សកម្មជនបក្សប្រឆាំងចាត់ទុកបេះដូងមេដឹកនាំខ្មែរ លោក ហ៊ុន សែន ថាជាបេះដូងដែលគ្មានសាច់ គ្មានឈាមដូចបេះដូងក្រដាសដែលគេបានរៀបចំនៅមុខប្រាសាទអង្គរវត្តដូច្នោះដែរ ព្រោះថាបេះដូងក្រដាស គឺជាបេះដូងដែលកប់ក្នុងដីរលួយ ត្រូវទឹករលាយ ហើយត្រូវខ្យល់នឹងប៉ើងតាមខ្យល់ប៉ុណ្ណោះ។
សកម្មជនគណបក្សសង្គ្រោះជាតិ លោក ទឹម សុជា បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃចន្ទ ទី១៧ មេសា ថា គេអាចសិក្សាហេតុផលបានថា បេះដូងលោក ហ៊ុន សែន ជាបេះដូងក្រដាស ព្រោះអ្វីៗដែលគាត់បានធ្វើក្នុងរយៈពេលដែលគាត់ដឹកនាំប្រទេសជាង ៤០ឆ្នាំមកនេះ គ្មានកិច្ចការណាមួយដែលគិតគូរដល់ផលប្រយោជន៍ជាតិនោះទេ គឺមានតែគិតផលប្រយោជន៍ក្រុមគ្រួសាររបស់គាត់ និងការកេងចំណេញនយោបាយប៉ុណ្ណោះ។
លោក ទឹម សុជា លើកឡើងថា រឿងងាយៗដែលគេអាចវាយតម្លៃលើកិច្ចការរបស់លោក ហ៊ុន សែន ដែលគាត់កំពុងធ្វើនៅពេលនេះ គឺការរៀបចំឲ្យមានបេះដូងក្រដាសច្រើនជាងគេនៅលើពិភពលោកនៅពេលនេះជាដើម ព្រោះថាការរៀបចំនេះគឺជារឿងឥតប្រយោជន៍សុទ្ធសាធសម្រាប់ប្រជាពលរដ្ឋខ្មែរ ត្បិតបេះដូងក្រដាសនេះក្រៅតែពីបំបែកកំណត់ត្រាពិភពលោកដែលមេដឹកនាំប្រទេសផ្សេងមិនធ្វើ ព្រោះគេយល់ឃើញថាជារឿងឥតប្រយោជន៍ គឺគ្រាន់តែជាល្បិចនយោបាយប្រជាភិថុតិលើពលរដ្ឋខ្មែរប៉ុណ្ណោះ។
សកម្មជនគណបក្សសង្គ្រោះជាតិរូបនេះបញ្ជាក់ថា ព្រឹត្តិការណ៍ដែលលោក ហ៊ុន សែន បង្កើតឡើងដើម្បីធ្វើប្រជាភិថុតិ ដូចជាអន្សមធំជាងគេ ក្រមាវែងជាងគេ បេះដូងក្រដាសច្រើនជាងគេ និងអ្នករាំបទម៉ាឌីហ្សូនច្រើនជាងគេ គឺគ្មានប្រយោជន៍អ្វីសម្រាប់ជាតិទាំងអស់ គ្រាន់តែជាល្បិចនយោបាយទាក់ទាញប្រជាប្រិយភាពសម្រាប់ខ្លួនគាត់ ដើម្បីកេងចំណេញនយោបាយសម្រាប់បក្សកាន់អំណាចតែប៉ុណ្ណោះ។
ការអះអាងនេះ ធ្វើឡើងបន្ទាប់ពីមេដឹកនាំបក្សកាន់អំណាច លោក ហ៊ុន សែន អួតពីការរៀបចំបេះដូងក្រដាសច្រើនជាងគេរហូតអាចបំបែកឯកត្តកម្មលើពិភពលោកកាលពីពេលថ្មីៗនេះ រហូតលោកចាត់ទុកថា កម្ពុជាជាប្រទេសតូចដែលមានបេះដូងធំថែមទៀត។
កាលពីថ្ងៃទី១៣ ខែមេសា ឆ្នាំ២០២៣ ប្រទេសកម្ពុជាបានបំបែកកំណត់ត្រាពិភពលោកដោយសារតែការរៀបចំបេះដូងក្រដាសច្រើនជាងគេនៅលើពិភពលោក។ ក្រោយជាប់កំណត់ត្រាពិភពលោកនេះ មន្ត្រីបក្សកាន់អំណាច ជាពិសេសលោក ហ៊ុន សែន លើកឡើងថា កម្ពុជាជាប្រទេសតូចតែបេះដូងធំ ដែលលោកចង់មានន័យថា ក្នុងឋានៈលោកជាមេដឹកនាំ គឺមានបេះដូងទូលាយពោរពេញដោយគុណធម៌ក្នុងការដឹកនាំប្រទេសដ៏តូចមួយនេះ។
សកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន បានលើកឡើងក្នុងកម្មវិធីពិភាក្សានេះដែរថា បើគ្រាន់តែដើម្បីបង្ហាញថាមេដឹកនាំនៃប្រទេសមួយមានគុណធម៌ខ្ពស់ដឹកនាំប្រទេសប្រកបដោយបេះដូងទូលាយ ដោយការរៀបចំបេះដូងក្រដាសឲ្យបានច្រើនបែបនេះ ប្រទេសភូមា ប្រទេសរុស្ស៊ី និងប្រទេសរំលោភសិទ្ធិមនុស្សផ្សេងទៀត ក៏អាចរៀបចំបេះដូងក្រដាសឲ្យកាន់តែច្រើនដើម្បីក្លាយជាប្រទេសដែលមានមេដឹកនាំបេះដូងទូលាយបានដែរ។
លោក ស្រ៊ុន ស្រ៊ន លើកឡើងថា ការរៀបចំបេះដូងក្រដាសនេះ បើប្រើក្នុងអត្ថន័យដើម្បីទាក់ទាញភ្ញៀវទេសចរឲ្យប្លែកភ្នែកនោះ គឺជារឿងត្រឹមត្រូវ ប៉ុន្តែមិនអាចយកមកប្រើក្នុងអត្ថន័យបង្ហាញថាមេដឹកនាំនៃប្រទេសនោះមានបេះដូងទូលាយបានទេ ព្រោះថាដើម្បីបង្ហាញថា មេដឹកនាំនៃប្រទេសមួយមានបេះដូងទូលាយក្នុងការដឹកនាំរដ្ឋ ទាល់តែមានការដឹកនាំដោយការគោរពច្បាប់ ធានាបាននូវនីតិរដ្ឋ និងលទ្ធិប្រជាធិបតេយ្យស្របតាមរដ្ឋធម្មនុញ្ញរបស់ខ្លួន ជាដើម។
អ្នកឃ្លាំមើលកិច្ចការសង្គមរូបនេះបញ្ជាក់ថា សម្រាប់ប្រទេសកម្ពុជាទាល់តែមេដឹកនាំធានាបាននូវការអនុវត្តច្បាប់ គោរពតាមរដ្ឋធម្មនុញ្ញ កិច្ចព្រមព្រៀងសន្តិភាពទីក្រុងប៉ារីស លើកស្ទួយសិទ្ធិមនុស្ស អនុវត្តតាមគន្លងលទ្ធិប្រជាធិបតេយ្យសេរីពហុបក្ស និងបើកឲ្យមានសេរីភាពបញ្ចេញមតិ ជាដើម ទើបអាចចាត់ទុកថាមេដឹកនាំនោះមានបេះដូងទូលំទូលាយសម្រាប់ប្រទេសដ៏តូចមួយនេះ។
កម្ពុជាដែលក្រោមការដឹកនាំរបស់មេដឹកនាំបក្សកាន់អំណាច លោក ហ៊ុន សែន ត្រូវគេមើលឃើញថា បានរំលោភច្បាប់ រំលោភសិទ្ធិមនុស្ស រំលោភព្រះមហាក្សត្រ រំលាយបក្សប្រឆាំង បង្កើតឲ្យមានអំពើពុករលួយ បង្កើតឲ្យមានការសម្លាប់ក្រៅប្រព័ន្ធច្បាប់ និងបង្ក្រាបពលរដ្ឋដែលទាមទារសិទ្ធិសេរីភាពរហូតចាប់ខ្លួនដាក់គុក ជាដើម។
ជាក់ស្តែង កាលពីអំឡុងឆ្នាំ២០១៤ កងកម្លាំងចម្រុះរបស់រដ្ឋាភិបាលកម្ពុជាដែលមានលោក ហ៊ុន សែន ជាអ្នកដឹកនាំ បានបាញ់រះទៅលើកម្មករដែលកំពុងតវ៉ានៅមហាវិថីវ៉េងស្រេង ក្នុងបំណងសុំដំឡើងប្រាក់ខែ ១៦០ដុល្លារ ដែលធ្វើឱ្យមនុស្ស ៤នាក់ស្លាប់ ៣៨នាក់ផ្សេងទៀតរងរបួស និងក្មេងប្រុសម្នាក់ឈ្មោះ ខឹម សាផាត បានបាត់ខ្លួនមកទល់សព្វថ្ងៃនេះ។
អស់រយៈពេល ៩ឆ្នាំហើយ រដ្ឋាភិបាលកម្ពុជាដែលមានលោក ហ៊ុន សែន ជានាយករដ្ឋមន្ត្រី មិនទាន់បង្ហាញថា ស្ថាប័នណាមួយជាអ្នកទទួលខុសត្រូវចំពោះការបង្ក្រាបបង្ហូរឈាមនោះទេ ហើយក៏មិនទាន់បានបញ្ជាក់ថា ស្ថាប័នណាមួយជាអ្នកផ្តល់សំណងជំងឺចិត្តដើម្បីប៉ះប៉ូវដល់ការឈឺចាប់របស់គ្រួសារជនរងគ្រោះដែរ។
អង្គការគម្រោងយុត្តិធម៌ពិភពលោក បានដាក់ប្រទេសកម្ពុជាឲ្យស្ថិតក្នុងលេខរៀងទី១៣៩ ក្នុងចំណោម ១៤០ប្រទេសដែលមាននីតិរដ្ឋទាបបំផុត កាលពីអំឡុងខែតុលា ឆ្នាំ២០២២ កន្លងទៅ ដោយសារតែគេរកឃើញថា ការដឹកនាំរបស់រដ្ឋាភិបាលកម្ពុជាគ្មានតម្លាភាព មានការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួន ជាដើម៕