បុរសខ្លាំងក្រាញអំណាចជិត ៤ទសវត្សរ៍នៅកម្ពុជា គំរាមដកតំណែង និងគំរាមឪពុកម្ដាយ ព្រមទាំងប្អូនៗរបស់លោក ស៊ន តារា បើសិនជាសកម្មជននយោបាយរូបនេះនៅតែបន្តរិះគន់លើការដឹកនាំរបស់រដ្ឋាភិបាលកម្ពុជា និងគ្រួសារត្រកូលហ៊ុនទៀត។
ក្នុងពិធីប្រគល់សញ្ញាបត្រជូនគរុសិស្ស គរុនិស្សិត និស្សិត និងបុគ្គលិកអប់រំ នៅថ្ងៃអង្គារ ទី២៥ មេសា នេះ លោក ហ៊ុន សែន ថ្លែងថា កន្លងមក លោក ស៊ន តារា បានចោទទៅលើរដ្ឋាភិបាលដែលមានលោកជាអ្នកដឹកនាំ ថាខ្វះថវិកាទើបមិនបានរៀបចំពិធីបុណ្យអុំទូក ប៉ុន្តែនៅពេលដែលលោកមិនយកថ្លៃគណៈប្រតិភូដែលចូលរួមក្នុងព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម បែរជាលោក ស៊ន តារា មករិះគន់ ហើយថែមទាំងជំរុញឲ្យរដ្ឋាភិបាលយកថវិការាប់លានដុល្លារទៅចំណាយទៅវិញ។
លោកបង្ហាញការហួសចិត្តដែលសកម្មជនបក្សប្រឆាំងរូបនេះដាក់លក្ខខណ្ឌ ដោយទាមទារយកតំណែងនាយករដ្ឋមន្ត្រីជាថ្នូរនឹងការចរចាជាមួយលោក ខណៈតំណែងនេះ លោក ហ៊ុន សែន កំពុងត្រៀមរៀបចំផ្ទេរឲ្យកូនប្រុសច្បងរបស់លោក គឺលោក ហ៊ុន ម៉ាណែត បន្តវេន ទោះបីជាលោកកាន់អំណាចជិត ៤០ឆ្នាំហើយក្ដី។
បុរសខ្លាំងក្រាញអំណាចតពូជនៅកម្ពុជាអះអាងថា លោក ស៊ន តារា គ្មានឋានៈអ្វីដែលត្រូវឲ្យលោកដាក់ខ្លួនទៅចរចា និងយល់ព្រមតាមលក្ខខណ្ឌទាមទារឡើយ សូម្បីគណបក្សនយោបាយក្រៅរដ្ឋាភិបាលនៅកម្ពុជាបច្ចុប្បន្ន ក៏លោកមិនចាំបាច់ទៅសុំចរចាអ្វីនោះដែរ។
លោក ហ៊ុន សែន បានថ្លែងលើវេទិកាដោយប្រើពាក្យ «អញ ហែង» រូបនេះ ក៏បានព្រមានដកតំណែង និងគំរាមហៅឪពុកម្ដាយ ព្រមទាំងប្អូនរបស់លោក ស៊ន តារា ទៅប្រដៅនៅផ្ទះរបស់លោក ដើម្បីឲ្យអប់រំកូន ប៉ុន្តែនៅពេលដែលលោកហៅទៅប្រដៅដល់ផ្ទះ ហើយឪពុកម្ដាយលោក ស៊ន តារា អប់រំកូនមិនបានទៀត លោក ហ៊ុន សែន ជំរុញឲ្យគ្រួសាររបស់លោក ស៊ន តារា ចាកចេញពីតួនាទីដែលពួកគេកំពុងធ្វើបច្ចុប្បន្ន។
ការព្រមាន និងគំរាមគ្រួសាររបស់លោក ស៊ន តារា ពីសំណាក់លោក ហ៊ុន សែន នៅពេលនេះ ធ្វើឡើងបន្ទាប់ពីសកម្មជនបក្សប្រឆាំង លោក ស៊ន តារា នៅបន្តរិះគន់រដ្ឋាភិបាលកម្ពុជា និងគ្រួសារត្រកូលហ៊ុន។
ក្រោយពីលោក ហ៊ុន សែន ព្រមាន និងគំរាមខ្លាំងៗ ប្អូនប្រុសរបស់លោក ស៊ន តារា គឺលោក ស៊ន សារ៉ាត បានបង្ហាញការសោកស្ដាយចំពោះសកម្មភាពរបស់បងប្រុសខ្លួន ដែលវាយប្រហារជេរប្រមាថលើព្រះមហាក្សត្រ រដ្ឋាភិបាល និងគ្រួសាររបស់លោក ហ៊ុន សែន។
លោកបញ្ជាក់ថា រូបលោក និងគ្រួសារបានផ្ដាច់ទំនាក់ទំនងជាមួយបងប្រុសរបស់ខ្លួនជាយូរណាស់មកហើយ ដោយបារម្ភខ្លាចប៉ះពាល់ការងារ ប៉ុន្តែប្រសិនបើបងប្រុសបង្កើតខ្លួនត្រឡប់មកកម្ពុជាវិញ លោកនឹងពន្យល់លោក ស៊ន តារា ឲ្យបញ្ឈប់សកម្មភាពវាយប្រហារជេរប្រមាថព្រះមហាក្សត្រ និងលោក ហ៊ុន សែន ថែមទៀត។
លោក ស៊ន សារ៉ាត ក៏បានប្ដេជ្ញាជំរុញឲ្យលោក ស៊ន តារា ផ្ដាច់ខ្លួនចេញពីក្រុមបក្សប្រឆាំង ហើយសន្យាថានឹងសហការជាមួយសមត្ថកិច្ច ក្នុងករណីដែលខ្លួនទទួលបានដំណឹង ឬព័ត៌មានណាមួយដែលធ្វើឲ្យប៉ះពាល់ដល់សន្តិសុខសណ្ដាប់ធ្នាប់សង្គមនោះ។
ការលើកឡើងរបស់លោក ស៊ន សារ៉ាត ដែលជាប្អូនបង្កើតលោក ស៊ន តារា ធ្វើឡើងក្នុងវីដេអូឃ្លីបជាង ២នាទី ដែលត្រូវសារព័ត៌មានក្នុងស្រុកមួយយកមកចុះផ្សាយ បន្ទាប់ពីលោក ហ៊ុន សែន បានប្រតិកម្មខ្លាំងៗនាថ្ងៃនេះ។
ឆ្លើយតបនឹងសារព្រមានរបស់លោក ហ៊ុន សែន នៅថ្ងៃទី២៥ មេសា នេះ សកម្មជនបក្សប្រឆាំងលោក ស៊ន តារា បានសរសេរលើហ្វេសប៊ុកដោយប្រកាសកាត់កាលក្រុមគ្រួសាររបស់ខ្លួនចេញ ដោយសារលោកមិនអាចមកបម្រើលោក ហ៊ុន សែន ដែលជាមនុស្សអគុណធម៌បានទេ។ លោកបញ្ជាក់ថា ការធ្វើបែបនេះ គឺធ្វើឡើងដោយស្ម័គ្រចិត្ត និងដោយគ្មានអ្នកណាបង្ខំនោះទេ។
លោក ស៊ន តារា អះអាងថា បើតាមច្បាប់កម្ពុជា ច្បាប់សកលលោក ច្បាប់ធម្មជាតិ នរណាប្រព្រឹត្តអ្នកនោះទទួល នរណាស៊ីអ្នកនោះឆ្អែត មានតែច្បាប់ ប៉ុល ពត និងច្បាប់ ហ៊ុន សែន ទេដែលលោកស៊ីទៅ ឆ្អែតក្របីទៅវិញ។
លោក ស៊ន តារា អះអាងថា លោកក៏ធ្លាប់មានចិត្តស្រឡាញ់សម្តេចខ្លះៗដែរនូវសិល្បៈក្នុងការដឹកនាំចំណុចខ្លះ លោករៀនសូត្រ ចងចាំតែទង្វើអគុណធម៌របស់សម្តេច ធ្វើឲ្យលោកមានកម្លាំងចិត្តតស៊ូដើម្បីគុណធម៌ យុត្តិធម៌ និងសីលធម៌មេដឹកនាំគំរូទោះជាលោកត្រូវស្លាប់នៅនឹងកន្លែងក៏ដោយ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានចាត់ទុកការធ្វើបាបឪពុកម្ដាយ និងបងប្អូនលោក ស៊ន តារា ដែលមិនពាក់ព័ន្ធ និងគ្មានកំហុសថា ខុសទាំងសីលធម៌ ច្បាប់សាសនា ច្បាប់ជាតិ និងអន្តរជាតិផងដែរ។
ឪពុករបស់លោក ស៊ន តារា គឺលោក សុខ ស៊ុនណារ៉េត បច្ចុប្បន្នជាមន្ត្រីយោធាមានតួនាទីជានាយរងសេនាធិការនៃតំបន់ប្រតិបត្តិការសឹករងខេត្តកំពង់ស្ពឺ៕