មេដឹកនាំបក្សកាន់អំណាច លោក ហ៊ុន សែន សន្យាថានឹងឡង់សេបទ «មីឆុង មីកំប៉ុង មីឆា» ដែលច្រៀងក្នុងព្រឹត្តិការណ៍ស៊ីហ្គេមដោយលោក ព្រាប សុវត្ថិ និងកញ្ញា តន់ ចាន់សីមា មុនពិធីប្រកាសបើកព្រឹត្តិការណ៍ស៊ីហ្គេមឱ្យកាន់តែល្បី បន្ទាប់ពីអ្នកវិភាគលោក គឹម សុខ រិះគន់ថាបទនេះមិនគួរច្រៀងក្នុងព្រឹត្តិការណ៍កំពូលរបស់ជាតិ។
លោក ហ៊ុន សែន បានអះអាងក្នុងពិធីចែកសញ្ញាបត្រដល់និស្សិតពេទ្យបញ្ចប់ការសិក្សាពីសាកលវិទ្យាល័យវិទ្យាសាស្ត្រសុខាភិបាល នៅថ្ងៃទី១៨ ខែឧសភា នេះថា បទចម្រៀងនេះគ្រាន់តែកំដរឆាកមុនប្រកាសបើកព្រឹត្តិការណ៍ប្រកួតកីឡាស៊ីហ្គេមជាផ្លូវការប៉ុណ្ណោះ ដូច្នេះមិនមែនជារឿងខុសទាស់អ្វីនោះទេ។
លោក ហ៊ុន សែន អះអាងថា លោក គឹម សុខ រិះគន់លោក ព្រាប សុវត្ថិ បែបនេះគឺជារឿងល្អសម្រាប់គាត់ទៅវិញទេ ព្រោះថាការរិះគន់លោក ព្រាប សុវត្ថិ ដែលច្រៀងបទនេះក្នុងព្រឹត្តិការណ៍ស៊ីហ្គេមនេះ គឺស្មើនឹងរិះគន់អ្នកគាំទ្រលោក ព្រាប សុវត្ថិ ដូច្នោះដែរដែលជាការបង្កើតសត្រូវកាន់តែច្រើនសម្រាប់ខ្លួន។
លោក ហ៊ុន សែន បញ្ជាក់ថា ក្នុងពិធីនេះគេមិនគួរយកបទល្ខោន ឬបទភ្លេងការ ដូចជាបទកន្សែងក្រហម ជាដើម មកច្រៀងនោះទេ ស្របពេលដែលអ្នកចូលរួមសុទ្ធតែយុវវ័យរាប់ម៉ឺននាក់នោះ ហើយការច្រៀងបទនេះក៏ដើម្បីកំដរអារម្មណ៍អ្នកចូលទស្សនាព្រឹត្តិការណ៍ស៊ីហ្គេមនេះដែរ។ យ៉ាងណាក៏ដោយ លោក ហ៊ុន សែន បញ្ជាក់ថា លោកមិនទាន់បានស្តាប់ខ្លឹមសារបទចម្រៀងនេះឱ្យបានចប់នៅឡើយទេ។
កាលពីថ្ងៃទី៥ ខែឧសភា ឆ្នាំ២០២៣ ក្នុងពិធីប្រកាសបើកព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ កម្ពុជាបានប្រគំបទចម្រៀង ៣បទ ក្រោមចំណងជើងថា «កម្ពុជាស្វាគមន៍» «នេះជាពេលវេលារបស់យើង» និងបទ «កម្ពុជាជាផ្ទះរបស់យើង» ក្រៅពីចម្រៀង ៣បទនេះក៏មានការប្រគំបទ «មីឆុង មីកំប៉ុង មីឆា» ដែលច្រៀងដោយអ្នកចម្រៀង លោក ព្រាប សុវត្ថិ និងកញ្ញា តន់ ចាន់សីមា មុនពិធីប្រកាសបើកព្រឹត្តិការណ៍ស៊ីហ្គេមនេះផងដែរ។
បទ «មីឆុង មីកំប៉ុង មីឆា» ជាបទចម្រៀងដែលផលិតឡើងដោយក្រុមហ៊ុន កាឡាក់ស៊ី ណាវ៉ាត្រា របស់អ្នកឧកញ៉ា ឡេង ណាវ៉ាត្រា ជាប្រភេទបទ រាំញាក់កន្ត្រាក់អារម្មណ៍ មិនមែនជាបទប្រភេទលំនាំបែបប្រពៃណីខ្មែរឡើយ។
កាលពីថ្ងៃទី១៣ ខែឧសភា ឆ្នាំ២០២៣ ប្រធានវេទិកាពលរដ្ឋ លោក គឹម សុខ បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily ថា បទនេះបើយកទៅច្រៀងរាំលេងតាមភូមិបាន ប៉ុន្តែគេមិនគួរឲ្យតម្លៃរហូតយកច្រៀងក្នុងព្រឹត្តិការណ៍ធំរបស់ប្រទេសជាតិទេ ព្រោះបទនេះគ្មានខ្លឹមសារផ្សព្វផ្សាយវប្បធម៌ ឬអរិយធម៌របស់ខ្មែរទៅកាន់ពិភពលោកនោះឡើយ។
លោក គឹម សុខ លើកឡើងថាការជ្រើសរើសបទចម្រៀងមកប្រគំក្នុងព្រឹត្តិការណ៍របស់ជាតិ គឺដើម្បីបង្ហាញពិភពលោកឱ្យស្គាល់ពីវប្បធម៌អរិយធម៌របស់ខ្មែរ មិនមែនគ្រាន់តែដើម្បីកំដរអ្នកទស្សនានោះទេ ប៉ុន្តែក៏ត្រូវបង្ហាញទៅកាន់ពិភពលោកនូវភាពអស្ចារ្យរបស់ខ្មែរដែរ ព្រោះព្រឹត្តិការណ៍ធំៗនីមួយៗរបស់ជាតិ មិនងាយមានឱកាសផ្សព្វផ្សាយបែបនេះទេ។
ទាក់ទិននឹងបញ្ហានេះ វីរសិល្បករខ្មែរ លោក សុះ ម៉ាច ធ្លាប់បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី៧ ឧសភា កន្លងទៅនេះថា បទចម្រៀងដែលលើកមកប្រគំក្នុងព្រឹត្តិការណ៍នេះ ប្រសិនបើមានការស្លៀកសម្លៀកបំពាក់ប្រពៃណីខ្មែរ គឺកាន់តែល្អ ដើម្បីបង្ហាញពីអរិយធម៌ដ៏យូរលង់ដែលខ្មែរមាន ក្នុងការទាក់ទាញពិភពលោកឱ្យស្គាល់កាន់តែច្បាស់នូវអរិយធម៌របស់ខ្មែរផងដែរ។
ក្រុមអ្នកសង្កេតការណ៍លើកឡើងថា លោក ហ៊ុន សែន គ្មានបំណងឡង់សេ «បទមីឆុង មីកំប៉ុង មីឆា» នេះទេ ប៉ុន្តែគាត់មានចេតនាអុជអាលឱ្យមានជម្លោះរវាងក្រុមតារាចម្រៀង និងលោក គឹម សុខ ប៉ុណ្ណោះ ព្រោះគាត់មិនពេញចិត្តនឹងលោក គឹម សុខ ដែលតែងប្រឆាំងនឹងគាត់ ព្រមទាំងជីកកកាយចេតនារបស់គាត់ដែលបិទបាំងក្នុងការបើកព្រឹត្តិការណ៍ស៊ីហ្គេមនៅពេលនេះថែមទៀតនោះ៕