ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន និងសហការី ២រូបទៀត ត្រូវបានតុលាការខេត្តរតនគិរី ដោះលែងឲ្យនៅក្រៅឃុំបណ្ដោះអាសន្ននាល្ងាចថ្ងៃទី៣០ ឧសភា បន្ទាប់ពីពួកគេសុំទោសលោក ហ៊ុន សែន និងប្រកាសដកខ្លួនចេញពីសមាជិកនៃផ្ទះសាមគ្គី។
កាលពីថ្ងៃទី២៧ ខែឧសភា ឆ្នាំ២០២៣ លោក ថេង សាវឿន បានសរសេរលិខិត និងចេញវីដេអូសុំទោសដោយអះអាងថា កន្លងមក រូបលោកជឿតាមការចង្អុលរបស់បរទេសមួយចំនួន និងក្រុមអ្នកនយោបាយប្រឆាំងមួយចំនួនក្នុងរូបភាពញុះញង់បង្កចលាចលធ្វើឲ្យបាត់បង់ និងប៉ះពាល់សណ្ដាប់ធ្នាប់សង្គម និងសាធារណៈ ដែលបានប្រមូលផ្ដុំសមាជិករបស់ខ្លួនក្នុងគោលបំណងផ្ដួលរំលំរដ្ឋាភិបាលដោយមិនដឹងខ្លួន។
ក្រោយពេលចេញមុខសុំទោសបុរសខ្លាំងនៅកម្ពុជារួចមក នៅថ្ងៃទី៣០ ខែឧសភា នេះ លោក ថេង សាវឿន និងសហការី ២រូបទៀត ក្នុងនោះមានលោក ញ៉ិល ភាព និងលោក ថាន់ ហាច ត្រូវបានតុលាការខេត្តរតនគិរី ដោះលែងវិញ បន្ទាប់ពីឃុំខ្លួនអស់រយៈពេលជាង ១០ថ្ងៃរួចមក។ បន្ទាប់ពីដោះលែងឲ្យនៅក្រៅឃុំភ្លាមៗ ពួកគេទាំងបីរូប ព្រមទាំងគ្រួសារបានចេញវីដេអូសម្ដែងការអរគុណដល់លោក ហ៊ុន សែន និងរដ្ឋមន្ត្រីក្រសួងមហាផ្ទៃ លោក ស ខេង ដែលពួកគេអះអាងថាបានជួយអន្តរាគមន៍ឲ្យមានការដោះលែងនេះ។
បើតាមវីដេអូរយៈពេលជាង ៦នាទីដែលសារព័ត៌មានរបស់រដ្ឋាភិបាល Fresh News បានចុះផ្សាយនោះ លោក ថេង សាវឿន បានសុំទោស និងសារភាពទទួលកំហុស ដែលថាកន្លងមកលោកបានជឿទៅលើសកម្មជន និងអ្នកនយោបាយបក្សប្រឆាំងជ្រុលនិយមមួយចំនួន រហូតដល់មានការប្រមូលផ្ដុំញុះញង់ឲ្យមានការងើបឡើងប្រឆាំង ការតវ៉ា ផ្ដួលរំលំរដ្ឋាភិបាលស្របច្បាប់។
លើសពីនេះ លោក ថេង សាវឿន ក៏បានអំពាវនាវដល់ប្រជាកសិករដែលរងគ្រោះ ឲ្យឈប់ធ្វើការប្រមូលផ្ដុំទៅតាមអ្នកនយោបាយជ្រុលនិយមរបស់បក្សប្រឆាំង ប៉ុន្តែគួរងាកមកចូលរួមដោះស្រាយបញ្ហាជាមួយរដ្ឋាភិបាលវិញ បើទោះបីពលរដ្ឋដែលរងគ្រោះដោយសារការរំលោភដីធ្លី និងរងភាពអយុត្តិធម៌ពីសំណាក់ឧកញ៉ា និងអ្នកមានអំណាចក្នុងជួររដ្ឋាភិបាលក៏ដោយ។
លោកក៏បានអំពាវនាវឲ្យពលរដ្ឋចូលរួមជាមួយរដ្ឋាភិបាល និងទៅបោះឆ្នោតនៅខែកក្កដា ខាងមុខនេះផងដែរ។ ការអំពាវនាវនេះ ទោះបីជាមិនមានវត្តមានគណបក្សភ្លើងទៀនចូលរួម ដោយសារ គ.ជ.ប និងក្រុមប្រឹក្សាធម្មនុញ្ញក្រោមការបញ្ជារបស់លោក ហ៊ុន សែន បានបិទខ្ទប់មិនឲ្យចូលរួមប្រកួតប្រជែងក្ដី។
ប្រធានសមាគមការពារសិទ្ធិមនុស្សអាដហុក លោក នី សុខា បង្ហាញការភ្ញាក់ផ្អើល និងសោកស្ដាយ ប៉ុន្តែសម្រាប់អង្គការសង្គមស៊ីវិលដែលធ្វើការលើកកម្ពស់សិទ្ធិមនុស្ស និងលទ្ធិប្រជាធិបតេយ្យ នៅតែគោរពការសម្រេចចិត្តនេះ ដោយចាត់ទុកការសម្រេចចិត្តរបស់លោក ថេង សាវឿន និងសហការីជាសិទ្ធិបុគ្គល។
