កូនប្រុសច្បងរបស់មេដឹកនាំខ្មែរដែលកំពុងត្រៀមស្នងមរតកអំណាចដ៏ចម្រូងចម្រាស លោក ហ៊ុន ម៉ាណែត អួតពីឪពុករបស់ខ្លួនថាជាអគ្គមគ្គុទ្ទេសក៍ដ៏ឆ្នើម ប៉ិនប្រសប់ និងឈ្លាសវៃក្នុងការរៀបចំធ្វើជាម្ចាស់ផ្ទះនៃព្រឹត្តិការណ៍កីឡាអាស៊ីអាគ្នេយ៍លើកទី៣២ នៅពេលនេះ ដែលបាននាំកិត្តិយស និងជាមោទកភាពដ៏ធំធេងមួយសម្រាប់ប្រទេសកម្ពុជា។
លោក ហ៊ុន ម៉ាណែត លើកឡើងក្នុងពិធីបញ្ចុះខណ្ឌសីមាក្នុងវត្តបទុមវង្សា នៅក្នុងខេត្តកណ្តាល កាលពីថ្ងៃទី៣ ខែឧសភា ឆ្នាំ២០២៣ នេះថា លោក ហ៊ុន សែន ពិតជាមេដឹកនាំទទួលខុសត្រូវខ្ពស់លើជោគវាសនាជាតិ និងប្រជាជន ដោយបានធ្វើឱ្យកម្ពុជាមានសុខសន្តិភាពពេញលេញ ស្ថិរភាពសង្គម និងការអភិវឌ្ឍរីកចម្រើនលើគ្រប់វិស័យ។
កូនប្រុសមេដឹកនាំក្រាញអំណាចតវង្សត្រកូលរូបនេះលើកឡើងថា លោក ហ៊ុន សែន បានកែប្រែកម្ពុជាពីប្រទេសដែលញាំញីដោយសង្គ្រាម ការបែកបាក់ និងភាពភ័យខ្លាច មកជាទឹកដីកោះសុខសន្តិភាព ស្ថិរភាព និងភាពសប្បាយរីករាយរួបរួមគ្នា ហើយបើកចំហបេះដូង និងទឹកចិត្តយ៉ាងទូលំទូលាយ ដើម្បីទទួលស្វាគមន៍បណ្តាមិត្តភ័ក្ដិអន្តរជាតិមកពីគ្រប់ទិសទី ជាពិសេសក្នុងព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះនៅពេលនេះ។
ទោះជាយ៉ាងណាក៏ដោយ អ្នកវិភាគឯករាជ្យ និងប្រធានវេទិកាពលរដ្ឋ លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី២ ឧសភា ថា ការរៀបចំព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះនៅពេលនេះ លោក ហ៊ុន សែន បានធ្វើឱ្យបាត់បង់ប្រយោជន៍ជាតិយ៉ាងធំធេងដើម្បីតែមុខមាត់របស់គាត់ ក្នុងចេតនាឱ្យគេសរសើរថា កម្ពុជាក្រោមការដឹកនាំរបស់គាត់ គឺមានសមត្ថភាពគ្រប់គ្រាន់ក្នុងការរៀបចំព្រឹត្តិការណ៍មួយនេះដោយមិនត្រូវការលុយពីការបង់សម្រាប់ការចូលរួមរបស់កីឡាករបរទេសទាំងនោះ។
លោក គឹម សុខ លើកឡើងថា គោលដៅធំនៃព្រឹត្តិការណ៍ប្រកួតកីឡាស៊ីហ្គេមដែលប្រទេសនីមួយៗចង់ឱ្យមានលើទឹកដីរបស់ពួកគេ មិនមែនត្រឹមតែមោទកភាពជាតិរបស់គេទេ ប៉ុន្តែក៏ដើម្បីទទួលបានចំណូលរាប់លានដុល្លារចូលទៅក្នុងប្រទេសរបស់គេដែរ ដើម្បីឱ្យពលរដ្ឋរបស់គេអាចទទួលបានចំណូលកាន់តែច្រើនក្នុងឱកាសនៃការបើកឱ្យមានព្រឹត្តិការណ៍នេះ ខណៈប្រទេសទាំងនោះមិនមែនជាប្រទេសក្រីក្រ និងជាប្រទេសដែលជំពាក់បំណុលបរទេសវ័ណ្ឌកដូចកម្ពុជានោះដែរ។
អ្នកវិភាគឯករាជ្យរូបនេះបញ្ជាក់ថា លោក ហ៊ុន សែន ជាមេដឹកនាំប្រទេសក្រីក្រ ប៉ុន្តែធ្វើឫកគ្រាន់បើជាងប្រទេសអ្នកមាន ខណៈការអភិវឌ្ឍនានាតែងរត់ខ្ចីលុយពីបរទេសរហូតក្លាយខ្លួនជាកូនបំណុលវ័ណ្ឌក ហើយលុយដែលបានចំណាយលើស៊ីហ្គេមដើម្បីមុខមាត់របស់គាត់នៅពេលនេះ គឺសុទ្ធសឹងតែជាលុយដែលពលរដ្ឋបង់ពន្ធដើម្បីសងបំណុលបរទេសប៉ុណ្ណោះ ដូច្នេះសម្រាប់កម្ពុជា និងពលរដ្ឋខ្មែរមានតែខាតបង់ប៉ុណ្ណោះសម្រាប់ព្រឹត្តិការណ៍មួយនេះ។
ចំណែកអ្នកស្រាវជ្រាវការអភិវឌ្ឍសង្គម បណ្ឌិត មាស នី លើកឡើងថា លោកមិនអាចវាយតម្លៃពីការសម្រេចចិត្តរបស់លោក ហ៊ុន សែន មិនព្រមទទួលយកលុយដែលកីឡាករបរទេសត្រូវបង់សម្រាប់ការចូលរួមប្រកួតក្នុងព្រឹត្តិការណ៍ស៊ីហ្គេមនេះទេ ប៉ុន្តែលោកគ្រាន់តែដឹងថា សម្រាប់កីឡាករបរទេសទាំងនោះគេមានលុយគ្រប់គ្រាន់សម្រាប់ការចូលរួមប្រកួតយកមេដាយជូនជាតិរបស់គេ ទាំងការស្នាក់នៅ ការហូបចុក និងការធ្វើដំណើរ ជាដើម ប្រសិនបើកម្ពុជាតម្រូវឱ្យពួកគេបង់លុយដូចច្បាប់ស៊ីហ្គេមបានកំណត់ក្នុងមួយថ្ងៃម្នាក់ត្រូវបង់ ៥០ដុល្លារនោះ។
ព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះនៅឆ្នាំ២០២៣ នេះមានការចូលរួមពីប្រតិភូកីឡាអាស៊ានដល់ទៅជាង ១ម៉ឺននាក់ ហើយបើគិតចំនួនទឹកប្រាក់ដែលកម្ពុជាត្រូវចំណាយ គឺប្រមាណជាង ៧លានដុល្លារសម្រាប់ការស្នាក់ ការធ្វើដំណើរ និងអាហារហូបចុករយៈពេល ១៣ថ្ងៃរបស់កីឡាករបរទេសទាំងនោះ នេះគេមិនទាន់គិតពីវត្តមានមុនពិធីផ្លូវការរបស់ក្រុមកីឡាករកីឡាការិនីបាល់ទាត់ដែលត្រូវប្រកួតមុនថ្ងៃបើកព្រឹត្តិការណ៍ស៊ីហ្គេមជាផ្លូវការនៅឡើយទេ។
ទាក់ទិននឹងបញ្ហានេះ កាលពីថ្ងៃទី២៥ ខែមេសា ឆ្នាំ២០២៣ ប្រមុខរដ្ឋាភិបាលកម្ពុជា លោក ហ៊ុន សែន បានប្រកាសថា កម្ពុជានឹងមិនយកលុយពីការចូលរួមប្រកួតស៊ីហ្គេមលើកទី៣២ នៅកម្ពុជានោះទេ បើទោះបីជាតាមគោលការណ៍ ប្រតិភូកីឡាស៊ីហ្គេមតម្រូវឲ្យកីឡាករដែលចូលរួមក្នុងម្នាក់ៗត្រូវបង់លុយ ៥០ដុល្លារក្នុង ១ថ្ងៃសម្រាប់អាហារ និងការស្នាក់នៅក៏ដោយ។
លោក ហ៊ុន សែន អះអាងថា រដ្ឋាភិបាលកម្ពុជានឹងបន្ថែមទឹកប្រាក់ប្រមាណ ៧លានដុល្លារបន្ថែមទៀតដើម្បីសម្រួលដល់ការមិនយកថ្លៃលើការហូបចុក ការស្នាក់នៅ និងការធ្វើដំណើររបស់ប្រតិភូកីឡាដែលបានមកចូលរួមព្រឹត្តិការណ៍ស៊ីហ្គេមខាងមុខនេះ។
លោក ហ៊ុន សែន បញ្ជាក់ថា ដោយសារតែការមិនយកលុយពីកីឡាករបរទេសទាំងនោះ ពីដើមឡើយកម្ពុជាគ្រោងចំណាយរៀបចំស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ មានចំនួនទឹកប្រាក់ត្រឹមតែ ១២៤លានដុល្លារអាមេរិកប៉ុណ្ណោះ ដូច្នេះបើបន្ថែម ៧លានដុល្លារទៀត គឺកើនដល់ ១៣១លានដុល្លារហើយនៅពេលនេះសម្រាប់ការចំណាយសរុបក្នុងព្រឹត្តិការណ៍នេះ។
ការប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ នឹងចាប់ផ្តើមពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ ខណៈអាស៊ានប៉ារ៉ាហ្គេម នឹងចាប់ផ្តើមពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ខាងមុខនេះ៕