36 C
Phnom Penh

មន្ត្រី​បក្ស​កាន់​អំណាច​ម្នាក់​ទម្លាយ​ថា​បក្ស​ភ្លើង​ទៀន​នឹង​ត្រូវ​រំលាយ​ពី​ឆាក​នយោបាយ​ដ៏​ខ្លី​ខាង​មុខ​នេះ

ដោយ ឌឹ ខេមបូឌា ដេលី

បទវិភាគ

គណបក្ស​ភ្លើង​ទៀន នឹង​ត្រូវ​រំលាយ​ចោល​ពី​ឆាក​នយោបាយ​នៅ​កម្ពុជា​នា​ពេល​ដ៏​ខ្លី​ខាងមុខ​នេះ ដើម្បី​កម្ទេច​កេរដំណែល​របស់​អតីត​មេដឹកនាំ​បក្ស​ប្រឆាំង​លោក សម រង្ស៊ី តាម​ការ​បញ្ជា​របស់​លោក ហ៊ុន សែន។

មន្ត្រី​ជាន់ខ្ពស់​នៃ​គណបក្ស​ប្រជាជន​កម្ពុជា​មួយ​រូប បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​ដើម្បី​សុវត្ថិភាព​ផ្ទាល់ខ្លួន​នៅ​ថ្ងៃទី​១៥ សីហា នេះ​ថា មេដឹកនាំ​បក្ស​កាន់​អំណាច​លោក ហ៊ុន សែន កំពុង​ពិនិត្យ​លើ​នីតិវិធី​ដើម្បី​ឈាន​ទៅ​រក​ការ​រំលាយ​គណបក្ស​ភ្លើង​ទៀន​ជា​ផ្លូវការ​ក្នុង​ពេល​ឆាប់ៗ​ខាងមុខ​នេះ​ហើយ។

ការ​រំលាយ​បក្ស​ប្រឆាំង​មួយ​នេះ ដោយសារ​លោក ហ៊ុន សែន មិន​ចង់​ឱ្យ​មាន​គណបក្ស​ដែល​ជា​មរតក​របស់​លោក សម រង្ស៊ី នៅ​សេសសល់ និង​ដើម្បី​ផ្តាច់​ឫសគល់​ក្រុម​ប្រឆាំង​ឱ្យ​អស់​ពី​កម្ពុជា ក្នុង​ចេតនា​ធានា​នូវ​អំណាច​កូនប្រុស​របស់​គាត់​ដែល​នឹង​ឡើង​កាន់​តំណែង​ជា​នាយករដ្ឋមន្ត្រី​នា​ពេល​ដ៏​ខ្លី​ខាងមុខ​នេះ។

មន្ត្រី​រូប​នោះ​អះអាង​ថា នៅ​មុន​ការ​បោះឆ្នោត រដ្ឋមន្ត្រី​ក្រសួង​មហាផ្ទៃ​លោក ស ខេង បាន​អនុញ្ញាត​ឱ្យ​គណបក្ស​ភ្លើង​ទៀន​ចូលរួម​ការ​បោះឆ្នោត​ដែរ ប៉ុន្តែ​ត្រូវ​លោក ហ៊ុន សែន គំរាម និង​ព្រមាន​ធ្ងន់ៗ​រហូត​លោក ស ខេង មិន​អាច​ជួយ​ឱ្យ​គណបក្ស​ភ្លើង​ទៀន​ចូលរួម​ក្នុង​យុទ្ធនាការ​បោះឆ្នោត​ជាតិ​ឆ្នាំ​២០២៣ នេះ​បាន។

មន្ត្រី​ជាន់ខ្ពស់​គណបក្ស​ប្រជាជន​កម្ពុជា​រូប​នោះ​បញ្ជាក់​ថា បន្ទាប់ពី​គណបក្ស​ភ្លើង​ទៀន​អវត្តមាន​ក្នុង​ការ​បោះឆ្នោត លោក ហ៊ុន សែន កំពុង​រៀបចំ​បង្កើត​សេណារីយ៉ូ​ឱ្យ​មាន​គណបក្ស​នយោបាយ​តូចៗ ដើម្បី​ជួយ​លំអ​បក្ស​កាន់​អំណាច​ក្នុង​ផែនការ​ជំនួស​គណបក្ស​ភ្លើង​ទៀន ដែល​គេ​ត្រៀម​នឹង​រំលាយ​នោះ ព្រោះ​ថា​លោក ហ៊ុន សែន មិន​ចង់​ឱ្យ​គណបក្ស​ណា​មួយ​ដែល​ជា​មរតក​របស់​លោក សម រង្ស៊ី អាច​មាន​ឥទ្ធិពល​ក្នុង​ការ​រៀបចំ​យុទ្ធសាស្ត្រ​នយោបាយ​ឱ្យ​លោក សម រង្ស៊ី នោះ​ឡើយ។

អ្នក​ស្រាវជ្រាវ​អំពី​ការ​អភិវឌ្ឍ​សង្គម លោក សេង សារី បាន​ប្រាប់​សារព័ត៌មាន​ក្នុង​ស្រុក​ថា យុទ្ធសាស្ត្រ​របស់​លោក ហ៊ុន សែន មិន​ត្រឹម​តែ​មាន​ចេតនា​ដាក់​លោក សម រង្ស៊ី ឱ្យ​នៅ​ឯកា ហើយ​បញ្ចប់​ជីវិត​នយោបាយ​របស់​លោក សម រង្ស៊ី ប៉ុណ្ណោះ​ទេ ប៉ុន្តែ​ថែម​ទាំង​មាន​ចេតនា​ក្នុង​ការ​កម្ទេច​ឫសគល់​គណបក្ស​សង្គ្រោះ​ជាតិ អ្នកគាំទ្រ​គណបក្ស និង​គណបក្ស​ដែល​មាន​និន្នាការ​ប្រជាធិបតេយ្យ​ថែម​ទៀត។

ជាង​នេះ​ទៅ​ទៀត មន្ត្រី​ជាន់ខ្ពស់​គណបក្ស​ភ្លើង​ទៀន​មួយ​រូប​បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​ថា បើ​លោក ហ៊ុន សែន រំលាយ​គណបក្ស​ភ្លើង​ទៀន គឺ​រំលាយ​បាន​តែ​នៅ​លើ​ក្រដាស​ប៉ុណ្ណោះ ប៉ុន្តែ​លោក ហ៊ុន សែន មិន​អាច​រំលាយ​បេះដូង​ពលរដ្ឋ​ដែល​ស្រឡាញ់​គណបក្ស​ភ្លើង​ទៀន និង​ស្រឡាញ់​លោក សម រង្ស៊ី បាន​ឡើយ។ ជាង​នេះ​ទៀត ការ​រំលាយ​នេះ គឺ​រឹតតែ​ធ្វើ​ឱ្យ​ពលរដ្ឋ​ឃើញ​ពី​អំពើ​អាក្រក់​របស់​លោក ហ៊ុន សែន កាន់តែ​ខ្លាំង​ប៉ុណ្ណោះ។

យ៉ាងណា​ក៏ដោយ បុរស​ខ្លាំង​ក្តាប់​អំណាច​ផ្ដាច់មុខ​នៅ​កម្ពុជា​លោក ហ៊ុន សែន ធ្លាប់​បាន​ព្រមាន​គណបក្ស​ភ្លើង​ទៀន ក្នុង​ពិធី​សម្ពោធ​ផ្លូវ​ក្រវាត់​ក្រុង​ទី​៣ កាលពី​ថ្ងៃទី​៣ ខែ​សីហា ឆ្នាំ​២០២៣ ថា គណបក្ស​ភ្លើង​ទៀន​នឹង​រង​នូវ​ការ​រំលាយ ដើម្បី​ផ្តាច់​ឫសគល់​ក្រុម​ជ្រុល​និយម​ឱ្យ​អស់​ពី​កម្ពុជា បន្ទាប់ពី​លោក​រក​ឃើញ​ថា បក្ស​នេះ​មាន​ជាប់​ពាក់ព័ន្ធ​នឹង​យុទ្ធនាការ​បំផ្លាញ​ការ​បោះឆ្នោត​របស់​អតីត​មេដឹកនាំ​បក្ស​ប្រឆាំង​លោក សម រង្ស៊ី តាមរយៈ​ក្រុម​មួយ​ក្នុង​ប្រព័ន្ធ​ទំនាក់ទំនង​តេឡេក្រាម​ឈ្មោះ​ថា «សប្បាយ» កាលពី​ចុង​ខែ​កក្កដា កន្លងទៅ​នេះ។

លោក ហ៊ុន សែន គំរាម​ថា បើ​លោក សម រង្ស៊ី ព្រមាន​ថា​ហ៊ាន​លើក​កាំបិត​កាប់​លោក​ទៅ​ហើយ​នោះ លោក​ក៏​មិន​ញញើត​លើក​កាំបិត​កាប់​អ្នកគាំទ្រ​របស់​លោក សម រង្ស៊ី វិញ​ដែរ ព្រោះ​ថា​ភស្តុតាង​មាន​គ្រប់គ្រាន់​ហើយ។

គណបក្ស​ភ្លើង​ទៀន តែង​បញ្ជាក់​ថា ខ្លួន​មិន​បាន​ជាប់​ពាក់ព័ន្ធ និង​មិន​ទទួល​ខុសត្រូវ​ចំពោះ​ទង្វើ​របស់​បុគ្គល​ទាំងឡាយ​ណា​ដែល​ធ្វើ​សកម្មភាព​ប្រាសចាក​ពី​ស្មារតី​នៃ​រដ្ឋធម្មនុញ្ញ និង​ច្បាប់​ជា​ធរមាន​នានា​នៃ​ព្រះរាជាណាចក្រ​កម្ពុជា​ឡើយ ខណៈ​ជំហរ​របស់​ខ្លួន គឺ​ធ្វើ​សកម្មភាព​នយោបាយ​ដោយ​គោរព និង​អនុវត្ត​យ៉ាង​ខ្ជាប់ខ្លួន​ស្រប​តាម​ស្មារតី​នៃ​រដ្ឋធម្មនុញ្ញ ច្បាប់​ស្ដីពី​ការ​បោះឆ្នោត ច្បាប់​ស្ដីពី​គណបក្ស​នយោបាយ និង​ច្បាប់​ជា​ធរមាន​នានា​នៃ​ព្រះរាជាណាចក្រ​កម្ពុជា​ដទៃ​ទៀត ព្រមទាំង​លក្ខន្តិកៈ​របស់​គណបក្ស​ដែល​បាន​តម្កល់​នៅ​ក្រសួង​មហាផ្ទៃ​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស