ក្រុមយុវជនបរិស្ថានជាច្រើននាក់ដង្ហែញត្តិតាមដងផ្លូវយកទៅដាក់ជូនខុទ្ទកាល័យលោក ហ៊ុន សែន ដើម្បីសុំឱ្យបុរសខ្លាំងក្រាញអំណាចរូបនេះដកសិទ្ធិអភិវឌ្ឍន៍កោះកុងក្រៅ ពីក្រុមហ៊ុន Koh Kong SEZ របស់ឧកញ៉ា លី យ៉ុងផាត់ ដើម្បីការពារកោះមួយនេះឱ្យស្ថិតនៅគង់វង្សទៅថ្ងៃមុខ។
ក្រុមយុវជនបរិស្ថានប្រមាណជា ២០នាក់ កាលពីថ្ងៃទី១៧ ខែកក្កដា ឆ្នាំ២០២៣ បានដង្ហែញត្តិដោយធ្វើដំណើរពីទីតាំងម្តុំសាកលវិទ្យាល័យភូមិន្ទភ្នំពេញ ទៅកាន់ទីស្ដីការក្រសួងទេសចរណ៍ ក្រសួងបរិស្ថាន និងខុទ្ទកាល័យលោក ហ៊ុន សែន ដើម្បីសុំឱ្យស្ថាប័នពាក់ព័ន្ធទាំងនោះជួយពន្លឿនដាក់កោះកុងក្រៅជាឧទ្យានជាតិសមុទ្រ និងសុំឱ្យលោក ហ៊ុន សែន ទម្លាក់ចោលរាល់បទចោទប្រកាន់ទាំងអស់លើក្រុមយុវជនបរិស្ថាន ដូចជាកញ្ញា ឡុង គន្ធា កញ្ញា ភួន កែវរស្មី លោក ថុន រដ្ឋា កញ្ញា ស៊ុន រដ្ឋា លោក លី ចាន់ដារ៉ាវុត និងលោក យ៉ីម លាងហ៊ី ជាដើម ដែលកំពុងរងនូវការចោទប្រកាន់ជុំវិញសកម្មភាពការពារបរិស្ថានរបស់ពួកគេសព្វថ្ងៃនេះ។
យុវជនដែលពាក់អាវមានឆ្លាក់អក្សរកោះកុងក្រៅដូចៗគ្នា បានកាន់បដាដែលមានសរសេរអក្សរធំៗពណ៌ខៀវលើផ្ទាំងក្រណាត់ពណ៌ស ថា អនាគតឧទ្យានជាតិសមុទ្រកោះកុងក្រៅ និងនាំគ្នាស្រែកស្រុះៗគ្នាតាមរយៈអាឃោសនសព្ទក្នុងអំឡុងពេលដង្ហែញត្តិថា ពួកគេស្រឡាញ់កោះកុងក្រៅ និងសូមដាក់កោះកុងក្រៅជាឧទ្យានជាតិសមុទ្រ ជាដើម។
ការដង្ហែញត្តិនេះ ធ្វើឡើងដើម្បីជំរុញឱ្យស្ថាប័នពាក់ព័ន្ធដាក់កោះកុងក្រៅជាឧទ្យានជាតិសមុទ្រឱ្យបានឆាប់ក្នុងបំណងបញ្ចៀសការផ្តល់សិទ្ធិអភិវឌ្ឍន៍កោះមួយនេះឱ្យទៅក្រុមហ៊ុនឯកជនរបស់ឧកញ៉ា លី យ៉ុងផាត់ ដែលជាមូលហេតុនាំទៅរកការបំផ្លាញធនធានធម្មជាតិទៅថ្ងៃអនាគត។
ជុំវិញការដង្ហែញត្តិនេះ ក្រសួងទេសចរណ៍បានបដិសេធមិនទទួលញត្តិនេះទេ ដោយលើកមូលហេតុថាមិនពាក់ព័ន្ធនឹងក្រសួង ប៉ុន្តែបន្ទាប់ពីក្រុមយុវជនបរិស្ថានរង់ចាំអស់រយៈពេល ៣០នាទី ក្រសួងក៏សម្រេចអនុញ្ញាតឲ្យតំណាងយុវជន ១រូប គឺកញ្ញា ភួន កែវរស្មី ចូលជួបដើម្បីដាក់ញត្តិនោះ ហើយទីស្ដីការក្រសួងទេសចរណ៍ក៏បានបញ្ជាក់ថា ខ្លួននឹងបញ្ជូនញត្តិនេះទៅថ្នាក់លើផងដែរ ចំណែកក្រសួងបរិស្ថាន និងខុទ្ទកាល័យលោក ហ៊ុន សែន មិនទាន់មានការឆ្លើយតបចំពោះញត្តិនេះនៅឡើយទេ។
