សកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន កញ្ញា សោភា និងអ្នកធ្វើដំណើរជាមួយ ត្រូវបានសមត្ថកិច្ចខេត្តក្រចេះ ដោះលែងឲ្យមានសេរីភាពឡើងវិញក្រោយពីមានការឃាត់ខ្លួនកាលពីល្ងាចថ្ងៃពុធ ទី២៤ ឧសភា នេះ អំឡុងពេលដែលពួកគេកំពុងធ្វើការផ្សាយបន្តផ្ទាល់អំពីកិច្ចព្រមព្រៀងទីក្រុងប៉ារីសនៅក្រុងក្រចេះ ខេត្តក្រចេះ។
សារព័ត៌មាន The Cambodia daily មិនអាចសុំការបំភ្លឺពាក់ព័ន្ធនឹងមូលហេតុនៃការឃាត់ខ្លួននេះពីសមត្ថកិច្ចខេត្តក្រចេះ បាននៅឡើយទេ។
ការឃាត់ខ្លួននេះ បន្ទាប់ពីពួកគាត់បានធ្វើដំណើរត្រឡប់មកពីផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីសនៅកម្ពុជាក្រោមវិញដោយឆ្លងកាត់ខេត្តក្រចេះ។
គិតមកដល់ពេលនេះ សារព័ត៌មាន The Cambodia daily នៅមិនទាន់អាចទាក់ទងគ្រួសារលោក ស្រ៊ុន ស្រ៊ន ជុំវិញរឿងសមត្ថកិច្ចឃាត់ខ្លួនលោក និងសហការីរបស់លោកបាននៅឡើយទេ។
លោក ស្រ៊ុន ស្រ៊ន និងកញ្ញា សោភា តែងតែផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីសជារៀងរាល់ថ្ងៃ ដើម្បីអប់រំ និងពន្យល់ដល់ពលរដ្ឋឲ្យយល់ដឹងអំពីច្បាប់ជាតិ និងអន្តរជាតិ។ លើសពីនេះ កន្លងមក ពួកគាត់ក៏បានលើកទឹកចិត្តពលរដ្ឋដែលរងគ្រោះត្រូវហ៊ានធ្វើការតស៊ូមតិ និងការពារសិទ្ធិសេរីភាពរបស់ខ្លួន ដោយការដាក់បណ្ដឹងតវ៉ានៅពេលមានការរំលោភដីធ្លី និងការប្រព្រឹត្តអំពើពុករលួយជាដើមពីសំណាក់អ្នកមានអំណាច ឬមន្ត្រីរដ្ឋាភិបាល។
មិនត្រឹមតែឲ្យពលរដ្ឋយល់អំពីសិទ្ធិទេ អ្នកទាំងពីរក៏បានបង្ហាញពីកាតព្វកិច្ច និងទំនួលខុសត្រូវរបស់រដ្ឋាភិបាលកម្ពុជាចំពោះប្រទេសជាតិ និងប្រជាពលរដ្ឋផងដែរ។ ក្រៅពីផ្សព្វផ្សាយកិច្ចព្រមព្រៀងហើយ លោក ស្រ៊ុន ស្រ៊ន និងកញ្ញា សោភា ក៏បានពន្យល់ពីខ្លឹមសាររដ្ឋធម្មនុញ្ញដែលជាច្បាប់កំពូលរបស់ប្រទេសកម្ពុជាទៅកាន់ប្រជាពលរដ្ឋ ដើម្បីឲ្យពួកគាត់បានដឹងអំពីសិទ្ធិសេរីភាព និងកាតព្វកិច្ចរបស់រដ្ឋាភិបាលផងដែរ។
ក្រៅពីការផ្សព្វផ្សាយច្បាប់ សកម្មជនកិច្ចព្រមព្រៀងសន្តិភាពទីក្រុងប៉ារីសរូបនេះក៏បានបង្កើតការងារឲ្យពលរដ្ឋធ្វើនៅពេលដែលពួកគេមិនមានថវិកាសម្រាប់ដោះស្រាយបញ្ហាក្នុងគ្រួសារ។
កាលពីពេលថ្មីៗនេះ បុរសខ្លាំងកាន់អំណាចតពូជនៅកម្ពុជា គឺលោក ហ៊ុន សែន បានព្រមានទៅលោក ស្រ៊ុន ស្រ៊ន ដោយកុំឲ្យតាំងខ្លួនជាគ្រូកិច្ចព្រមព្រៀងទីក្រុងប៉ារីសទៀត។ ការព្រមានរបស់លោក ហ៊ុន សែន នាពេលនេះ បន្ទាប់ពីលោក ស្រ៊ុន ស្រ៊ន និងកញ្ញា សោភា បន្តផ្សព្វផ្សាយកិច្ចព្រមព្រៀងទីក្រុងប៉ារីស រដ្ឋធម្មនុញ្ញ និងច្បាប់ពាក់ព័ន្ធផ្សេងទៀតទៅពលរដ្ឋ បើទោះបីកន្លងមកពួកគាត់ធ្លាប់ត្រូវបានសមត្ថកិច្ចឃាត់ខ្លួនរួចម្ដងហើយក្ដី៕