គណៈមេធាវីកម្ពុជា ព្រមានប្តឹងលោក ដេវិដ ឆាណាយវា ថាកំពុងប្រកបវិជ្ជាជីវៈជាមេធាវីខុសច្បាប់នៅក្នុងប្រទេសកម្ពុជា ជុំវិញការផ្តល់ប្រឹក្សាយោបល់ផ្នែកច្បាប់ដល់ភាគីវិវាទដីធ្លីនៅភូមិចំណោតរាម និងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។
គណៈមេធាវីកម្ពុជាបានចេញសេចក្តីប្រកាសព័ត៌មានកាលពីថ្ងៃទី២៧ ខែមីនា ឆ្នាំ២០២៣ នេះថា លោក ដេវិដ ឆាណាយវា ពុំមានសិទ្ធិផ្តល់ការប្រឹក្សាយោបល់ផ្នែកច្បាប់ក្នុងនាមជាមេធាវី និងពុំមានសិទ្ធិប្រកបវិជ្ជាជីវៈជាមេធាវីក្នុងប្រទេសកម្ពុជាឡើយ ដូច្នេះការផ្តល់ប្រឹក្សាផ្នែកច្បាប់សម្រាប់ទំនាស់ដីធ្លី មិនត្រូវបានអនុញ្ញាតជាដាច់ខាត។
ប្រភពដដែលលើកឡើងថា ក្នុងករណីដែលលោក ដេវិដ ឆាណាយវា មិនបញ្ឈប់សកម្មភាពដែលនាំឱ្យមានការយល់ច្រឡំថាលោកជាមេធាវីដែលមានសិទ្ធិប្រកបវិជ្ជាជីវៈក្នុងប្រទេសកម្ពុជាទេនោះ គណៈមេធាវីនឹងចាត់វិធានការតាមផ្លូវច្បាប់យ៉ាងម៉ឺងម៉ាត់ដោយគ្មានករណីលើកលែងឡើយ។
កាលពីថ្ងៃទី២៤ ខែមីនា ឆ្នាំ២០២៣ លោក ដេវិដ ឆាណាយវា បានផ្សាយផ្ទាល់លើគណនីហ្វេសប៊ុករបស់ខ្លួនដោយសួរទៅកាន់ប្រមុខរាជរដ្ឋាភិបាលកម្ពុជា លោក ហ៊ុន សែន ថានៅពេលដែលលោកស្ម័គ្រចិត្តធ្វើជាមេធាវីផ្តល់ប្រឹក្សាផ្នែកច្បាប់ដល់ពលរដ្ឋជិត ៥០០គ្រួសារ ដែលកំពុងរងនូវការរំលោភដីធ្លីពីសំណាក់អ្នកមានអំណាចនៅភូមិចំណោតរាម និងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ សព្វថ្ងៃនេះ ដោយមិនយកកម្រៃថាតើលោកមានកំហុសដែរឬទេ?
លោក ដេវិដ ឆាណាយវា ត្អូញត្អែរថា បច្ចុប្បន្ននេះ អាជ្ញាធរខេត្តព្រះសីហនុ កំពុងរឹតត្បិតអ្នកសារព័ត៌មានយ៉ាងខ្លាំងមិនឲ្យចូលទៅយកព័ត៌មាននៅទីតាំងដែលក្រុមហ៊ុន និងអ្នកមានអំណាចកំពុងរំលោភយកដីធ្លីរបស់ពលរដ្ឋនោះទេ ព្រោះអាជ្ញាធរទាំងនោះខ្លាចលេចធ្លាយរឿងអាក្រក់របស់ខ្លួនដល់ថ្នាក់ដឹកនាំប្រទេស។
ប្រភពដដែលបញ្ជាក់ថា អាជ្ញាធរខេត្តព្រះសីហនុ បានគំរាមពលរដ្ឋរងគ្រោះថា ប្រសិនបើពួកគេនៅតែបន្តពឹងពាក់លោកឲ្យផ្តល់ប្រឹក្សាផ្នែកច្បាប់បន្តទៀត អាជ្ញាធរនឹងមិនដោះស្រាយវិវាទនេះឲ្យពួកគេទេ គឺអាជ្ញាធរនឹងបញ្ជូនរឿងនេះទៅដោះស្រាយនៅតុលាការតែម្តង។
យ៉ាងណា ក្រោយការចេញសេចក្តីប្រកាសព័ត៌មានពីគណៈមេធាវីកម្ពុជា កាលពីថ្ងៃចន្ទ លោក ដេវិដ ឆាណាយវា ក៏បានចេញប្រតិកម្មត្រឡប់ទៅវិញនៅថ្ងៃទី២៨ ខែមីនា ឆ្នាំ២០២៣ នេះដែរ ដោយច្រានចោលសេចក្តីប្រកាសព័ត៌មានរបស់គណៈមេធាវីកម្ពុជាទាំងស្រុង ក្នុងនោះលោក ដេវិដ ឆាណាយវា អះអាងថា លោកមិនដែលបាននិយាយថាលោកជាសមាជិកគណៈមេធាវីនៃព្រះរាជាណាចក្រកម្ពុជានោះឡើយ។
ជាងនេះទៀត ក្នុងលិខិតរបស់លោកក៏មិនបានប្រាប់សាធារណជនថា លោកមានសិទ្ធិប្រកបវិជ្ជាជីវៈជាមេធាវីក្នុងព្រះរាជាណាចក្រកម្ពុជាដែរ ប៉ុន្តែលោកបានបញ្ជាក់ថា លោកគឺជាមេធាវីអាមេរិកាំង។
លោក ដេវិដ ឆាណាយវា ទាមទារឲ្យគណៈមេធាវីកម្ពុជាកែសម្រួលខ្លឹមសារក្នុងសេចក្តីប្រកាសព័ត៌មាន ដែលបានចុះផ្សាយកាលពីថ្ងៃទី២៧ ខែមីនា ជាបន្ទាន់។ លោកបន្ថែមថា ក្នុងករណីមិនកែសម្រួល លោកនឹងចាត់វិធានការតាមផ្លូវច្បាប់យ៉ាងម៉ឺងបំផុត ដោយសារតែគណៈមេធាវីកម្ពុជាបានបរិហារកេរ្តិ៍លោកជាសាធារណៈជុំវិញករណីនេះ។
ពលរដ្ឋជាច្រើនគ្រួសារដែលរស់នៅក្នុងភូមិគគីរ ធ្លាប់បានអះអាងកាលពីពេលថ្មីៗនេះថា ពេលដែលពលរដ្ឋមករស់នៅលើដីនេះលើកដំបូង អាជ្ញាធរចោទថាពួកគាត់រស់នៅដោយខុសច្បាប់ដោយសារតែរស់នៅលើដីគម្របព្រៃឈើឆ្នាំ២០០២ ប៉ុន្តែក្រោយពេលពលរដ្ឋរស់នៅអស់រាប់ឆ្នាំទៅ អាជ្ញាធរបាននាំគ្នាមកបណ្តេញពួកគេចេញពីលំនៅឋាន ដោយចោទថាពលរដ្ឋរស់នៅដោយខុសច្បាប់នៅលើដីរបស់ក្រុមហ៊ុនឯកជនទៅវិញ។
ទាក់ទិននឹងបញ្ហានេះ កាលពីថ្ងៃទី៣១ ខែធ្នូ ឆ្នាំ២០២១ លោក ហ៊ុន សែន បានចេញអនុក្រឹត្យកាត់ឆ្វៀលដីគម្របព្រៃឈើឆ្នាំ២០០២ ស្ថិតនៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ ដែលមានទំហំ ១០ហិកតារ ៤០អា និង ៣៩សង់ទីអា ចេញពីដែនគម្របព្រៃឈើឆ្នាំ២០០២ ដើម្បីធ្វើអនុបយោគឱ្យជាកម្មសិទ្ធិរបស់ធនាគារកាណាឌីយ៉ារបស់លោកឧកញ៉ា ពុង ឃាវសែ។
ជាងនេះទៀត កាលពីថ្ងៃទី៩ ខែមិថុនា ឆ្នាំ២០២០ លោក ហ៊ុន សែន ក៏បានចេញអនុក្រឹត្យកាត់ដីទំហំ ៦០០ហិកតារស្ថិតក្នុងឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ ដើម្បីធ្វើអនុបយោគជាដីឯកជនរបស់រដ្ឋឲ្យទៅឧកញ៉ាពីររូប គឺឧកញ៉ា សេង ញ៉ក និងជំទាវ លី អាផណ ដែលត្រូវជាសាច់ញាតិរបស់ឧកញ៉ា លី យ៉ុងផាត់ ធ្វើជាកម្មសិទ្ធិផងដែរ។
ខណៈអ្នកស្រី ហ៊ុន ម៉ាណា និងអ្នកស្រី ហ៊ុន ម៉ាលី ដែលត្រូវជាកូនស្រីបង្កើតរបស់លោក ហ៊ុន សែន ក៏ទទួលបានដីជាង ៤៤ហិកតារចេញពីដែនគម្របព្រៃឈើឆ្នាំ២០០២ នៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ កាលពីអំឡុងខែកក្កដា ឆ្នាំ២០២០ ថែមទៀត។
ដោយឡែកនៅថ្ងៃទី៣ ខែធ្នូ ឆ្នាំ២០២០ លោក ហ៊ុន សែន បានចេញអនុក្រឹត្យកាត់ឆ្វៀលដីទំហំ ២៥ហិកតារ ៩៨អាបន្ថែមទៀតដែលស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ចេញពីដែនគម្របព្រៃឈើឆ្នាំ២០០២ ឲ្យក្រុមហ៊ុន ហ្វូហាយ អ៊ិនវេសម៉ិន ធ្វើជាកម្មសិទ្ធិតាមសំណើលោក ជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់ ផងដែរ។
ជុំវិញការកាត់ឆ្វៀលដែនគម្របព្រៃឈើនេះ មន្ត្រីអង្គការឃ្លាំមើលការអភិវឌ្ឍសង្គមចំនួន ២ស្ថាប័ន រួមមានអង្គការលីកាដូ (LICADHO) និងអង្គការស្រាវជ្រាវជាតិកម្ពុជា ឬហៅកាត់ ស៊ីអិនរ៉ូ (CNRO) ប្រចាំខេត្តព្រះសីហនុ ធ្លាប់បានបង្ហាញលើកឡើងកាលពីពេលកន្លងទៅថា សព្វថ្ងៃនេះដីគម្របព្រៃឈើឆ្នាំ២០០២ ដែលរដ្ឋាភិបាលបានរក្សាទុក កំពុងរងការបំផ្លាញ និងពុះច្រៀកធ្វើកម្មសិទ្ធិឯកជនឱ្យទៅអ្នកមានទ្រព្យធន និងអ្នកមានអំណាចក្នុងជួររដ្ឋាភិបាលកម្ពុជាព្រោងព្រាត៕