32 C
Phnom Penh

ភរិយា​លោក យឹម ស៊ីណន អង្វរ​សុំ​លោក ហ៊ុន សែន លើកលែង​ទោស​ដល់​ស្វាមី​របស់​ខ្លួន

ដោយ ឌឹ ខេមបូឌា ដេលី

បទវិភាគ

ភរិយា​របស់​លោក យឹម ស៊ីណន អង្វរ​សុំ​ឱ្យ​លោក ហ៊ុន សែន លើកលែង​ទោស​ដល់​ស្វាមី​របស់​អ្នកស្រី ព្រោះ​ការ​លើកឡើង​របស់​ស្វាមី​អ្នកស្រី គឺជា​កំហុស​ដែល​គិត​ខ្លី និង​ឆេវឆាវ​មួយ​ពេល​ប៉ុណ្ណោះ។

អ្នកស្រី សុផាត មករា ដែល​ត្រូវ​ជា​ភរិយា​របស់​លោក យឹម ស៊ីណន បាន​សរសេរ​លើ​ទំព័រ​ហ្វេសប៊ុក​រ​បស់​អ្នកស្រី​នៅ​ថ្ងៃទី​២៤ មីនា នេះ​ថា អ្នកស្រី​សូម​លើក​ម្រាមដៃ​ទាំង​១០ អង្វរ​លោក ហ៊ុន សែន សូម​មេត្តា​អនុគ្រោះ​ដល់​ប្តី​របស់​អ្នកស្រី​ផង ដើម្បី​ឱ្យ​កូនៗ​របស់​អ្នកស្រី​បាន​ជួប​ឪពុក​របស់​គេ​វិញ ព្រោះ​ពេល​កូន​សួរ​រក​ឪពុក អ្នកស្រី​មិន​ដឹង​ត្រូវ​ប្រាប់​កូន​ថា​ដូចម្តេច​នោះ​ទេ។

ភរិយា​របស់​លោក យឹម ស៊ីណន អះអាង​ថា អ្នកស្រី និង​លោក យឹម ស៊ីណន ដែល​ត្រូវ​ជា​ស្វាមី​នឹង​កែ​ខ្លួន​មិន​ឱ្យ​មាន​កំហុស​លើក​ក្រោយ​ទៀត​ឡើយ ហើយ​ក៏​នឹង​មិន​ធ្វើ​ឱ្យ​លោក ហ៊ុន សែន ខកចិត្ត​ទៀត​នោះ​ដែរ។

អ្នកស្រី សុផាត មករា បញ្ជាក់​ថា ប្តី​របស់​អ្នកស្រី​គ្មាន​ចេតនា​ប្រមាថ​លោក ហ៊ុន សែន ទេ គាត់​តែងតែ​គោរព​លោក ហ៊ុន សែន រហូត​មក ដោយសារតែ​គ្រួសារ​របស់​អ្នកស្រី​ធ្លាប់​ត្រូវ​បាន​លោក ហ៊ុន សែន លើកលែង​ទោស​កាលពី​ពេល​កន្លង​ទៅ​នោះ។

អ្នកស្រី សុផាត មករា បញ្ជាក់​ថា ប្រសិនបើ​លោក ហ៊ុន សែន អនុញ្ញាត​ឱ្យ​អ្នកស្រី​ជួប​សុំទោស​ដោយ​ផ្ទាល់ អ្នកស្រី​នឹង​ក្រាប​សូម​អភ័យ​ទោស​ពី​លោក ហ៊ុន សែន ពី​កំហុស​ស្វាមី​របស់​ខ្លួន គឺ​លោក យឹម ស៊ីណន ដែល​បាន​ប្រព្រឹត្ត​ខុស​ជុំវិញ​ការ​លើកឡើង​របស់​លោក​ទាក់ទិន​នឹង​ព្រះមហាក្សត្រ​កាលពី​ពេល​ថ្មីៗ​នេះ។

