36 C
Phnom Penh

ព្រះមហាក្សត្រ​តែងតាំង​លោក ស ឡុងដេត ជា​ទីប្រឹក្សា​រដ្ឋាភិបាល​បន្ទាប់ពី​ចុះចូល​បក្ស​កាន់​អំណាច

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​បក្ស​ភ្លើង​ទៀន លោក ស ឡុងដេត ដែល​បាន​រិះគន់​រដ្ឋាភិបាល​ឯក​បក្ស​នៅ​កម្ពុជា និង​រង​នូវ​ការ​គំរាមកំហែង​ពី​លោក ហ៊ុន សែន រួម​ទាំង​មាន​បណ្តឹង​ជាប់​ខ្លួន​ផង​នោះ ពេល​នេះ​លោក​ត្រូវ​បាន​ព្រះមហាក្សត្រ​តែងតាំង​ជា​ទីប្រឹក្សា​រាជរដ្ឋាភិបាល បន្ទាប់ពី​លោក​បាន​ប្រកាស​ផ្តាច់​ខ្លួន​ពី​លោក សម រង្ស៊ី និង​ព្រម​ចុះចូល​ជាមួយ​បក្ស​កាន់​អំណាច។

ព្រះមហាក្សត្រ​ខ្មែរ​សម្តេច​ព្រះករុណា ព្រះបាទ​នរោត្តម សីហមុនី បាន​ចេញ​ព្រះរាជក្រឹត្យ​ត្រាស់​បង្គាប់​តែងតាំង​អតីត​មន្ត្រី​ជាន់ខ្ពស់​បក្ស​ភ្លើង​ទៀន ២​រូប គឺ​លោក ស ឡុងដេត និង​លោក ឡូញ តេត្រា ជា​ទីប្រឹក្សា​រាជរដ្ឋាភិបាល​មាន​ឋានៈ​ស្មើ​អនុរដ្ឋលេខាធិការ បន្ទាប់ពី​ពួកគេ​ប្រកាស​ផ្តាច់​ខ្លួន​ពី​លោក សម រង្ស៊ី និង​ប្រកាស​ចុះចូល​ជាមួយ​គណបក្ស​ប្រជាជន​កម្ពុជា​របស់​លោក ហ៊ុន សែន កាលពី​ពេល​ថ្មីៗ​នេះ។

ការ​តែងតាំង​អតីត​មន្ត្រី​ជាន់ខ្ពស់​របស់​បក្ស​ភ្លើង​ទៀន​នេះ គឺជា​លើក​ទី​ពីរ​ហើយ​ស្រប​ពេល​ដែល​មន្ត្រី និង​សកម្មជន​បក្ស​នេះ​កំពុង​រង​នូវ​ការ​ធ្វើ​ទុក្ខបុកម្នេញ​ពី​មេដឹកនាំ​បក្ស​កាន់​អំណាច​លោក ហ៊ុន សែន ជា​បន្តបន្ទាប់​នៅ​ពេលនេះ។

កាលពី​ថ្ងៃទី​១៣ ខែ​មិថុនា ឆ្នាំ​២០២៣ លោក ស ឡុងដេត បាន​ចេញ​វីដេអូ​សុំទោស​លោក ហ៊ុន សែន ព្រមទាំង​សុំ​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា​ថែម​ទៀត។ លើស​ពី​នេះ លោក​ក៏​បាន​ប្រកាស​ផ្តាច់​ខ្លួន​ពី​អតីត​មេដឹកនាំ​បក្ស​ប្រឆាំង​លោក សម រង្ស៊ី ផង​ដែរ បន្ទាប់ពី​រង​នូវ​ការ​គំរាមកំហែង​ពី​លោក ហ៊ុន សែន តាមរយៈ​នៃ​ការ​ប្រើប្រាស់​ប្រព័ន្ធ​តុលាការ​ដើម្បី​ចោទ​ប្តឹង​រូបលោក​ពី​បទ «បង្ក​ចលាចល និង​ពី​បទ ញុះញង់​ឲ្យ​មាន​ការ​ប្រព្រឹត្ត​បទឧក្រិដ្ឋ​ជាអាទិ៍»។

ការ​គំរាមកំហែង​នេះ ធ្វើឡើង​បន្ទាប់ពី​លោក ស ឡុងដេត បាន​ដឹកនាំ​កិច្ចប្រជុំ​មួយ​កាលពី​ថ្ងៃទី​៩ ខែ​មិថុនា ឆ្នាំ​២០២៣ ជាមួយ​ក្រុមប្រឹក្សា​ឃុំ-សង្កាត់​ជាប់​ឆ្នោត​របស់​គណបក្ស​ភ្លើង​ទៀន ដោយ​ប្រកាស​ឱ្យ​អ្នក​ទាំងនោះ​រក្សា​ជំហរ​របស់​ខ្លួន​ឲ្យ​បាន​រឹងមាំ ក្នុង​នោះ​មន្ត្រី​ជាន់ខ្ពស់​គណបក្ស​ភ្លើង​ទៀន​រូប​នេះ​ក៏​បាន​រិះគន់​ពី​ការ​រៀបចំ​ព្រឹត្តិការណ៍​ស៊ីហ្គេម​ដែល​កម្ពុជា​ធ្វើ​ជា​ម្ចាស់​ផ្ទះ​ផង​ដែរ។

ជុំវិញ​ការ​គំរាមកំហែង​មន្ត្រី​ជាន់ខ្ពស់​បក្ស​ភ្លើង​ទៀន មិនមែន​មាន​តែ​លោក ស ឡុងដេត ទេ គឺ​មាន​មន្ត្រី​ជាន់ខ្ពស់​ជាច្រើន​នាក់​ទៀត​ដែល​បាន​រង​នូវ​ការ​គំរាមកំហែង​បែប​នេះ ដោយ​អ្នក​ខ្លះ​កំពុង​រង​នូវ​ការ​ចោទ​ប្តឹង​តាម​ផ្លូវ​តុលាការ និង​អ្នក​ខ្លះ​កំពុង​រង​នូវ​ការ​ឃុំ​ខ្លួន​ក្នុង​ពន្ធនាគារ ដូចជា​លោក គង់ គាំ លោក សុន ឆ័យ លោក ថាច់ សេដ្ឋា និង​លោក ទាវ វណ្ណុល ជាដើម ប៉ុន្តែ​ទោះជា​រង​នូវ​ការ​គំរាមកំហែង​ដោយ​ការ​ចោទ​ប្តឹង ដោយ​ការ​រឹបអូស​យក​ទ្រព្យសម្បត្តិ និង​ការ​ចាប់​ដាក់​គុក​យ៉ាងណា​ក៏ដោយ ក៏​មិនទាន់​មាន​នរណា​ម្នាក់​ប្រកាស​ចុះចូល​ជាមួយ​គណបក្ស​ប្រជាជន​កម្ពុជា​នៅឡើយ​ទេ។

ជាក់ស្តែង អនុប្រធាន​គណបក្ស​ភ្លើង​ទៀន លោក ថាច់ សេដ្ឋា កំពុង​ជាប់​ពន្ធនាគារ​នៅ​មន្ទីរ​ឃុំឃាំង​ព្រៃស ចំណែក​លោក សុន ឆ័យ កំពុង​រង​នូវ​បណ្តឹង និង​ត្រូវ​បាន​តុលាការ​រឹបអូស​ទ្រព្យសម្បត្តិ ចំណែក​លោក គង់ គាំ ត្រូវ​លោក ហ៊ុន សែន រឹបអូស​យក​ផ្ទះ​ផង​ដែរ។

យ៉ាងណា​ក៏ដោយ ការ​ចុះចូល​ជាមួយ​គណបក្ស​ប្រជាជន​កម្ពុជា​នៅ​ពេល​នេះ មាន​ប្រភព​ខ្លះ​ទម្លាយ​ថា ក្រៅពី​អ្នក​ចង់​បាន​តំណែង​តួនាទី ក៏​មាន​អ្នក​ដែល​ត្រូវ​បក្ស​កាន់​អំណាច​គំរាមកំហែង​ឱ្យ​ចុះចូល​ដែរ។ ជាក់ស្តែង ដូចជា​លោក កែត ឃី មន្ត្រី​ជាន់ខ្ពស់​បក្ស​ភ្លើង​ទៀន ដែល​បាន​ប្រកាស​ចុះចូល​កាលពី​ថ្មីៗ​នេះ ជាដើម។

អ្នក​ស្រាវជ្រាវ​ការ​អភិវឌ្ឍ​សង្គម បណ្ឌិត មាស នី ត្អូញត្អែរ​កាលពី​ពេល​ថ្មីៗ​នេះ​ថា ការ​គំរាមកំហែង​ក្នុង​សមរភូមិ​នយោបាយ​កម្ពុជា​តែងតែ​កើតមាន​គ្រប់​អាណត្តិ​រាល់​ពេល​ដែល​ការ​បោះឆ្នោត​មក​ដល់​ម្តងៗ ហើយ​ការ​គំរាមកំហែង​នេះ​តែងតែ​កើតឡើង​នៅ​មុន​ពេល​បោះឆ្នោត​បន្ត​រហូត​ដល់​ការ​បោះឆ្នោត​ត្រូវ​បាន​បញ្ចប់៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស