មន្ត្រីជាន់ខ្ពស់របស់គណបក្សភ្លើងទៀន ដែលកំពុងជាប់ឃុំក្នុងពន្ធនាគារ ចេញវីដេអូសុំទោសមេដឹកនាំបក្សកាន់អំណាច លោក ហ៊ុន សែន និងសុំឱ្យលោក ហ៊ុន សែន លើកលែងទោសឱ្យដោយលោកសុខចិត្តទទួលស្គាល់នូវកំហុសគ្រប់យ៉ាងដែលខ្លួនបានប្រព្រឹត្តកាលពីពេលកន្លងមក។
មន្ត្រីជាន់ខ្ពស់គណបក្សភ្លើងទៀនប្រចាំខេត្តតាកែវ លោក អៀ ចាន់ណា នៅមុនការផ្សាយនេះបន្តិច បានចេញវីដេអូឃ្លីបពីពន្ធនាគារព្រៃសសុំទោសលោក ហ៊ុន សែន ឱ្យលើកលែងទោស ដោយសន្យាថាលោកនឹងមិនប្រព្រឹត្តខុសច្បាប់ដូចកាលពីពេលមុនទៀតឡើយ។
ការចេញវីដេអូសុំទោសលោក ហ៊ុន សែន នេះ ធ្វើឡើងបន្ទាប់ពីលោក អៀ ចាន់ណា ត្រូវបានឃុំខ្លួនក្នុងពន្ធនាគារព្រៃសអស់រយៈពេលជិតមួយឆ្នាំមកហើយបើគិតទល់នឹងពេលនេះ។
ក្រោយការចេញវីដេអូ និងលិខិតសុំទោសរបស់លោក អៀ ចាន់ណា មេដឹកនាំបក្សកាន់អំណាច លោក ហ៊ុន សែន បានសរសេរលើប្រព័ន្ធទំនាក់ទំនងតេឡេក្រាមរបស់លោកថា លោកបានស្នើឱ្យរដ្ឋមន្ត្រីក្រសួងយុត្តិធម៌ លោក កើត រិទ្ធ ពិនិត្យករណីលោក អៀ ចាន់ណា ដើម្បីឱ្យមន្ត្រីបក្សភ្លើងទៀនរូបនេះបាននៅក្រៅឃុំបណ្ដោះអាសន្ននៅពេលនេះ។
លោក អៀ ចាន់ណា ត្រូវបានអាជ្ញាធរក្រុងភ្នំពេញចាប់ខ្លួននៅក្បែរផ្សារអ៊ីអន ក្នុងទីក្រុងភ្នំពេញ កាលពីថ្ងៃទី៣០ ខែឧសភា ឆ្នាំ២០២២ បន្ទាប់ពីលោកបានចូលរួមសកម្មភាពនយោបាយជាមួយគណបក្សភ្លើងទៀន និងហែក្បួនឃោសនាគណបក្សនេះនៅមុនការបោះឆ្នោតក្រុមប្រឹក្សាឃុំ-សង្កាត់ឆ្នាំ២០២២ កន្លងទៅ។
ចៅក្រមស៊ើបសួរសាលាដំបូងរាជធានីភ្នំពេញ លោក ស៊ិន សុវណ្ណរ័ត្ន បានចេញដីកាបង្គាប់ឱ្យចាប់ខ្លួនលោក អៀ ចាន់ណា ពីបទរួមគំនិតក្បត់ ដែលបានប្រព្រឹត្តនៅប្រទេសកម្ពុជាកាលពីឆ្នាំ២០២០ និងពេលបន្តបន្ទាប់មកទៀតតាមមាត្រា៤៥៣ នៃក្រមព្រហ្មទណ្ឌ៕