ព្រះមហាក្សត្រខ្មែរសម្តេចព្រះបាទ នរោត្តម សីហមុនី មានបន្ទូលកោតសរសើររដ្ឋសភាឯកបក្សនៃគណបក្សប្រជាជនកម្ពុជារបស់លោក ហ៊ុន សែន ថាជារដ្ឋសភាជាតិមួយដែលបានបំពេញការងារដ៏មានសារសំខាន់បំផុត ដូចជាការអនុម័តច្បាប់រហូតដល់ជាង ១០០មាត្រាក្នុងអាណត្តិទី៦ ដើម្បីធានានូវនិរន្តរភាពនៃដំណើរការកែលំអលទ្ធិប្រជាធិបតេយ្យអាស្រ័យរដ្ឋធម្មនុញ្ញរបស់ប្រទេសកម្ពុជាសព្វថ្ងៃនេះ។
ព្រះមហាក្សត្រខ្មែរសម្តេចព្រះបាទ នរោត្តម សីហមុនី ចេញព្រះរាជសារក្នុងឱកាសបើកបវេសនកាលនៃរដ្ឋសភាជាតិកម្ពុជានៅថ្ងៃទី៣០ ខែមីនា ឆ្នាំ២០២៣ នេះថា សមាជិករដ្ឋសភាទាំងអស់បានខិតខំយកចិត្តទុកដាក់ចំពោះសុខទុក្ខរបស់ប្រជាពលរដ្ឋនៅតាមមណ្ឌលដែលខ្លួនបានទទួលខុសត្រូវរៀងៗខ្លួន ដើម្បីដោះស្រាយបញ្ហាជូនប្រជាពលរដ្ឋកន្លងមក។
សម្តេចព្រះបាទ នរោត្តម សីហមុនី មានព្រះរាជបន្ទូលកោតសរសើរការដឹកនាំរបស់រាជរដ្ឋាភិបាលកម្ពុជាដែរថា បានដោះស្រាយការងារលំបាកៗដោយជោគជ័យក្នុងការថែរក្សាសន្តិភាព ឯករាជ្យជាតិជូនប្រជាពលរដ្ឋឱ្យបានរស់នៅដោយស្មើភាព ស្មើសិទ្ធិ និងសុខដុមរមនា ព្រមទាំងបាននាំមកនូវកិត្យានុភាពជូនជាតិមាតុភូមិនៅលើឆាកអន្តរជាតិផងដែរ។
ព្រះមហាក្សត្រខ្មែរអំពាវនាវឱ្យប្រជាពលរដ្ឋខ្មែរគ្រប់រូបត្រៀមលក្ខណៈចូលរួមបោះឆ្នោតជ្រើសតាំងតំណាងរាស្ត្រសម្រាប់អាណត្តិទី៧ ស្របតាមគោលការណ៍លទ្ធិប្រជាធិបតេយ្យ សេរីពហុបក្ស ដើម្បីជ្រើសរើសអ្នកដឹកនាំប្រទេសជាតិដែលមានចក្ខុវិស័យបន្តការអភិវឌ្ឍសម្រាប់ប្រទេសជាតិទៅថ្ងៃអនាគត។
រដ្ឋសភាឯកបក្សរបស់គណបក្សប្រជាជនកម្ពុជា ដែលកំពុងគ្រប់គ្រងដោយលោកនាយករដ្ឋមន្ត្រី ហ៊ុន សែន សព្វថ្ងៃនេះ គឺជារដ្ឋសភាមួយដែលកើតចេញពីការរំលោភលើមាត្រា៧៦ នៃរដ្ឋធម្មនុញ្ញយ៉ាងធ្ងន់ធ្ងរ បន្ទាប់ពីតុលាការកំពូលប្រកាសរំលាយគណបក្សសង្គ្រោះជាតិ ដោយយកកៅអីសមាជិករដ្ឋសភារបស់គណបក្សប្រឆាំងដ៏ធំមួយនេះមកធ្វើជារបស់ខ្លួនកាលពីអំឡុងខែតុលា ឆ្នាំ២០១៧ កន្លងទៅនោះ។
ក្រោយពីបក្សកាន់អំណាចប្លន់កៅអីសមាជិករដ្ឋសភាគណបក្សសង្គ្រោះជាតិបានហើយ ដោយជំនួសមកវិញនូវសមាជិករដ្ឋសភាខុសច្បាប់របស់ខ្លួន ពួកគេបាននាំគ្នាកែប្រែនូវមាត្រានៃរដ្ឋធម្មនុញ្ញជាច្រើនទៅតាមការចង់បានរបស់មេដឹកនាំបក្សកាន់អំណាច លោក ហ៊ុន សែន ដែលរងការរិះគន់ថា ជាការកែប្រែក្នុងចេតនាជួយការពារអំណាចឱ្យវង្សត្រកូលរបស់លោក ហ៊ុន សែន ដែលជាហេតុធ្វើឱ្យធ្លាក់ចុះនូវការអនុវត្តតាមបែបលទ្ធិប្រជាធិបតេយ្យកាន់តែខ្លាំងទៅថ្ងៃមុខ។
សមាជិករដ្ឋសភាជាតិកម្ពុជាដែលមកពីគណបក្សប្រជាជនកម្ពុជាទាំង ១២៥រូប ក្នុងអាណត្តិទី៦ នេះ ត្រូវគេមើលឃើញថា ពួកគេមិនបានបំពេញតួនាទីបម្រើប្រជាពលរដ្ឋដែលជាម្ចាស់ឆ្នោតទេ គឺពួកគេបម្រើតែមហិច្ឆតារបស់មេដឹកនាំបក្សកាន់អំណាចលោក ហ៊ុន សែន តែប៉ុណ្ណោះ ជាពិសេសគឺការចូលរួមជួយកែប្រែ ឬតាក់តែងច្បាប់ទាំងឡាយណាដែលលោក ហ៊ុន សែន ចង់បាន ដូចជាការធ្វើវិសោធនកម្មរដ្ឋធម្មនុញ្ញលើកទី១០ ដែលរងនូវការរិះគន់ថាជាការកែប្រែដើម្បីធានាសុវត្ថិភាពដល់ការផ្ទេរអំណាចក្នុងវង្សត្រកូលរបស់លោក ហ៊ុន សែន ទៅថ្ងៃមុខ ជាដើម ដែលមិនមែនការកែប្រែដើម្បីប្រយោជន៍ជាតិឡើយ។
ក្រុមអ្នកសង្កេតការណ៍រិះគន់ថា រដ្ឋធម្មនុញ្ញដែលត្រូវបានធ្វើវិសោធនកម្មក្រោមសំឡេងសមាជិករដ្ឋសភាដែលមកពីគណបក្សប្រជាជនកម្ពុជាកន្លងមកនេះ បានបង្ហាញយ៉ាងច្បាស់ថា លោក ហ៊ុន សែន កំពុងតែជ្រែករាជ្យព្រះមហាក្សត្រខ្មែរដែលនឹងក្លាយជាបុគ្គលដ៏មានអំណាចបំផុតនៅថ្ងៃមុខ ទោះអំណាចព្រះមហាក្សត្រខ្មែរដែលធានាដោយរដ្ឋធម្មនុញ្ញ ក៏នៅក្រោមអំណាចរបស់លោក ហ៊ុន សែន ដែរ៕