លោក ហ៊ុន សែន គំរាមរដ្ឋាភិបាលនៃប្រទេសជិតខាងរបស់កម្ពុជា គឺរដ្ឋាភិបាលវៀតណាម ថាប្រសិនបើខ្លួនមិនចាប់បញ្ជូនខ្លួនលោក សម រង្ស៊ី ឱ្យមកកម្ពុជា នោះវៀតណាមនឹងមានបញ្ហាការទូតជាមួយនឹងរដ្ឋាភិបាលរបស់លោក។
ទោះជាយ៉ាងណាក៏ដោយ លោក ហ៊ុន សែន បានដក ឬលុបសម្ដីរបស់ខ្លួនវិញត្រឹមរយៈពេលប្រមាណ ៧ម៉ោងប៉ុណ្ណោះ។
បុរសខ្លាំងកម្ពុជាដែលឧស្សាហ៍ប្រើកណ្ដាប់ដៃដែករូបនេះលើកឡើងក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-បាវិត នៅថ្ងៃទី៧ ខែមិថុនា ឆ្នាំ២០២៣ នេះថា លោកទទួលបានព័ត៌មានច្បាស់ការណ៍ថា លោក សម រង្ស៊ី នឹងប្រើលិខិតឆ្លងដែនជនជាតិបារាំងចូលទៅទឹកដីវៀតណាម ក្នុងនាមជាភ្ញៀវទេសចរណ៍។
លោក ហ៊ុន សែន បញ្ជាក់ថា បំណងរបស់លោក សម រង្ស៊ី ធ្វើបែបនេះ គឺចង់ឲ្យលោកខឹង ដូច្នេះរដ្ឋាភិបាលវៀតណាមត្រូវតែចាប់ខ្លួនអតីតមេដឹកនាំបក្សប្រឆាំងរូបនេះឱ្យរដ្ឋាភិបាលកម្ពុជាដាច់ខាតនៅពេលដែលគាត់ចូលទៅដល់ទឹកដីរបស់ខ្លួន។
យ៉ាងណាក៏ដោយ បន្ទាប់ពីបង្ហោះវីដេអូផ្សាយផ្ទាល់របស់លោកបានប៉ុន្មានម៉ោងប៉ុណ្ណោះ ស្រាប់តែវីដេអូនោះត្រូវបានលុបចេញពីទំព័រហ្វេសប៊ុកផ្លូវការរបស់លោក ហ៊ុន សែន វិញ ហើយក្រោយមកមានការបង្ហោះសារនេះឡើងវិញនូវវីដេអូដដែលនោះ ប៉ុន្តែត្រូវបានកាត់ចំណុចដែលលោក ហ៊ុន សែន គំរាមវៀតណាមជុំវិញការបញ្ជាឲ្យចាប់ខ្លួនលោក សម រង្ស៊ី ចោលទាំងអស់។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៧ មិថុនា នេះថា ទង្វើរបស់លោក ហ៊ុន សែន បែបនេះដោយសារតែលោក ហ៊ុន សែន ដឹងថាសម្ដីរបស់គាត់បែបនេះនឹងធ្វើឲ្យវៀតណាមមិនសប្បាយចិត្តនោះទេ។ ម្យ៉ាងវិញទៀត ក៏ទំនងជាមានសារនយោបាយការទូតសម្ងាត់ពីស្ថានទូតវៀតណាម ឬមេដឹកនាំវៀតណាមទៅកាន់ក្រសួងការបរទេសកម្ពុជា ឬទៅកាន់លោក ហ៊ុន សែន ផ្ទាល់ផងដែរ ទើបធ្វើឲ្យគាត់ត្រូវបង្ខំចិត្តកាត់សម្ដីដែលគាត់បានគំរាមរដ្ឋាភិបាលវៀតណាមចោល មុននឹងបង្ហោះសាជាថ្មីឡើងវិញបែបនេះ។
លោក គឹម សុខ អះអាងថា លោក ហ៊ុន សែន ច្រឡំខ្លួនឯងធ្ងន់ធ្ងរណាស់ចំពោះការប្រើសម្ដីបែបនេះទៅកាន់រដ្ឋាភិបាលវៀតណាម ដែលគាត់គ្រាន់តែជាមេដឹកនាំខ្មែរមួយរូបដែលវៀតណាមបានលើកបន្តុបប៉ុណ្ណោះ ហើយការគំរាមរបស់លោក ហ៊ុន សែន នេះ គឺជាការជ្រៀតជ្រែកកិច្ចការផ្ទៃក្នុងរបស់វៀតណាមធ្ងន់ធ្ងរណាស់ ខណៈវៀតណាមក៏ទំនងជាមិនសប្បាយចិត្តនឹងសម្ដីរបស់លោក ហ៊ុន សែន បែបនេះដែរ។
អ្នកវិភាគរូបនេះរិះគន់ថា លោក ហ៊ុន សែន មិនយល់អំពីនយោបាយការទូតតាមរយៈសម្ដីគាត់ទៅកាន់វៀតណាមបែបនេះ ព្រោះថាបើអតីតមេដឹកនាំបក្សប្រឆាំងលោក សម រង្ស៊ី ប្រើលិខិតឆ្លងដែនក្នុងនាមជាជនជាតិបារាំងចូលប្រទេសវៀតណាម រដ្ឋាភិបាលវៀតណាមមិនអាចទៅចាប់លោក សម រង្ស៊ី តាមការបញ្ជារបស់លោក ហ៊ុន សែន បានទេ ព្រោះបើចាប់លោក សម រង្ស៊ី វានឹងធ្វើឲ្យប៉ះពាល់នយោបាយការទូតធំណាស់រវាងវៀតណាមជាមួយនឹងប្រទេសបារាំង ជាមួយសហភាពអឺរ៉ុប ឬសហរដ្ឋអាមេរិក ជាដើម។
លោក គឹម សុខ បញ្ជាក់ថា វៀតណាមសព្វថ្ងៃនេះទទួលបានផលប្រយោជន៍ពីនយោបាយការទូតជាមួយប្រទេសបារាំង ជាមួយសហភាពអឺរ៉ុប និងសហរដ្ឋអាមេរិក ដូចជាសេដ្ឋកិច្ច ពាណិជ្ជកម្ម និងសន្តិសុខក្នុងតំបន់ ជាដើម ធំធេងណាស់ ដូច្នេះជុំវិញករណីលោក សម រង្ស៊ី យ៉ាងច្រើនបំផុតរដ្ឋាភិបាលវៀតណាមរកវិធីមិនឲ្យលោក សម រង្ស៊ី អាចចូលវៀតណាមបាន ឬបើគាត់អាចចូលបានតាមវិធីណាមួយនោះ វៀតណាមគ្រាន់តែសុំឲ្យលោក សម រង្ស៊ី ចាកចេញពីវៀតណាមវិញប៉ុណ្ណោះ ព្រោះការធ្វើបែបនេះ ទើបមិនធ្វើឲ្យប៉ះពាល់ដល់ផលប្រយោជន៍របស់វៀតណាមទៅថ្ងៃមុខ។
កាលពីថ្ងៃទី៣១ ខែឧសភា ឆ្នាំ២០២៣ ក្នុងពិធីសម្ពោធស្ពានអាកាសឫស្សីកែវ បុរសខ្លាំងក្រាញអំណាចតពូជនៅកម្ពុជា លោក ហ៊ុន សែន អះអាងថា នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានសន្យាជាមួយលោកចំនួន ៤ដង ថានឹងមិនឲ្យលោក សម រង្ស៊ី ជាន់ទឹកដីម៉ាឡេស៊ី ជាដាច់ខាត ប៉ុន្តែលោក សម រង្ស៊ី នៅតែប្រើល្បិចលួចចូលទៅប្រទេសម៉ាឡេស៊ី តាមវិស័យឯកជនដោយប្រើប៉ាសស្ព័របារាំង បានទៀត។
ទាក់ទិននឹងបញ្ហានេះ ក្នុងពិធីអបអរសាទរទិវាអន្តរជាតិនារី ៨មីនា កាលពីថ្ងៃទី៧ ខែមីនា ឆ្នាំ២០២៣ លោក ហ៊ុន សែន ព្រមានថា លោកនឹងមានតម្លៃស្មើសត្វតិរច្ឆាន ប្រសិនបើលោកចុះហត្ថលេខាស្នើទៅព្រះមហាក្សត្រដើម្បីលើកលែងទោសឱ្យអតីតមេដឹកនាំបក្សប្រឆាំង លោក សម រង្ស៊ី ដែលកំពុងមានទោសនៅតុលាការពីបទព្រហ្មទណ្ឌសព្វថ្ងៃនេះ។ ជាងនេះទៀត កាលពីថ្ងៃទី៥ ខែតុលា ឆ្នាំ២០១៨ លោក ហ៊ុន សែន ធ្លាប់បានអះអាងថា បើលោកចុះហត្ថលេខាស្នើព្រះមហាក្សត្រលើកលែងទោសឱ្យលោក សម រង្ស៊ី លោកសុខចិត្តកាត់ដៃស្តាំខ្លួនឯងក្រវាត់ចោល។
យ៉ាងណាក៏ដោយ ក្រុមអ្នកសង្កេតការណ៍លើកឡើងថា លោក ហ៊ុន សែន សម្លឹងមើលប្រយោជន៍នយោបាយរបស់គាត់ធំជាងអ្វីៗទាំងអស់ ដូច្នេះគាត់អាចនឹងមិនធ្វើដូចអ្វីដែលគាត់បាននិយាយទេនៅពេលដែលលោក សម រង្ស៊ី អាចផ្តល់ប្រយោជន៍នយោបាយណាមួយដល់គាត់បន្តទៀត ព្រោះថាកន្លងមក មេដឹកនាំនយោបាយទាំងពីរនេះតែងតែឈ្លោះគ្នាស៊ីសាច់ហុតឈាម ហើយពេលត្រូវគ្នាគឺផ្អែមល្ហែមជាងទឹកឃ្មុំទៅទៀត នៅពេលដែលពួកគេទទួលបានផលប្រយោជន៍នយោបាយពីគ្នាទៅវិញទៅមក៕