 តាមការស្នើសុំរបស់លោកនាយករដ្ឋមន្ត្រី ហ៊ុន សែន ដែលបានថ្វាយព្រះអង្គកាលពីពេលថ្មីៗនេះ។){kind=link}
ព្រះមហាក្សត្រខ្មែរត្រាស់បង្គាប់ផ្តល់សញ្ជាតិខ្មែរដល់កីឡាករប្រដាល់ជនជាតិប្រេស៊ីល លោក Thiago Teixeira Manado និងភរិយារបស់លោកដែលជាជនជាតិប៉ូឡូញ សញ្ជាតិអាមេរិកាំង អ្នកស្រី រ៉ូម៉ា ម៉ារៀ រ៉ូហ្សានស្កា ស្តេហ្វហ្វន (ROMA MARIA ROZANSKA-STEFFEN) តាមការស្នើសុំរបស់លោកនាយករដ្ឋមន្ត្រី ហ៊ុន សែន ដែលបានថ្វាយព្រះអង្គកាលពីពេលថ្មីៗនេះ។
ព្រះមហាក្សត្រខ្មែរព្រះករុណាព្រះបាទ នរោត្តម សីហមុនី កាលពីថ្ងៃទី១១ ខែមេសា ឆ្នាំ២០២៣ បានព្រះរាជទានសញ្ជាតិខ្មែរដោយសញ្ជាតូបនីយកម្មជាចង្កោមគ្រួសារដល់គ្រួសារលោក Thiago Teixeira Manado និងភរិយារបស់លោក គឺអ្នកស្រី រ៉ូម៉ា ម៉ារៀ រ៉ូហ្សានស្កា ស្តេហ្វហ្វន (ROMA MARIA ROZANSKA-STEFFEN) តាមសំណើទូលថ្វាយរបស់ប្រមុខរាជរដ្ឋាភិបាលកម្ពុជា បន្ទាប់ពីកីឡាករប្រដាល់បរទេសរូបនេះចូលរួមជួយផ្សព្វផ្សាយវិស័យកីឡាគុនខ្មែរនាពេលកន្លងមក។
កាលពីថ្ងៃទី៨ ខែមេសា ឆ្នាំ២០២៣ ប្រមុខរាជរដ្ឋាភិបាលកម្ពុជា លោក ហ៊ុន សែន បានផ្តល់រង្វាន់ដល់កីឡាករប្រដាល់ Thiago Teixeira សញ្ជាតិប្រេស៊ីល ចំនួន ២ម៉ឺនដុល្លារអាមេរិក និងប្រកាសស្នើសុំផ្តល់សញ្ជាតិខ្មែរដល់កីឡាករបរទេសរូបនេះថែមទៀត។
ការផ្តល់សញ្ជាតិខ្មែរដល់កីឡាករប្រដាល់ជនជាតិប្រេស៊ីលនេះ ធ្វើឡើងបន្ទាប់ពីលោក Thiago Teixeira Manado ត្រូវគណៈកម្មាធិការមួយថៃ ដកខ្សែក្រវាត់ WMO របស់លោក ក្រោយពីអ្នកប្រដាល់រូបនេះចេញប្រកួតតំណាងឱ្យគុនខ្មែរនៅប្រទេសអាល្លឺម៉ង់ កាលពីដើមខែមេសា កន្លងទៅនេះ។
កាលពីថ្ងៃទី១ ខែមេសា ឆ្នាំ២០២៣ កីឡាករប្រដាល់ Thiago Teixeira បានប្រកួតឈ្នះកីឡាករប្រដាល់ជនជាតិអង់គ្លេស លោក Joe Craven ក្នុងកម្មវិធី APEX Fight Series នៅសង្វៀន LKH Arena ប្រទេសអាល្លឺម៉ង់ ដែលត្រូវទទួលបានខ្សែក្រវាត់ពិភពលោក WMO (World Of Muaythai Organization) ពីការប្រកួតនោះ។
ក្រោយឈ្នះការប្រកួតភ្លាម លោក Thiago បានយកទង់ជាតិរបស់កម្ពុជាមកចងជាប់នឹងខ្លួនដោយឆ្លើយទៅកាន់សំណួរពិធីករថា ជើងឯកពិភពលោក WMO គុនខ្មែរ ជាក្បាច់គុនមានដើមកំណើតពីកម្ពុជា។ បន្ថែមលើនេះ កីឡាករប្រដាល់រូបនេះក៏បានបង្ហោះវីដេអូខ្លីលើបណ្ដាញសង្គមហ្វេសប៊ុករបស់ខ្លួនថែមទៀត បន្ទាប់ពីការប្រកួតបានបញ្ចប់ ដោយនិយាយជាភាសាខ្មែរថា៖ «គុនខ្មែរ! គុនខ្មែរ! គុនខ្មែរ» ជាក្បាច់គុនមានដើមកំណើតពីកម្ពុជា»។
ដោយសារតែបញ្ហានេះ នៅថ្ងៃទី៦ ខែមេសា ឆ្នាំ២០២៣ ប្រធានស្ថាប័នមួយថៃ (WMO) លោក Chinawut Sirisampan បានចេញសេចក្តីថ្លែងការណ៍មួយដោយប្រកាសដកខ្សែក្រវាត់ WMO ពីកីឡាករប្រដាល់ Thiago Teixeira និងមិនផ្តល់ទឹកប្រាក់ចំនួន ៣៥០០ដុល្លារអាមេរិកជារង្វាន់ដែលលោកត្រូវទទួលបានពីជ័យជម្នះក្នុងការប្រកួតនេះថែមទៀត។
ជុំវិញបញ្ហានេះ អ្នកប្រដាល់ជនជាតិប្រេស៊ីលតំណាងគុនខ្មែរ កីឡាករ Thiago Teixeira បានធ្វើសន្និសីទសារព័ត៌មានឆ្លើយតបទៅនឹងគណៈកម្មាធិការមួយថៃ WMO កាលពីថ្ងៃទី៨ ខែមេសា ឆ្នាំ២០២៣ ដោយសម្ដែងនូវការខកចិត្តយ៉ាងខ្លាំង និងចាត់ទុកការដកយកខ្សែក្រវាត់របស់លោកនេះ គឺជាការរើសអើងមួយដែលពិភពលោកស្អប់ខ្ពើម។
ទាក់ទិននឹងបញ្ហានេះ ក្រុមអ្នកឃ្លាំមើលសង្គមលើកឡើងថា អ្វីដែលកម្ពុជាត្រូវធ្វើនោះ គឺរដ្ឋាភិបាលត្រូវតែលើកស្ទួយវិស័យកីឡារបស់ខ្លួនឱ្យទៅជាកីឡាជាតិ ព្រោះកន្លងមកកម្ពុជាតែងរៀបចំការប្រកួតកីឡាយកពានរង្វាន់ជាលក្ខណៈបុគ្គលប៉ុណ្ណោះ ដូចជាការប្រកួតយកពានរង្វាន់របស់ក្រុមហ៊ុនស្រាបៀ ឬប្រកួតយកពានរង្វាន់របស់ក្រុមហ៊ុនលក់ផលិតផលផ្សេងៗ ជាដើម ដែលទាំងអស់នេះមិនមែនជាពានរង្វាន់ថ្នាក់ជាតិឡើយ។
ប្រភពដដែលបញ្ជាក់ថា ពានរង្វាន់ថ្នាក់ជាតិ គឺជាពានរង្វាន់របស់ព្រះមហាក្សត្រ ព្រោះព្រះអង្គជាព្រះប្រមុខរដ្ឋ ដូចជាប្រទេសថៃធ្លាប់ធ្វើរហូតមក នោះទើបអាចជំរុញវិស័យកីឡាកម្ពុជាឱ្យខ្ពង់ខ្ពស់ទៅមុខ និងអាចជួយលើកស្ទួយជីវភាពកីឡាករប្រដាល់ក្នុងការផ្សព្វផ្សាយក្បាច់គុននៅលើឆាកអន្តរជាតិឱ្យកាន់តែទូលំទូលាយផងដែរ។
ប្រវត្តិវប្បធម៌ក្បាច់គុនបុរាណខ្មែរមានប្រវត្តិយូរលង់ណាស់មកហើយ បើយោងទៅលើភស្តុតាងដែលបុព្វបុរសខ្មែរបានឆ្លាក់ជារូបក្បាច់គុនផ្សេងៗលើផ្ទាំងសិលាតាមជញ្ជាំងប្រាសាទនានារបស់ខ្មែរ ដូចជាប្រាសាទបាយ័ន ប្រាសាទអង្គរវត្ត និងប្រាសាទជាច្រើនទៀត ដែលប្រាសាទតំណាងជាតិរបស់កម្ពុជាទាំងនេះត្រូវបានសាងសង់ឡើងតាំងពីដើមសតវត្សទី១២ មកម្ល៉េះ៕