 ប្រឆាំងនឹងការឃុំខ្លួនតាមទំនើងចិត្ត បានទាមទាររដ្ឋាភិបាលកម្ពុជាឲ្យដោះលែងកញ្ញា សេង ធារី សញ្ជាតិខ្មែរ-អាមេរិកាំងជាបន្ទាន់ និងគ្មានលក្ខខណ្ឌ ដោយចាត់ទុកថាជាការឃុំខ្លួនដោយបំពាន និងផ្ទុយពីច្បាប់អន្តរជាតិ។){kind=link}
ក្រុមការងារអង្គការសហប្រជាជាតិ (UN) ប្រឆាំងនឹងការឃុំខ្លួនតាមទំនើងចិត្ត បានទាមទាររដ្ឋាភិបាលកម្ពុជាឲ្យដោះលែងកញ្ញា សេង ធារី សញ្ជាតិខ្មែរ-អាមេរិកាំងជាបន្ទាន់ និងគ្មានលក្ខខណ្ឌ ដោយចាត់ទុកថាជាការឃុំខ្លួនដោយបំពាន និងផ្ទុយពីច្បាប់អន្តរជាតិ។
សេចក្ដីសម្រេចមួយរបស់ក្រុមការងារអង្គការសហប្រជាជាតិប្រឆាំងនឹងការឃុំខ្លួនតាមទំនើងចិត្តនៅថ្ងៃទី១២ កក្កដា នេះ បានលើកឡើងថា ការឃុំខ្លួនកញ្ញា សេង ធារី ធ្វើឡើងតាមរយៈការរើសអើងនិន្នាការនយោបាយ និងការកាត់ក្ដីទាំងហ្វូង ដូច្នេះកញ្ញា សេង ធារី មិនមានលទ្ធភាពទទួលបានយុត្តិធម៌នោះឡើយ។
ប្រភពដដែលលើកឡើងថា ការឃុំខ្លួនកញ្ញា សេង ធារី ដែលមានសញ្ជាតិខ្មែរ-អាមេរិក គឺជាការឃុំខ្លួនដោយបំពាន និងផ្ទុយពីច្បាប់អន្តរជាតិ ដោយពួកគេទាមទារឲ្យរដ្ឋាភិបាលលោក ហ៊ុន សែន ដោះលែងកញ្ញា សេង ធារី ជាបន្ទាន់ និងគ្មានលក្ខខណ្ឌ។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានប្រាប់សារព័ត៌មានក្នុងស្រុកថា ការទាមទារគឺជាសិទ្ធិ ប៉ុន្តែវាផ្ទុយទៅនឹងច្បាប់កម្ពុជា និងជាការជ្រៀតជ្រែកកិច្ចការផ្ទៃក្នុងរបស់កម្ពុជាផងដែរ។ លោកថា មធ្យោបាយតែមួយគត់ដែលអាចជួយកញ្ញា សេង ធារី បាន គឺត្រូវធ្វើតាមនីតិវិធីរបស់តុលាការ និងស្វែងរកភស្តុតាងដើម្បីដោះបន្ទុកតែប៉ុណ្ណោះ។
លោក ចារិត ហ្គិនស័រ (Jared Genser) មេធាវីសិទ្ធិមនុស្សអន្តរជាតិរបស់កញ្ញា សេង ធារី បានលើកឡើងនៅក្នុងសេចក្ដីថ្លែងការណ៍នេះដែរថា ទោះបីជាដឹងខ្លួនថានឹងអាចប្រឈមទៅនឹងគ្រោះថ្នាក់យ៉ាងណាក្ដី ក៏កញ្ញា សេង ធារី នៅតែតស៊ូមតិដើម្បីទាមទារឲ្យមានការគោរពសិទ្ធិមនុស្ស និងលទ្ធិប្រជាធិបតេយ្យ។ លោកបន្ថែមថា កញ្ញា សេង ធារី គឺជាវីរជនខ្មែរ-អាមេរិកដែលក្លាហានហ៊ានប្រឈមនឹងការឃុំខ្លួន ដើម្បីស្វែងរកយុត្តិធម៌ ហើយនាងសមនឹងទទួលបានការគាំទ្រពីពិភពលោក។
គួរបញ្ជាក់ផងដែរថា ក្នុងពិធីសំណេះសំណាលជាមួយកម្មករក្នុងខេត្តកណ្តាល កាលពីថ្ងៃទី៣ ខែមិថុនា លោក ហ៊ុន សែន បានលើកឡើងថា ជនជាប់ឃុំរូបណាដែលត្រូវបានបរទេសស្នើសុំឲ្យដោះលែង គឺអ្នកជាប់ឃុំនោះនឹងនៅតែបន្តជាប់ឃុំក្នុងពន្ធនាគារ។ លោកអះអាងថា កញ្ញា សេង ធារី ដែលកំពុងជាប់ពន្ធនាគារនៅខេត្តព្រះវិហារ នោះ នឹងមិនត្រូវបានដោះលែង ឬបន្ធូរបន្ថយទោសឡើយ ពីព្រោះមានអន្តរាគមន៍ពីបរទេស។
កាលពីថ្ងៃទី១៤ ខែមិថុនា ឆ្នាំ២០២២ សាលាដំបូងរាជធានីភ្នំពេញបានសម្រេចផ្ដន្ទាទោសកញ្ញា សេង ធារី ដាក់ពន្ធនាគារចំនួន ៦ឆ្នាំ ពីបទរួមគំនិតក្បត់ និងបទញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម ទាក់ទងនឹងផែនការមាតុភូមិនិវត្តន៍មិនជោគជ័យរបស់លោក សម រង្ស៊ី កាលពីចុងឆ្នាំ២០១៩៕