អតីតតំណាងរាស្ត្រគណបក្សសង្គ្រោះជាតិ លើកជាសំណួរថា តើសមាជិកគណបក្សប្រជាជនកម្ពុជាឈឺចាប់ទេនៅពេលដែលខ្លួនស្មោះត្រង់នឹងគណបក្ស បម្រើគណបក្សស្ទើរមួយជីវិត មិនបានតំណែងអ្វីសោះ ប៉ុន្តែមន្ត្រីបក្សប្រឆាំងទទួលបានតំណែងធំជាងខ្លួនបន្ទាប់ពីចុះចូលជាមួយបក្សកាន់អំណាច។
មន្ត្រីជាន់ខ្ពស់អតីតគណបក្សសង្គ្រោះជាតិ លោក សួន សុរីដា បានសរសេរលើគណនីហ្វេសប៊ុករបស់លោកកាលពីថ្ងៃទី២៥ មេសា ថា ថ្មីៗនេះមេដឹកនាំបក្សកាន់អំណាចលោក ហ៊ុន សែន បានអូសទាញមន្ត្រីខាងគណបក្សប្រឆាំងយ៉ាងច្រើនទៅបម្រើនយោបាយឱ្យគណបក្សប្រជាជនកម្ពុជា ដោយផ្តល់តំណែងខ្លះជារដ្ឋលេខាធិការ ខ្លះជាអនុរដ្ឋលេខាធិការនៅតាមក្រសួងនានា ស្របពេលដែលអ្នកទាំងនោះគ្មានគុណសម្បត្តិបន្តិចសោះសម្រាប់បក្សកាន់អំណាច ហើយអ្នកខ្លះគ្មានចំណេះជំនាញវិជ្ជាជីវៈចំពោះតំណែងដែលពួកគេទទួលបាននោះថែមទៀត។
អតីតតំណាងរាស្ត្របក្សប្រឆាំងរូបនេះលើកជាសំណួរថា តើអ្នកដែលជាសមាជិកគណបក្សប្រជាជនកម្ពុជាមានឈឺចាប់ទេនៅពេលដែលខ្លួនស្មោះត្រង់នឹងគណបក្ស បម្រើគណបក្សស្ទើរមួយជីវិត អ្នកខ្លះមិនបានតំណែងអ្វីផង ប៉ុន្តែមន្ត្រីគណបក្សប្រឆាំងជាច្រើនពីមុនធ្លាប់តែរិះគន់គណបក្សប្រជាជនកម្ពុជាកប់ៗមាត់ ជាពិសេសរិះគន់លោក ហ៊ុន សែន ឥឡូវនេះស្រាប់តែទទួលបានតំណែងជារដ្ឋលេខាធិការ និងជាអនុរដ្ឋលេខាធិការធំជាងខ្លួនដែលស្មោះត្រង់នឹងគណបក្សប្រជាជនកម្ពុជាទៅវិញ។
លោក សួន សុរីដា លើកឡើងថា អ្នកដែលស្មោះត្រង់នឹងគណបក្សប្រជាជនកម្ពុជា ស្មោះត្រង់ផង អស់លុយកាក់បម្រើបក្សផង នៅតែគ្មានតម្លៃដូចមន្ត្រីគណបក្សប្រឆាំងដែលត្រឹមតែប្រកាសសុំចុះចូលជាមួយបក្សកាន់អំណាចត្រឹមតែ ២ ទៅ ៣ថ្ងៃ ដូច្នេះអ្នកដែលចង់ឆាប់បានតំណែងធំ ត្រូវតែចូលបក្សប្រឆាំងសិន បន្ទាប់មកចាំចុះចូលជាមួយបក្សកាន់អំណាចវិញ នោះពួកគេនឹងទទួលបានតំណែងខ្ពង់ខ្ពស់លឿនជាងដែលពួកគេនៅបន្តស្មោះត្រង់នឹងបក្សកាន់អំណាចដូចពេលកន្លងមក។
ការអះអាងនេះ ធ្វើឡើងបន្ទាប់ពីសកម្មជន និងមន្ត្រីបក្សប្រឆាំងភាគីលោក កឹម សុខា បាននាំគ្នាចុះចូលជាមួយបក្សកាន់អំណាចជាបន្តបន្ទាប់ ក្រោយពេលលោក កឹម សុខា ត្រូវកាត់ទោសឱ្យជាប់គុកមិនទាន់ដល់ ២ខែផងនោះ។
កាលពីថ្ងៃទី៣ ខែមីនា ឆ្នាំ២០២៣ មេដឹកនាំបក្សប្រឆាំង លោក កឹម សុខា ត្រូវតុលាការក្រុងភ្នំពេញកាត់ទោសពីបទក្បត់ជាតិឱ្យជាក់គុក ២៧ឆ្នាំ ប៉ុន្តែនៅថ្ងៃទី២១ ខែមេសា ឆ្នាំ២០២៣ លោក យឹម ស៊ីណន ជាសកម្មជនដែលស្និទ្ធនឹងលោក កឹម សុខា បានប្រកាសចូលរួមជីវភាពនយោបាយជាមួយបក្សកាន់អំណាច និងត្រូវព្រះមហាក្សត្រតែងតាំងជាអនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី២២ មេសា ផងដែរ។
ចំណែកលោក ហ៊ុន កុសល ក៏បានប្រកាសចុះចូលជាមួយបក្សកាន់អំណាចដែរកាលពីថ្ងៃទី២៣ ខែមេសា ឆ្នាំ២០២៣ និងត្រូវបានតែងតាំងជាអនុរដ្ឋលេខាធិការក្រសួងដែនដី នគរូបនីយកម្ម និងសំណង់ បន្ទាប់ពីសកម្មជនបក្សប្រឆាំងរូបនេះចុះចូលជាមួយបក្សកាន់អំណាចបាន ១ថ្ងៃ។
ក្រៅពីលោក យឹម ស៊ីណន និងលោក ហ៊ុន កុសល អតីតអនុប្រធានក្រុមការងារគណបក្សសង្គ្រោះជាតិប្រចាំខេត្តសៀមរាប លោក ប៉ែន ផល្លីកា និងអតីតអ្នកតាក់តែងគោលនយោបាយសុខាភិបាលរបស់អតីតគណបក្សសង្គ្រោះជាតិ លោក ប៉ែន រដ្ឋា ក៏ត្រូវបានព្រះមហាក្សត្រតែងតាំងជាអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងក្រសួងសុខាភិបាល កាលពីថ្ងៃទី២៤ ខែមេសា ឆ្នាំ២០២៣ នេះ បន្ទាប់ពីពួកគេបានចុះចូលជាមួយបក្សកាន់អំណាច ប៉ុន្តែអ្នកទាំងពីរនាក់នេះមិនបានរងនូវការចោទប្រកាន់ ឬជាប់ពន្ធនាគារអ្វីនោះឡើយ។
ទាក់ទិននឹងបញ្ហានេះ អ្នកវិភាគនយោបាយឯករាជ្យ និងជាប្រធានវេទិកាពលរដ្ឋ លោក គឹម សុខ បានអះអាងកាលពីពេលថ្មីៗនេះថា ទោះអ្នកណារត់ចោលលោក កឹម សុខា ក៏ដោយ ក៏លោកនៅតែគាំទ្រលោក កឹម សុខា ដដែល ហើយក៏មិនមែនមានតែលោកម្នាក់ឯងដែរ គឺមានពលរដ្ឋខ្មែរជាច្រើននាក់ទៀត។ លោកបន្តថា ក្រោយពីគេរំលាយគណបក្សសង្គ្រោះជាតិ លោក កឹម សុខា គឺជាមេដឹកនាំជាន់ខ្ពស់តែម្នាក់គត់ដែលប្រឹងក្រាញននៀលតស៊ូនៅសមរភូមិនយោបាយ ខំរកយុត្តិធម៌ឲ្យគណបក្សសង្គ្រោះជាតិ។
លោក គឹម សុខ បញ្ជាក់ថា ទង្វើលោក កឹម សុខា គឺជាគំរូវីរភាពនៃមេដឹកនាំដែលមានជំហររឹងមាំ មិនព្រមចុះចាញ់ មិនបោះបង់គោលដៅ ហើយគុណធម៌ប្រជាធិបតេយ្យដ៏ស្វាហាប់របស់លោកបានក្លាយជានិមិត្តរូបនៃការតស៊ូនយោបាយមានតម្លៃសកលដូចលោក ណែលសុន ម៉ានដឺឡា (Nelson Mandela) តំណាងឱ្យប្រទេសអាហ្វ្រិកខាងត្បូង និងលោកស្រី អ៊ុងសាន ស៊ូជី (Aung San Suu Kyi) តំណាងឱ្យប្រទេសភូមា ដូច្នោះដែរ៕