ទាក់ទិននឹងបញ្ហានេះ កាលពីថ្ងៃទី២៨ ខែវិច្ឆិកា ឆ្នាំ២០២២ ក្រុមសកម្មជនចលនាមាតាធម្មជាតិក៏ធ្លាប់បានចែកលិខិតប័ណ្ណទេសចរណ៍ និងក្រដាសព័ត៌មានដែលរៀបរាប់អំពីតំបន់កោះកុងក្រៅទៅកាន់សាធារណជន ដើម្បីទាមទារឱ្យរដ្ឋាភិបាលអន្តរាគមន៍ដកហូតតំបន់កោះកុងក្រៅមកធ្វើជាសម្បត្តិរដ្ឋវិញ តាមរយៈការដាក់បញ្ចូលតំបន់នេះឱ្យទៅជាឧទ្យានជាតិសមុទ្រផងដែរ ក្រោយពីរដ្ឋាភិបាលបានសម្រេចផ្តល់សិទ្ធិឱ្យក្រុមហ៊ុនឯកជន កោះកុង អេសអ៊ីហ្ស៊ិត ខូអិលធីឌី (KOH KONG SEZ Co., Ltd.) របស់ឧកញ៉ា លី យ៉ុងផាត់ ដែលជាសមាជិកព្រឹទ្ធសភាគណបក្សប្រជាជនកម្ពុជាធ្វើការអភិវឌ្ឍនាពេលកន្លងមក។
កោះកុងក្រៅ ស្ថិតនៅក្នុងភូមិអាវឡាតាន់ ឃុំជ្រោយប្រស់ ស្រុកកោះកុង ខេត្តកោះកុង មានទំហំផ្ទៃដី ១០៣គីឡូម៉ែត្រក្រឡា ទទឹងប្រវែង ៧គីឡូម៉ែត្រ បណ្តោយ ១៩គីឡូម៉ែត្រ ព្រមទាំងមានឆ្នេរ ៦កន្លែង៖
- ឆ្នេរទី១ ប្រវែង ១៨០០ម៉ែត្រ
- ឆ្នេរទី២ ប្រវែង ២០៥០ម៉ែត្រ
- ឆ្នេរទី៣ ប្រវែង ៧០០ម៉ែត្រ
- ឆ្នេរទី៤ ប្រវែង ៩០០ម៉ែត្រ
- ឆ្នេរទី៥ ប្រវែង ៧៥០ម៉ែត្រ
- និងឆ្នេរទី៦ ប្រវែង ៦៥០ម៉ែត្រ ក្រៅពីនេះក៏មានតំបន់ទឹកធ្លាក់ ៩កន្លែង និងកូនភ្នំជាច្រើនដែលមានចម្ងាយត្រឹមតែ ៣០គីឡូម៉ែត្រប៉ុណ្ណោះពីក្រុងខេមរភូមិន្ទ។
ជុំវិញករណីនេះ ក្រុមសង្គមស៊ីវិល និងសហគមន៍មួយចំនួនបានចេញសេចក្ដីថ្លែងការណ៍មួយកាលពីពេលកន្លងទៅ ដោយបង្ហាញពីការព្រួយបារម្ភជាខ្លាំងក្រោយពេលរដ្ឋាភិបាលបានផ្ដល់សិទ្ធិអភិវឌ្ឍន៍កោះកុងក្រៅទាំងមូលទៅឱ្យក្រុមហ៊ុន «កោះកុង អេសអ៊ីហ្ស៊ិត ខូអិលធីឌី (KOH KONG SEZ CO., LTD.)» របស់ឧកញ៉ា លី យ៉ុងផាត់។
រហូតមកដល់ពេលនេះ កោះកុងក្រៅ នៅមិនទាន់មានសេចក្ដីប្រកាសណាមួយ ឬអនុក្រឹត្យណាមួយបញ្ជាក់ថាកោះនេះជាឧទ្យានជាតិសមុទ្រនៅឡើយទេ ប៉ុន្តែត្រូវគេរកឃើញថា កោះដែលធំជាងគេនៅកម្ពុជាមួយនេះ ត្រូវបានរដ្ឋាភិបាលប្រគល់ផ្ដាច់មុខដោយស្ងាត់ៗទៅឱ្យក្រុមហ៊ុនឯកជនរបស់ឧកញ៉ា លី យ៉ុងផាត់ ដើម្បីធ្វើការអភិវឌ្ឍតាំងពីឆ្នាំ២០១៩ មក ដោយមិនបានធ្វើការវាយតម្លៃពីផលប៉ះពាល់បរិស្ថានជាមុន និងប្រកាសប្រាប់សាធារណជននោះឡើយ៕