លោក ហ៊ុន សែន អះអាងថា រដ្ឋាភិបាលដឹកនាំដោយបក្សប្រជាជនកម្ពុជានៅតែប្ដេជ្ញាចិត្តគាំពារសេរីភាពសារព័ត៌មាន បន្ទាប់ពីបានបញ្ជាទៅក្រសួងព័ត៌មាន ឲ្យបិទវិទ្យុសំឡេងប្រជាធិបតេយ្យ VOD ដែលជាវិទ្យុឯករាជ្យចុងក្រោយនៅកម្ពុជាកាលពីខែកុម្ភៈ ឆ្នាំ២០២៣។
ការប្ដេជ្ញារបស់បុរសខ្លាំងក្រាញអំណាចជិត ៤០ឆ្នាំនៅកម្ពុជា ធ្វើឡើងនាឱកាសអបអរទិវាសេរីភាពសារព័ត៌មានពិភពលោកលើកទី៣០ នៅថ្ងៃទី៣ ឧសភា នេះ ខណៈប្រទេសលោកសេរីបង្ហាញការព្រួយបារម្ភចំពោះសេរីភាពសារព័ត៌មាននៅកម្ពុជា បន្ទាប់ពីលោក ហ៊ុន សែន បញ្ជាឲ្យបិទវិទ្យុសំឡេងប្រជាធិបតេយ្យ VOD។
ក្នុងសារលិខិតអបអរទិវាសេរីភាពសារព័ត៌មានលើកទី៣០ នេះ លោក ហ៊ុន សែន បានអះអាងថា រដ្ឋាភិបាលកម្ពុជានៅតែបន្តការប្ដេជ្ញាចិត្តក្នុងការគាំពារសិទ្ធិសេរីភាពនៃការបញ្ចេញមតិ សេរីភាពខាងសារព័ត៌មាន ស្របតាមរដ្ឋធម្មនុញ្ញ និងច្បាប់ស្ដីពីរបបសារព័ត៌មាននៃព្រះរាជាណាចក្រកម្ពុជា។
លិខិតដដែលបញ្ជាក់ថា តាមរយៈការប្ដេជ្ញាចិត្តនេះ ដែលបានធ្វើឲ្យវិស័យសារព័ត៌មាននៅកម្ពុជាមានការរីកចម្រើនគួរជាទីមោទនៈដោយមធ្យោបាយនៃប្រព័ន្ធផ្សព្វផ្សាយកាន់តែទំនើប និងសម្បូរបែប ដែលអាចឲ្យពលរដ្ឋទាំងក្នុង និងក្រៅប្រទេសបានទទួលព័ត៌មានយ៉ាងទូលំទូលាយទាន់ពេលវេលា និងគ្រប់ទីកន្លែង។
មួយវិញទៀត លោក ហ៊ុន សែន ថាបច្ចុប្បន្នប្រព័ន្ធផ្សព្វផ្សាយ និងអង្គភាពសារព័ត៌មាន ព្រមទាំងអ្នកសារព័ត៌មាននៅក្នុងប្រទេសកម្ពុជាបានកើនឡើងដ៏ច្រើនលើសលប់ផងដែរ។
ស្របពេលដែលលោក ហ៊ុន សែន ប្រកាសប្ដេជ្ញាចិត្តនេះ តំណាងស្ថានទូតប្រទេសលោកសេរីបង្ហាញក្ដីបារម្ភចំពោះស្ថានភាពសេរីភាពសារព័ត៌មាននៅកម្ពុជា បើទោះបីបច្ចុប្បន្នកម្ពុជាមានអង្គភាព និងស្ថាប័នព័ត៌មានជាង ២ពាន់ និងអ្នកសារព័ត៌មានប្រមាណ ៥០០០នាក់ក្ដី។
ករណីនេះ ឯកអគ្គរដ្ឋទូតបារាំងប្រចាំកម្ពុជា លោក ហ្សាក់ ប៉ឺឡេ ក៏បានអំពាវនាវដល់រដ្ឋាភិបាលកម្ពុជា និងភាគីពាក់ព័ន្ធផ្សេងទៀត ចូលរួមធានាបរិយាកាសមួយប្រកបដោយសុវត្ថិភាពសម្រាប់អ្នកសារព័ត៌មាននាពេលបច្ចុប្បន្ន និងអនាគតផងដែរ។
ចំណែកស្ថានទូតអាមេរិកប្រចាំកម្ពុជា ក៏បានសរសេរលើហ្វេសប៊ុករបស់ខ្លួនក្នុងខួបលើកទី៣០ នៃទិវាសេរីភាពសារព័ត៌មានពិភពលោកថា គោលការណ៍គ្រឹះនៃសេរីភាពផ្នែកសារព័ត៌មាន និងតួនាទីដ៏សំខាន់របស់អ្នកសារព័ត៌មាននៅក្នុងការជំរុញតម្លាភាព គណនេយ្យភាព និងលទ្ធិប្រជាធិបតេយ្យ។
ការបង្ហាញក្ដីបារម្ភពីបណ្ដាប្រទេសលោកសេរីនេះ ធ្វើឡើងបន្ទាប់ពីលោក ហ៊ុន សែន បានបន្តបង្ក្រាប និងបិទវិទ្យុសំឡេងប្រជាធិបតេយ្យ វីអូឌី ដោយប្រើពេលមិនដល់ ២៤ម៉ោង កាលពីខែកុម្ភៈ ឆ្នាំ២០២៣ ដោយការបិទនេះមិនបានអនុវត្តទៅតាមច្បាប់ស្ដីពីរបបសារព័ត៌មាន និងរដ្ឋធម្មនុញ្ញកម្ពុជាឡើយ។
ក្រោយពីបិទសារព័ត៌មាន វីអូឌី សហគមន៍ជាតិ និងអន្តរជាតិ បានចេញសេចក្ដីថ្លែងការណ៍ថ្កោលទោសលោក ហ៊ុន សែន ដោយចាត់ទុកការបិទវិទ្យុសំឡេងប្រជាធិបតេយ្យ (VOD) ជាសារព័ត៌មានឯករាជ្យចុងក្រោយគេ ថាបានប៉ះពាល់ដល់សេរីភាពប្រព័ន្ធផ្សព្វផ្សាយ សេរីភាពសារព័ត៌មាន និងដំណើរការបោះឆ្នោតជាតិនៅខែកក្កដា ឆ្នាំ២០២៣ ខាងមុខនេះ។
វិទ្យុសំឡេងប្រជាធិបតេយ្យ (VOD) ជាសារព័ត៌មានក្នុងស្រុកមួយដែលសកម្មក្នុងការផ្សព្វផ្សាយអំពីបញ្ហារឿងដីធ្លី បញ្ហាបរិស្ថាន សិទ្ធិមនុស្ស សិទ្ធិការងារ និងបញ្ហាអយុត្តិធម៌ដែលកើតឡើងក្នុងសង្គមកម្ពុជានាពេលបច្ចុប្បន្ន៕