ព្រះមហាក្សត្រខ្មែរសម្តេចព្រះបាទ នរោត្តម សីហមុនី ត្រាស់បង្គាប់តែងតាំងលោក កែវ បេងវឌ្ឍន៍ ជាទីប្រឹក្សាផ្ទាល់របស់លោក ហ៊ុន សែន ឲ្យមានឋានៈស្មើរដ្ឋមន្ត្រី បន្ថែមលើមុខងារបច្ចុប្បន្ន ស្របពេលដែលលោកកំពុងជាប់ឈ្មោះក្នុងរឿងអាស្រូវពុករលួយជួយរៀបចំសាច់ញាតិខ្លួនឯងក្នុងស្ថាប័នជាតិ។
ព្រះមហាក្សត្រខ្មែរសម្តេចព្រះបាទ នរោត្តម សីហមុនី បានចេញព្រះរាជក្រឹត្យកាលពីថ្ងៃទី២០ ខែមេសា ឆ្នាំ២០២៣ ដោយទ្រង់យល់ស្របតាមសេចក្តីក្រាបបង្គំទូលថ្វាយរបស់ប្រមុខរាជរដ្ឋាភិបាលកម្ពុជា លោក ហ៊ុន សែន ក៏បានតែងតាំងលោក កែវ បេងវឌ្ឍន៍ ជាទីប្រឹក្សាផ្ទាល់របស់លោក ហ៊ុន សែន ឲ្យមានឋានៈស្មើរដ្ឋមន្ត្រីបន្ថែមលើមុខងារបច្ចុប្បន្នដោយពុំទទួលប្រាក់បំណាច់មុខងារ។
ការតែងតាំងលោក កែវ បេងវឌ្ឍន៍ នេះ ធ្វើឡើងបន្ទាប់ពីមន្ត្រីរាជរដ្ឋាភិបាលរូបនេះបានជាប់ឈ្មោះក្នុងរឿងអាស្រូវប្រព្រឹត្តអំពើពុករលួយក្នុងស្ថាប័នរដ្ឋធ្ងន់ធ្ងរក្នុងពេលបច្ចុប្បន្ននេះ។
កាលពីចុងខែធ្នូ ឆ្នាំ២០២២ មន្ត្រីមួយចំនួនស្នើទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងអង្គភាពប្រឆាំងអំពើពុករលួយ ឲ្យបើកការស៊ើបអង្កេតលើករណីអគ្គនាយកដ្ឋានហិរញ្ញវត្ថុថ្នាក់ក្រោមជាតិនៃក្រសួងសេដ្ឋកិច្ច លោក កែវ បេងវឌ្ឍន៍ ដែលបានដាក់គ្រួសារ និងសាច់ញាតិរបស់ខ្លួនឲ្យចូលធ្វើការនៅក្នុងស្ថាប័នដែលខ្លួនកំពុងដឹកនាំសព្វថ្ងៃនេះ ដែលជាហេតុធ្វើឲ្យមានអំពើពុករលួយកើតមានក្នុងស្ថាប័នរដ្ឋ។
ការស្នើនេះ ធ្វើឡើងបន្ទាប់ពីអគ្គនាយកដ្ឋានហិរញ្ញវត្ថុថ្នាក់ក្រោមជាតិនៃក្រសួងសេដ្ឋកិច្ច លោក កែវ បេងវឌ្ឍន៍ បានដាក់លោក កែវ បេងវី ដែលត្រូវជាប្អូនប្រុសបង្កើត និងលោក កែវ បេងវឌ្ឍន៍វិស្ណុ ត្រូវជាកូនបង្កើត ឲ្យធ្វើជាប្រធាននាយកដ្ឋានគ្រប់គ្រងហិរញ្ញវត្ថុរដ្ឋបាលថ្នាក់ក្រោមជាតិទី៣ នៅក្នុងអគ្គនាយកដ្ឋានហិរញ្ញវត្ថុថ្នាក់ក្រោមជាតិនៃក្រសួងសេដ្ឋកិច្ច នៅពេលនេះ។
ការតែងតាំងសែស្រឡាយសាច់ញាតិខ្លួនឯង មិនមែនមានតែស្ថាប័នរដ្ឋមួយនេះទេ ជាក់ស្តែងកាលពីថ្ងៃទី២១ ខែមករា ឆ្នាំ២០២២ កូនៗរបស់រដ្ឋមន្ត្រីក្រសួងធនធានទឹក លោក លឹម គានហោ ក៏ត្រូវបានតែងតាំងជារដ្ឋលេខាធិការ និងអនុរដ្ឋលេខាធិការក្រសួងធនធានទឹក និងឧតុនិយមព្រមៗគ្នា បន្ទាប់ពីលោក ហ៊ុន សែន បានទូលថ្វាយទៅព្រះមហាក្សត្រដែរ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ លើកឡើងថា ដោយសារតែប្រទេសកម្ពុជាដឹកនាំដោយគ្រួសារលោក ហ៊ុន សែន ដូច្នេះប្រព័ន្ធរដ្ឋាភិបាលគ្រួសារមួយនេះនឹងការពារតែអ្នកដែលប្រព្រឹត្តអំពើពុករលួយ បក្ខពួកនិយមប៉ុណ្ណោះ ដែលជាហេតុធ្វើឲ្យមានអំពើពុករលួយជាប្រព័ន្ធ និងការបង្កើតបក្ខពួកនិយម គ្រួសារនិយមនៅពេញក្រសួងស្ថាប័នយ៉ាងអនាធិបតេយ្យបែបនេះ។
ជាមួយគ្នានេះផងដែរ បេក្ខជនថ្នាក់បណ្ឌិតខាងផ្នែកវិទ្យាសាស្ត្រនយោបាយនៃសាកលវិទ្យាល័យវីជិនញ៉ា លីញឈ្បើក (Virginia University of Lynchburg) អ្នកស្រី ស៊ូ ឡាក់ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២០ មេសា នេះថា ការដឹកនាំតាមបែបគ្រួសារនិយមនៅកម្ពុជា គឺចាប់ផ្តើមពីគ្រួសារត្រកូលហ៊ុនមុនគេ ជាហេតុនាំឲ្យមន្ត្រីថ្នាក់ក្រោមរបស់គាត់អនុវត្ត និងយកគំរូតាម។
ចំណែកអ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា អះអាងថា ការដាក់ក្រុមគ្រួសារ និងសាច់ញាតិរបស់ខ្លួននៅតាមស្ថាប័នរដ្ឋ មិនមែនទើបនឹងកើតមានទេ ហើយក៏មិនមែនមានតែស្ថាប័នមួយនេះដែរ។ លោកចាត់ទុកការដាក់គ្រួសារ សាច់ញាតិនេះ វាបង្ហាញពីអំពើពុករលួយជាប្រព័ន្ធនៅក្នុងស្ថាប័នរដ្ឋនីមួយៗ ដែលធ្វើឲ្យប៉ះពាល់ដល់ការអនុវត្តការងារ និងថវិកាចំណាយរបស់ជាតិ ជាដើម។
លោកបញ្ជាក់ថា វាក៏បានជះឥទ្ធិពលអាក្រក់ដល់សង្គមជាតិ ជាពិសេសការអភិវឌ្ឍប្រទេស។ លោកបន្តថា ប្រទេសប្រជាធិបតេយ្យគេមិនតែងតាំង និងដាក់គ្រួសារ ព្រមទាំងសាច់ញាតិរបស់ខ្លួននៅក្នុងស្ថាប័នរដ្ឋដែលកំពុងដឹកនាំ ឬកាន់អំណាចនោះឡើយ។
អង្គការតម្លាភាពអន្តរជាតិ (Transparency International) កាលពីអំឡុងឆ្នាំ២០២២ បានរកឃើញថា កម្ពុជាជាប់ចំណាត់ថ្នាក់លេខរៀងទី១៥៧ ក្នុងចំណោមប្រទេស និងដែនដីចំនួន ១៨០ នៅលើពិភពលោក។ ចំណាត់ថ្នាក់នេះបង្ហាញថា កម្ពុជានៅតែជាប្រទេសមានកម្រិតពុករលួយអាក្រក់ជាងគេបំផុតក្នុងចំណោមប្រទេសទាំង ១០ នៃសមាគមអាស៊ាន៕