ក្រុមសង្គមស៊ីវិលធ្វើការលើកកម្ពស់សិទ្ធិពលករ អំពាវនាវរដ្ឋាភិបាលកម្ពុជាឲ្យជួយអន្តរាគមន៍ និងស្វែងរកដំណោះស្រាយជាមួយភាគីថៃ ដើម្បីដោះលែងពលករខ្មែរដែលកំពុងជាប់ឃុំឃាំងនៅប្រទេសថៃ ឲ្យមានសេរីភាពឡើងវិញ។
ក្នុងសេចក្តីថ្លែងការណ៍ស្ដីពីការចាប់ខ្លួនពលករកម្ពុជាពីសំណាក់អាជ្ញាធរថៃ ចេញផ្សាយនៅថ្ងៃទី០៣ ខែឧសភា ឆ្នាំ២០២៣ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ឲ្យដឹងថា ពលករខ្មែរជាង ៨០០នាក់ត្រូវបានចាប់ខ្លួនអំឡុងពេលដែលពួកគេធ្វើដំណើរវិលត្រឡប់ទៅបំពេញការងារនៅប្រទេសថៃ វិញ បន្ទាប់ពីបុណ្យចូលឆ្នាំរួច។
ប្រភពដដែលថា ពលករខ្មែរភាគច្រើនដែលត្រូវបានអាជ្ញាធរថៃ ចាប់ឃុំខ្លួនបណ្ដោះអាសន្នដោយទទួលរងការធ្វើទារុណកម្ម និងដាក់ខ្នោះ ជាដើម។ ការចាប់ខ្លួននេះ ដោយសារពួកគេពុំមានឯកសារគ្រប់គ្រាន់ ឬក៏ផុតសុពលភាព ឬក៏ការធ្វើដំណើរមិនត្រឹមត្រូវតាមនីតិវិធី និងមិនមានលទ្ធភាពក្នុងការបង់ប្រាក់តាមច្រកព្រំដែនផ្លូវការ។
លើសពីនេះ ពលករខ្មែរជាច្រើនត្រូវបានអាជ្ញាធរថៃ ឃុំខ្លួននៅក្នុងអគារដែលមានលក្ខណៈតូចចង្អៀត។ ករណីនេះ មិនត្រឹមតែធ្វើឲ្យប៉ះពាល់ទៅដល់សិទ្ធិសេរីភាពជាមូលដ្ឋានរបស់ពលករចំណាកស្រុកប៉ុណ្ណោះទេ វាក៏ជះឥទ្ធិពលអវិជ្ជមានមកលើសេដ្ឋកិច្ច និងជីវភាពរស់នៅប្រចាំថ្ងៃរបស់ក្រុមគ្រួសារពួកគេផងដែរ ដោយសារពួកគេមិនមានប្រាក់ចំណូលកើនឡើង។ ផ្ទុយទៅវិញ កាន់តែជំពាក់បំណុលបន្ថែម ដែលធ្វើឲ្យប៉ះពាល់មកលើផ្នែកសុខភាពផ្លូវចិត្ត ជាដើម។
អង្គការសង់ត្រាល់ អំពាវនាវដល់រដ្ឋាភិបាល ពិសេសអាជ្ញាធរមានសមត្ថកិច្ច ជួយអន្តរាគមន៍ និងស្វែងរកដំណោះស្រាយជាមួយភាគីថៃ ដើម្បីដោះលែងពលករខ្មែរដែលកំពុងជាប់ឃុំឲ្យមានសេរីភាពឡើងវិញ។
ការទាមទារបែបនេះ ដោយអង្គការសង់ត្រាល់ថាដើម្បីការពារសិទ្ធិរបស់ពួកគេឲ្យមានសុខសុវត្ថិភាពទាំងពេលធ្វើដំណើរ អំឡុងពេលស្នាក់នៅ និងធ្វើការនៅប្រទេសគោលដៅ ស្របតាមរដ្ឋធម្មនុញ្ញកម្ពុជា មាត្រា៣២ ដែលបានធានានូវសិទ្ធិរស់រានមានជីវិតប្រកបដោយសេចក្តីថ្លៃថ្នូរ ស្មើមុខស្មើមាត់គ្នាក្នុងសង្គម។
មួយវិញទៀត ពលករចំណាកស្រុកកម្ពុជាក៏បានចូលរួមចំណែកយ៉ាងសំខាន់នៅក្នុងដំណើរការនៃការអភិវឌ្ឍសេដ្ឋកិច្ចនៃប្រទេសជាតិ តាមរយៈប្រាក់បញ្ញើត្រឡប់មកមាតុប្រទេសប្រមាណជាង ២ពាន់លានដុល្លារក្នុងមួយឆ្នាំ។
ប្រភពដដែលអះអាងថា លើសពីនេះទៀត ពួកគេក៏បានអភិវឌ្ឍជំនាញការងារស្ទើរគ្រប់វិស័យដែលជាធនធានមនុស្សដ៏មានសក្ដានុពលសំខាន់អាចប្រើប្រាស់ដើម្បីចូលរួមចំណែកអភិវឌ្ឍប្រទេសជាតិទាំងមូល ប៉ុន្តែជានិច្ចកាល បញ្ហាប្រឈមរបស់ពលករកម្ពុជាមិនទាន់ត្រូវបានដោះស្រាយឲ្យមានប្រសិទ្ធភាពនៅឡើយ។
បើតាមអង្គការសង់ត្រាល់ អះអាងថា ក្នុងរយៈពេល ៤ខែ ចាប់ពីខែមករា ដល់ខែមេសា ឆ្នាំ២០២៣ ករណីនៃការឃាត់ខ្លួនពលករកម្ពុជាដែលឆ្លងដែនទៅរកការងារធ្វើនៅប្រទេសថៃ មានការកើនឡើងចំនួន ២៥ករណី ក្នុងនោះមានជនរងគ្រោះចំនួន ១២៩៧នាក់ ដែលជាង ៧០០នាក់ជាស្រី និងជាង ៦០នាក់ជាកុមារ។
ករណីនេះ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ទាមទារឲ្យរដ្ឋាភិបាលកម្ពុជាត្រូវសម្របសម្រួលក្នុងការផ្តល់ភាពស្របច្បាប់ដល់ពលករកម្ពុជា ដែលបានបាត់បង់ភាពស្របច្បាប់ ឬអ្នកមិនទាន់មានឯកសារស្របច្បាប់ ដើម្បីឲ្យពួកគេទទួលបានការការពារ ការគាំពារ និងធានានូវអត្ថប្រយោជន៍ពេញលេញស្របតាមច្បាប់ និងគោលការណ៍សិទ្ធិមនុស្សជាសកល។
បើតាមរបាយការណ៍ក្រសួងការងារកម្ពុជា ឲ្យដឹងថា គិតត្រឹមឆ្នាំ២០២២ ពលករខ្មែរដែលកំពុងស្នាក់នៅ និងធ្វើការនៅក្រៅប្រទេសមានជាង ១លាន ៣សែននាក់ ក្នុងនោះប្រទេសថៃ មានចំនួនជាង ១លាន ២សែននាក់។
របាយការណ៍ដែលក្រសួងការងារបង្ហាញនេះ ធ្វើឡើងហាក់ផ្ទុយពីរបាយការណ៍របស់អង្គការសង់ត្រាល់ (Central) ដែលរកឃើញថា ពលករខ្មែរដែលកំពុងរស់នៅ និងធ្វើការក្នុងប្រទេសថៃ ទាំងស្របច្បាប់ និងមិនស្របច្បាប់មានជាង ២លាននាក់៕