កាលពី​ថ្ងៃទី​២១ ខែ​មីនា ឆ្នាំ​២០២៣ សកម្មជន​គណបក្ស​សង្គ្រោះ​ជាតិ លោក យឹម ស៊ីណន ត្រូវ​បាន​អាជ្ញាធរ​ក្រុង​ភ្នំពេញ​ចាប់​ខ្លួន​បន្ទាប់ពី​លោក​លើកឡើង​ជុំវិញ​ការ​រៀបចំ​ពិធី​សម្រាប់​ព្រះមហាក្សត្រ​ដែល​បាន​យាង​ចូលរួម​ក្នុង​ពិធី​ព្រះរាជទាន​ព្រះ​អគ្គីជ័យ​កីឡា ឬ​អុជ​ភ្លើង​កីឡា​នៅ​ខេត្ត​សៀមរាប ក្នុង​នោះ​សកម្មជន​គណបក្ស​សង្គ្រោះ​ជាតិ​ម្នាក់​ទៀត គឺ​លោក ហ៊ុន កុសល ក៏​ត្រូវ​បាន​សមត្ថកិច្ច​ចាប់​ខ្លួន​ក្នុង​ថ្ងៃ​តែ​មួយ​ដោយ​ចោទប្រកាន់​ពី​បទល្មើស​ដូច​គ្នា​ដែរ។

ក្រោយ​ការ​ចាប់​ខ្លួន សាលាដំបូង​រាជធានី​ភ្នំពេញ​បាន​សម្រេច​ឃុំ​ខ្លួន​អ្នក​ទាំង​ពីរ​ជា​បណ្ដោះអាសន្ន ដែល​ត្រូវ​បាន​ដាក់​ឲ្យ​ស្ថិត​នៅ​ក្រោម​ការ​ពិនិត្យ​ពី​បទ ប្រមាថ​ចំពោះ​អង្គ​ព្រះមហាក្សត្រ និង​បទ​ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម តាម​មាត្រា​៤៣៧ (ស្ទួន) នៃ​ច្បាប់​ស្ដីពី​វិសោធនកម្ម​ក្រមព្រហ្មទណ្ឌ​មាត្រា​៤៩៤ និង​មាត្រា​៤៩៥ នៃ​ក្រមព្រហ្មទណ្ឌ​ផង​ដែរ។

ទាក់ទិន​នឹង​បញ្ហា​នេះ អតីត​អគ្គ​ទីប្រឹក្សា​ស្ថានទូត​ខ្មែរ​ប្រចាំ​ប្រទេស​ឥណ្ឌូនេស៊ី បណ្ឌិត សូ ណារ៉ូ បាន​អះអាង​កាលពី​ពេល​ថ្មីៗ​នេះ​ថា ការ​លើកឡើង​របស់​សកម្មជន​នយោបាយ​ទាំង​ពីរ​នាក់​នោះ គ្រាន់តែ​ដើម្បី​បង្ហាញ​ពី​ការ​ស្រឡាញ់​គោរព​ចំពោះ​ព្រះមហាក្សត្រ​តែប៉ុណ្ណោះ ដែល​ធ្វើ​ឱ្យ​ប៉ះពាល់​ដោយ​អចេតនា​លើ​រដ្ឋាភិបាល​កម្ពុជា ប៉ុន្តែ​ពួកគេ​មិន​បាន​បំពាន​លើ​មាត្រា​នៃ​ច្បាប់​ណា​មួយ​របស់​កម្ពុជា​នោះ​ឡើយ។

បណ្ឌិត សូ ណារ៉ូ លើកឡើង​ថា ប្រសិនបើ​លោក​នាយករដ្ឋមន្ត្រី ហ៊ុន សែន ទុក​ឱកាស​ឱ្យ​ពួកគេ​សុំទោស​ដើម្បី​លុបលាង​កំហុស​របស់​ខ្លួន នោះ​លោក យឹម ស៊ីណន និង​លោក ហ៊ុន កុសល ប្រាកដ​ជា​ទទួលស្គាល់​នូវ​សមានចិត្ត​ដ៏​ល្អ​របស់​លោក ហ៊ុន សែន ជាមិនខាន ដែល​ជា​កិត្តិយស​សម្រាប់​រដ្ឋាភិបាល​ផង និង​សម្រាប់​គណបក្ស​ប្រជាជន​កម្ពុជា​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស