លោក ហ៊ុន ម៉ាណែត ត្រូវបានព្រះមហាក្សត្រចាត់តាំងជានាយករដ្ឋមន្ត្រីកម្ពុជា ដើម្បីរៀបចំគណៈរដ្ឋមន្ត្រីសម្រាប់រាជរដ្ឋាភិបាលអាណត្តិទី៧ បន្ទាប់ពីលោក ហ៊ុន សែន ដែលជាឪពុកបានទូលថ្វាយស្នើសុំទៅព្រះអង្គ ក្រោយពីលាលែងតំណែងនាយករដ្ឋមន្ត្រីកាលពីពេលថ្មីៗនេះ ដើម្បីផ្ទេរតំណែងទៅឲ្យលោក ហ៊ុន ម៉ាណែត បន្តវេន។
ក្នុងព្រះរាជក្រឹត្យចុះថ្ងៃទី០៧ ខែសីហា ឆ្នាំ២០២៣ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានត្រាស់បង្គាប់ចាត់តាំងលោក ហ៊ុន ម៉ាណែត ជានាយករដ្ឋមន្ត្រីនៃកម្ពុជាដើម្បីរៀបចំគណៈរដ្ឋមន្ត្រីសម្រាប់រាជរដ្ឋាភិបាលអាណត្តិទី៧។
ព្រះរាជក្រឹត្យដដែលបញ្ជាក់ថា លោក ហ៊ុន ម៉ាណែត ដែលជានាយករដ្ឋមន្ត្រីចាត់តាំងមានភារកិច្ចរៀបចំសមាសភាពរាជរដ្ឋាភិបាលកម្ពុជា ដើម្បីសុំសេចក្ដីអនុម័តទុកចិត្តពីរដ្ឋសភា ដែលព្រះរាជក្រឹត្យនេះនឹងចូលជាធរមានចាប់ពីថ្ងៃឡាយព្រះហស្តលេខានេះតទៅ។
លោក ហ៊ុន ម៉ាណែត ត្រូវបានព្រះមហាក្សត្រចាត់តាំងជានាយករដ្ឋមន្ត្រីកម្ពុជានាពេលនេះ ធ្វើឡើងបន្ទាប់ពីលោក ហ៊ុន សែន ដែលជាឪពុក បានប្រកាសលាលែងពីតំណែងនាយករដ្ឋមន្ត្រីកាលពីថ្ងៃទី២៦ ខែកក្កដា ឆ្នាំ២០២៣ ដើម្បីផ្ទេរតំណែងនេះឲ្យកូនប្រុសឡើងកាន់តំណែងជំនួសវិញ។
បុរសខ្លាំងក្រាញអំណាចតពូជនៅកម្ពុជាលោក ហ៊ុន សែន បានសរសេរលើហ្វេសប៊ុកនាថ្ងៃទី៧ សីហា នេះថា លោកសម្រេចចិត្តលះបង់អំណាចបញ្ជារបស់ខ្លួន ដោយផ្ទេរឲ្យកូនប្រុសច្បងរបស់លោក គឺលោក ហ៊ុន ម៉ាណែត ធ្វើជានាយករដ្ឋមន្ត្រីបន្តទៀតនេះ ដើម្បីធានាសេចក្តីសុខសាន្តរបស់ជាតិ។
លោកអះអាងថា ការលះបង់តំណែងនេះទាំងដែលលោកបានកាន់តំណែងជានាយករដ្ឋមន្ត្រីរយៈពេលជាង ៣៨ឆ្នាំ ដែលជាមេដឹកនាំកាន់អំណាចយូរជាងគេលើពិភពលោក និងជាមេដឹកនាំដែលលោក ហ៊ុន សែន ខ្លួនឯងអះអាងថាប្រកបដោយមហាគុណធម៌បំផុតផងដែរ។
លោក ហ៊ុន សែន ថាលោកនឹងក្លាយជាឪពុកនាយករដ្ឋមន្ត្រីវិញម្ដង បន្ទាប់ពីកាន់តំណែងនាយករដ្ឋមន្ត្រីរយៈពេល ១៥ថ្ងៃទៀត។ លោកថា ទោះបីជាលោកផ្ទេរតំណែងនាយករដ្ឋមន្ត្រីឲ្យកូនប្រុសកាន់ជំនួសក៏ដោយ ប៉ុន្តែអំណាចរបស់លោកមិនទាន់ចប់ត្រឹមហ្នឹងនោះទេ ដោយលោកនឹងបន្តការងារក្នុងមុខនាទីផ្សេងទៀតយ៉ាងតិចត្រឹមឆ្នាំ២០៣៣ ដែលពេលនោះលោកនឹងបំពេញការងារជាងកន្លះសតវត្សរ៍។
បុរសខ្លាំងកាន់អំណាចតពូជបញ្ជាក់ថា បើគិតពីការងារក្នុងរដ្ឋាភិបាលចាប់តាំងពីថ្ងៃទី៨ ខែមករា ឆ្នាំ១៩៧៩ ក្នុងមុខតំណែងជារដ្ឋមន្ត្រីការបរទេស ជាឧបនាយករដ្ឋមន្ត្រី ជានាយករដ្ឋមន្ត្រីស្តីទី និងជានាយករដ្ឋមន្ត្រីត្រឹមថ្ងៃទី២២ ខែសីហា ឆ្នាំ២០២៣ នោះលោកបានធ្វើការរយៈពេល ៤៤ឆ្នាំ ៧ខែ ១៤ថ្ងៃ ត្រូវជា ៥៣៥ខែ ២៣២៨សប្តាហ៍ និង ១៦២៩៧ថ្ងៃ។
លោក ហ៊ុន សែន ប្រកាសលាលែងតំណែងនាយករដ្ឋមន្ត្រី ហើយផ្ទេរឲ្យលោក ហ៊ុន ម៉ាណែត បន្តវេនកាលពីថ្ងៃទី២៦ ខែកក្កដា ឆ្នាំ២០២៣ បន្ទាប់ពីកម្ពុជាបញ្ចប់ការបោះឆ្នោតដោយគណបក្សប្រជាជនកម្ពុជាឈ្នះការបោះឆ្នោតដោយមិនមានវត្តមានគណបក្សប្រឆាំងចូលរួមប្រកួតប្រជែង។
អវត្តមានបក្សប្រឆាំងនេះ ដោយសារគណៈកម្មាធិការជាតិរៀបចំការបោះឆ្នោតស្ថិតក្រោមបញ្ជាលោក ហ៊ុន សែន បិទគណបក្សប្រឆាំងមិនឲ្យចូលរួម ដើម្បីត្រួសត្រាយផ្លូវក្នុងការផ្ទេរអំណាចឲ្យលោក ហ៊ុន ម៉ាណែត ឡើងធ្វើនាយករដ្ឋមន្ត្រីបន្តពីលោក ហ៊ុន សែន ដែលបានដឹកនាំប្រទេសកម្ពុជាអស់រយៈពេលជិត ៤០ឆ្នាំមក។
តែយ៉ាងណា ការទទួលបានតំណែងនាយករដ្ឋមន្ត្រីពីឪពុករបស់លោក ហ៊ុន ម៉ាណែត នាពេលនេះ ត្រូវមេដឹកនាំបក្សប្រឆាំង និងអ្នកឃ្លាំមើលសង្គមចាត់ទុកថាជាការដឹកនាំផ្ដាច់ការ និងតពូជដោយគ្រួសារត្រកូលហ៊ុន និងបក្ខពួក ដោយមិនគិតផលប្រយោជន៍ប្រជាពលរដ្ឋ និងប្រទេសជាតិ ខណៈក្រុមមេដឹកនាំ និងមន្ត្រីបក្សកាន់អំណាចនៅតាមក្រសួងស្ថាប័នរដ្ឋ រួមទាំងប្រព័ន្ធឃោសនារបស់លោក ហ៊ុន សែន បាននាំគ្នាចេញសេចក្ដីថ្លែងការណ៍អបអរលោក ហ៊ុន ម៉ាណែត ព្រោងព្រាត។
អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាត បានលើកឡើងថា អាណត្តិមុន របបលោក ហ៊ុន សែន ចំណែកអាណត្តិនេះ គឺរបបលោក ហ៊ុន ម៉ាណែត។ លោកហៅរដ្ឋាភិបាលថ្មីដែលមិនកើតចេញពីការបោះឆ្នោតដោយសេរី និងយុត្តិធម៌កាលពីថ្ងៃទី២៣ ខែកក្កដា ឆ្នាំ២០២៣ កន្លងទៅថាជា «របប»។