លោកបន្តថា កន្លងមក លោកមិនដែលឮសាររបស់លោក ថេង សាវឿន និយាយបែបនេះទេ ប៉ុន្តែនៅពេលជាប់ឃុំ បែរជាលោកលើកឡើងដូច្នេះទៅវិញ។ លោកបង្ហាញការងឿងឆ្ងល់ និងសង្ស័យថា ការសារភាពកំហុស និងសុំទោសរបស់លោក ថេង សាវឿន ព្រមទាំងសហការី ២រូបទៀត អាចបណ្ដាលមកពីពួកគេរងសម្ពាធណាមួយ។
លោក នី សុខា ចាត់ទុកការដោះលែងលោក ថេង សាវឿន លោក ញ៉ិល ភាព និងលោក ថាន់ ហាច បន្ទាប់ពីសុំទោសលោក ហ៊ុន សែន ថាមិនមែនជារឿងថ្មីឡើយ។ តែយ៉ាងណា លោកចង់ឲ្យតុលាការធ្វើការសម្រេចដោយឈរលើគោលការណ៍ឯករាជ្យ យុត្តិធម៌ ផ្អែកលើភស្តុតាង ជាជាងឲ្យសុំទោសជាថ្នូរនឹងការដោះលែងបែបនេះ។
លោក នី សុខា បង្ហាញក្ដីបារម្ភ ដោយថាសេរីភាពរបស់អង្គការសង្គមស៊ីវិលកាន់តែរួមតូច បន្ទាប់ពីរដ្ឋាភិបាលបិទសារព័ត៌មាន វីអូឌី និងចេញលិខិតកោះហៅក្រុមសង្គមស៊ីវិល ដោយឲ្យលុបបទចម្រៀង «ឈាមបាតុករ» ខណៈថ្មីៗនេះក៏មានចាប់ខ្លួន និងចោទប្រកាន់លើលោក ថេង សាវឿន និងសហការីរបស់លោកថែមទៀត។
ទោះបីជាលំហសិទ្ធិសេរីភាពអង្គការសង្គមស៊ីវិលកំពុងប្រឈមក្ដី លោក នី សុខា អះអាងថា ក្រុមអង្គការសង្គមស៊ីវិលដែលធ្វើការលើកកម្ពស់សិទ្ធិមនុស្ស និងលទ្ធិប្រជាធិបតេយ្យនៅតែបន្តការពារខ្លួនដដែល ដោយឈរលើគោលការណ៍ឯករាជ្យ យុត្តិធម៌ និងគោរពទៅតាមលក្ខន្តិកៈដែលបានតម្កល់នៅក្រសួងមហាផ្ទៃ។
ការចេញសុំទោសរបស់លោក ថេង សាវឿន និងសហការីនេះ ធ្វើឡើងបន្ទាប់ពីលោក ហ៊ុន សែន បានគំរាមថា លោកនឹងមិនលើកលែងដាច់ខាតចំពោះបុគ្គល ឬក្រុមណាដែលមានបំណងធ្វើបដិវត្តន៍ដើម្បីដណ្ដើមអំណាចពីគ្រួសាររបស់លោក។
ក្រៅពីគំរាមហើយ បុរសខ្លាំងក្រាញអំណាចនៅកម្ពុជារូបនេះក៏បានស្នើទៅបណ្ដាប្រទេសនានាឲ្យឈប់ផ្ដល់ថវិកាដល់អង្គការសង្គមស៊ីវិលនៅកម្ពុជាផងដែរ។ លើសពីនេះ លោកក៏បានបញ្ជាទៅសមត្ថកិច្ចធ្វើការស្រាវជ្រាវឲ្យដល់ឫសគល់នៃប្រភពថវិកាដែលក្រុមអង្គការសង្គមស៊ីវិលទទួលបានកន្លងមកដើម្បីយកមកធ្វើបដិវត្តន៍កសិករ ដែលលោក ហ៊ុន សែន ចោទថាក្នុងចេតនាចង់ផ្ដួលរំលំរដ្ឋាភិបាល។
លោក ថេង សាវឿន និងលោក ញ៉ិល ភាព ព្រមទាំងលោក ថាន់ ហាច ត្រូវបានតុលាការខេត្តរតនគិរី ចោទប្រកាន់ពីបទ «រួមគំនិតក្បត់ និងញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ក្រោមហេតុផលថា ការជួបជុំរបស់សមាគមសម្ព័ន្ធសហគមន៍កសិករកម្ពុជានាពេលនោះ ធ្វើឡើងក្នុងគោលដៅនយោបាយ ដើម្បីធ្វើសកម្មភាពញុះញង់ដល់កសិករឲ្យងើបបះបោរបង្កឲ្យមានចលាចលសង្គម និងឈានទៅផ្ដួលរំលំរដ្ឋាភិបាលតាមគ្រប់រូបភាព។
ការឃុំខ្លួន និងចោទប្រកាន់នេះ បន្ទាប់ពីសមត្ថកិច្ចខេត្តក្រចេះ បានឃាត់ខ្លួនលោក ថេង សាវឿន ជាមួយនឹងបុគ្គលិកកាលពីថ្ងៃទី១៧ ឧសភា អំឡុងពេលដែលធ្វើដំណើរទៅភ្នំពេញ ក្រោយពីធ្វើដំណើរកម្សាន្តកាលពីថ្ងៃទី១៣-១៤ ខែឧសភា ឆ្នាំ២០២៣ នៅខេត្តរតនគិរី៕