មន្ត្រីជាន់ខ្ពស់គណបក្សភ្លើងទៀន ថ្លែងអំណរគុណដល់មេដឹកនាំបក្សកាន់អំណាចលោក ហ៊ុន សែន ដែលបានអន្តរាគមន៍ឱ្យលោកទទួលបានសិទ្ធិរស់នៅក្រៅឃុំបណ្ដោះអាសន្ន បន្ទាប់ពីត្រូវជាប់ពន្ធនាគារជិតមួយឆ្នាំ។
មន្ត្រីជាន់ខ្ពស់គណបក្សភ្លើងទៀនប្រចាំខេត្តតាកែវ លោក អៀ ចាន់ណា បានចេញវីដេអូឃ្លីបពីពន្ធនាគារព្រៃសសុំទោសលោក ហ៊ុន សែន និងសុំឱ្យមេដឹកនាំបក្សកាន់អំណាចរូបនេះអនុញ្ញាតឱ្យលោកបានរស់នៅក្រៅឃុំជាបណ្ដោះអាសន្ន ដោយសន្យាថាលោកនឹងមិនប្រព្រឹត្តខុសច្បាប់ដូចកាលពីពេលមុនទៀតឡើយ។
លោក អៀ ចាន់ណា សន្យាថា លោកនឹងគោរពច្បាប់របស់ប្រទេសកម្ពុជាគ្រប់បែបយ៉ាងទាំងអស់ ដើម្បីមានឱកាសរស់នៅដូចពលរដ្ឋខ្មែរទូទៅ និងបានមើលថែក្រុមគ្រួសាររបស់លោកទៅថ្ងៃមុខ។
ការចេញវីដេអូថ្លែងអំណរគុណលោក ហ៊ុន សែន នេះធ្វើឡើងបន្ទាប់ពីលោក អៀ ចាន់ណា ត្រូវបានលោក ហ៊ុន សែន ចេញមុខអន្តរាគមន៍ឲ្យលោកបានរស់នៅក្រៅឃុំ បន្ទាប់ពីមន្ត្រីបក្សភ្លើងទៀនរូបនេះសុំទោសលោក ហ៊ុន សែន កាលពីថ្ងៃចន្ទដើមសប្ដាហ៍នេះ។
ក្រោយពីការចេញវីដេអូ និងលិខិតសុំទោសរបស់លោក អៀ ចាន់ណា មេដឹកនាំបក្សកាន់អំណាចលោក ហ៊ុន សែន បានសរសេរលើប្រព័ន្ធទំនាក់ទំនងតេឡេក្រាមរបស់លោកកាលពីថ្ងៃទី១ ខែឧសភា ថា លោកបានស្នើឱ្យរដ្ឋមន្ត្រីក្រសួងយុត្តិធម៌ លោក កើត រិទ្ធ ពិនិត្យករណីលោក អៀ ចាន់ណា រួចហើយ ដើម្បីឱ្យមន្ត្រីបក្សភ្លើងទៀនរូបនេះបានរស់នៅក្រៅឃុំបណ្ដោះអាសន្ននៅពេលនេះ។
កាលពីថ្ងៃទី៣០ ខែឧសភា ឆ្នាំ២០២២ លោក អៀ ចាន់ណា ត្រូវបានអាជ្ញាធរក្រុងភ្នំពេញចាប់ខ្លួននៅក្បែរផ្សារអ៊ីអន ក្នុងទីក្រុងភ្នំពេញ បន្ទាប់ពីលោកបានចូលរួមសកម្មភាពនយោបាយជាមួយគណបក្សភ្លើងទៀន និងហែក្បួនឃោសនាគណបក្សនេះនៅមុនការបោះឆ្នោតក្រុមប្រឹក្សាឃុំ-សង្កាត់ឆ្នាំ២០២២ កន្លងទៅ។
ការចាប់ខ្លួនលោក អៀ ចាន់ណា នេះធ្វើឡើងបន្ទាប់ពីចៅក្រមស៊ើបសួរសាលាដំបូងរាជធានីភ្នំពេញលោក ស៊ិន សុវណ្ណរ័ត្ន បានចេញដីកាបង្គាប់ឱ្យចាប់ខ្លួនលោក អៀ ចាន់ណា ពីបទរួមគំនិតក្បត់ដែលបានប្រព្រឹត្តនៅប្រទេសកម្ពុជាកាលពីឆ្នាំ២០២០ និងពេលបន្តបន្ទាប់មកទៀតតាមមាត្រា៤៥៣ នៃក្រមព្រហ្មទណ្ឌ។
លោក អៀ ចាន់ណា គឺជាតំណាងយុវជនអតីតគណបក្សសង្គ្រោះជាតិ ដែលបានភៀសខ្លួនទៅរស់នៅប្រទេសន័រវែស (Norway) ក្នុងទីក្រុងគ្រីសស្ទានសាន់ កាលពីឆ្នាំ២០០៥ បន្ទាប់ពីរដ្ឋាភិបាលកម្ពុជាបានធ្វើទុក្ខបុកម្នេញទាក់ទងរឿងព្រំដែន ប៉ុន្តែនៅឆ្នាំ២០២០ លោកត្រូវបានតុលាការក្រុងភ្នំពេញចោទប្រកាន់ពីបទក្បត់ជាតិ តាមមាត្រា៤៥៣ នៃក្រមព្រហ្មទណ្ឌ បន្ទាប់ពីលោកបានចូលរួមដំណើរមាតុភូមិនិវត្តន៍របស់លោក សម រង្ស៊ី និងចេញដីកាឱ្យចាប់ខ្លួនកាលពីចុងខែធ្នូ ឆ្នាំ២០២០ កន្លងទៅផងដែរ។
ក្រៅពីសុំឱ្យលោក ហ៊ុន សែន អនុញ្ញាតឱ្យខ្លួនបានរស់នៅក្រៅឃុំ គេមិនប្រាកដថាលោក អៀ ចាន់ណា នឹងប្រកាសចូលរួមជីវភាពនយោបាយជាមួយគណបក្សប្រជាជនកម្ពុជាដូចលោក ហ៊ុន កុសល និងលោក យឹម ស៊ីណន ឬក៏អត់នោះទេ ខណៈផែនការនយោបាយរបស់បក្សកាន់អំណាចនៅពេលនេះ ត្រូវគេសង្កេតឃើញថាកំពុងកៀរគរសកម្មជន និងមន្ត្រីបក្សក្រៅរដ្ឋាភិបាលឱ្យចុះចូលនឹងខ្លួនឱ្យបានកាន់តែច្រើននៅមុនការបោះឆ្នោតជាតិខាងមុខនេះ។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី២ ឧសភា នេះថា ការស្នើសុំឱ្យមានការអន្តរាគមន៍ពីលោក ហ៊ុន សែន ដើម្បីឱ្យមានឱកាសបានរស់នៅក្រៅឃុំរបស់លោក អៀ ចាន់ណា គ្រាន់តែដើម្បីសម្រួលការលំបាករបស់គាត់នៅក្នុងពន្ធនាគារតែប៉ុណ្ណោះ ប៉ុន្តែក៏ជារូបភាពមួយផ្តល់ឱកាសចំណេញនយោបាយដល់បក្សកាន់អំណាចនៅមុនការបោះឆ្នោតនេះដែរ។
លោក មាជ សុវណ្ណារ៉ា លើកឡើងថា ការសម្រេចចិត្តរបស់មនុស្សម្នាក់ គឺជាសិទ្ធិសេរីភាពផ្ទាល់ខ្លួនរបស់គេ ប៉ុន្តែបើការសម្រេចចិត្តណាមួយដែលនាំទៅដល់ការខាតបង់ប្រយោជន៍ជាតិ ក៏មិនគួរឱ្យកើតមានដែរ ព្រោះថាប្រយោជន៍ជាតិមិនគួរត្រូវបានបំផ្លាញដោយប្រយោជន៍របស់បុគ្គលផ្ទាល់ខ្លួននោះឡើយ។
មន្ត្រីជាន់ខ្ពស់អតីតបក្សប្រឆាំងរូបនេះបញ្ជាក់ថា ដំណើរឆ្ពោះទៅស្ដារលទ្ធិប្រជាធិបតេយ្យ និងលើកស្ទួយការគោរពសិទ្ធិមនុស្ស មិនមែនជារឿងងាយនោះទេ ព្រោះថាឧបសគ្គដែលនឹងកើតឡើងមានច្រើនណាស់ ប៉ុន្តែបញ្ហាស្ថិតនៅត្រង់ថា តើអ្នកដែលប្រកាសថាខ្លួនជាអ្នកស្រឡាញ់ប្រជាធិបតេយ្យនោះ មានជំហររឹងមាំ និងស្មោះត្រង់ចំពោះជាតិ ស្មោះត្រង់ចំពោះប្រជាជន ស្មោះត្រង់ចំពោះអ្នកគាំទ្ររបស់ខ្លួន ឬក៏អត់ប៉ុណ្ណោះ៕