36 C
Phnom Penh

អ្នក​ឃ្លាំមើល៖ កម្ពុជា​គ្មាន​អ្នក​នយោបាយ​ណា​ពុតត្បុត​ដណ្តើម​ស្នាដៃ​អ្នក​ដទៃ​ដូច​លោក ហ៊ុន សែន ទេ

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​សង្គម​លើកឡើង​ថា គ្មាន​អ្នក​នយោបាយ​ខ្មែរ​ណា​ម្នាក់​មាន​ចរិត​ពុតត្បុត​ដណ្តើម​ស្នាដៃ​អ្នកដទៃ​ដូច​មេដឹកនាំ​បក្ស​កាន់​អំណាច លោក ហ៊ុន សែន នោះ​ទេ ព្រោះ​ថា​លោក ហ៊ុន សែន តែ​ម្នាក់​គត់​ដែល​ជា​កំពូល​អ្នក​ដណ្តើម​ស្នាដៃ​របស់​អ្នកដទៃ​ធ្វើ​ជា​របស់​ខ្លួនឯង និង​សម្រាប់​ក្រុម​គ្រួសារ​របស់​គាត់។

អនុប្រធាន​វេទិកា​ពលរដ្ឋ លោក ម៉ែន ណាត ប្រាប់​សារព័ត៌មាន The Cambodia Daily នៅ​ថ្ងៃទី​១៦ ឧសភា នេះ​ថា ការ​កសាង​គណបក្ស​ប្រជាជន​កម្ពុជា​មិនមែន​មាន​តែ​លោក ហ៊ុន សែន ម្នាក់​ឯង​ទេ ហើយ​ការ​កសាង​ប្រទេស​ជាតិ​ក៏​មិនមែន​លោក ហ៊ុន សែន ធ្វើ​តែ​ម្នាក់​ឯង​ដែរ ប៉ុន្តែ​ស្នាដៃ​ដែល​លោក ហ៊ុន សែន កំពុងតែ​អួតអាង​នៅ​ពេលនេះ បែរជា​គាត់​បំបិទ​អ្នកដទៃ ដូចជា​លោក ជា ស៊ីម លោក ហេង សំរិន និង​លោក ស ខេង ទៅវិញ។

លោក ម៉ែន ណាត លើកឡើង​ថា ចរិត​នយោបាយ​ដែល​ដណ្តើម​ស្នាដៃ​ពី​អ្នកដទៃ លោក ហ៊ុន សែន បាន​អនុវត្ត​ក្នុង​ជីវិត​នយោបាយ​របស់​គាត់​អស់​រយៈពេល​ជាង ៤០​ឆ្នាំ​មក​ហើយ ដូចជា​ការ​ដណ្តើម​ស្នាដៃ​ពី​លោក ប៉ែន សុវណ្ណ លោក ចាន់ ស៊ី ដែល​ជា​នាយករដ្ឋមន្ត្រី​នៅ​អំឡុង​ទសវត្សរ៍​ឆ្នាំ​១៩៨០ និង​ការ​ដណ្តើម​ស្នាដៃ​ពី​មន្ត្រី​ជាន់ខ្ពស់​បក្ស​កាន់​អំណាច​ខ្លួនឯង​រហូត​ដល់​ពេលនេះ ជាដើម។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា ការ​ដណ្តើម​ស្នាដៃ​ពី​អ្នកដទៃ បាន​បង្ហាញ​ឱ្យ​ឃើញ​កាន់តែ​ច្បាស់​ថែម​ទៀត​នោះ លោក ហ៊ុន សែន កំពុងតែ​ដណ្តើម​ស្នាព្រះហស្ត​របស់​ព្រះមហាក្សត្រ​ខ្មែរ​បច្ចុប្បន្ន ដោយ​ការ​រំលោភ​ព្រះរាជ​តួនាទី និង​ព្រះរាជកិច្ច​របស់​ព្រះអង្គ ព្រមទាំង​ព្យាយាម​កម្ទេច​ស្នាព្រះហស្ត​របស់​អតីត​ព្រះមហាក្សត្រ​ខ្មែរ សម្តេច​ព្រះ​នរោត្តម សីហនុ ថែម​ទៀត។

លោក ហ៊ុន សែន បាន​លើកឡើង​ក្នុង​ពិធី​ចែក​សញ្ញាបត្រ​ដល់​និស្សិត​នៅ​មជ្ឈមណ្ឌល​កោះពេជ្រ កាលពី​ថ្ងៃទី​១៥ ខែ​ឧសភា ឆ្នាំ​២០២៣ នេះ​ថា លោក​គ្មាន​ទម្លាប់​ទៅ​ដណ្ដើម​ស្នាដៃ​របស់​អ្នកដទៃ​ទេ តែ​សូម​កុំ​ឱ្យ​តែ​អ្នកដទៃ​ដណ្តើម​ស្នាដៃ​របស់​លោក​ទៅ​បាន​ហើយ ព្រោះ​គ្រប់​ដំណាក់កាល​តាំងពី​ការ​ផ្ដួល​រំលំ​ខ្មែរក្រហម ស្វែងរក​សន្តិភាព និង​ការ​ធ្វើ​កំណែ​ទម្រង់​នយោបាយ សេដ្ឋកិច្ច គឺ​សុទ្ធតែ​លោក​បាន​យក​ជីវិត​ទៅ​ប្ដូរ​ទាំងអស់។

មេដឹកនាំ​ដែល​ក្រាញ​អំណាច​ត​វង្ស​ត្រកូល លោក ហ៊ុន សែន អះអាង​ថា ផ្ដើម​ចេញពី​ការ​រំដោះ​ប្រទេស​ដែល​ពោរពេញ​ទៅ​ដោយ​ភ្លើងសង្គ្រាម​រហូត​មាន​សុខ​សន្តិភាព និង​ការ​អភិវឌ្ឍ​ដូច​ពេល​បច្ចុប្បន្ន​នេះ លោក​សុទ្ធតែ​បាន​យក​ជីវិត​របស់​សម្ដេច​ទៅ​ប្ដូរ​គ្រប់​ពេល ព្រោះ​ក្នុង​ជីវិត​របស់​លោក គឺជា​ជីវិត​ពោរពេញ​ទៅ​ដោយ​ការ​ធ្វើ​កំណែ​ទម្រង់​គ្រប់​ដំណាក់កាល។

បុរស​ខ្លាំង​ក្រាញ​អំណាច​នៅ​កម្ពុជា​រូប​នេះ​អះអាង​ថា គ្រប់​ពេល​ដែល​លោក​យក​ជីវិត​ទៅ​ប្តូរ​សុទ្ធតែ​ជា​ដំណាក់កាល​សំខាន់​ទាំងអស់ ដូចជា​ការ​រំដោះ​ប្រទេស​ក្នុង​ថ្ងៃទី​៧ ខែ​មករា ឆ្នាំ​១៩៧៩ ប្ដូរ​ជាមួយ​សន្តិភាព។ ជាង​នេះ​ទៀត បញ្ហា​កំណែ​ទម្រង់​ដីធ្លី កំណែ​ទម្រង់​សេដ្ឋកិច្ច មិនមែន​ជា​បញ្ហា​តូចតាច​ទេ ហើយ​ក៏​មាន​ចរិត​យក​ជីវិត​ទៅ​ប្ដូរ​ដូច​គ្នា​ដែរ។

យ៉ាងណា​ក៏ដោយ លោក គឹម សុខ លើកឡើង​កាល​ពី​ពេល​ថ្មីៗ​នេះ​ថា មេដឹកនាំ​បក្ស​កាន់​អំណាច​លោក ហ៊ុន សែន កំពុង​ព្យាយាម​លុប​បំបាត់​ស្នាព្រះហស្ត​របស់​សម្តេច​ព្រះ​នរោត្តម សីហនុ ដោយ​ប្រឹង​រំលេច​ពី​ស្នាដៃ​ខ្លួនឯង ជាពិសេស​ក្នុង​ព្រឹត្តិការណ៍​នៃ​ការ​បើក​កីឡា​ស៊ីហ្គេម​កាលពី​ពេល​ថ្មីៗ​នេះ លោក ហ៊ុន សែន ព្យាយាម​រំលេច​តែ​ថ្ងៃ ៧​មករា ដែល​ជា​ជ័យជម្នះ​របស់​បក្ស​កាន់​អំណាច និង​នយោបាយ​ឈ្នះ​ឈ្នះ​ដែល​គាត់​ខំ​ឃោសនា​ប៉ុណ្ណោះ។

លោក គឹម សុខ បញ្ជាក់​ថា ផ្ទុយទៅវិញ ស្នាព្រះហស្ត​សម្តេច​ព្រះ​នរោត្តម សីហនុ ដូចជា​ការ​ទាមទារ​ឯករាជ្យ​ជាតិ​ពី​ប្រទេស​បារាំង ក្នុង​ឆ្នាំ​១៩៥៣ ការ​ដឹកនាំ​កម្ពុជា​ឱ្យ​ទទួល​បាន​នូវ​ការ​បង្រួបបង្រួម និង​ផ្សះផ្សា​ជាតិ​តាមរយៈ​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ និង​ការ​រៀបចំ​របប​ដឹកនាំ​ប្រទេស​សាជាថ្មី​ដោយ​ប្រកាន់​យក​លទ្ធិប្រជាធិបតេយ្យ​សេរី ពហុ​បក្ស ដែល​មាន​ក្នុង​រដ្ឋធម្មនុញ្ញ​ឆ្នាំ​១៩៩៣ ជាដើម មិន​ត្រូវ​បាន​លោក ហ៊ុន សែន យក​មក​ផ្សព្វផ្សាយ​នោះ​ឡើយ។

ទាក់ទិន​នឹង​បញ្ហា​នេះ អតីត​មេដឹកនាំ​ប្រឆាំង លោក សម រង្ស៊ី លើកឡើង​កាលពី​ពេល​ថ្មីៗ​នេះ​ថា រយៈពេល ៣៨​ឆ្នាំ​ដែល​មេដឹកនាំ​បក្ស​កាន់​អំណាច លោក ហ៊ុន សែន ធ្វើជា​នាយករដ្ឋមន្ត្រី​បាន​បន្សល់​ទុក​នូវ​បញ្ហា​ដ៏​ធ្ងន់ធ្ងរ​សម្រាប់​ប្រទេស​កម្ពុជា ក្នុង​នោះ​វិស័យ​សេដ្ឋកិច្ច ជំពាក់​បំណុល​បរទេស​វ័ណ្ឌក វិស័យ​សង្គម​ពោរពេញ​ទៅ​ដោយ​អំពើ​ជួញដូរ​មនុស្ស និង​ការ​លាង​លុយ​កខ្វក់ ជាដើម ខណៈ​របប​នយោបាយ គឺ​ត្រូវ​បាន​ដឹកនាំ​តាម​របប ហ្វាស៊ីស ទាំងស្រុង។

លោក សម រង្ស៊ី បញ្ជាក់​ថា ការ​ដឹកនាំ​ដ៏​អាក្រក់​ដែល​លោក​បាន​រៀបរាប់​នេះ គឺជា​គ្រាប់បែក​ដែល​ជា​ស្នាដៃ​របស់​លោក ហ៊ុន សែន បន្សល់​ទុក​ឲ្យ​ប្រទេស​កម្ពុជា និង​ពលរដ្ឋ​ខ្មែរ​ទៅ​ថ្ងៃ​អនាគត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស