38 C
Phnom Penh

លោក អ៊ុំ សំអាន ថា​ការ​ប្រកាស​របស់​នាយករដ្ឋមន្ត្រី​ថៃ គឺ​ផ្ទុយ​ស្រឡះ​ពី​នាយករដ្ឋមន្ត្រី​ខ្មែរ

ដោយ ឌឹ ខេមបូឌា ដេលី

បទវិភាគ

អតីត​តំណាងរាស្ត្រ​របស់​បក្ស​សង្គ្រោះ​ជាតិ​មួយ​រូប​លើកឡើង​ថា ការ​ប្រកាស​ធានា​នូវ​ការ​ផ្ទេរ​អំណាច​ដោយ​សន្តិវិធី​របស់​នាយករដ្ឋមន្ត្រី​ថៃ លោក ប្រាយុទ្ធ ចាន់អូចា ទៅ​ឱ្យ​គណបក្ស​ដែល​ឈ្នះ​ឆ្នោត គឺជា​គំរូ​ល្អ​មួយ​សម្រាប់​នយោបាយ​ប្រទេស​ថៃ ដែល​ខុស​ពី​មេដឹកនាំ​ខ្មែរ​លោក ហ៊ុន សែន ដែល​ក្រាញ​អំណាច និង​កំពុង​រៀបចំ​ផែនការ​ផ្ទេរ​អំណាច​ទៅ​ឲ្យ​កូន​ខ្លួនឯង​ថែម​ទៀត​នោះ។

លោក អ៊ុំ សំអាន បាន​សរសេរ​នៅ​លើ​គណនី​ហ្វេសប៊ុក​របស់​ខ្លួន​នៅ​ថ្ងៃទី​២៥ ឧសភា នេះ​ថា ប្រសិនបើ​នាយករដ្ឋមន្ត្រី​ថៃ លោក ប្រាយុទ្ធ ចាន់អូចា ចង់​ក្រាញ​អំណាច​ដូច​លោក ហ៊ុន សែន គាត់​ក៏​អាច​ធ្វើ​បាន​ដែរ​តាមរយៈ​នៃ​ការ​រំលាយ​បក្ស​ប្រឆាំង​ធំៗ​របស់​ប្រទេស​ថៃ នៅ​មុន​ការ​បោះឆ្នោត​មក​ដល់ ដូច​ដែល​លោក ហ៊ុន សែន រំលាយ​គណបក្ស​សង្គ្រោះ​ជាតិ​កាលពី​ឆ្នាំ​២០១៧ កន្លងទៅ​ដូច្នោះ​ដែរ។

លោក​បន្ត​ថា ទង្វើ​របស់​លោក ប្រាយុទ្ធ ចាន់អូចា ដែល​មិន​រំលាយ​បក្ស​ប្រឆាំង និង​រៀបចំ​ឲ្យ​មាន​ការ​បោះឆ្នោត​ដែល​អាច​ចូល​បាន​ពី​គ្រប់​ភាគី​បែប​នេះ បង្ហាញ​ពី​ភាព​ក្លាហាន​ដោយ​ហ៊ាន​ទទួល​ខុសត្រូវ​របស់​គាត់ ដែល​ខុស​ពី​លោក ហ៊ុន សែន ជា​មេដឹកនាំ​ដែល​កំសាក​មិន​ហ៊ាន​រៀបចំ​ឲ្យ​មាន​ការ​បោះឆ្នោត​ដោយ​ត្រឹមត្រូវ និង​តម្លាភាព ដោយ​ព្រម​ទទួល​លទ្ធផល​ដែល​ខ្លួន​បាន​ប្លន់​ពី​គណបក្ស​សង្គ្រោះ​ជាតិ​ដោយ​ឥត​អៀនខ្មាស​កន្លងមក។

លោក​បញ្ជាក់​ថា លោក ហ៊ុន សែន មិន​ត្រឹមតែ​ខ្លាច​អតីត​មេដឹកនាំ​បក្ស​ប្រឆាំង​លោក សម រង្ស៊ី និង​ប្រធាន​អតីត​គណបក្ស​សង្គ្រោះ​ជាតិ លោក កឹម សុខា ទេ សូម្បីតែ​សកម្មជន និង​មន្ត្រី​បក្ស​ប្រឆាំង​ផ្សេង​ទៀត រួម​ទាំង​គណបក្ស​ភ្លើង​ទៀន​ផង ក៏​គាត់​មិន​ហ៊ាន​ប្រកួតប្រជែង​ក្នុង​ការ​បោះឆ្នោត​ដោយ​សេរី និង​យុត្តិធម៌​ដែរ។

កាលពី​ថ្ងៃទី​២៤ ខែ​ឧសភា ឆ្នាំ​២០២៣ កាសែត Bangkok Post របស់​ប្រទេស​ថៃ បាន​ចុះផ្សាយ​ថា នាយករដ្ឋមន្ត្រី​ថៃ លោក ប្រាយុទ្ធ ចាន់អូចា បាន​ប្រកាស​ធានា​ពី​ការ​ផ្ទេរ​អំណាច​ដោយ​សន្តិវិធី​ពី​រដ្ឋាភិបាល​បណ្ដោះអាសន្ន​របស់​លោក​ទៅ​ឱ្យ​រដ្ឋាភិបាល​ថ្មី ខណៈ​វិធានការ​ជាច្រើន​កំពុង​ត្រូវ​បាន​អនុវត្ត ដើម្បី​ការពារ​សេដ្ឋកិច្ច​ជាតិ​អំឡុង​នីតិវិធី​ផ្ទេរ​អំណាច​នេះ។

លោក ប្រាយុទ្ធ ចាន់អូចា បាន​លើកឡើង​ថា អំឡុង​ពេល​ដែល​ប្រទេស​ថៃ​បន្ត​ដំណើរ​ឆ្ពោះ​ទៅ​មុខ លោក​នឹង​បន្ត​ការពារ​ប្រជាជន​បន្ត​ទៀត ដើម្បី​រង់ចាំ​រដ្ឋាភិបាល​ថ្មី​ឡើង​មក​កាន់​អំណាច​បន្ត​ពី​រដ្ឋាភិបាល​របស់​លោក ព្រោះ​លោក​មិន​មាន​បញ្ហា​ជាមួយ​គ្រប់​ភាគី​ណា​មួយ​នោះ​ឡើយ ដោយសារតែ​លោក​គោរព​តាម​នីតិវិធី​ប្រជាធិបតេយ្យ​ដែល​កំពុង​ដំណើរការ​សព្វថ្ងៃ​នេះ។ ជាង​នេះ​ទៀត លោក ប្រាយុទ្ធ ចាន់អូចា បាន​ជំរុញ​ឱ្យ​គ្រប់​ភាគី​ទាំងអស់​កុំ​ឱ្យ​បង្កើត​សេណារីយ៉ូ​បំភិតបំភ័យ​ណា​មួយ​ពី​ស្ថានការណ៍​នយោបាយ ដែល​អាច​ធ្វើ​ឱ្យ​ប្រជាជន​ផ្ទុះ​កំហឹង​ផង​ដែរ។

ការ​អះអាង​របស់​នាយករដ្ឋមន្ត្រី​ថៃ បែប​នេះ ធ្វើឡើង​ផ្ទុយ​ស្រឡះ​ពី​នាយករដ្ឋមន្ត្រី​កម្ពុជា លោក ហ៊ុន សែន ទាំងស្រុង ដែល​តែង​ប្រកាស​ពី​សង្គ្រាម​ប្រសិនបើ​គណបក្ស​ប្រជាជន​កម្ពុជា​របស់​លោក​ចាញ់​ឆ្នោត។

ជាក់ស្តែង កាលពី​ចុង​ឆ្នាំ​២០២២ ក្នុង​ពិធី​ចែក​សញ្ញាបត្រ​ដល់​និស្សិត​នៅ​រាជធានី​ភ្នំពេញ លោក​នាយករដ្ឋមន្ត្រី ហ៊ុន សែន គំរាម​ថា ប្រសិនបើ​គណបក្ស​ប្រជាជន​កម្ពុជា​មិន​អាច​គ្រប់គ្រង​អំណាច​បន្ត​ទេ សង្គ្រាម​នឹង​ផ្ទុះ​ឡើង​ដោយ​ចៀស​មិន​រួច​ឡើយ។ ការ​ព្រមាន​របស់​លោក ហ៊ុន សែន នៅ​ពេល​នោះ ត្រូវ​គេ​កត់សម្គាល់​ឃើញ​ថា​ជា​ការ​ព្រមាន​ទៅ​កាន់​ពលរដ្ឋ​ខ្មែរ​នៅ​មុន​ការ​បោះឆ្នោត​ថ្នាក់​ជាតិ ដែល​ធ្វើឡើង​នៅ​ថ្ងៃទី​២៣ ខែ​កក្កដា ដែល​នៅ​សល់​ប្រមាណ​ជិត ២​ខែ​ទៀត​នេះ។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​លើកឡើង​ថា កម្ពុជា​ក្រោម​ការ​ដឹកនាំ​របស់​គណបក្ស​កាន់​អំណាច​ដែល​មាន​លោក ហ៊ុន សែន ជា​មេដឹកនាំ បាន​រំលោភ​កិច្ចព្រមព្រៀង​សន្តិភាព​ទីក្រុង​ប៉ារីស រំលោភ​ច្បាប់ រំលោភ​សិទ្ធិ​មូលដ្ឋាន​របស់​ពលរដ្ឋ ជាន់ឈ្លី​លទ្ធិប្រជាធិបតេយ្យ និង​ធ្វើ​ឱ្យ​បាត់បង់​នូវ​អធិបតេយ្យ​ជាតិ​យ៉ាង​ធ្ងន់ធ្ងរ តាមរយៈ​នៃ​ប្រើ​អំណាច​តាម​បែប​យោធា​ដែល​គណបក្ស​ប្រជាជន​កម្ពុជា​តែងតែ​លួច​ស្ទើរតែ​គ្រប់​អាណត្តិ​រហូត​មក។

អ្នក​រាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ប្រចាំ​នៅ​កម្ពុជា បាន​លើកឡើង​នៅ​ក្នុង​កិច្ចប្រជុំ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ​លើក​ទី​៤៩ នៅ​ទីក្រុង​ហ្សឺណែវ កាលពី​ចុង​ឆ្នាំ​២០២២ ថា ទិដ្ឋភាព​សិទ្ធិមនុស្ស និង​លទ្ធិប្រជាធិបតេយ្យ​នៅ​កម្ពុជា​នៅតែ​មាន​ការ​ព្រួយបារម្ភ​យ៉ាង​ខ្លាំង ដោយសារ​លំហ​សេរីភាព​របស់​ពលរដ្ឋ និង​នយោបាយ​នៅ​កម្ពុជា​កាន់តែ​រួម​តូច និង​កំពុង​ដើរ​ថយ​ក្រោយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស