35 C
Phnom Penh

លោក ហ៊ុន សែន ព្រមាន​មិន​ឱ្យ​ផ្គូផ្គង​កីឡាករ​ត្រៀម​ស៊ីហ្គេម​ឡើង​សង្វៀន​ញឹកញាប់

ដោយ ឌឹ ខេមបូឌា ដេលី

បទវិភាគ

លោក ហ៊ុន សែន ព្រមាន​សហព័ន្ធ​កីឡា​កម្ពុជា​មិន​ឱ្យ​រៀបចំ​កម្មវិធី​ប្រកួត​ណា​មួយ​សម្រាប់​កីឡាករ​ខ្មែរ​ដែល​មាន​ឈ្មោះ​ចូលរួម​ប្រកួត​នៅ​ក្នុង​ព្រឹត្តិការណ៍​ស៊ីហ្គេម​នោះ​ឡើយ ព្រោះ​វា​អាច​ធ្វើ​ឱ្យ​កីឡាករ​បាត់បង់​ឱកាស​ដោយ​ប្រការ​ណា​មួយ។

លោក ហ៊ុន សែន បាន​ចេញ​ខ្សែអាត់​សំឡេង​ប្រវែង​ជាង ១២​នាទី​ទាំង​យប់​កាលពី​ថ្ងៃទី​១៦ ខែ​មេសា ឆ្នាំ​២០២៣ ដោយ​បញ្ជា​ឱ្យ​សហព័ន្ធ​កីឡា​ប្រដាល់​កម្ពុជា​យកចិត្ត​ទុកដាក់​លើ​កីឡាករ​ប្រដាល់​របស់​កម្ពុជា ដែល​ត្រូវ​ចូលរួម​ប្រកួត​ក្នុង​ព្រឹត្តិការណ៍​ស៊ីហ្គេម​ខាងមុខ​ឱ្យ​បាន​ហ្មត់ចត់ មុន​នឹង​ព្រឹត្តិការណ៍​នេះ​មក​ដល់ ដោយ​មិន​អនុញ្ញាត​ឲ្យ​មាន​ការ​រៀបចំ​ការ​ប្រកួត​សម្រាប់​កីឡាករ​ប្រដាល់​ទាំងនោះ​ឡើយ។

លោក ហ៊ុន សែន បញ្ជាក់​ថា សហព័ន្ធ​កីឡា​ប្រដាល់​កម្ពុជា​ត្រូវ​ត្រួតពិនិត្យ​កីឡាករ​ប្រដាល់​ដែល​ត្រូវ​ចូលរួម​ប្រកួត​ទៅ​តាម​ទីតាំង​ក្នុង​ព្រឹត្តិការណ៍​ស៊ីហ្គេម​ឱ្យ​បាន​ត្រឹមត្រូវ និង​មិន​ឱ្យ​មាន​ហេតុការណ៍​ថ្លោះធ្លោយ​ណា​មួយ​កើតឡើង​ជាយថាហេតុ​ដាច់ខាត សម្រាប់​ការ​ប្រកួត​តាម​វិញ្ញាសា​ក្នុង​ព្រឹត្តិការណ៍​ស៊ីហ្គេម​ខាងមុខ​នេះ។

ការ​ព្រមាន​នេះ ធ្វើឡើង​ដើម្បី​កុំ​ឱ្យ​កីឡាករ​ប្រដាល់​ដែល​មាន​ឈ្មោះ​ត្រូវ​ចូលរួម​ក្នុង​ព្រឹត្តិការណ៍​ស៊ីហ្គេម ឡើង​ប្រកួត​នៅ​កម្មវិធី​ផ្សេងៗ​មុន​នឹង​ចូលរួម​ប្រកួត​ក្នុង​ព្រឹត្តិការណ៍​ស៊ីហ្គេម បន្ទាប់ពី​កីឡាករ​ប្រដាល់​ខ្មែរ លោក ឈឿន ល្វៃ បាន​រង​របួស​ក្នុង​ការ​ប្រកួត​កាលពី​ពេល​ថ្មីៗ​នេះ។

គិត​ត្រឹម​ថ្ងៃទី​១៧ ខែ​មេសា ឆ្នាំ​២០២៣ នេះ សល់​រយៈពេល​តែ ១៨​ថ្ងៃ​ទៀត​ប៉ុណ្ណោះ ការ​ប្រកួត​កីឡា​ស៊ីហ្គេម​លើក​ទី​៣២ ដែល​កម្ពុជា​ធ្វើ​ជា​ម្ចាស់ផ្ទះ នឹង​ត្រូវ​ប្រកាស​បើក​ព្រឹត្តិការណ៍​ស៊ីហ្គេម​នេះ​ហើយ​នៅ​ថ្ងៃទី​៥ ខែ​ឧសភា ឆ្នាំ​២០២៣ ខាងមុខ​នេះ បន្ទាប់ពី​បាន​រង់ចាំ​អស់​រយៈពេល ៦៤​ឆ្នាំ​មក។

ព្រឹត្តិការណ៍​ស៊ីហ្គេម​នឹង​ចាប់ផ្តើម​ពី​ថ្ងៃទី​៥ ដល់​ថ្ងៃទី​១៧ ខែ​ឧសភា ឆ្នាំ​២០២៣ ខណៈ​អាស៊ាន​ប៉ារ៉ាហ្គេម (ASEAN Para Games) នឹង​ចាប់ផ្តើម​ពី​ថ្ងៃ​ទី​៣ ដល់​ថ្ងៃទី​៩ ខែ​មិថុនា ឆ្នាំ​២០២៣ ផង​ដែរ។

ព្រឹត្តិការណ៍​ស៊ីហ្គេម​លើក​ទី​៣២ ដែល​កម្ពុជា​ធ្វើជា​ម្ចាស់ផ្ទះ នឹង​មាន​ការ​ចូលរួម​ពី​ប្រទេស​ជាច្រើន ដូចជា ថៃ ឥណ្ឌូនេស៊ី វៀតណាម ហ្វីលីពីន ឡាវ មីយ៉ាន់ម៉ា និង​ម៉ាឡេស៊ី ផង​ដែរ ខណៈ​វិញ្ញាសា​ប្រកួត​មាន​ចំនួន ៣៨​ប្រភេទ រួមមាន​ប៉េតង់ តេក្វាន់ដូ (WT) ប្រដាល់​គុន​ខ្មែរ បាល់ទាត់ គុន​ល្បុក្កតោ និង​កាយ​វប្បកម្ម ជាដើម។

កីឡា​អាស៊ាន​ប៉ារ៉ាហ្គេម​លើក​ទី​១២ មាន​វិញ្ញាសា​ចំនួន ១២​ប្រភេទ រួមមាន​អត្តពលកម្ម ហែល​ទឹក លេងអុក បាល់ទះ​អង្គុយ វាយ​សី និង​វាយ​កូនឃ្លី​លើ​តុ ជាដើម។

ទាក់ទង​នឹង​បញ្ហា​នេះ កាលពី​ថ្ងៃទី​១៣ ខែ​កុម្ភៈ ឆ្នាំ​២០២៣ អគ្គលេខាធិការ​គណៈកម្មាធិការ​ជាតិ​រៀបចំ​ការ​ប្រកួត​ស៊ីហ្គេម និង​អាស៊ាន​ប៉ារ៉ាហ្គេម​ក្នុង​ឆ្នាំ​២០២៣ នេះ លោក វ៉ាត់ ចំរើន អះអាង​ថា តាម​ការ​គ្រោងទុក មេដាយ​ដែល​ត្រូវ​ផលិត​សម្រាប់​ព្រឹត្តិការណ៍​កីឡា​អន្តរជាតិ​នេះ​មាន​ចំនួន​សរុប​ប្រមាណ​ជា ៦​ពាន់​មេដាយ​សម្រាប់​កីឡាករ ប៉ុន្តែ​ក្នុង​នោះ​ក៏​មាន​ការ​ផលិត​មេដាយ​ជាច្រើន​ទៀត​សម្រាប់​ទុក​ជា​វត្ថុ​អនុស្សាវរីយ៍​ដើម្បី​ផ្តល់​ជូន​គណៈប្រតិភូ ម្ចាស់​ឧបត្ថម្ភ និង​ភ្ញៀវ​នានា​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស