28 C
Phnom Penh

លោក សម រង្ស៊ី៖ កម្ពុជា​បាន​ក្លាយ​ជា​ឋានសួគ៌​ដ៏​សុខសាន្ត​សម្រាប់​ក្រុម​ចោរ​អន្តរជាតិ​និង​ឧក្រិដ្ឋជន​គ្រប់​ប្រភេទ

ដោយ ឌឹ ខេមបូឌា ដេលី

បទវិភាគ

អតីត​មេដឹកនាំ​បក្ស​ប្រឆាំង​លោក សម រង្ស៊ី ព្រមាន​ថា លោក ហ៊ុន សែន កំពុងតែ​ធ្វើ​ឱ្យ​បាត់បង់​នូវ​ស្ថិរភាព និង​សន្តិសុខ​សម្រាប់​តំបន់​អាស៊ី​ភាគ​អាគ្នេយ៍​យ៉ាង​ធ្ងន់ធ្ងរ ដោយសារតែ​មេដឹកនាំ​ខ្មែរ​រូប​នេះ​បាន​បើក​ដៃ​ឲ្យ​ក្រុម​ចោរ​ជនជាតិ​ចិន​កុម្មុយនីស្ត និង​ពួក​ម៉ាហ្វៀរ​ចិន ធ្វើ​អ្វីៗ​តាម​ចិត្ត​នៅ​ក្នុង​ប្រទេស​កម្ពុជា។

លោក សម រង្ស៊ី សរសេរ​លើ​ទំព័រ​ហ្វេសប៊ុក​របស់​ខ្លួន​នៅ​ថ្ងៃទី​៦ មិថុនា នេះ​ថា កម្ពុជា​ដែល​កំពុង​ដឹកនាំ​ដោយ​លោក ហ៊ុន សែន សព្វថ្ងៃ​នេះ បាន​លាក់​ទុក​ក្រុម​ឧក្រិដ្ឋជន និង​ក្រុម​ចោរ​អន្តរជាតិ​យ៉ាង​ច្រើន​សន្ធឹកសន្ធាប់ ដែល​ពួកគេ​អាច​ធ្វើ​សកម្មភាព​តាម​អំពើ​ចិត្ត ដូចជា​ការ​ជួញដូរ​គ្រឿងញៀន ការ​ជួញដូរ​មនុស្ស និង​ការ​លាង​លុយ​កខ្វក់ ជាដើម ដែល​កើត​មកពី​អំពើពុករលួយ ដោយសារតែ​មាន​ការ​ការពារ​ពី​រដ្ឋ​អំណាច​របស់​លោក ហ៊ុន សែន។

លោក​បន្ត​ថា ក្រុម​ឧក្រិដ្ឋជន​អន្តរជាតិ​ទាំងនេះ​នឹង​បង្ក​គ្រោះថ្នាក់​យ៉ាង​ខ្លាំង​ដល់​ប្រទេស​នានា​នៅ​ក្នុង​តំបន់​អាស៊ី​អាគ្នេយ៍​ទៅ​ថ្ងៃ​មុខ។

ការ​អះអាង​របស់​អតីត​មេដឹកនាំ​បក្ស​ប្រឆាំង​រូប​នេះ ធ្វើឡើង​ស្រប​ពេល​ដែល​គេ​មើល​ឃើញ​ថា កម្ពុជា​កំពុង​បើក​ផ្លូវ​ឱ្យ​ពួក​ម៉ាហ្វៀរ​ជនជាតិ​ចិន​ចូល​ទៅ​រស់នៅ និង​ធ្វើ​អាជីវកម្ម​នៅ​ក្នុង​ប្រទេស​កម្ពុជា​យ៉ាង​ច្រើន​សន្ធឹកសន្ធាប់ ចាប់តាំងពី​កម្ពុជា​ភ្ជាប់​ទំនាក់ទំនង​មិត្ត​ដែកថែប​ជាមួយ​ចិន​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ។

