លោក សម រង្ស៊ី ប្រធានស្ដីទីអតីតគណបក្សសង្គ្រោះជាតិ បានថ្លែងថា លោកនឹងធ្វើដំណើរវិលជុំវិញប្រទេសកម្ពុជា ដើម្បីត្រៀមលក្ខណៈចូលកម្ពុជានៅក្នុងពេលឆាប់ៗនេះ ខណៈលោកកំពុងមានវត្តមាននៅប្រទេសម៉ាឡេស៊ី ជាទីដែលគណបក្សប្រឆាំងធ្លាប់ជួបប្រជុំគ្នាស្ដីពីនយោបាយនៅកម្ពុជា។
យោងតាមហ្វេសប៊ុករបស់លោក សម រង្ស៊ី បានថ្លែងនៅព្រលានយន្តហោះអូស្ត្រាលី ថា លោកបានបញ្ចប់ទស្សនកិច្ចរយៈពេល ១០ថ្ងៃនៅប្រទេសអូស្ត្រាលី ហើយកំពុងបន្តដំណើរទៅកាន់ប្រទេសម៉ាឡេស៊ី ដែលជាប្រទេសក្នុងតំបន់អាស៊ាន។ លោក សម រង្ស៊ី ថាលោកនឹងធ្វើដំណើរវិលជុំវិញប្រទេសកម្ពុជា និងត្រៀមលក្ខណៈចូលកម្ពុជានៅក្នុងពេលឆាប់ៗនេះ។
ទោះជាលោក សម រង្ស៊ី អះអាងថាលោកកំពុងធ្វើដំណើរទៅប្រទេសម៉ាឡេស៊ី យ៉ាងណាក៏ដោយ ក៏ពុំទាន់មានព័ត៌មានច្បាស់ថា លោក សម រង្ស៊ី នឹងធ្វើដំណើរទៅកាន់ម៉ាឡេស៊ី ពិតប្រាកដ ឬយ៉ាងណានោះទេ។
កាលពីសប្តាហ៍មុន លោក សម រង្ស៊ី ដែលកំពុងមានទោសជាប់ខ្លួនជាច្រើន បានប្រកាសនៅក្នុងប្រទេសអូស្ត្រាលី ថា លោកនឹងវិលចូលប្រទេសកម្ពុជាជាថ្មីក្រោយពីស្ថានភាពនយោបាយនៅប្រទេសថៃ មានការប្រែប្រួល បន្ទាប់ពីមេដឹកនាំរដ្ឋប្រហារយោធាថៃ បានចាញ់ឆ្នោតនៅក្នុងការបោះឆ្នោតកាលពីពាក់កណ្តាលខែឧសភា ថ្មីៗនេះ។
គួរបញ្ជាក់ផងដែរថា កាលពីខែមីនា កន្លងទៅ លោកនាយករដ្ឋមន្ត្រី ហ៊ុន សែន បានលើកឡើងថា នាយករដ្ឋមន្ត្រីថ្មីរបស់ម៉ាឡេស៊ី លោក អាន់វ៉ា អ៊ីប្រាហ៊ីម នឹងមិនស្វាគមន៍ក្រុមលោក សម រង្ស៊ី នោះទេ។ លោកនាយករដ្ឋមន្ត្រីថាមានក្រុមតំណាងរាស្ត្រម៉ាឡេស៊ី បានស្នើទៅលោក អាន់វ៉ា អ៊ីប្រាហ៊ីម ដោយសុំឲ្យក្រុមរបស់លោក សម រង្ស៊ី ចូលមកទឹកដីម៉ាឡេស៊ី ដើម្បីធ្វើបទបង្ហាញ ក៏ប៉ុន្តែសំណើនេះត្រូវបាននាយករដ្ឋមន្ត្រីម៉ាឡេស៊ី បដិសេធ។
លោក ហ៊ុន សែន បញ្ជាក់ថា ប្រសិនបើនាយករដ្ឋមន្ត្រីម៉ាឡេស៊ី ហ៊ានឲ្យក្រុមលោក សម រង្ស៊ី ជាន់ទឹកដីម៉ាឡេស៊ី នោះនឹងធ្វើឲ្យប៉ះពាល់ដល់ទំនាក់ទំនងរដ្ឋ និងរដ្ឋ ដោយមើលមុខគ្នាមិនត្រង់។ នេះគឺជាលើកទី៣ ហើយដែលលោក សម រង្ស៊ី បានប្រកាសត្រឡប់ចូលមកកម្ពុជា ខណៈដែល ២លើកមុនៗ លោក សម រង្ស៊ី បានបរាជ័យ និងមានភាពចម្រូងចម្រាសនយោបាយគ្នាយ៉ាងខ្លាំងជុំវិញដំណើរវិលចូលប្រទេសនេះ។
គួរបញ្ជាក់ផងដែរថា តុលាការក្រុងភ្នំពេញបានប្រកាសសាលក្រមកាត់ទោសលោក សម រង្ស៊ី និងថ្នាក់ដឹកនាំជាន់ខ្ពស់របស់លោក ៨រូបទៀតកាលពីថ្ងៃទី១ ខែមីនា ឆ្នាំ២០២១ ពីបទឧបឃាត ឬប៉ុនប៉ងផ្តួលរំលំរដ្ឋាភិបាល តាមរយៈផែនការវិលចូលស្រុកកាលពីថ្ងៃទី៩ ខែវិច្ឆិកា ឆ្នាំ២០១៩។
សាលក្រមនេះ បានសម្រេចផ្ដន្ទាទោសលោក សម រង្ស៊ី ឱ្យជាប់ពន្ធនាគារ ២៥ឆ្នាំ។ ដោយឡែកអ្នកស្រី មូរ សុខហួរ និងលោក អេង ឆៃអ៊ាង ត្រូវជាប់ពន្ធនាគារ ២២ឆ្នាំ។ រីឯភរិយាលោក សម រង្ស៊ី គឺអ្នកស្រី ជូឡុង សូមួរ៉ា លោក ម៉ែន សុថាវរិន្ទ្រ លោក ហូរ វ៉ាន់ លោក អ៊ូ ច័ន្ទឫទ្ធិ លោក ឡុង រី និងលោក នុត រំដួល ត្រូវជាប់ពន្ធនាគារ ២០ឆ្នាំ។
ក្រៅពីជាប់ពន្ធនាគារ មេដឹកនាំបក្សប្រឆាំងទាំង ៩រូបដែលកំពុងរស់នៅឯក្រៅប្រទេស ត្រូវបានដកសិទ្ធិពលរដ្ឋមួយចំនួន រួមមានសិទ្ធិបោះឆ្នោត សិទ្ធិឈរឈ្មោះឲ្យគេបោះឆ្នោត។ បន្ថែមពីនេះ ពួកគេទាំងនោះត្រូវបង់ប្រាក់រួមគ្នាចំនួន ១៨០០លានរៀល ឬស្មើជាង ៤៤ម៉ឺនដុល្លារចូលទៅថវិការដ្ឋផងដែរ៕