29 C
Phnom Penh

ពលរដ្ឋ​បន្ត​ប្ដឹង​ក្រុមហ៊ុន​ពិភព​ដី​មាស​របស់​អ្នកឧកញ៉ា ហ៊ី គឹមហុង បន្ទាប់​ពី​ពួកគេ​ខាតបង់​ជាង​២១​លាន​ដុល្លារ

ដោយ ឌឹ ខេមបូឌា ដេលី

បទវិភាគ

សមត្ថកិច្ច​ខេត្ត​កំពត អះអាង​ថា ពលរដ្ឋ​ជាច្រើន​គ្រួសារ​បាន​បន្ត​ដាក់​បណ្ដឹង​មក​សមត្ថកិច្ច ដោយ​ប្ដឹង​ក្រុមហ៊ុន ពិភព​ដី​មាស របស់​អ្នកឧកញ៉ា ហ៊ី គឹមហុង ដែល​ធ្វើ​ឲ្យ​ពួកគេ​ខាតបង់​ទឹកប្រាក់​ជាង ២១​លាន​ដុល្លារ ខណៈ​តុលាការ​កំពុង​សាកសួរ​អ្នកឧកញ៉ា​រូប​នេះ។

បើ​តាម​ស្នងការដ្ឋាន​នគរបាល​ខេត្ត​កំពត បាន​សរសេរ​នៅ​លើ​ហ្វេសប៊ុក​របស់​ខ្លួន​នៅ​ថ្ងៃទី​១០ ខែ​សីហា នេះ​ថា គិត​ត្រឹម​ថ្ងៃទី​០៩ ខែ​សីហា នេះ សមត្ថកិច្ច​បាន​ទទួល​ពាក្យបណ្ដឹង​របស់​ពលរដ្ឋ​ដែល​បាន​ប្ដឹង​ក្រុមហ៊ុន ពិភព​ដី​មាស របស់​អ្នកឧកញ៉ា ហ៊ី គឹមហុង ជាង ១​ពាន់ (១១០៥) បណ្ដឹង​ទៅ​ហើយ។

ប្រភព​ដដែល​បញ្ជាក់​ថា បណ្ដឹង​ទាំង​ជាង ១​ពាន់​នេះ​គិត​ជា​ទឹកប្រាក់​ដែល​ក្រុម​ពលរដ្ឋ​អះអាង​នោះ​ថា​មាន​ចំនួន​ជាង ២១​លាន​ដុល្លារ​អាមេរិក (២១០៧៨៩៦០​ដុល្លារ)។

ពលរដ្ឋ​រងគ្រោះ​បន្ត​ដាក់​បណ្ដឹង​ទៅ​ស្នងការដ្ឋាន​នគរបាល​ខេត្ត​កំពត នេះ ស្រប​ពេល​តុលាការ​កំពុង​សាកសួរ​អ្នកឧកញ៉ា ហ៊ី គឹមហុង និង​ក្រុម​អង្គរក្ស​ចំនួន ១៣​នាក់​ទៀត ករណី​ឆបោក​ពលរដ្ឋ​រាប់​រយ​គ្រួសារ​នៅ​ខេត្ត​កំពត ដោយ​គិត​ជា​ទឹកប្រាក់​មាន​ចំនួន​រាប់​លាន​ដុល្លារ​អាមេរិក​ក្នុង​គម្រោង​អចលនទ្រព្យ។

អ្នកឧកញ៉ា ហ៊ី គឹមហុង និង​អង្គរក្ស​ត្រូវ​បាន​ប៉ូលិស​រាជធានី​ភ្នំពេញ​ចាប់​ខ្លួន​កាលពី​ថ្ងៃទី​០៨ ខែ​សីហា នេះ​ពាក់ព័ន្ធ​នឹង​ករណី​ឆបោក​ពលរដ្ឋ​នៅ​ខេត្ត​កំពត ជាង ៧០០​គ្រួសារ ដែល​ពលរដ្ឋ​បាន​វិនិយោគ​ប្រាក់​រាប់​លាន​ដុល្លារ​ក្នុង​គម្រោង​អចលនទ្រព្យ​ជាមួយ​ក្រុមហ៊ុន​នេះ។

បើ​តាម​អ្នក​នាំពាក្យ​នគរបាល​រាជធានី​ភ្នំពេញ លោក សាន សុខសីហា បាន​ប្រាប់​សារព័ត៌មាន​ក្នុង​ស្រុក​ថា ប៉ូលិស​ចាប់​ខ្លួន​អង្គរក្ស​ទាំង ១៣​នាក់​របស់​អ្នកឧកញ៉ា​ទៅ​ជាមួយ​ដែរ ដោយសារតែ​ពួកគេ​បាន​រារាំង​ដីកា​ចាប់​ខ្លួន​របស់​តុលាការ និង​ប៉ុនប៉ង​ប្រើ​អំពើ​ហិង្សា​លើ​មន្ត្រី​អនុវត្ត​ច្បាប់។

លោក ហ៊ី គឹមហុង ត្រូវ​បាន​ព្រះករុណា​ព្រះបាទ​សម្ដេចព្រះ បរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា​បាន​ចេញ​ព្រះរាជក្រឹត្យ​ផ្ដល់​គោរមងារ​ជា «អ្នកឧកញ៉ា» កាលពី​ថ្ងៃទី​២១ ខែ​តុលា ឆ្នាំ​២០២២។ ការ​ត្រាស់​បង្គាប់​ផ្ដល់​គោរមងារ​នេះ បន្ទាប់ពី​លោក ហ៊ុន សែន ទូល​ថ្វាយ​ដើម្បី​ស្នើសុំ​ពី​ព្រះអង្គ។

តែ​យ៉ាងណា ករណី​អ្នកឧកញ៉ា និង​ឧកញ៉ា​រំលោភ​កិច្ចសន្យា មិនមែន​មាន​តែ​អ្នកឧកញ៉ា ហ៊ី គឹមហុង នោះ​ទេ ក្នុង​នោះ​ក៏​មាន​ឧកញ៉ា ឡេង ណាវ៉ាត់ត្រា ដែរ ប៉ុន្តែ​រហូត​មក​ទល់​ពេលនេះ សមត្ថកិច្ច​កម្ពុជា​នៅ​មិន​ទាន់​ហ៊ាន​ចាត់​វិធានការ​ច្បាប់​លើ​ឧកញ៉ា​រូប​នេះ​នៅឡើយ​ទេ បើ​ទោះបី​ពលរដ្ឋ​បាន​នាំគ្នា​តវ៉ា និង​ប្ដឹង​រូបលោក​ពី​បទ​រកស៊ី​លក់​ផ្ទះល្វែង​ខ្យល់ និង​ការ​បោកប្រាស់​ទំនុកចិត្ត​របស់​ពលរដ្ឋ​រាប់​ពាន់​រាប់​ម៉ឺន​នាក់​បែប​ណា​ក៏ដោយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស