លោក ហ៊ុន សែន ព្រមានបិទអង្គការអន្តរជាតិនៅកម្ពុជា បើពួកគេហ៊ានជួយជនជាតិម៉ុងតាញ៉ា ដែលរត់ ឬកំពុងភៀសខ្លួននៅកម្ពុជា ដោយលោកចោទថា ក្រុមជនជាតិម៉ុងតាញ៉ា នេះជាអ្នកបាញ់សម្លាប់អាជ្ញាធរ និងមន្ត្រីនៅក្នុងប្រទេសវៀតណាម កាលពីពេលថ្មីៗនេះ។
ការគំរាមបិទអង្គការអន្តរជាតិនេះ ធ្វើឡើងក្នុងពិធីសំណេះសំណាលជាមួយកម្មកររោងចក្រនាភូមិរវៀង ឃុំខ្នុរដំបង ស្រុកជើងព្រៃ ខេត្តកំពង់ចាម នៅព្រឹកថ្ងៃទី១៦ ខែមិថុនា។
បុរសខ្លាំងក្រាញអំណាចនៅកម្ពុជា ក៏បានបញ្ជាទៅកងកម្លាំងប្រដាប់អាវុធជាកងទ័ពក្តី ជានគរបាលក្តី នៅទិសភូមិភាគទី១ និងនៅខេត្តរតនគិរី មណ្ឌលគិរី រួមទាំងខេត្តក្រចេះ ឲ្យបង្កើនការយកចិត្តទុកដាក់ដោយសហការជាមួយនឹងភាគីវៀតណាម ទប់ស្កាត់ការឆ្លងដែនខុសច្បាប់ ដើម្បីកុំឲ្យក្រុមឧទ្ទាម (ជនជាតិម៉ុងតាញ៉ា) មកសម្ងំលាក់ខ្លួននៅកម្ពុជា។
លោកថា បើទោះបីបច្ចុប្បន្នជនជាតិម៉ុងតាញ៉ា បានចាកចេញពីកម្ពុជាអស់ហើយក៏ដោយ ប៉ុន្តែប្រសិនបើមានអ្នកចូលមកថ្មីទៀត លោកបញ្ជាឲ្យសមត្ថកិច្ចចាប់ខ្លួន និងបញ្ជូនជនជាតិម៉ុងតាញ៉ាទាំងនោះទៅឲ្យវៀតណាមវិញភ្លាម ដោយមិនឲ្យពួកគេស្នាក់នៅលើទឹកដីកម្ពុជាឡើយ។
លោក ហ៊ុន សែន បានព្រមានរំលាយអង្គការអន្តរជាតិទាំងឡាយដែលធ្វើសកម្មភាពនៅកម្ពុជាជួយជនជាតិម៉ុងតាញ៉ា ដោយលោកចាត់ទុកការជួយជនជាតិម៉ុងតាញ៉ា ថាជាការប្រព្រឹត្តបទឧក្រិដ្ឋលើប្រជាជាតិវៀតណាម។
ប្រធានវេទិកាពលរដ្ឋ និងជាអ្នកវិភាគនយោបាយសង្គម លោក គឹម សុខ ចាត់ទុកការចោទរបស់លោក ហ៊ុន សែន លើជនជាតិម៉ុងតាញ៉ា ក្នុងការបាញ់សម្លាប់មន្ត្រីវៀតណាមនោះ ថាជារឿងពិបាកជឿខ្លាំងណាស់ ពីព្រោះក្រុមជនជាតិម៉ុងតាញ៉ាដែលរស់នៅក្រោមការគំរាមកំហែងរាល់ថ្ងៃរបស់អាជ្ញាធរវៀតណាម ហើយពួកកុម្មុយនីស្តនេះចូលចិត្តបំភ័ន្តព័ត៌មានធ្វើជាមធ្យោបាយកម្ចាត់អ្នកណាម្នាក់ ឬក្រុមណាមួយ។
លោកបន្តថា ករណីលោក ហ៊ុន សែន ព្រមានអង្គការអន្តរជាតិមិនឲ្យជួយជនជាតិម៉ុងតាញ៉ានេះ គឺជាការបំពានសិទ្ធិជនជាតិដើមភាគតិចផង និងជាការរំលោភគោលការណ៍សិទ្ធិមនុស្សអន្តរជាតិផង ពីព្រោះសិទ្ធិនេះធានាការពារដោយធម្មនុញ្ញរបស់អង្គការសហប្រជាជាតិ និងមិនអនុញ្ញាតឲ្យរដ្ឋាភិបាលប្រទេសណាមួយកាឡៃព័ត៌មាន ដើម្បីធ្វើទុក្ខបុកម្នេញជនជាតិដើមភាគតិចនោះទេ។
លោក គឹម សុខ ហៅការព្រមានរបស់លោក ហ៊ុន សែន ថាមានគោលដៅជួយទប់ស្កាត់ព័ត៌មានរំលោភសិទ្ធិមនុស្សដ៏ធ្ងន់ធ្ងររបស់រដ្ឋាភិបាលវៀតណាម ហើយដែលអាចរាលដាលដល់គាត់ផងដែរ ពីព្រោះកាលណាយុវជនជនជាតិម៉ុងតាញ៉ាមានឱកាសបានសិទ្ធិសេរីភាពក្រោមការជ្រោមជ្រែងដិតដល់របស់អង្គការអន្តរជាតិ នោះគាត់អាចបកអាក្រាតអំពីឧក្រិដ្ឋកម្មរំលោភសិទ្ធិមនុស្សរបស់វៀតណាម មកលើពួកគេ និងមកលើជនជាតិដើមភាគតិចផ្សេងៗទៀត ព្រមទាំងការបំពានសិទ្ធិខ្មែរកម្ពុជាក្រោមដែលជាម្ចាស់ដើមកំណើតទឹកដីកម្ពុជាក្រោមរបស់ដូនតាខ្មែរ។
ប្រធានវេទិកាពលរដ្ឋរូបនេះថា លោក ហ៊ុន សែន ភ័យខ្លាចថាបើគាត់មិនជួយបិទបាំងការរំលោភសិទ្ធិមនុស្សរបស់វៀតណាមទេ វាអាចធ្វើឲ្យធ្លាយរឿងអាក្រក់ជាច្រើនទៀតនៃបណ្ដាញរំលោភសិទ្ធិមនុស្សរវាងរដ្ឋាភិបាលវៀតណាម និងរដ្ឋាភិបាលលោក ហ៊ុន សែន៕