ក្រុមយុវជនស្រឡាញ់បរិស្ថាន ស្នើឲ្យក្រសួងយុត្តិធម៌បន្តជំរុញទៅស្ថាប័នអយ្យការឲ្យស៊ើបអង្កេតដោយឯករាជ្យលើករណីឃាតកម្មលើលោក ឈុត វុទ្ធី ដើម្បីស្វែងរកអ្នកផ្តើមគំនិត និងអ្នកពាក់ព័ន្ធឲ្យមកទទួលខុសត្រូវចំពោះមុខផ្លូវច្បាប់ បន្ទាប់ពីក្រុមគ្រួសារទទួលរងនូវភាពអយុត្តិធម៌អស់រយៈពេល ១១ឆ្នាំ។
យុវជនប្រមាណ ២០នាក់នៅថ្ងៃព្រឹកពុធ ទី២៦ មេសា នេះ បាននាំគ្នាធ្វើដំណើរដោយថ្មើរជើងពីសួនវត្តបទុមវតី ឆ្ពោះទៅក្រសួងយុត្តិធម៌ ដើម្បីដាក់ញត្តិទាមទារយុត្តិធម៌សម្រាប់គ្រួសារ និងលោក ឈុត វុទ្ធី។
ការដើរថ្មើរជើងរបស់ក្រុមយុវជនអមជាមួយនឹងរូបថតភ្ជាប់ជាមួយសារ «យុត្តិធម៌គង់តែមានសម្រាប់លោក ឈុត វុទ្ធី»។
ក្រៅពីសរសេរសារភ្ជាប់នឹងរូបថតហើយ ពួកគេក៏បានសរសេរអក្សរនៅលើអាវខ្លួនថា «ខ្ញុំជា ឈុត វុទ្ធី ខ្ញុំត្រូវការយុត្តិធម៌» និង «អ្នកការពារព្រៃឈើ មិនមែនជាអ្នកទោសទេ»។
ការទៅដាក់ញត្តិនេះ ក៏មានក្រុមសមត្ថកិច្ចស្លៀកពាក់ស៊ីវិលតាមថតរូប និងសកម្មភាពពួកគេដែរ។
បើតាមខ្លឹមសារញត្តិដែលក្រុមយុវជនយកដាក់ទៅក្រសួងយុត្តិធម៌ នៅថ្ងៃទី២៦ ខែមេសា នេះ គឺដើម្បីស្នើទៅក្រសួងយុត្តិធម៌ឱ្យបន្តជំរុញទៅស្ថាប័នអយ្យការឲ្យស៊ើបអង្កេតដោយឯករាជ្យ ករណីឃាតកម្មលើលោក ឈុត វុទ្ធី ដើម្បីឈានទៅរកការកំណត់លើអ្នកផ្តើមគំនិត និងអ្នកពាក់ព័ន្ធមកទទួលខុសត្រូវតាមផ្លូវច្បាប់។
ក្រុមយុវជនថា ទោះបីជាលោក ឈុត វុទ្ធី ត្រូវខ្មាន់កាំភ្លើងបាញ់សម្លាប់រយៈពេល ១១ឆ្នាំហើយក៏ពិតមែន ប៉ុន្តែអ្នកផ្តើមគំនិត និងអ្នកពាក់ព័ន្ធក្នុងរឿងឃាតកម្មនេះនៅមិនទាន់ត្រូវបានសមត្ថកិច្ចចាប់ខ្លួនមកដាក់ទោសនោះឡើយ។
ជុំវិញការស្នើនេះ ក្រសួងយុត្តិធម៌ក៏បានអនុញ្ញាតឲ្យតំណាងយុវជន ២រូប គឺលោក កើត សារ៉ាយ និងកញ្ញា ធួន ស្រីពៅ បានចូលយកញត្តិទៅដាក់ ហើយបានសន្យាថានឹងឆ្លើយតបពួកគេនៅពេលក្រោយ។
អ្នកស្រី ចក់ សុភាព នាយិកានៃមជ្ឈមណ្ឌលសិទ្ធិមនុស្សកម្ពុជា (CCHR) បានបង្ហោះសារខ្លីមួយលើគណនីហ្វេសប៊ុកជុំវិញខួប ១១ឆ្នាំនៃឃាតកម្មលើលោក ឈុត វុទ្ធី ដោយសរសេរថា «១១ឆ្នាំក្រោយមក យុត្តិធម៌ និងការពិតមិនទាន់ត្រូវបានលាតត្រដាង»។ អ្នកស្រីចងចាំវីរភាពរបស់លោក ឈុត វុទ្ធី និងសូមឧទ្ទិសបុណ្យកុសលទាំងឡាយជូនដល់លោកជាដរាប។
ចំណែកឯសកម្មជនការពារព្រៃឈើ លោក ហេង ស្រស់ ក៏បានសរសេរលើហ្វេសប៊ុករបស់ខ្លួនភ្ជាប់ជាមួយទីកន្លែងខ្មាន់កាំភ្លើងបាញ់សម្លាប់លោក ឈុត វុទ្ធី កាលពីឆ្នាំ២០១២ ថា ផ្លូវទៅកន្លែងលោក ឈុត វុទ្ធី ត្រូវបានគេអភិវឌ្ឍស្អាតណាស់ ប៉ុន្តែផ្លូវទាំងនេះលោកថា បច្ចុប្បន្នបានក្លាយទៅជាផ្លូវដែលដឹកឈើចេញពីព្រៃធម្មជាតិកម្ពុជាយកទៅលក់នៅក្រៅប្រទេស។
លោករៀបរាប់ថា ព្រៃឈើរបស់កម្ពុជាត្រូវបានក្រុមអ្នកមានងារជាឧកញ៉ាកាប់បំផ្លាញដឹកយកទៅលក់នៅប្រទេសវៀតណាម និងប្រទេសផ្សេងៗទៀត។ សកម្មជនរូបនេះអះអាងថា ក្រុមឧកញ៉ាទាំងនោះ បច្ចុប្បន្នកំពុងតែសប្បាយចាយលុយដែលបានបំផ្លាញព្រៃឈើ និងសម្បត្តិជាតិទាំងឡាយ ដោយសារពួកគេមិនដែលគិតថាជាតិសាសន៍មួយនេះ ប្រទេសមួយនេះជាម្ចាស់របស់ពួកគេឡើយ។
លោកយល់ថា ប្រសិនពួកគេជាខ្មែរ មិនបំផ្លាញជាតិឯងដល់ម្ល៉ឹងនោះទេ ប៉ុន្តែសកម្មភាពទាំងនេះវាហាក់បីដូចឆ្លុះបញ្ចាំងឲ្យឃើញថា ក្រុមឧកញ៉ាទាំងនោះមិនមែនជាខ្មែរ ទើបបានជាពួកគេបំផ្លាញធនធានធម្មជាតិដោយគ្មានការខ្លាចរអា។
ក្រៅពីរៀបរាប់សកម្មភាពនៃការបំផ្លាញព្រៃឈើ លោក ហេង ស្រស់ បង្ហាញការគោរពចំពោះវីរភាពលោក ឈុត វុទ្ធី ដែលបានបំពេញការងារការពារព្រៃឈើនៅក្នុងប្រទេសកម្ពុជាផងដែរ។
ចំណែកអ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានលើកឡើងថា លោក ហ៊ុន សែន និងលោក ហ៊ុន ម៉ាណែត មានបេះដូងធំទូលាយណាស់ បានឲ្យឃាតករដែលសម្លាប់លោក ឈុត វុទ្ធី ជ្រកកោនបាន ដោយលាក់ខ្លួនក្នុងបេះដូងរបស់ពួកគាត់ ហេតុដូច្នេះហើយទើបរយៈពេល ១១ឆ្នាំមកនេះ សមត្ថកិច្ចនៅតែរកឃាតករទាំងនោះមិនឃើញនោះ។ ដូច្នេះលោកថា ក្រុមអ្នកដែលចុះចូល ហើយអួតកន្លងមក ហើយអួតអំពីបេះដូងរបស់លោក ហ៊ុន សែន នោះ គឺមិនខុសអ្វីទេ។
លោក ឈុត វុទ្ធី ត្រូវបានគេបាញ់សម្លាប់នៅលើរថយន្តរបស់លោកកាលពីថ្ងៃទី២៦ ខែមេសា ឆ្នាំ២០១២ នៅស្រុកថ្មបាំង ខេត្តកោះកុង។
ករណីឃាតកម្មនេះ មន្ត្រីកងរាជអាវុធហត្ថម្នាក់ឈ្មោះ អ៊ិន រតនា បានរងការចោទប្រកាន់ថាជាអ្នកបាញ់សម្លាប់លោក ឈុត វុទ្ធី នៅលើរថយន្តរបស់លោក ក្នុងពេលដែលមានការទាស់ពាក្យសម្ដីគ្នាជាមួយសន្តិសុខយាមឲ្យក្រុមហ៊ុន ធីមប៊ឺ គ្រីន (Timber Green)។
បើតាមការចុះផ្សាយរបស់បណ្ដាញព័ត៌មានផ្សេងៗគ្នានាពេលកន្លងមក ឲ្យដឹងថា ក្រុមហ៊ុននេះគឺជាក្រុមហ៊ុនរបស់លោកឧកញ៉ា ទ្រី ភាព ដែលជាមនុស្សស្និទ្ធនឹងលោកនាយករដ្ឋមន្ត្រី ហ៊ុន សែន ហើយក្រុមហ៊ុននេះទទួលបានសិទ្ធិកាប់ព្រៃសម្អាតបាតអាង ដើម្បីធ្វើទំនប់វារីអគ្គិសនីតាតៃ ដែលស្ថិតនៅក្នុងស្រុកថ្មបាំង ខេត្តកោះកុង។
ប៉ុន្តែបើតាមរបាយការណ៍ផ្សេងទៀតចុះផ្សាយថា ក្រុមហ៊ុន ធីមប៊ឺ គ្រីន គឺជារបស់ម្ចាស់ភាគហ៊ុនរកស៊ីកាប់ឈើដ៏ធំមួយរបស់អ្នកស្រី ខៀវ សស៊ីលាភ និងឈ្មួញម្នាក់ទៀតមានតួនាទីជាឧកញ៉ា ហើយជាមន្ត្រីយោធាផង ឈ្មោះ ហួរ ហាប់។ អ្នកទាំងពីរនេះក៏ជាមនុស្សដែលស្និទ្ធនឹងលោកនាយករដ្ឋមន្ត្រី ហ៊ុន សែន និងអ្នកស្រី ហ៊ុន ម៉ាណា ផងដែរ៕