លោកនាយករដ្ឋមន្ត្រី ហ៊ុន សែន អរគុណទៅដល់ភាគីប្រទេសថៃ គណបក្សកាវក្លៃ ឬ «Move Forward» ដែលបានបញ្ជាក់អំពីគោលជំហរមិនបណ្តេញពលករខ្មែរចេញពីប្រទេសថៃ ប្រសិនបើគណបក្សប្រឆាំងនេះឡើងទៅកាន់អំណាចនៅថ្ងៃមុខ។
ថ្លែងក្នុងពិធីសំណេះសំណាលជាមួយកម្មករកម្មការិនីក្នុងខេត្តកំពង់ឆ្នាំង នៅថ្ងៃទី៨ មិថុនា នេះ លោកនាយករដ្ឋមន្ត្រី ហ៊ុន សែន ថាលោកបានទទួលដំណឹងពីភាគីថៃ មកថា ថៃមិនមានគម្រោងដេញពលករបរទេសចេញទឹកដីនោះទេ។ ការបកស្រាយរបស់ភាគីថៃ នេះ ជាការឆ្លើយតបទៅនឹងព័ត៌មានដែលបានចុះផ្សាយថា គណបក្សឆ្ពោះទៅមុខដែលត្រៀមដឹកនាំរដ្ឋាភិបាលប្រទេសថៃ មានផែនការបណ្ដេញពលករបរទេស។
លោកនាយករដ្ឋមន្ត្រី ហ៊ុន សែន ថ្លែងថា ម្សិលមិញ (ថ្ងៃទី៧ មិថុនា) មានការបញ្ជាក់យ៉ាងជាក់លាក់ថា គឺអត់មានទេ ហើយគេនឹងសម្រួលឱ្យថែមទៀតផង។ បើដូច្នេះ គឺលែងកង្វល់ជាមួយនឹងការចាកចេញរបស់កម្មករកម្មការិនីរបស់ខ្មែរដែលកំពុងធ្វើការក្នុងប្រទេសថៃ។
លោក ហ៊ុន សែន ក៏ជំរុញឱ្យបណ្ដាប្រទេសក្នុងតំបន់អាស៊ានយកចិត្តទុកដាក់ឱ្យកាន់តែខ្លាំងលើពលករ តាមរយៈកិច្ចសហប្រតិបត្តិការលើច្បាប់អន្តោប្រវេសន៍ដែលវាជាកិច្ចព្រមព្រៀងសម្របសម្រួលមួយនៅក្នុងក្របខ័ណ្ឌអាស៊ាន ដើម្បីទទួលការការពារ និងដោះស្រាយបញ្ហាពលករ។
គួររំឭកថា ក្នុងវេទិកាសាធារណៈកាលពីថ្ងៃទី០៣ ខែមិថុនា ឆ្នាំ២០២៣ លោកនាយករដ្ឋមន្ត្រី ហ៊ុន សែន បានប្រតិកម្មបង្ហាញការមិនគាំទ្រចំពោះគោលនយោបាយរបស់គណបក្សប្រឆាំងថៃ គណបក្សកាវក្លៃ ឬ «Move Forward» ដែលចង់បណ្ដេញពលករខ្មែរ និងពលករឡាវ ចេញពីប្រទេសថៃ។
លោក ហ៊ុន សែន ថែមទាំងបានព្រមានគណបក្សប្រឆាំងថៃ ពីគោលនយោបាយនេះ និងដាក់បញ្ជាឱ្យក្រសួងការងារ ក្រសួងស្ថាប័នរបស់កម្ពុជា និងភាគីពាក់ព័ន្ធដទៃទៀត ត្រៀមជើងព្រួលដោះស្រាយបញ្ហាប្រឈមរបស់ពលករខ្មែរនៅប្រទេសថៃ។
ជាការឆ្លើយតប គណបក្សកាវក្លៃ ឬ «Move Forward» នៅថ្ងៃទី៧ ខែមិថុនា ឆ្នាំ២០២៣ បានចេញមកបដិសេធ និងបញ្ជាក់ថា រដ្ឋាភិបាលថៃ ក្រោមការដឹកនាំដោយគណបក្សប្រឆាំងជំនួសលោក ប្រាយុទ្ធ ចាន់អូចា នឹងមិនផ្លាស់ប្ដូរគោលនយោបាយបញ្ជូនពលករចំណាកស្រុកចេញពីប្រទេសថៃឡើយ។ ផ្ទុយទៅវិញ គណបក្សកាវក្លៃ មានបំណងបង្កើតគោលនយោបាយសម្រួលដល់បរិយាកាសការងារពលករចំណាកស្រុកឱ្យកាន់តែមានភាពងាយស្រួលជាងមុន ផ្តល់ការការពារសមរម្យ និងធានាថា ពលករចំណាកស្រុកគ្រប់ជាតិសាសន៍នៅប្រទេសថៃ មិនទទួលរងការបង្ខិតបង្ខំ ឬកេងប្រវ័ញ្ចផ្សេងៗទៀត។
គួរបញ្ជាក់ផងដែរថា បច្ចុប្បន្ននេះមានពលករខ្មែរប្រមាណ ១,២លាននាក់កំពុងបម្រើការងារនៅប្រទេសថៃ ដែលជាចំនួនដ៏ច្រើនលើសលប់ក្នុងចំណោមពលករនៅក្រៅប្រទេសសរុបប្រមាណ ១,៣លាននាក់៕