ប្រទេសអូស្ត្រាលី ប្ដេជ្ញាគាំទ្រឲ្យមានសេរីភាពនៃការបញ្ចេញមតិ ការគោរពសិទ្ធិជាមូលដ្ឋាន និងលទ្ធិប្រជាធិបតេយ្យក្នុងនាមប្រទេសជាមិត្តដ៏យូរអង្វែង និងជាដៃគូរបស់ប្រទេសកម្ពុជាកន្លងមក។
ស្ថានទូតអូស្ត្រាលីប្រចាំនៅកម្ពុជា សរសេរលើទំព័រហ្វេសប៊ុករបស់ខ្លួននៅថ្ងៃទី១៨ មេសា នេះថា ក្នុងនាមអូស្ត្រាលីជាមិត្តដ៏យូរអង្វែង និងជាដៃគូរបស់កម្ពុជា អូស្ត្រាលីនៅតែប្ដេជ្ញាបន្តការគាំទ្រឲ្យមានសេរីភាពនៃការបញ្ចេញមតិ និងសិទ្ធិជាមូលដ្ឋាននានា ហើយអូស្ត្រាលីនៅតែបន្តធ្វើការយ៉ាងជិតស្និទ្ធជាមួយដៃគូនានារបស់ខ្លួន ដើម្បីគាំទ្រឲ្យមានការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាទៅថ្ងៃមុខបន្តទៀត។
ការអះអាងនេះ ធ្វើឡើងស្របពេលដែលស្ថានភាពសិទ្ធិមនុស្សនៅកម្ពុជាត្រូវគេឃើញថា កំពុងធ្លាក់ចុះយ៉ាងធ្ងន់ធ្ងរបន្ទាប់ពីរដ្ឋាភិបាលខ្មែរចាប់ខ្លួនសកម្មជននយោបាយ សកម្មជនសង្គម និងបិទប្រព័ន្ធផ្សព្វផ្សាយឯករាជ្យ ជាដើម។
មន្ត្រីជាន់ខ្ពស់ទទួលបន្ទុកសិទ្ធិមនុស្សនៅកម្ពុជានៃសមាគមសិទ្ធិមនុស្សអាដហុក លោក ស៊ឹង សែនករុណា សម្ដែងនូវក្តីសង្ឃឹមចំពោះវត្តមានរបស់ឯកអគ្គរដ្ឋទូតប្រទេសអូស្ត្រាលី លោក វ៉ាយ អេត ដែលបានផ្តល់ឱកាសដល់អង្គការសង្គមស៊ីវិលឲ្យមានឱកាសជួបពិភាក្សាចែករំលែកព័ត៌មានពីស្ថានភាពសិទ្ធិមនុស្សនៅកម្ពុជា ក្នុងកិច្ចពិភាក្សាប្រចាំត្រីមាសរបស់ស្ថានទូតអូស្ត្រាលី ជាមួយអង្គការសិទ្ធិមនុស្ស និងស្ថានទូតជាច្រើនទៀតកាលពីពេលថ្មីៗនេះ។
លោក ស៊ឹង សែនករុណា ធ្លាប់បានអំពាវនាវទៅកាន់ប្រទេសលោកសេរីកាលពីដើមខែមេសា នេះថា សូមកុំឲ្យប្រទេសលោកសេរីរើសយកបុគ្គលនយោបាយណាមួយ ឬក៏បក្សនយោបាយណាមួយឲ្យសោះ សូមរើសយកពលរដ្ឋខ្មែរដែលត្រូវការប្រជាធិបតេយ្យ និងការគោរពសិទ្ធិមនុស្សពិតប្រាកដ។
លោកបញ្ជាក់ថា ទាល់តែមានប្រព័ន្ធប្រកួតប្រជែងបោះឆ្នោតដោយសេរី ត្រឹមត្រូវ និងយុត្តិធម៌ ទើបមានការចូលរួមពីពលរដ្ឋខ្មែរគ្រប់និន្នាការនយោបាយដោយគ្មានការភ័យខ្លាច។
កាលពីចុងខែមីនា ឆ្នាំ២០២៣ ឯកអគ្គរាជទូតអូស្ត្រាលី លោក វ៉ាយ អេត បានជួបជាមួយលោកនាយករដ្ឋមន្ត្រី ហ៊ុន សែន ដើម្បីពិភាក្សាការងារអំពីវិធីសាស្ត្រដែលអូស្ត្រាលី និងកម្ពុជាធ្វើការងាររួមគ្នាទាំងលក្ខណៈទ្វេភាគី និងក្នុងតំបន់ ក្នុងនោះ លោក វ៉ាយ អេត បានលើកឡើងអំពីការអភិវឌ្ឍវិស័យសេដ្ឋកិច្ច វិស័យសុខាភិបាល វិស័យអប់រំ វិស័យពាណិជ្ជកម្ម វិស័យសន្តិសុខព្រំដែន វិស័យការពារជាតិ ព្រមទាំងលទ្ធិប្រជាធិបតេយ្យ សង្គមស៊ីវិល និងសិទ្ធិមនុស្សផងដែរ។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ចសង្គម និងវប្បធម៌របស់ប្រទេសជាតិ ខណៈសេចក្តីស្នើទាំងឡាយរបស់ពលរដ្ឋត្រូវបានដោះស្រាយ និងពិនិត្យយ៉ាងហ្មត់ចត់ពីអង្គការរដ្ឋ ប៉ុន្តែរដ្ឋាភិបាលក្រោមការគ្រប់គ្រងរបស់បក្សកាន់អំណាចសព្វថ្ងៃនេះ ត្រូវគេមើលឃើញថា បានអនុវត្តផ្ទុយពីមាត្រាដែលបានចែងក្នុងរដ្ឋធម្មនុញ្ញទាំងស្រុង។
ជាក់ស្តែង ប្រទេសដែលប្រកាន់របបប្រជាធិបតេយ្យ ជាពិសេសសហរដ្ឋអាមេរិក បានរកឃើញជាបន្តបន្ទាប់ពីការរំលោភសិទ្ធិរបស់រដ្ឋាភិបាលកម្ពុជាលើប្រជាពលរដ្ឋខ្មែរ។ ជាក់ស្តែង របាយការណ៍ប្រចាំឆ្នាំ២០២១ របស់ក្រសួងការបរទេសសហរដ្ឋអាមេរិកស្ដីពីសិទ្ធិមនុស្សនៅក្នុងប្រទេសកម្ពុជា ដែលបានចេញផ្សាយកាលពីពាក់កណ្តាលឆ្នាំ២០២២ បានរកឃើញថា មន្ត្រីរដ្ឋាភិបាលកម្ពុជានៅតែបន្តរំលោភសិទ្ធិមនុស្សធ្ងន់ធ្ងរ ជាពិសេសតាមរយៈនៃការគំរាមកំហែងដោយប្រើកងកម្លាំងប្រដាប់អាវុធប្រឆាំងនឹងគូប្រជែងនយោបាយរបស់លោក ហ៊ុន សែន ជាដើម។
របាយការណ៍ខាងលើបានលាតត្រដាងថា រដ្ឋាភិបាលកម្ពុជាបានធ្វើការចោទប្រកាន់តាមអំពើចិត្តពីបទ «ញុះញង់» ក្នុងរយៈពេលពីរឆ្នាំចុងក្រោយនេះ ដោយប្រើប្រាស់ច្បាប់ ដើម្បីចោទប្រកាន់មេដឹកនាំគណបក្សប្រឆាំង និងអ្នកគាំទ្ររបស់ពួកគេពីបទឧក្រិដ្ឋផងដែរ។
បន្ថែមពីនេះ ក៏មានការយាយីកាន់តែខ្លាំងឡើងៗលើមេដឹកនាំសហជីពឯករាជ្យ សកម្មជនបរិស្ថាន និងប្រជាពលរដ្ឋដែល «បញ្ចេញមតិដ៏រសើបទាក់ទិននឹងរឿងនយោបាយ» ក្នុងនោះរួមមានទាក់ទិនការឆ្លើយតបរបស់រដ្ឋាភិបាលទៅនឹងការរីករាលដាលជំងឺកូវីដ-១៩ វិវាទដីធ្លី បញ្ហាព្រំដែនជាមួយវៀតណាម និងទំនាក់ទំនងជាមួយប្រទេសចិន ជាដើម។
ទាក់ទិននឹងការដឹកនាំរបស់លោក ហ៊ុន សែន ជាង ៤០ឆ្នាំមកនេះ អង្គការ Freedom House បានចេញរបាយការណ៍របស់ខ្លួនកាលពីឆ្នាំ២០២២ ថា ប្រព័ន្ធនយោបាយរបស់កម្ពុជាត្រូវបានលោក ហ៊ុន សែន គ្រប់គ្រងផ្ដាច់មុខទាំងស្រុង ក្នុងនោះគណបក្សប្រឆាំង បណ្ដាញសារព័ត៌មានឯករាជ្យ អ្នកតវ៉ាទាមទារសិទ្ធិសេរីភាព និងពលរដ្ឋខ្មែរកំពុងរស់នៅក្នុងភាពភ័យខ្លាចគ្រប់ៗគ្នា៕