33 C
Phnom Penh

លោក ហ៊ុន សែន៖ ខ្មែរ​និង​បរទេស​ចូល​ទស្សនា​ព្រឹត្តិការណ៍​ស៊ីហ្គេម​ដោយ​ឥត​គិត​ថ្លៃ

ដោយ ឌឹ ខេមបូឌា ដេលី

បទវិភាគ

នាយករដ្ឋមន្ត្រី​កម្ពុជា លោក ហ៊ុន សែន ប្រកាស​លុប​ចោល​នូវ​ការ​លក់​សំបុត្រ​សម្រាប់​អ្នក​ចូល​ទស្សនា​ព្រឹត្តិការណ៍​ស៊ីហ្គេម​ខាងមុខ ទាំង​ខ្មែរ និង​បរទេស មិន​តម្រូវ​ឲ្យ​បង់​ប្រាក់​ឡើយ ព្រមទាំង​ស្ដីបន្ទោស​ឱ្យ​មន្ត្រី​ក្រោម​ឱវាទ​ថា​ជា​មន្ត្រី​ដែល​ខ្វះ​ការ​ចេះដឹង។

ប្រមុខ​រាជរដ្ឋាភិបាល​ខ្មែរ លោក ហ៊ុន សែន បាន​លើកឡើង​ក្នុង​កិច្ចប្រជុំ​គណៈរដ្ឋមន្ដ្រី​នៅ​ថ្ងៃទី​៣១ ខែ​មីនា ឆ្នាំ​២០២៣ នេះ ដោយ​ប្រកាស​លុប​ចោល​នូវ​ការ​លក់​សំបុត្រ​សម្រាប់​អ្នក​ចូល​ទស្សនា​ព្រឹត្តិការណ៍​ស៊ីហ្គេម​ខាងមុខ​ថា ទាំង​ព្រឹត្តិការណ៍​បើក​កម្មវិធី​នៃ​ការ​ប្រកួត​ស៊ីហ្គេម និង​ព្រឹត្តិការណ៍​បិទ​បញ្ចប់​ស៊ីហ្គេម គឺ​មិន​មាន​ការ​បង់​ប្រាក់​នោះ​ឡើយ។ ក្នុង​នោះ លោក ហ៊ុន សែន ក៏​បាន​ប្រកាស​ឲ្យ​អ្នក​ដែល​បាន​ទិញ​សំបុត្រ​រួច នាំគ្នា​ទៅ​ប្ដូរ​យក​លុយ​វិញ​ផង​ដែរ។

មេដឹកនាំ​កម្ពុជា លោក ហ៊ុន សែន លើកឡើង​ថា ការ​ផ្សព្វផ្សាយ​ពី​ការ​លក់​សំបុត្រ​ចូល​ទស្សនា​ព្រឹត្តិការណ៍​ប្រកួត​កីឡា​ស៊ីហ្គេម​ដែល​កម្ពុជា​នឹង​រៀបចំ​ពី​សំណាក់​គណៈកម្មាធិការ​ជាតិ​រៀបចំ​ការ​ប្រកួត​កីឡា​អាស៊ី​អាគ្នេយ៍​នេះ គឺជា​រឿង​ខុស​ទំនង ព្រោះ​ថា​ការ​ប្រកាស​លក់​សំបុត្រ​ទាំងនោះ​មិន​មាន​ការ​យល់ព្រម​ពី​រូបលោក​ដែល​ជា​នាយករដ្ឋមន្ត្រី​ក្នុង​នាម​ជា​មេដឹកនាំ​ជាន់ខ្ពស់​របស់​ប្រទេស​កម្ពុជា​នោះ​ទេ។

មេដឹកនាំ​បក្ស​កាន់​អំណាច លោក ហ៊ុន សែន បញ្ជាក់​ថា រដ្ឋាភិបាល​របស់​លោក​បាន​ចំណាយ​លុយ​អស់​រាប់​រយ​លាន​ដុល្លារ​អាមេរិក រួម​ទាំង​ជំនួយ​របស់​មិត្ត​ចិន​ថែម​ទៀត​លើ​មូលដ្ឋាន​សម្ភារៈ​បច្ចេកទេស​សម្រាប់​រៀបចំ​ឱ្យ​មាន​ការ​ប្រកួត​កីឡា​ស៊ីហ្គេម​នេះ ស្រប​ពេល​ដែល​កម្ពុជា​ក៏​បាន​ទន្ទឹង​រង់ចាំ​ព្រឹត្តិការណ៍​នេះ​អស់​រយៈពេល​ជាង ៦០​ឆ្នាំ​មក​ដែរ​ហើយ​នោះ។

លោក ហ៊ុន សែន គូស​បញ្ជាក់​ថា រដ្ឋាភិបាល​កម្ពុជា​នឹង​មិន​អនុញ្ញាត​ឱ្យ​មាន​ការ​លក់​សំបុត្រ​សម្រាប់​អ្នក​ចូល​ទស្សនា​ដាច់ខាត សូម្បី​ទូរទស្សន៍​បរទេស​នានា​ដែល​ផ្សាយ​បន្ត​ទៅ​ក្រៅ​ប្រទេស​ក្នុង​ព្រឹត្តិការណ៍​ប្រកួត​កីឡា​ស៊ីហ្គេម​នេះ ក៏​មិន​តម្រូវ​ឱ្យ​បង់​លុយ​ដែរ។

ការ​អះអាង​នេះ ធ្វើឡើង​បន្ទាប់ពី​គណៈកម្មាធិការ​ជាតិ​រៀបចំ​ការ​ប្រកួត​កីឡា​អាស៊ី​អាគ្នេយ៍​លើក​ទី​៣២ (CAMSOC) បាន​ប្រកាស​លក់​សំបុត្រ​សម្រាប់​ពិធី​បើក​ព្រឹត្តិការណ៍​ស៊ីហ្គេម​ឆ្នាំ​២០២៣ នៅ​កម្ពុជា​កាលពី​ពេល​ថ្មីៗ​នេះ។

កាលពី​ថ្ងៃទី​២៨ ខែ​មីនា ឆ្នាំ​២០២៣ គណៈកម្មាធិការ​ជាតិ​រៀបចំ​ការ​ប្រកួត​កីឡា​អាស៊ី​អាគ្នេយ៍​លើក​ទី​៣២ (CAMSOC) បាន​ប្រកាស​លក់​សំបុត្រ​សម្រាប់​អ្នក​ចូល​ទស្សនា​ពិធី​បើក​ព្រឹត្តិការណ៍​ស៊ីហ្គេម​ឆ្នាំ​២០២៣ នៅ​ដើម​ខែ​ឧសភា ឆ្នាំ​២០២៣ ខាងមុខ​នេះ​ក្នុង​តម្លៃ ១០​ម៉ឺន​រៀល និង ២០​ម៉ឺន​រៀល​ក្នុង​ម្នាក់ៗ។

ក្រោយ​ការ​ស្ដីបន្ទោស​របស់​លោក ហ៊ុន សែន គណៈកម្មាធិការ​ជាតិ​រៀបចំ​ការ​ប្រកួត​កីឡា​អាស៊ី​អាគ្នេយ៍ នៅ​ថ្ងៃទី​៣១ ខែ​មីនា ឆ្នាំ​២០២៣ នេះ បាន​ចេញ​សេចក្តី​ជូនដំណឹង​ដោយ​អនុញ្ញាត​ឲ្យ​ប្រជាពលរដ្ឋ​ទូទៅ​ចូល​ទស្សនា​ការ​ប្រកួត និង​ផ្តល់​សិទ្ធិ​ផ្សព្វផ្សាយ​ដល់​ទូរទស្សន៍​បរទេស​នានា​ដែល​ផ្សាយ​បន្ត​ទៅ​ក្រៅ​ប្រទេស​ក្នុង​ព្រឹត្តិការណ៍​ប្រកួត​កីឡា​ស៊ីហ្គេម​នេះ ដោយ​មិន​មាន​ការ​បង់​ប្រាក់​ឡើយ។

កាលពី​ថ្ងៃទី​២៥ ខែ​មករា ឆ្នាំ​២០២៣ ប្រមុខ​រដ្ឋាភិបាល​កម្ពុជា លោក ហ៊ុន សែន បាន​ប្រកាស​ស្វាគមន៍​ការ​រាប់​ថយ​ក្រោយ ១០០​ថ្ងៃ​នៃ​ព្រឹត្តិការណ៍​ស៊ីហ្គេម​លើក​ទី​៣២ ដែល​កម្ពុជា​ទទួល​រៀបចំ​សម្រាប់​ព្រឹត្តិការណ៍​ស៊ីហ្គេម​លើក​ទី​៣២ និង​អាស៊ាន​ប៉ារ៉ាហ្គេម​លើក​ទី​១២ ដែល​កម្ពុជា​ធ្វើ​ជា​ម្ចាស់​ផ្ទះ​ក្នុង​ឆ្នាំ​២០២៣ នេះ។

ព្រឹត្តិការណ៍​ស៊ីហ្គេម​ដែល​កម្ពុជា​ធ្វើ​ជា​ម្ចាស់​ផ្ទះ នឹង​ចាប់ផ្ដើម​នៅ​ថ្ងៃទី​៥ ដល់​ថ្ងៃទី​១៧ ខែ​ឧសភា ឆ្នាំ​២០២៣ ខាងមុខ​នេះ ខណៈ​អាស៊ាន​ប៉ារ៉ាហ្គេម​នឹង​ត្រូវ​ចាប់ផ្ដើម​ពី​ថ្ងៃ​ទី​៣ ដល់​ថ្ងៃទី​៩ ខែ​មិថុនា ឆ្នាំ​២០២៣ ខាងមុខ​នេះ​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស