លោកនាយករដ្ឋមន្ត្រី ហ៊ុន សែន ព្រមានក្នុងពិធីបិទបញ្ចប់ព្រឹត្តិការណ៍ស៊ីហ្គេមដែលកម្ពុជាធ្វើជាម្ចាស់ផ្ទះលើកទី៣២ កាលពីរាត្រីថ្ងៃទី១៧ ឧសភា ថា បើពលរដ្ឋខ្មែរចង់ឱ្យកម្ពុជាបើកព្រឹត្តិការណ៍បែបនេះបន្តទៀតនៅឆ្នាំ២០៤៣ ត្រូវតែចូលរួមជាមួយរដ្ឋាភិបាលរបស់លោក ដើម្បីការពារសន្តិភាពព្រោះកីឡាត្រូវរស់ក្រោមសន្តិភាព។
ប្រមុខរាជរដ្ឋាភិបាលកម្ពុជា លោក ហ៊ុន សែន បានលើកឡើងថា នៅពេលនេះប្រជាជនកម្ពុជាប្រាកដជាយល់យ៉ាងច្បាស់នូវអត្ថន័យនៃពាក្យថាកីឡារស់នៅក្រោមសន្តិភាព ហើយភាពជោគជ័យនៃការរៀបចំព្រឹត្តិការណ៍កីឡាស៊ីហ្គេមរបស់កម្ពុជានៅពេលនេះ គឺជាស្មារតីនៃការសាមគ្គីភាពក្នុងក្របខ័ណ្ឌអាស៊ានផងដែរ។
មេដឹកនាំបក្សកាន់អំណាច លោក ហ៊ុន សែន អំពាវនាវឱ្យពលរដ្ឋគ្រប់និន្នាការនយោបាយ គ្រប់សាសនាទាំងអស់ទទួលយកនូវភាពជោគជ័យនៃព្រឹត្តិការណ៍ស៊ីហ្គេមនៅពេលនេះ ក្នុងនោះលោក ហ៊ុន សែន លើកជាសំណួរទៅកាន់ទស្សនិកជនដែលចូលរួមផងដែរថា តើភាពជោគជ័យនេះ គឺជាសាមគ្គីភាព និងជាមិត្តភាពក្នុងចំណោមបណ្តាប្រទេសអាស៊ានមែនទេ? តើភាពជោគជ័យនេះជាសមិទ្ធផលរួមរបស់ប្រជាជនកម្ពុជាមែនឬទេ? ថាតើប្រជាជនទាំងអស់ចង់ឱ្យមានព្រឹត្តិការណ៍ស៊ីហ្គេមបែបនេះនៅឆ្នាំ២០៤៣ បន្តទៀតដែរឬទេ?
ការអះអាងនេះ ធ្វើឡើងស្របពេលដែលការបើកព្រឹត្តិការណ៍ស៊ីហ្គេម និងការបិទបញ្ចប់ព្រឹត្តិការណ៍នេះ ត្រូវបានមន្ត្រីក្នុងជួររាជរដ្ឋាភិបាលបក្សកាន់អំណាច និងពលរដ្ឋជាច្រើនទទួលស្គាល់ថា កម្ពុជាពិតជាទទួលជោគជ័យយ៉ាងខ្លាំងក្នុងការរៀបចំព្រឹត្តិការណ៍ជាតិលើកដំបូងរបស់ខ្លួននៅពេលនេះ។
ព្រឹត្តិការណ៍កីឡាស៊ីហ្គេមដែលកម្ពុជាធ្វើជាម្ចាស់ផ្ទះ បានចាប់ផ្តើមពីថ្ងៃទី៥ ខែឧសភា រហូតដល់ថ្ងៃទី១៧ ខែឧសភា ឆ្នាំ២០២៣ នេះ ដែលចំណាយទឹកប្រាក់អស់ ១៣១លានដុល្លារអាមេរិកដោយរួមបញ្ចូលទាំងថ្លៃស្នាក់នៅ អាហារហូបចុក និងការធ្វើដំណើររបស់កីឡាករបរទេស ដែលត្រូវចំណាយអស់ ៧លានដុល្លារអាមេរិកទៀតនោះ។
ក្នុងរយៈពេលនៃការប្រកួតស៊ីហ្គេមរយៈពេល ១៣ថ្ងៃនេះ កម្ពុជាបានជ្រើសរើសកីឡាកររបស់ខ្លួនឱ្យចូលរួមប្រកួតចំនួន ១៣១២នាក់ ខណៈមេដាយដែលកម្ពុជាទទួលបានសរុបមានចំនួន ២៨២មេដាយ ក្នុងចំណោមប្រទេសចំនួន១១ ដែលមានចំនួន ៦០៨វិញ្ញាសា ក្នុងនោះកម្ពុជាទទួលបានមេដាយមាសសរុប ៨១មេដាយលើវិញ្ញាសាចំនួន១៩ ដូចជា គុនខ្មែរ ១៤មេដាយ វិញ្ញាសាវ៉ូរីណាម ១០មេដាយ គុនល្បុក្កតោ ៩មេដាយ និងវិញ្ញាសាផ្សេងទៀតផងដែរ ចំណែកមេដាយប្រាក់សរុបទទួលបានចំនួន ៧៤មេដាយ និងមេដាយសំរឹទ្ធទទួលបាន ១២៦មេដាយផងដែរ ដែលធ្វើឱ្យកម្ពុជាជាប់ចំណាត់ថ្នាក់លេខរៀងទី៤ នៅក្រោមវៀតណាម ដែលជាប់លេខ១ ថៃលេខ២ និងឥណ្ឌូនេស៊ីលេខ៣។
បើទោះបីជាប្រទេសឥណ្ឌូនេស៊ី ជាប់ចំណាត់ថ្នាក់លេខ៣ ប៉ុន្តែមេដាយសរុបទទួលត្រឹមតែ ២៧៦មេដាយប៉ុណ្ណោះ ខណៈកម្ពុជាទទួលបានដល់ទៅ ២៨២មេដាយ ហើយមូលហេតុដែលកម្ពុជាជាប់លេខក្រោមប្រទេសឥណ្ឌូនេស៊ី ដោយសារកម្ពុជាចាញ់មេដាយមាសចំនួន ៦មេដាយ គឺកម្ពុជាទទួលបាន ៨១មេដាយ ខណៈឥណ្ឌូនេស៊ីទទួលបាន ៨៧មេដាយ។
មេដាយទាំងនេះ កម្ពុជាធ្វើតែ ៣៧វិញ្ញាសាប៉ុណ្ណោះក្នុងចំណោមវិញ្ញាសាទាំង ៦០៨ ដែលបានដាក់ចូលក្នុងការប្រកួតកីឡាស៊ីហ្គេមនេះ។
ទាក់ទិននឹងព្រឹត្តិការណ៍ស៊ីហ្គេមដែលកម្ពុជារៀបចំនៅពេលនេះ ក៏មានការរិះគន់ពីអ្នកវិភាគ អ្នកឃ្លាំមើលសង្គម អ្នកសង្កេតការណ៍ផងដែរ ដោយសារតែគេមើលឃើញថា លោក ហ៊ុន សែន បានប្រើប្រាស់ព្រឹត្តិការណ៍កំពូលរបស់ជាតិនេះដើម្បីកេងចំណេញនយោបាយរបស់បក្សកាន់អំណាចរបស់គាត់ផង និងដើម្បីរំលេចខ្លួនឱ្យខ្ពស់ជាងព្រះមហាក្សត្រផង និងធ្វើប្រជាភិថុតិទៅដល់ពលរដ្ឋខ្មែរផងដែរ។
ជុំវិញបញ្ហានេះ អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ធ្លាប់រិះគន់អំឡុងព្រឹត្តិការណ៍ស៊ីហ្គេមនេះថា លោក ហ៊ុន សែន ប្រកាសថាកីឡាដើម្បីទាំងអស់គ្នា ប៉ុន្តែអ្នកនយោបាយជាន់ខ្ពស់លោក កឹម សុខា ដែលជាមេដឹកនាំកំពូលរបស់បក្សប្រឆាំងកំពុងរងនូវការផ្ដន្ទាទោសទាំងអយុត្តិធម៌ មិនបានចូលរួមអបអរកីឡាជាតិនេះទេ ដោយសារតែការដឹកនាំនយោបាយ មិនគិតពីផលប្រយោជន៍ជាតិរបស់លោក ហ៊ុន សែន នេះឯង។
លោក គឹម សុខ លើកឡើងថា មិនមែនតែកីឡាទេដែលមិនបានធ្វើឡើងដើម្បីទាំងអស់គ្នា សូម្បីប្រជាធិបតេយ្យដែលមានចែងក្នុងរដ្ឋធម្មនុញ្ញក៏លោក ហ៊ុន សែន មិនអនុវត្តមិនដើម្បីទាំងអស់ដែរ៕