ទាក់ទិន​នឹង​បញ្ហា​នេះ កាលពី​ថ្ងៃទី​១៤ ខែ​កក្កដា ឆ្នាំ​២០២២ សារព័ត៌មាន​អន្តរជាតិ អាល់ចាហ្ស៊ីរ៉ា (Aljazeera) បាន​ចេញ​ផ្សាយ​ជា​វីដេអូ​រយៈពេល​ជាង ៤០​នាទី ដែល​មាន​ចំណងជើង​ថា «Forced to Scam: Cambodia’s Cyber Slaves» ឬ «ទាសករ​តាម​អ៊ីនធឺណិត​នៅ​កម្ពុជា» ដោយ​ក្នុង​វីដេអូ​នោះ​បាន​រៀបរាប់​យ៉ាង​ច្រើន​ពី​ការ​ស៊ើបអង្កេត​នៃ​អំពើ​ជួញដូរ​មនុស្ស និង​ការ​ធ្វើ​ទាសភាព​ដោយ​ប្រតិបត្តិការ​បោកប្រាស់​តាម​អ៊ីនធឺណិត​របស់​ជនជាតិ​ចិន​នៅ​កម្ពុជា ដែល​គ្រប់គ្រង​ដោយ​ជនជាតិ​ចិន និង​បណ្ដាញ​របស់​ពួកគេ​ដែល​ពាក់ព័ន្ធ​ជាមួយ​មន្ត្រី​ជាន់ខ្ពស់​នៃ​រដ្ឋាភិបាល​កម្ពុជា​ជា​ប្រព័ន្ធ ជាពិសេស​គឺ​ពាក់ព័ន្ធ​ជាមួយ​លោក​នាយករដ្ឋមន្ត្រី ហ៊ុន សែន តែម្តង។

ជាង​នេះ​ទៅ​ទៀត សារព័ត៌មាន The Australian ក៏​បាន​ចេញ​ផ្សាយ​កាលពី​ពេល​កន្លង​ទៅ​ដែរ​ថា កម្ពុជា​កំពុង​រង​នូវ​ការ​សង្ស័យ​ថា​កំពុង​ប្រព្រឹត្ត​អំពើ​ជួញដូរ​មនុស្ស​យ៉ាង​ធំ​ដែល​គ្រប់គ្រង​ដោយ​ក្រុម​ឧក្រិដ្ឋជន​លាង​លុយ​ជនជាតិ​ចិន ដែល​ជាប់​ពាក់ព័ន្ធ​យ៉ាង​ខ្លាំង​ជាមួយ​នឹង​ក្មួយប្រុស​របស់​មេដឹកនាំ​ផ្ដាច់ការ​កម្ពុជា លោក ហ៊ុន សែន គឺ​លោក ហ៊ុន តូ។

ជុំវិញ​បញ្ហា​នេះ ទិន្នន័យ​សង្គម​ស៊ីវិល​បាន​បង្ហាញ​កាលពី​ចុង​ឆ្នាំ​២០២១ ថា សមត្ថកិច្ច​កម្ពុជា​បាន​ចាប់​ខ្លួន​ជនជាតិ​ចិន​ជាង ៥០០​នាក់​ពាក់ព័ន្ធ​នឹង​បទឧក្រិដ្ឋ​ដែល​ពួកគេ​បាន​ប្រព្រឹត្ត​នៅ​កម្ពុជា ហើយ​ជនជាតិ​ចិន​ដែល​ត្រូវ​បាន​ចាប់​ខ្លួន​ទាំងនោះ ភាគច្រើន​បាន​ជាប់​ពាក់ព័ន្ធ​នឹង​ការ​ប្រព្រឹត្ត​អំពើ​ឃាតកម្ម ចាប់​ជំរិត​ទារ​ប្រាក់ អំពើ​ហិង្សា ការ​ឆបោក អំពើ​ចោរកម្ម ការ​រត់ពន្ធ​ថ្នាំញៀន និង​ការ​ប្រើប្រាស់​អាវុធ​ខុស​ច្បាប់ ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស