យកូន និងចៅរបស់គាត់គ្រប់គ្រងប្រទេសកម្ពុជាបន្តពីខ្លួនទៅថ្ងៃមុខ។
ជុំវិញភាពចម្រូងចម្រាសចំពោះការបន្តអំណាចក្នុងវង្សត្រកូល «ហ៊ុន» នេះ លោក ហ៊ុន សែន ធ្លាប់គំរាមកាលពីអំឡុងខែធ្នូ ឆ្នាំ២០២២ ថា អ្នកដែលមានបំណងធ្លាប់ចង់សម្លាប់រូបលោកកាលពីមុន ហើយចង់ធ្វើឃាតលោកនៅពេលនេះដើម្បីទប់ស្កាត់មិនឱ្យលោក ហ៊ុន ម៉ាណែត ធ្វើជានាយករដ្ឋមន្ត្រីនៅថ្ងៃអនាគត ពួកគេក៏មិនរួចខ្លួនដែរ ព្រោះថាគាត់បានស្គាល់អ្នកទាំងនោះអស់ហើយ គ្រាន់តែគាត់មិនធ្វើអ្វីលើពួកគេប៉ុណ្ណោះ៕