អតីតតំណាងរាស្ត្របក្សប្រឆាំងរូបនេះថា លោក ហ៊ុន សែន ជាឪពុកជួយកូនប្រុសរបស់លោក គឺលោក ហ៊ុន ម៉ាណែត ទៅរៀននៅសាលាបណ្ឌិតសភាយោធា West Point សហរដ្ឋអាមេរិក ដោយមិនមានការប្រឡងចូលនោះដូចអ្នកដទៃឡើយ។ ចំណែកការឡើងធ្វើជានាយករដ្ឋមន្ត្រីនាពេលនេះ ក៏មិនមែនឡើងតាមសមត្ថភាពខ្លួនឯងនោះទេ តែឡើងទៅតាមជើងខោឪពុករបស់ខ្លួន។ ដូច្នេះលោក ហ៊ុន ម៉ាណែត ទទួលបានការចាត់តាំងនាយករដ្ឋមន្ត្រីនាពេលនេះខុសច្បាប់ បន្ទាប់ពីលោក ហ៊ុន សែន ជាឪពុក បានប្លន់អំណាចតាមរយៈការបោះឆ្នោតក្លែងក្លាយកាលពីខែកក្កដា កន្លងទៅ។
ចំណែកប្រធានវេទិកាពលរដ្ឋ និងជាអ្នកវិភាគនយោបាយ លោក គឹម សុខ លើកឡើងថា លោក ហ៊ុន ម៉ាណែត ឡើងកាន់តំណែងនាយករដ្ឋមន្ត្រីខុសច្បាប់នៃរដ្ឋាភិបាលខុសច្បាប់ ហើយរដ្ឋសភាក៏ខុសច្បាប់ដែរ ដោយសារតែកើតចេញពីការបោះឆ្នោតកាលពីថ្ងៃទី២៣ ខែកក្កដា ធ្វើឡើងដោយខុសច្បាប់។ ដូច្នេះ លោកថាតំណែងនាយករដ្ឋមន្ត្រីនេះជាតំណែងដែលនាំមកនូវភាពក្ដៅក្រហាយដល់ជាតិ ដែលកើតពីផែនការឧក្រិដ្ឋនយោបាយរបស់លោក ហ៊ុន សែន ជាឪពុក ក្នុងគន្លងរដ្ឋប្រហារអចិន្ត្រៃយ៍នៃរបបដឹកនាំសង្គមបែបភេរវកម្មរដ្ឋ គឺការប្រើឈ្មោះរដ្ឋ ធ្វើបាប គំរាមកំហែង បន្លាចពលរដ្ឋ និងបំផ្លាញពលរដ្ឋគ្រប់កាលៈទេសៈ។
យ៉ាងណា តំណែងនាយករដ្ឋមន្ត្រីរបស់លោក ហ៊ុន ម៉ាណែត នេះ លោក គឹម សុខ ថាអាចនឹងក្លាយជាមរតកចុងក្រោយនៃអំណាចគ្រួសារហ៊ុន គឺមានន័យថា អំណាចគ្រួសារហ៊ុននឹងត្រូវចប់ ឬដួលរលំត្រឹមលោក ហ៊ុន ម៉ាណែត។ មួយវិញទៀត វានឹងដល់ទីបញ្ចប់ត្រឹមពេលលោក ហ៊ុន សែន ធ្វើការលែងកើត ពីព្រោះវាជារបៀបឡើងកាន់តំណែងដែលដុតកម្ដៅផ្ទៃក្នុងជាតិ និងអន្តរជាតិសេរីប្រជាធិបតេយ្យ ដែលបុគ្គលគ្មានសមត្ថភាព និងគ្មានឆន្ទៈជាតិដូចលោក ហ៊ុន ម៉ាណែត មិនអាចទប់សភាពការណ៍វិបត្តិបន្តឡើយ។
លោក គឹម សុខ ថាការឡើងធ្វើនាយករដ្ឋមន្ត្រីរបស់លោក ហ៊ុន ម៉ាណែត ជាការឡើងទៅទទួលថ្មបាក់ជំនួសឪពុកប៉ុណ្ណោះ ដែលជាទម្ងន់ថ្មនៃវិបត្តិឧក្រិដ្ឋកម្ម និងគំនរទណ្ឌកម្មរបស់អន្តរជាតិប្រជាធិបតេយ្យដែលនឹងចៀសមិនផុតនោះទេ៕